৯. পিণ্ডপাতপাৰিসুদ্ধিসুত্তৱণ্ণনা

৪৩৮. এৱং মে সুতন্তি পিণ্ডপাতপাৰিসুদ্ধিসুত্তং. তত্থ পটিসল্লানাতি ফলসমাপত্তিতো.

ৱিপ্পসন্নানীতি ওকাসৱসেনেতং ৱুত্তং. ফলসমাপত্তিতো হি ৱুট্ঠিতস্স পঞ্চহি পসাদেহি পতিট্ঠিতোকাসো ৱিপ্পসন্নো হোতি, ছৱিৱণ্ণো পৰিসুদ্ধো. তস্মা এৱমাহ. সুঞ্ঞতৱিহাৰেনাতি সুঞ্ঞতফলসমাপত্তিৱিহাৰেন. মহাপুৰিসৱিহাৰোতি বুদ্ধপচ্চেকবুদ্ধতথাগতমহাসাৱকানং মহাপুৰিসানং ৱিহাৰো. যেন চাহং মগ্গেনাতিআদীসু ৱিহাৰতো পট্ঠায যাৱ গামস্স ইন্দখীলা এস পৱিট্ঠমগ্গো নাম, অন্তোগামং পৱিসিত্ৱা গেহপটিপাটিযা চৰিত্ৱা যাৱ নগৰদ্ৱাৰেন নিক্খমনা এস চৰিতব্বপদেসো নাম, বহি ইন্দখীলতো পট্ঠায যাৱ ৱিহাৰা এস পটিক্কন্তমগ্গো নাম. পটিঘং ৱাপি চেতসোতি চিত্তে পটিহঞ্ঞনকিলেসজাতং কিঞ্চি অত্থি নত্থীতি. অহোৰত্তানুসিক্খিনাতি দিৱসঞ্চ ৰত্তিঞ্চ অনুসিক্খন্তেন.

৪৪০. পহীনা নু খো মে পঞ্চ কামগুণাতিআদীসু একভিক্খুস্স পচ্চৱেক্খণা নানা, নানাভিক্খূনং পচ্চৱেক্খণা নানাতি. কথং? একো হি ভিক্খু পচ্ছাভত্তং পিণ্ডপাতপটিক্কন্তো পত্তচীৱৰং পটিসামেত্ৱা ৱিৱিত্তোকাসে নিসিন্নো পচ্চৱেক্খতি ‘‘পহীনা নু খো মে পঞ্চকামগুণা’’তি. সো ‘‘অপ্পহীনা’’তি ঞত্ৱা ৱীৰিযং পগ্গয্হ অনাগামিমগ্গেন পঞ্চকামগুণিকৰাগং সমুগ্ঘাটেত্ৱা মগ্গানন্তৰং ফলং ফলানন্তৰং মগ্গং ততো ৱুট্ঠায পচ্চৱেক্খন্তো ‘‘পহীনা’’তি পজানাতি. নীৱৰণাদীসুপি এসেৱ নযো. এতেসং পন অৰহত্তমগ্গেন পহানাদীনি হোন্তি, এৱং একভিক্খুস্স নানাপচ্চৱেক্খণা হোতি. এতাসু পন পচ্চৱেক্খণাসু অঞ্ঞো ভিক্খু একং পচ্চৱেক্খণং পচ্চৱেক্খতি, অঞ্ঞো একন্তি এৱং নানাভিক্খূনং নানাপচ্চৱেক্খণা হোতি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

পিণ্ডপাতপাৰিসুদ্ধিসুত্তৱণ্ণনা নিট্ঠিতা.