৭. দুক্খধম্মসুত্তৱণ্ণনা

২৪৪. সত্তমে দুক্খধম্মানন্তি দুক্খসম্ভৱধম্মানং. পঞ্চসু হি খন্ধেসু সতি ছেদনৱধবন্ধনাদিভেদং দুক্খং সম্ভৱতি, তস্মা তে দুক্খসম্ভৱধম্মত্তা দুক্খধম্মাতি ৱুচ্চন্তি. তথা খো পনস্সাতি তেনাকাৰেনস্স. যথাস্স কামে পস্সতোতি যেনাকাৰেনস্স কামে পস্সন্তস্স. যথা চৰন্তন্তি যেনাকাৰেন চাৰঞ্চ ৱিহাৰঞ্চ অনুবন্ধিত্ৱা চৰন্তং. অঙ্গাৰকাসূপমা কামা দিট্ঠা হোন্তীতি পৰিযেট্ঠিমূলকস্স চেৱ পটিসন্ধিমূলকস্স চ দুক্খস্স ৱসেন অঙ্গাৰকাসু ৱিয মহাপৰিড়াহাতি দিট্ঠা হোন্তি. কামে পৰিযেসন্তানঞ্হি নাৱায মহাসমুদ্দোগাহনঅজপথসঙ্কুপথপটিপজ্জনউভতোব্যূড়্হসঙ্গামপক্খন্দনাদিৱসেন পৰিযেট্ঠিমূলকম্পি, কামে পৰিভুঞ্জন্তানং কামপৰিভোগচেতনায চতূসু অপাযেসু দিন্নপটিসন্ধিমূলকম্পি মহাপৰিড়াহদুক্খং উপ্পজ্জতি. এৱমেতস্স দুৱিধস্সাপি দুক্খস্স ৱসেন অঙ্গাৰকাসু ৱিয মহাপৰিড়াহাতি দিট্ঠা হোন্তি.

দাযন্তি অটৱিং. পুৰতোপি কণ্টকোতি পুৰিমপস্সে ৱিজ্ঝিতুকামো ৱিয আসন্নট্ঠানেযেৱ ঠিতকণ্টকো. পচ্ছতোতিআদীসুপি এসেৱ নযো. হেট্ঠা পন পাদেহি অক্কন্তট্ঠানস্স সন্তিকে, ন অক্কন্তট্ঠানেযেৱ. এৱং সো কণ্টকগব্ভং পৱিট্ঠো ৱিয ভৱেয্য. মা মং কণ্টকোতি মা মং কণ্টকো ৱিজ্ঝীতি কণ্টকৱেধং ৰক্খমানো.

দন্ধো, ভিক্খৱে, সতুপ্পাদোতি সতিযা উপ্পাদোযেৱ দন্ধো, উপ্পন্নমত্তায পন তায কাচি কিলেসা নিগ্গহিতাৱ হোন্তি, ন সণ্ঠাতুং সক্কোন্তি. চক্খুদ্ৱাৰস্মিঞ্হি ৰাগাদীসু উপ্পন্নেসু দুতিযজৱনৱাৰেন ‘‘কিলেসা মে উপ্পন্না’’তি ঞত্ৱা ততিযে জৱনৱাৰে সংৱৰজৱনংযেৱ জৱতি. অনচ্ছৰিযঞ্চেতং, যং ৱিপস্সকো ততিযজৱনৱাৰে কিলেসে নিগ্গণ্হেয্য. চক্খুদ্ৱাৰে পন ইট্ঠাৰম্মণে আপাথগতে ভৱঙ্গং আৱট্টেত্ৱা আৱজ্জনাদীসু উপ্পন্নেসু ৱোট্ঠব্বনানন্তৰং সম্পত্তকিলেসজৱনৱাৰং নিৱত্তেত্ৱা কুসলমেৱ উপ্পাদেতি. আৰদ্ধৱিপস্সকানঞ্হি অযমানিসংসো ভাৱনাপটিসঙ্খানে পতিট্ঠিতভাৱস্স.

অভিহট্ঠুং পৱাৰেয্যুন্তি সুদিন্নত্থেৰস্স ৱিয ৰট্ঠপালকুলপুত্তস্স ৱিয চ কাযেন ৱা সত্ত ৰতনানি অভিহৰিত্ৱা ৱাচায ৱা ‘‘অম্হাকং ধনতো যত্তকং ইচ্ছসি, তত্তকং গণ্হা’’তি ৱদন্তা পৱাৰেয্যুং. অনুদহন্তীতি সৰীৰে পলিৱেঠিতত্তা উণ্হপৰিড়াহং জনেত্ৱা অনুদহন্তি. সঞ্জাতসেদে ৱা সৰীৰে লগ্গন্তা অনুসেন্তীতিপি অত্থো. যঞ্হি তং, ভিক্খৱে, চিত্তন্তি ইদং যস্মা চিত্তে অনাৱট্টন্তে পুগ্গলস্স আৱট্টনং নাম নত্থি. এৱৰূপঞ্হি চিত্তং অনাৱট্টন্তি, তস্মা ৱুত্তং. ইতি ইমস্মিং সুত্তে ৱিপস্সনাবলমেৱ দীপিতং.