১. অদন্তঅগুত্তৱণ্ণনা

৯৪. সড়ৱগ্গস্স পঠমে অদন্তাতি অদমিতা. অগুত্তাতি অগোপিতা. অৰক্খিতাতি ন ৰক্খিতা. অসংৱুতাতি অপিহিতা. দুক্খাধিৱাহা হোন্তীতি নেৰযিকাদিভেদং অধিকদুক্খং আৱহনকা হোন্তি. সুখাধিৱাহা হোন্তীতি ঝানমগ্গফলপভেদং অধিকসুখং আৱহনকা হোন্তি. অধিৱহাতিপি পাঠো, এসেৱত্থো.

সড়েৱাতি ছ এৱ. অসংৱুতো যত্থ দুক্খং নিগচ্ছতীতি যেসু আযতনেসু সংৱৰৱিৰহিতো দুক্খং পাপুণাতি. তেসঞ্চ যে সংৱৰণং অৱেদিসুন্তি যে তেসং আযতনানং সংৱৰং ৱিন্দিংসু পটিলভিংসু. ৱিহৰন্তানৱস্সুতাতি ৱিহৰন্তি অনৱস্সুতা অতিন্তা.

অসাদিতঞ্চ সাদুন্তি অস্সাদৱন্তঞ্চ মধুৰঞ্চ. ফস্সদ্ৱযং সুখদুক্খে উপেক্খেতি সুখফস্সঞ্চ দুক্খফস্সঞ্চাতি ইদং ফস্সদ্ৱযং উপেক্খে, উপেক্খামেৱেত্থ উপ্পাদেয্যাতি অত্থো. ফস্সদ্ৱযং সুখদুক্খং উপেক্খোতি ৱা পাঠো, ফস্সহেতুকং সুখদুক্খং উপেক্খো, সুখে অনুৰোধং দুক্খে চ ৱিৰোধং অনুপ্পাদেন্তো উপেক্খকো ভৱেয্যাতিপি অত্থো. অনানুৰুদ্ধো অৱিৰুদ্ধো কেনচীতি কেনচি সদ্ধিং নেৱ অনুৰুদ্ধো ন ৱিৰুদ্ধো ভৱেয্য.

পপঞ্চসঞ্ঞাতি কিলেসসঞ্ঞায পপঞ্চসঞ্ঞা নাম হুত্ৱা. ইতৰীতৰা নৰাতি লামকসত্তা পপঞ্চযন্তা উপযন্তীতি পপঞ্চযমানা ৱট্টং উপগচ্ছন্তি. সঞ্ঞিনোতি সসঞ্ঞা সত্তা. মনোমযং গেহসিতঞ্চ সব্বন্তি সব্বমেৱ পঞ্চকামগুণগেহনিস্সিতং মনোমযং ৱিতক্কং. পনুজ্জাতি পনুদিত্ৱা নীহৰিত্ৱা. নেক্খম্মসিতং ইৰীযতীতি দব্বজাতিকো ভিক্খু নেক্খম্মসিতং ইৰিযেন ইৰীযতি.

ছস্সু যদা সুভাৱিতোতি ছসু আৰম্মণেসু যদা সুট্ঠু ভাৱিতো. ফুট্ঠস্স চিত্তং ন ৱিকম্পতে ক্ৱচীতি সুখফস্সেন ৱা দুক্খফস্সেন ৱা ফুট্ঠস্স কিস্মিঞ্চি চিত্তং ন কম্পতি ন ৱেধতি. ভৱত্থ জাতিমৰণস্স পাৰগাতি জাতিমৰণানং পাৰং নিব্বানং গমকা হোথ.