৪. অত্তকামপাৰিচৰিযসিক্খাপদৱণ্ণনা

২৯০. তেন সমযেন বুদ্ধো ভগৱাতি অত্তকামসিক্খাপদং. তত্থ কুলূপকোতি কুলপযিৰুপাসনকো চতুন্নং পচ্চযানং অত্থায কুলূপসঙ্কমনে নিচ্চপ্পযুত্তো.

চীৱৰপিণ্ডপাতসেনাসনগিলানপচ্চযভেসজ্জপৰিক্খাৰন্তি চীৱৰঞ্চ পিণ্ডপাতঞ্চ সেনাসনঞ্চ গিলানপচ্চযভেসজ্জপৰিক্খাৰঞ্চ. গিলানপচ্চযভেসজ্জপৰিক্খাৰন্তি চেত্থ পতিকৰণত্থেন পচ্চযো, যস্স কস্সচি সপ্পাযস্সেতং অধিৱচনং. ভিসক্কস্স কম্মং তেন অনুঞ্ঞাতত্তাতি ভেসজ্জং. গিলানপচ্চযোৱ ভেসজ্জং গিলানপচ্চযভেসজ্জং, যংকিঞ্চি গিলানস্স সপ্পাযং ভিসক্ককম্মং তেলমধুফাণিতাদীতি ৱুত্তং হোতি. পৰিক্খাৰোতি পন ‘‘সত্তহি নগৰপৰিক্খাৰেহি সুপৰিক্খতং হোতী’’তিআদীসু (অ. নি. ৭.৬৭) পৰিৱাৰো ৱুচ্চতি. ‘‘ৰথো সীসপৰিক্খাৰো ঝানক্খো চক্কৱীৰিযো’’তিআদীসু (সং. নি. ৫.৪) অলঙ্কাৰো. ‘‘যে চিমে পব্বজিতেন জীৱিতপৰিক্খাৰা সমুদানেতব্বা’’তিআদীসু (ৰো. নি. ১.১.১৯১) সম্ভাৰো. ইধ পন সম্ভাৰোপি পৰিৱাৰোপি ৱট্টতি. তঞ্হি গিলানপচ্চযভেসজ্জং জীৱিতস্স পৰিৱাৰোপি হোতি জীৱিতৱিনাসকাবাধুপ্পত্তিযা অন্তৰং অদত্ৱা ৰক্খণতো, সম্ভাৰোপি যথা চিৰং পৱত্ততি এৱমস্স কাৰণভাৱতো, তস্মা পৰিক্খাৰোতি ৱুচ্চতি. এৱং গিলানপচ্চযভেসজ্জঞ্চ তং পৰিক্খাৰো চাতি গিলানপচ্চযভেসজ্জপৰিক্খাৰো, তং গিলানপচ্চযভেসজ্জপৰিক্খাৰন্তি এৱমত্থো দট্ঠব্বো.

ৱসলন্তি হীনং লামকং. অথ ৱা ৱস্সতীতি ৱসলো, পগ্ঘৰতীতি অত্থো, তং ৱসলং, অসুচিপগ্ঘৰণকন্তি ৱুত্তং হোতি. নিট্ঠুহিত্ৱাতি খেড়ং পাতেত্ৱা.

কস্সাহং কেন হাযামীতি অহং কস্সা অঞ্ঞিস্সা ইত্থিযা কেন ভোগেন ৱা অলঙ্কাৰেন ৱা ৰূপেন ৱা পৰিহাযামি, কা নাম মযা উত্তৰিতৰাতি দীপেতি.

২৯১. সন্তিকেতি উপচাৰে ঠত্ৱা সামন্তা অৱিদূৰে, পদভাজনেপি অযমেৱঅত্থো দীপিতো. অত্তকামপাৰিচৰিযাযাতি মেথুনধম্মসঙ্খাতেন কামেন পাৰিচৰিযা কামপাৰিচৰিযা. অত্তনো অত্থায কামপাৰিচৰিযা অত্তকামপাৰিচৰিযা, অত্তনা ৱা কামিতা ইচ্ছিতাতি অত্তকামা, সযং মেথুনৰাগৱসেন পত্থিতাতি অত্থো. অত্তকামা চ সা পাৰিচৰিযা চাতি অত্তকামপাৰিচৰিযা, তস্সা অত্তকামপাৰিচৰিযায. ৱণ্ণং ভাসেয্যাতি গুণং আনিসংসং পকাসেয্য.

