১. সম্বহুলসুত্তৱণ্ণনা

১৫৭. ততিযৱগ্গস্স পঠমে জটণ্ডুৱেনাতি জটাচুম্বটকেন. অজিনক্খিপনিৱত্থোতি সখুৰং অজিনচম্মং একং নিৱত্থো একং পাৰুতো. উদুম্বৰদণ্ডন্তি অপ্পিচ্ছভাৱপ্পকাসনত্থং ঈসকং ৱঙ্কং উদুম্বৰদণ্ডং গহেত্ৱা. এতদৱোচাতি লোকে ব্ৰাহ্মণস্স ৱচনং নাম সুস্সূসন্তি, ব্ৰাহ্মণেসুপি পব্বজিতস্স, পব্বজিতেসুপি মহল্লকস্সাতি মহল্লকব্ৰাহ্মণস্স পব্বজিতৱেসং গহেত্ৱা পধানভূমিযং কম্মং কৰোন্তে তে ভিক্খূ উপসঙ্কমিত্ৱা হত্থং উক্খিপিত্ৱা এতং ‘‘দহৰা ভৱন্তো’’তিআদিৱচনং অৱোচ. ওকম্পেত্ৱাতি হনুকেন উৰং পহৰন্তো অধোনতং কত্ৱা. জিৱ্হং নিল্লালেত্ৱাতি কবৰমহাজিৱ্হং নীহৰিত্ৱা উদ্ধমধো উভযপস্সেসু চ লালেত্ৱা. তিৱিসাখন্তি তিসাখং. নলাটিকন্তি ভকুটিং, নলাটে উট্ঠিতং ৱলিত্তযন্তি অত্থো. পক্কামীতি তুম্হে জানন্তানং ৱচনং অকত্ৱা অত্তনোৱ তেলে পচ্চিস্সথাতি ৱত্ৱা একং মগ্গং গহেত্ৱা গতো. পঠমং.