৩. দুট্ঠুল্লৱাচাসিক্খাপদৱণ্ণনা

২৮৩. তেন সমযেন বুদ্ধো ভগৱাতি দুট্ঠুল্লৱাচাসিক্খাপদং. তত্থ আদিস্সাতি অপদিসিত্ৱা. ৱণ্ণম্পি ভণতীতিআদীনি পৰতো আৱি ভৱিস্সন্তি. ছিন্নিকাতি ছিন্নওত্তপ্পা. ধুত্তিকাতি সঠা. অহিৰিকাযোতি নিল্লজ্জা. উহসন্তীতি সিতং কত্ৱা মন্দহসিতং হসন্তি. উল্লপন্তীতি ‘‘অহো অয্যো’’তিআদিনা নযেন উচ্চকৰণিং নানাৱিধং পলোভনকথং কথেন্তি. উজ্জগ্ঘন্তীতি মহাহসিতং হসন্তি. উপ্পণ্ডেন্তীতি ‘‘পণ্ডকো অযং, নাযং পুৰিসো’’তিআদিনা নযেন পৰিহাসং কৰোন্তি.

২৮৫. সাৰত্তোতি দুট্ঠুল্লৱাচস্সাদৰাগেন সাৰত্তো. অপেক্খৱা পটিবদ্ধচিত্তোতি ৱুত্তনযমেৱ, কেৱলং ইধ ৱাচস্সাদৰাগো যোজেতব্বো. মাতুগামং দুট্ঠুল্লাহি ৱাচাহীতি এত্থ অধিপ্পেতং মাতুগামং দস্সেন্তো ‘‘মাতুগামো’’তিআদিমাহ. তত্থ ৱিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুন্তি যা পণ্ডিতা সাত্থকনিৰত্থককথং অসদ্ধম্মসদ্ধম্মপটিসংযুত্তকথঞ্চ জানিতুং পটিবলা, অযং ইধ অধিপ্পেতা. যা পন মহল্লিকাপি বালা এলমূগা অযং ইধ অনধিপ্পেতাতি দস্সেতি.

ওভাসেয্যাতি অৱভাসেয্য নানাপ্পকাৰকং অসদ্ধম্মৱচনং ৱদেয্য. যস্মা পনেৱং ওভাসন্তস্স যো সো ওভাসো নাম, সো অত্থতো অজ্ঝাচাৰো হোতি ৰাগৱসেন অভিভৱিত্ৱা সঞ্ঞমৱেলং আচাৰো, তস্মা তমত্থং দস্সেন্তো ‘‘ওভাসেয্যাতি অজ্ঝাচাৰো ৱুচ্চতী’’তি আহ. যথা তন্তি এত্থ তন্তি নিপাতমত্তং, যথা যুৱা যুৱতিন্তি অত্থো.

দ্ৱে মগ্গে আদিস্সাতিআদি যেনাকাৰেন ওভাসতো সঙ্ঘাদিসেসো হোতি, তং দস্সেতুং ৱুত্তং. তত্থ দ্ৱে মগ্গেতি ৱচ্চমগ্গঞ্চ পস্সাৱমগ্গঞ্চ. সেসং উদ্দেসে তাৱ পাকটমেৱ. নিদ্দেসে পন থোমেতীতি ‘‘ইত্থিলক্খণেন সুভলক্খণেন সমন্নাগতাসী’’তি ৱদতি, ন তাৱ সীসং এতি. ‘‘তৱ ৱচ্চমগ্গো চ পস্সাৱমগ্গো চ ঈদিসো তেন নাম ঈদিসেন ইত্থিলক্খণেন সুভলক্খণেন সমন্নাগতাসী’’তি ৱদতি, সীসং এতি, সঙ্ঘাদিসেসো. ৱণ্ণেতি পসংসতীতি ইমানি পন থোমনপদস্সেৱ ৱেৱচনানি.

খুংসেতীতি ৱাচাপতোদেন ঘট্টেতি. ৱম্ভেতীতি অপসাদেতি. গৰহতীতি দোসং দেতি. পৰতো পন পাড়িযা আগতেহি ‘‘অনিমিত্তাসী’’তিআদীহি একাদসহি পদেহি অঘটিতে সীসং ন এতি, ঘটিতেপি তেসু সিখৰণীসি সম্ভিন্নাসি উভতোব্যঞ্জনাসীতি ইমেহি তীহি ঘটিতেযেৱ সঙ্ঘাদিসেসো.

দেহি মেতি যাচনাযপি এত্তকেনেৱ সীসং ন এতি, ‘‘মেথুনং ধম্মং দেহী’’তি এৱং মেথুনধম্মেন ঘটিতে এৱ সঙ্ঘাদিসেসো.

