৫. সঙ্গাৰৱসুত্তৱণ্ণনা

২৩৬. পঞ্চমে পগেৱাতি পঠমঞ্ঞেৱ. কামৰাগপৰিযুট্ঠিতেনাতি কামৰাগগহিতেন. কামৰাগপৰেতেনাতি কামৰাগানুগতেন. নিস্সৰণন্তি তিৱিধং কামৰাগস্স নিস্সৰণং ৱিক্খম্ভননিস্সৰণং তদঙ্গনিস্সৰণং সমুচ্ছেদনিস্সৰণন্তি. তত্থ অসুভে পঠমজ্ঝানং ৱিক্খম্ভননিস্সৰণং নাম, ৱিপস্সনা তদঙ্গনিস্সৰণং নাম, অৰহত্তমগ্গো সমুচ্ছেদনিস্সৰণং নাম. তং তিৱিধম্পি নপ্পজানাতীতি অত্থো. অত্তত্থম্পীতিআদীসু অৰহত্তসঙ্খাতো অত্তনো অত্থো অত্তত্থো নাম, পচ্চযদাযকানং অত্থো পৰত্থো নাম, স্ৱেৱ দুৱিধোপি উভযত্থো নাম. ইমিনা নযেন সব্বৱাৰেসু অত্থো ৱেদিতব্বো.

অযং পন ৱিসেসো – ব্যাপাদস্স নিস্সৰণন্তিআদীসু হি দ্ৱেৱ নিস্সৰণানি ৱিক্খম্ভননিস্সৰণঞ্চ সমুচ্ছেদনিস্সৰণঞ্চ. তত্থ ব্যাপাদস্স তাৱ মেত্তায পঠমজ্ঝানং ৱিক্খম্ভননিস্সৰণং, অনাগামিমগ্গো সমুচ্ছেদনিস্সৰণং. থিনমিদ্ধস্স আলোকসঞ্ঞা ৱিক্খম্ভননিস্সৰণং, অৰহত্তমগ্গো সমুচ্ছেদনিস্সৰণং. উদ্ধচ্চকুক্কুচ্চস্স যো কোচি সমথো ৱিক্খম্ভননিস্সৰণং, উদ্ধচ্চস্স পনেত্থ অৰহত্তমগ্গো, কুক্কুচ্চস্স অনাগামিমগ্গো সমুচ্ছেদনিস্সৰণং. ৱিচিকিচ্ছায ধম্মৱৱত্থানং ৱিক্খম্ভননিস্সৰণং, পঠমমগ্গো সমুচ্ছেদনিস্সৰণং.

যা পনেত্থ সেয্যথাপি ব্ৰাহ্মণ উদপত্তো সংসট্ঠো লাখায ৱাতিআদিকা উপমা ৱুত্তা, তাসু উদপত্তোতি উদকভৰিতা পাতি. সংসট্ঠোতি ৱণ্ণভেদকৰণৱসেন সংসট্ঠো. পক্কুথিতোতি কুথিতো. উস্মুদকজাতোতি উসুমজাতো. সেৱালপণকপৰিযোনদ্ধোতি তিলবীজকাদিভেদেন সেৱালেন ৱা নীলমণ্ডূকপিট্ঠিৱণ্ণেন ৱা উদকপিট্ঠিং ছাদেত্ৱা নিব্বত্তপণকেন পৰিযোনদ্ধো. ৱাতেৰিতোতি ৱাতেন এৰিতো কম্পিতো. আৱিলোতি অপ্পসন্নো. লুড়িতোতি অসন্নিসিন্নো. কললীভূতোতি কদ্দমীভূতো. অন্ধকাৰে নিক্খিত্তোতি কোট্ঠন্তৰাদিভেদে অনালোকট্ঠানে ঠপিতো. ইমস্মিং সুত্তে ভগৱা তীহি ভৱেহি দেসনং নিৱত্তেত্ৱা অৰহত্তনিকূটেন দেসনং নিট্ঠাপেসি, ব্ৰাহ্মণো পন সৰণমত্তে পতিট্ঠিতো.