৬. ছছক্কসুত্তৱণ্ণনা

৪২০. এৱং মে সুতন্তি ছছক্কসুত্তং. তত্থ আদিকল্যাণন্তিআদিম্হি কল্যাণং ভদ্দকং নিদ্দোসং কত্ৱা দেসেস্সামি. মজ্ঝপৰিযোসানেসুপি এসেৱ নযো. ইতি ভগৱা অৰিযৱংসং নৱহি, মহাসতিপট্ঠানং সত্তহি, মহাঅস্সপুৰং সত্তহিযেৱ পদেহি থোমেসি. ইদং পন সুত্তং নৱহি পদেহি থোমেসি.

ৱেদিতব্বানীতি সহৱিপস্সনেন মগ্গেন জানিতব্বানি. মনাযতনেন তেভূমকচিত্তমেৱ কথিতং, ধম্মাযতনেন বহিদ্ধা তেভূমকধম্মা চ, মনোৱিঞ্ঞাণেন ঠপেত্ৱা দ্ৱে পঞ্চৱিঞ্ঞাণানি সেসং বাৱীসতিৱিধং লোকিযৱিপাকচিত্তং. ফস্সৱেদনা যথাৱুত্তৱিপাকৱিঞ্ঞাণসম্পযুত্তাৱ. তণ্হাতি ৱিপাকৱেদনাপচ্চযা জৱনক্খণে উপ্পন্নতণ্হা.

৪২২. চক্খু অত্তাতি পাটিযেক্কো অনুসন্ধি. হেট্ঠা কথিতানঞ্হি দ্ৱিন্নং সচ্চানং অনত্তভাৱদস্সনত্থং অযং দেসনা আৰদ্ধা. তত্থ ন উপপজ্জতীতি ন যুজ্জতি. ৱেতীতি ৱিগচ্ছতি নিৰুজ্ঝতি.

৪২৪. অযং খো পন, ভিক্খৱেতি অযম্পি পাটিযেক্কো অনুসন্ধি. অযঞ্হি দেসনা তিণ্ণং গাহানং ৱসেন ৱট্টং দস্সেতুং আৰদ্ধা. দুক্খং সমুদযোতি দ্ৱিন্নং সচ্চানং ৱসেন ৱট্টং দস্সেতুন্তিপি ৱদন্তিযেৱ. এতং মমাতিআদীসু তণ্হামানদিট্ঠিগাহাৱ ৱেদিতব্বা. সমনুপস্সতীতি গাহত্তযৱসেন পস্সতি.

এৱং ৱট্টং দস্সেত্ৱা ইদানি তিণ্ণং গাহানং পটিপক্খৱসেন, নিৰোধো মগ্গোতি ইমেসং ৱা দ্ৱিন্নং সচ্চানং ৱসেন ৱিৱট্টং দস্সেতুং অযং খো পনাতিআদিমাহ. নেতং মমাতিআদীনি তণ্হাদীনং পটিসেধৱচনানি. সমনুপস্সতীতি অনিচ্চং দুক্খমনত্তাতি পস্সতি.

৪২৫. এৱং ৱিৱট্টং দস্সেত্ৱা ইদানি তিণ্ণং অনুসযানং ৱসেন পুন ৱট্টং দস্সেতুং চক্খুঞ্চ, ভিক্খৱেতিআদিমাহ. তত্থ অভিনন্দতীতিআদীনি তণ্হাদিট্ঠিৱসেনেৱ ৱুত্তানি. অনুসেতীতি অপ্পহীনো হোতি. দুক্খস্সাতি ৱট্টদুক্খকিলেসদুক্খস্স.

৪২৬. এৱং তিণ্ণং অনুসযানং ৱসেন ৱট্টং কথেত্ৱা ইদানি তেসং পটিক্খেপৱসেন ৱিৱট্টং দস্সেন্তো পুন চক্খুঞ্চাতিআদিমাহ. অৱিজ্জং পহাযাতি ৱট্টমূলিকং অৱিজ্জং পজহিত্ৱা. ৱিজ্জন্তি অৰহত্তমগ্গৱিজ্জং উপ্পাদেত্ৱা.

৪২৭. ঠানমেতং ৱিজ্জতীতি এত্তকেনেৱ কথামগ্গেন ৱট্টৱিৱট্টৱসেন দেসনং মত্থকং পাপেত্ৱা পুন তদেৱ সম্পিণ্ডেত্ৱা দস্সেন্তো এৱং পস্সং, ভিক্খৱেতিআদিমাহ. সট্ঠিমত্তানং ভিক্খূনন্তি এত্থ অনচ্ছৰিযমেতং, যং সযমেৱ তথাগতে দেসেন্তে সট্ঠি ভিক্খূ অৰহত্তং পত্তা. ইমঞ্হি সুত্তং ধম্মসেনাপতিম্হি কথেন্তেপি সট্ঠি ভিক্খূ অৰহত্তং পত্তা, মহামোগ্গল্লানে কথেন্তেপি, অসীতিমহাথেৰেসু কথেন্তেসুপি পত্তা এৱ. এতম্পি অনচ্ছৰিযং. মহাভিঞ্ঞপ্পত্তা হি তে সাৱকা.