তত্ৰ যস্মা ‘‘অত্তনো অত্থায কামপাৰিচৰিযা’’তি ইমস্মিং অত্থৱিকপ্পে কামো চেৱ হেতু চ পাৰিচৰিযা চ অত্থো, সেসং ব্যঞ্জনং. ‘‘অত্তকামা চ সা পাৰিচৰিযা চাতি অত্তকামপাৰিচৰিযা’’তি ইমস্মিং অত্থৱিকপ্পে অধিপ্পাযো চেৱ পাৰিচৰিযা চাতি অত্থো, সেসং ব্যঞ্জনং. তস্মা ব্যঞ্জনে আদৰং অকত্ৱা অত্থমত্তমেৱ দস্সেতুং ‘‘অত্তনো কামং অত্তনো হেতুং অত্তনো অধিপ্পাযং অত্তনো পাৰিচৰিয’’ন্তি পদভাজনং ৱুত্তং. ‘‘অত্তনো কামং অত্তনো হেতুং অত্তনো পাৰিচৰিয’’ন্তি হি ৱুত্তে জানিস্সন্তি পণ্ডিতা ‘‘এত্তাৱতা অত্তনো অত্থায কামপাৰিচৰিযা ৱুত্তা’’তি. ‘‘অত্তনো অধিপ্পাযং অত্তনো পাৰিচৰিয’’ন্তি ৱুত্তেপি জানিস্সন্তি ‘‘এত্তাৱতা অত্তনা ইচ্ছিতকামিতট্ঠেন অত্তকামপাৰিচৰিযা ৱুত্তা’’তি.

ইদানি তস্সা অত্তকামপাৰিচৰিযায ৱণ্ণভাসনাকাৰং দস্সেন্তো ‘‘এতদগ্গ’’ন্তিআদিমাহ. তং উদ্দেসতোপি নিদ্দেসতোপি উত্তানত্থমেৱ. অযং পনেত্থ পদসম্বন্ধো চ আপত্তিৱিনিচ্ছযো চ – এতদগ্গং…পে… পৰিচৰেয্যাতি যা মাদিসং সীলৱন্তং কল্যাণধম্মং ব্ৰহ্মচাৰিং এতেন ধম্মেন পৰিচৰেয্য, তস্সা এৱং মাদিসং পৰিচৰন্তিযা যা অযং পাৰিচৰিযা নাম, এতদগ্গং পাৰিচৰিযানন্তি.

মেথুনুপসংহিতেন সঙ্ঘাদিসেসোতি এৱং অত্তকামপাৰিচৰিযায ৱণ্ণং ভাসন্তো চ মেথুনুপসংহিতেন মেথুনধম্মপটিসংযুত্তেনেৱ ৱচনেন যো ভাসেয্য, তস্স সঙ্ঘাদিসেসোতি.

ইধানি যস্মা মেথুনুপসংহিতেনেৱ ভাসন্তস্স সঙ্ঘাদিসেসো ৱুত্তো, তস্মা ‘‘অহম্পি খত্তিযো, ত্ৱম্পি খত্তিযা, অৰহতি খত্তিযা খত্তিযস্স দাতুং সমজাতিকত্তা’’তি এৱমাদীহি ৱচনেহি পাৰিচৰিযায ৱণ্ণং ভাসমানস্সাপি সঙ্ঘাদিসেসো নত্থি. ‘‘অহম্পি খত্তিযো’’তিআদিকে পন বহূপি পৰিযাযে ৱত্ৱা ‘‘অৰহসি ত্ৱং ময্হং মেথুনধম্মং দাতু’’ন্তি এৱং মেথুনপ্পটিসংযুত্তেনেৱ ভাসমানস্স সঙ্ঘাদিসেসোতি.

ইত্থী চ হোতীতিআদি পুব্বে ৱুত্তনযমেৱ. ইধ উদাযিত্থেৰো আদিকম্মিকো, তস্স অনাপত্তি আদিকম্মিকস্সাতি.

সমুট্ঠানাদি সব্বং দুট্ঠুল্লৱাচাসদিসং. ৱিনীতৱত্থূনি উত্তানত্থানেৱাতি.

অত্তকামপাৰিচৰিযসিক্খাপদৱণ্ণনা নিট্ঠিতা.