২. সমিদ্ধিসুত্তৱণ্ণনা

১৫৮. দুতিযে লাভা ৱত মে, সুলদ্ধং ৱত মেতি এৱৰূপস্স সত্থু চেৱ ধম্মস্স চ সব্ৰহ্মচাৰীনঞ্চ লদ্ধত্তা ময্হং লাভা ময্হং সুলদ্ধন্তি. সো কিৰাযস্মা পচ্ছা মূলকম্মট্ঠানং সম্মসিত্ৱা ‘‘অৰহত্তং গহেস্সামী’’তি পাসাদিকং তাৱ কম্মট্ঠানং গহেত্ৱা বুদ্ধধম্মসঙ্ঘগুণে আৱজ্জেত্ৱা চিত্তকল্লতং উপ্পাদেত্ৱা চিত্তং হাসেত্ৱা তোসেত্ৱা নিসিন্নো. তেনস্স এৱমহোসি. উপসঙ্কমীতি ‘‘অযং সমিদ্ধি ভিক্খু পাসাদিকং কম্মট্ঠানং গহেত্ৱা নিসিন্নসদিসো, যাৱ মূলকম্মট্ঠানং গহেত্ৱা অৰহত্তং ন গণ্হাতি, তাৱস্স অন্তৰাযং কৰিস্সামী’’তি উপসঙ্কমি. গচ্ছ ত্ৱন্তি সত্থা সকলজম্বুদীপং ওলোকেন্তো ‘‘তস্মিংযেৱ ঠানে তস্স কম্মট্ঠানং সপ্পাযং ভৱিস্সতী’’তি অদ্দস, তস্মা এৱমাহ. সতিপঞ্ঞা চ মে বুদ্ধাতি মযা সতি চ পঞ্ঞা চ ঞাতা. কৰস্সু ৰূপানীতি বহূনিপি ৱিভিংসকাৰহানি ৰূপানি কৰস্সু. নেৱ মং ব্যাধযিস্সসীতি মং নেৱ ৱেধযিস্সসি ন কম্পস্সেসি. দুতিযং.