অপৰভাগে পন তম্বপণ্ণিদীপে মালেয্যদেৱত্থেৰো নাম হেট্ঠা লোহপাসাদে ইদং সুত্তং কথেসি. তদাপি সট্ঠি ভিক্খূ অৰহত্তং পত্তা. যথা চ লোহপাসাদে, এৱং থেৰো মহামণ্ডপেপি ইদং সুত্তং কথেসি. মহাৱিহাৰা নিক্খমিত্ৱা চেতিযপব্বতং গতো, তত্থাপি কথেসি. ততো সাকিযৱংসৱিহাৰে, কূটালিৱিহাৰে, অন্তৰসোব্ভে, মুত্তঙ্গণে, ৱাতকপব্বতে, পাচিনঘৰকে, দীঘৱাপিযং, লোকন্দৰে, নোমণ্ডলতলে কথেসি. তেসুপি ঠানেসু সট্ঠি সট্ঠি ভিক্খূ অৰহত্তং পত্তা. ততো নিক্খমিত্ৱা পন থেৰো চিত্তলপব্বতং গতো. তদা চ চিত্তলপব্বতৱিহাৰে অতিৰেকসট্ঠিৱস্সো মহাথেৰো, পোক্খৰণিযং কুৰুৱকতিত্থং নাম পটিচ্ছন্নট্ঠানং অত্থি, তত্থ থেৰো ন্হাযিস্সামীতি ওতিণ্ণো. দেৱত্থেৰো তস্স সন্তিকং গন্ত্ৱা ন্হাপেমি, ভন্তেতি আহ. থেৰো পটিসন্থাৰেনেৱ – ‘‘মালেয্যদেৱো নাম অত্থীতি ৱদন্তি, সো অযং ভৱিস্সতী’’তি ঞত্ৱা ত্ৱং দেৱোতি আহ. আম, ভন্তেতি. সট্ঠিৱস্সদ্ধানং মে, আৱুসো, কোচি সৰীৰং হত্থেন ফুসিতুং নাম ন লভি, ত্ৱং পন ন্হাপেহীতি উত্তৰিত্ৱা তীৰে নিসীদি.

থেৰো সব্বম্পি হত্থপাদাদিপৰিকম্মং কত্ৱা মহাথেৰং ন্হাপেসি. তং দিৱসঞ্চ ধম্মস্সৱনদিৱসো হোতি. অথ মহাথেৰো – ‘‘দেৱ অম্হাকং ধম্মদানং দাতুং ৱট্টতী’’তি আহ. থেৰো সাধু, ভন্তেতি সম্পটিচ্ছি. অত্থঙ্গতে সূৰিযে ধম্মস্সৱনং ঘোসেসুং. অতিক্কন্তসট্ঠিৱস্সাৱ সট্ঠি মহাথেৰা ধম্মস্সৱনত্থং অগমংসু. দেৱত্থেৰো সৰভাণাৱসানে ইমং সুত্তং আৰভি, সুত্তন্তপৰিযোসানে চ সট্ঠি মহাথেৰা অৰহত্তং পাপুণিংসু. ততো তিস্সমহাৱিহাৰং গন্ত্ৱা কথেসি, তস্মিম্পি সট্ঠি থেৰা. ততো নাগমহাৱিহাৰে কাড়কচ্ছগামে কথেসি, তস্মিম্পি সট্ঠি থেৰা. ততো কল্যাণিং গন্ত্ৱা তত্থ চাতুদ্দসে হেট্ঠাপাসাদে কথেসি, তস্মিম্পি সট্ঠি থেৰা. উপোসথদিৱসে উপৰিপাসাদে কথেসি, তস্মিম্পি সট্ঠি থেৰাতি এৱং দেৱত্থেৰেযেৱ ইদং সুত্তং কথেন্তে সট্ঠিট্ঠানেসু সট্ঠি সট্ঠি জনা অৰহত্তং পত্তা.

অম্বিলকাড়কৱিহাৰে পন তিপিটকচূড়নাগত্থেৰে ইমং সুত্তং কথেন্তে মনুস্সপৰিসা গাৱুতং অহোসি, দেৱপৰিসা যোজনিকা. সুত্তপৰিযোসানে সহস্সভিক্খূ অৰহত্তং পত্তা, দেৱেসু পন ততো ততো একেকোৱ পুথুজ্জনো অহোসীতি.

পপঞ্চসূদনিযা মজ্ঝিমনিকাযট্ঠকথায

ছছক্কসুত্তৱণ্ণনা নিট্ঠিতা.