৭. মহাসড়াযতনিকসুত্তৱণ্ণনা

৪২৮. এৱং মে সুতন্তি মহাসড়াযতনিকসুত্তং. তত্থ মহাসড়াযতনিকন্তি মহন্তানং ছন্নং আযতনানং জোতকং ধম্মপৰিযাযং.

৪২৯. অজানন্তি সহৱিপস্সনেন মগ্গেন অজানন্তো. উপচযং গচ্ছন্তীতি ৱুড্ঢিং গচ্ছন্তি, ৱসিভাৱং গচ্ছন্তীতি অত্থো. কাযিকাতি পঞ্চদ্ৱাৰিকদৰথা. চেতসিকাতি মনোদ্ৱাৰিকদৰথা. সন্তাপাদীসুপি এসেৱ নযো.

৪৩০. কাযসুখন্তি পঞ্চদ্ৱাৰিকসুখং. চেতোসুখন্তি মনোদ্ৱাৰিকসুখং. এত্থ চ পঞ্চদ্ৱাৰিকজৱনেন সমাপজ্জনং ৱা ৱুট্ঠানং ৱা নত্থি, উপ্পন্নমত্তকমেৱ হোতি. মনোদ্ৱাৰিকেন সব্বং হোতি. অযঞ্চ মগ্গৱুট্ঠানস্স পচ্চযভূতা বলৱৱিপস্সনা, সাপি মনোদ্ৱাৰিকেনেৱ হোতি.

৪৩১. তথাভূতস্সাতি কুসলচিত্তসম্পযুত্তচেতোসুখসমঙ্গীভূতস্স. পুব্বেৱ খো পনস্সাতি অস্স ভিক্খুনো ৱাচাকম্মন্তাজীৱা পুব্বসুদ্ধিকা নাম আদিতো পট্ঠায পৰিসুদ্ধাৱ হোন্তি. দিট্ঠিসঙ্কপ্পৱাযামসতিসমাধিসঙ্খাতানি পন পঞ্চঙ্গানি সব্বত্থককাৰাপকঙ্গানি নাম. এৱং লোকুত্তৰমগ্গো অট্ঠঙ্গিকো ৱা সত্তঙ্গিকো ৱা হোতি.

ৱিতণ্ডৱাদী পন ‘‘যা যথাভূতস্স দিট্ঠী’’তি ইমমেৱ সুত্তপদেসং গহেত্ৱা ‘‘লোকুত্তৰমগ্গো পঞ্চঙ্গিকো’’তি ৱদতি. সো – ‘‘এৱমস্সাযং অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতী’’তি ইমিনা অনন্তৰৱচনেনেৱ পটিসেধিতব্বো. উত্তৰি চ এৱং সঞ্ঞাপেতব্বো – লোকুত্তৰমগ্গো পঞ্চঙ্গিকো নাম নত্থি, ইমানি পন পঞ্চ সব্বত্থককাৰাপকঙ্গানি মগ্গক্খণে ৱিৰতিৱসেন পূৰেন্তি. ‘‘যা চতূহি ৱচীদুচ্চৰিতেহি আৰতি ৱিৰতী’’তি এৱং ৱুত্তৱিৰতীসু হি মিচ্ছাৱাচং পজহতি, সম্মাৱাচং ভাৱেতি, এৱং সম্মাৱাচং ভাৱেন্তস্স ইমানি পঞ্চঙ্গিকানি ন ৱিনা, সহেৱ ৱিৰতিযা পূৰেন্তি. সম্মাকম্মন্তাজীৱেসুপি এসেৱ নযো. ইতি ৱচীকম্মাদীনি আদিতো পট্ঠায পৰিসুদ্ধানেৱ ৱট্টন্তি. ইমানি পন পঞ্চ সব্বত্থককাৰাপকঙ্গানি ৱিৰতিৱসেন পৰিপূৰেন্তীতি পঞ্চঙ্গিকো মগ্গো নাম নত্থি. সুভদ্দসুত্তেপি (দী. নি. ২.২১৪) চেতং ৱুত্তং – ‘‘যস্মিং খো, সুভদ্দ, ধম্মৱিনযে অৰিযো অট্ঠঙ্গিকো মগ্গো’’তি. অঞ্ঞেসু চ অনেকেসু সুত্তসতেসু অট্ঠঙ্গিকোৱ মগ্গো আগতোতি.

৪৩৩. চত্তাৰোপি সতিপট্ঠানাতি মগ্গসম্পযুত্তাৱ চত্তাৰো সতিপট্ঠানা. সম্মপ্পধানাদীসুপি এসেৱ নযো. যুগনন্ধাতি একক্খণিকযুগনন্ধা. এতেহি অঞ্ঞস্মিং খণে সমাপত্তি, অঞ্ঞস্মিং ৱিপস্সনাতি. এৱং নানাখণিকাপি হোন্তি, অৰিযমগ্গে পন একক্খণিকা.

ৱিজ্জা চ ৱিমুত্তি চাতি অৰহত্তমগ্গৱিজ্জা চ ফলৱিমুত্তি চ. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

মহাসড়াযতনিকসুত্তৱণ্ণনা নিট্ঠিতা.