কদা তে মাতা পসীদিস্সতীতিআদীসু আযাচনৱচনেসুপি এত্তকেনেৱ সীসং ন এতি, ‘‘কদা তে মাতা পসীদিস্সতি, কদা তে মেথুনং ধম্মং লভিস্সামী’’তি ৱা ‘‘তৱ মাতৰি পসন্নায মেথুনং ধম্মং লভিস্সামী’’তি ৱা আদিনা পন নযেন মেথুনধম্মেন ঘটিতেযেৱ সঙ্ঘাদিসেসো.

কথং ত্ৱং সামিকস্স দেসীতিআদীসু পুচ্ছাৱচনেসুপি মেথুনধম্মন্তি ৱুত্তেযেৱ সঙ্ঘাদিসেসো, ন ইতৰথা. এৱং কিৰ ত্ৱং সামিকস্স দেসীতি পটিপুচ্ছাৱচনেসুপি এসেৱ নযো.

আচিক্খনায পুট্ঠো ভণতীতি ‘‘কথং দদমানা সামিকস্স পিযা হোতী’’তি এৱং পুট্ঠো আচিক্খতি. এত্থ চ ‘‘এৱং দেহি এৱং দদমানা’’তি ৱুত্তেপি সীসং ন এতি. ‘‘মেথুনধম্মং এৱং দেহি এৱং উপনেহি এৱং মেথুনধম্মং দদমানা উপনযমানা পিযা হোতী’’তিআদিনা পন নযেন মেথুনধম্মেন ঘটিতেযেৱ সঙ্ঘাদিসেসো. অনুসাসনীৱচনেসুপি এসেৱ নযো.

অক্কোসনিদ্দেসে – অনিমিত্তাসীতি নিমিত্তৰহিতাসি, কুঞ্চিকপণালিমত্তমেৱ তৱ দকসোতন্তি ৱুত্তং হোতি.

নিমিত্তমত্তাসীতি তৱ ইত্থিনিমিত্তং অপৰিপুণ্ণং সঞ্ঞামত্তমেৱাতি ৱুত্তং হোতি. অলোহিতাতি সুক্খসোতা. ধুৱলোহিতাতি নিচ্চলোহিতা কিলিন্নদকসোতা. ধুৱচোড়াতি নিচ্চপক্খিত্তাণিচোড়া, সদা আণিচোড়কং সেৱসীতি ৱুত্তং হোতি. পগ্ঘৰন্তীতি সৱন্তী; সদা তে মুত্তং সৱতীতি ৱুত্তং হোতি. সিখৰণীতি বহিনিক্খন্তআণিমংসা. ইত্থিপণ্ডকাতি অনিমিত্তাৱ ৱুচ্চতি. ৱেপুৰিসিকাতি সমস্সুদাঠিকা পুৰিসৰূপা ইত্থী. সম্ভিন্নাতি সম্ভিন্নৱচ্চমগ্গপস্সাৱমগ্গা. উভতোব্যঞ্জনাতি ইত্থিনিমিত্তেন চ পুৰিসনিমিত্তেন চাতি উভোহি ব্যঞ্জনেহি সমন্নাগতা.

ইমেসু চ পন একাদসসু পদেসু সিখৰণীসি সম্ভিন্নাসি উভতোব্যঞ্জনাসীতি ইমানিযেৱ তীণি পদানি সুদ্ধানি সীসং এন্তি. ইতি ইমানি চ তীণি পুৰিমানি চ ৱচ্চমগ্গপস্সাৱমগ্গমেথুনধম্মপদানি তীণীতি ছ পদানি সুদ্ধানি আপত্তিকৰানি. সেসানি অনিমিত্তাতিআদীনি ‘‘অনিমিত্তে মেথুনধম্মং মে দেহী’’তি ৱা ‘‘অনিমিত্তাসি মেথুনধম্মং মে দেহী’’তি ৱা আদিনা নযেন মেথুনধম্মেন ঘটিতানেৱ আপত্তিকৰানি হোন্তীতি ৱেদিতব্বানি.

২৮৬. ইদানি য্ৱাযং ওতিণ্ণো ৱিপৰিণতেন চিত্তেন ওভাসতি, তস্স ৱচ্চমগ্গপস্সাৱমগ্গে আদিস্স এতেসং ৱণ্ণভণনাদীনং ৱসেন ৱিত্থাৰতো আপত্তিভেদং দস্সেন্তো ‘‘ইত্থী চ হোতি ইত্থিসঞ্ঞী’’তিআদিমাহ. তেসং অত্থো কাযসংসগ্গে ৱুত্তনযেনেৱ ৱেদিতব্বো.

অযং পন ৱিসেসো – অধক্খকন্তি অক্খকতো পট্ঠায অধো. উব্ভজাণুমণ্ডল জাণুমণ্ডলতো পট্ঠায উদ্ধং. উব্ভক্খকন্তি অক্খকতো পট্ঠায উদ্ধং. অধো জাণুমণ্ডলন্তি জাণুমণ্ডলতো পট্ঠায অধো. অক্খকং পন জাণুমণ্ডলঞ্চ এত্থেৱ দুক্কটক্খেত্তে সঙ্গহং গচ্ছন্তি ভিক্খুনিযা কাযসংসগ্গে ৱিয. ন হি বুদ্ধা গৰুকাপত্তিং সাৱসেসং পঞ্ঞপেন্তীতি. কাযপ্পটিবদ্ধন্তি ৱত্থং ৱা পুপ্ফং ৱা আভৰণং ৱা.

২৮৭. অত্থপুৰেক্খাৰস্সাতি অনিমিত্তাতিআদীনং পদানং অত্থং কথেন্তস্স, অট্ঠকথং ৱা সজ্ঝাযং কৰোন্তস্স.

ধম্মপুৰেক্খাৰস্সাতি পাড়িং ৱাচেন্তস্স ৱা সজ্ঝাযন্তস্স ৱা. এৱং অত্থঞ্চ ধম্মঞ্চ পুৰক্খত্ৱা ভণন্তস্স অত্থপুৰেক্খাৰস্স চ ধম্মপুৰেক্খাৰস্স চ অনাপত্তি.

অনুসাসনিপুৰেক্খাৰস্সাতি ‘‘ইদানিপি অনিমিত্তাসি উভত্তোব্যঞ্জনাসি অপ্পমাদং ইদানি কৰেয্যাসি, যথা আযতিম্পি এৱৰূপা ন হোহিসী’’তি এৱং অনুসিট্ঠিং পুৰক্খত্ৱা ভণন্তস্স অনুসাসনিপুৰেক্খাৰস্স অনাপত্তি. যো পন ভিক্খুনীনং পাড়িং ৱাচেন্তো পকতিৱাচনামগ্গং পহায হসন্তো হসন্তো ‘‘সিখৰণীসি সম্ভিন্নাসি উভতোব্যঞ্জনাসী’’তি পুনপ্পুনং ভণতি, তস্স আপত্তিযেৱ. উম্মত্তকস্স অনাপত্তি. ইধ আদিকম্মিকো উদাযিত্থেৰো, তস্স অনাপত্তি আদিকম্মিকস্সাতি.

পদভাজনীযৱণ্ণনা নিট্ঠিতা.

সমুট্ঠানাদীসু ইদং সিক্খাপদং তিসমুট্ঠানং কাযচিত্ততো ৱাচাচিত্ততো কাযৱাচাচিত্ততো চ সমুট্ঠাতি, কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দ্ৱিৱেদনন্তি.

২৮৮. ৱিনীতৱত্থূসু লোহিতৱত্থুস্মিং সো ভিক্খু ইত্থিযা লোহিতকং নিমিত্তং সন্ধাযাহ – ইতৰা ন অঞ্ঞাসি, তস্মা দুক্কটং.

কক্কসলোমন্তি ৰস্সলোমেহি বহুলোমং. আকিণ্ণলোমন্তি জটিতলোমং. খৰলোমন্তি থদ্ধলোমং. দীঘলোমন্তি অৰস্সলোমং. সব্বং ইত্থিনিমিত্তমেৱ সন্ধায ৱুত্তং.

২৮৯. ৱাপিতং খো তেতি অসদ্ধম্মং সন্ধাযাহ, সা অসল্লক্খেত্ৱা নো চ খো পটিৱুত্তন্তি আহ. পটিৱুত্তং নাম উদকৱপ্পে বীজেহি অপ্পতিট্ঠিতোকাসে পাণকেহি ৱিনাসিতবীজে ৱা ওকাসে পুন বীজং পতিট্ঠাপেত্ৱা উদকেন আসিত্তং, থলৱপ্পে ৱিসমপতিতানং ৱা বীজানং সমকৰণত্থায পুন অট্ঠদন্তকেন সমীকতং, তেসু অঞ্ঞতৰং সন্ধায এসা আহ.

মগ্গৱত্থুস্মিং মগ্গো সংসীদতীতি অঙ্গজাতমগ্গং সন্ধাযাহ. সেসং উত্তানমেৱাতি.

দুট্ঠুল্লৱাচাসিক্খাপদৱণ্ণনা নিট্ঠিতা.