৫. ৰাহুলোৱাদসুত্তৱণ্ণনা

৪১৬. এৱং মে সুতন্তি ৰাহুলোৱাদসুত্তং. তত্থ ৱিমুত্তিপৰিপাচনীযাতি ৱিমুত্তিং পৰিপাচেন্তীতি ৱিমুত্তিপৰিপাচনীযা. ধম্মাতি পন্নৰস ধম্মা. তে সদ্ধিন্দ্ৰিযাদীনং ৱিসুদ্ধিকাৰণৱসেন ৱেদিতব্বা. ৱুত্তঞ্হেতং –

‘‘অস্সদ্ধে পুগ্গলে পৰিৱজ্জযতো, সদ্ধে পুগ্গলে সেৱতো ভজতো পযিৰুপাসতো পসাদনীযে সুত্তন্তে পচ্চৱেক্খতো ইমেহি তীহাকাৰেহি সদ্ধিন্দ্ৰিযং ৱিসুজ্ঝতি. কুসীতে পুগ্গলে পৰিৱজ্জযতো আৰদ্ধৱীৰিযে পুগ্গলে সেৱতো ভজতো পযিৰুপাসতো সম্মপ্পধানে পচ্চৱেক্খতো ইমেহি তীহাকাৰেহি ৱীৰিযিন্দ্ৰিযং ৱিসুজ্ঝতি. মুট্ঠস্সতী পুগ্গলে পৰিৱজ্জযতো উপট্ঠিতস্সতী পুগ্গলে সেৱতো ভজতো পযিৰুপাসতো সতিপট্ঠানে পচ্চৱেক্খতো ইমেহি তীহাকাৰেহি সতিন্দ্ৰিযং ৱিসুজ্ঝতি. অসমাহিতে পুগ্গলে পৰিৱজ্জযতো সমাহিতে পুগ্গলে সেৱতো ভজতো পযিৰুপাসতো ঝানৱিমোক্খে পচ্চৱেক্খতো ইমেহি তীহাকাৰেহি সমাধিন্দ্ৰিযং ৱিসুজ্ঝতি. দুপ্পঞ্ঞে পুগ্গলে পৰিৱজ্জযতো পঞ্ঞৱন্তে পুগ্গলে সেৱতো ভজতো পযিৰুপাসতো গম্ভীৰঞাণচৰিযং পচ্চৱেক্খতো ইমেহি তীহাকাৰেহি পঞ্ঞিন্দ্ৰিযং ৱিসুজ্ঝতি. ইতি ইমে পঞ্চ পুগ্গলে পৰিৱজ্জযতো পঞ্চ পুগ্গলে সেৱতো ভজতো পযিৰুপাসতো পঞ্চ সুত্তন্তক্খন্ধে পচ্চৱেক্খতো ইমেহি পন্নৰসহি আকাৰেহি ইমানি পঞ্চিন্দ্ৰিযানি ৱিসুজ্ঝন্তী’’তি (পটি. ম. ১.১৮৫).

অপৰেপি পন্নৰস ধম্মা ৱিমুত্তিপৰিপাচনীযা – সদ্ধাদীনি পঞ্চিমানি ইন্দ্ৰিযানি, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৱিৰাগসঞ্ঞাতি, ইমা পঞ্চ নিব্বেধভাগিযা সঞ্ঞা, মেঘিযত্থেৰস্স কথিতা কল্যাণমিত্ততাদযো পঞ্চধম্মাতি. কায পন ৱেলায ভগৱতো এতদহোসীতি. পচ্চূসসমযে লোকং ৱোলোকেন্তস্স.

৪১৯. অনেকানং দেৱতাসহস্সানন্তি আযস্মতা ৰাহুলেন পদুমুত্তৰস্স ভগৱতো পাদমূলে পালিতনাগৰাজকালে পত্থনং পট্ঠপেন্তেন সদ্ধিং পত্থনং পট্ঠপিতদেৱতাযেৱ. তাসু পন কাচি ভূমট্ঠকা দেৱতা, কাচি অন্তলিক্খকা, কাচি চাতুমহাৰাজিকা, কাচি দেৱলোকে, কাচি ব্ৰহ্মলোকে নিব্বত্তা. ইমস্মিং পন দিৱসে সব্বা একট্ঠানে অন্ধৱনস্মিংযেৱ সন্নিপতিতা. ধম্মচক্খুন্তি উপালিওৱাদ- (ম. নি. ২.৬৯) দীঘনখসুত্তেসু (ম. নি. ২.২০৬) পঠমমগ্গো ধম্মচক্খুন্তি ৱুত্তো, ব্ৰহ্মাযুসুত্তে (ম. নি. ২.৩৯৫) তীণি ফলানি, ইমস্মিং সুত্তে চত্তাৰো মগ্গা, চত্তাৰি চ ফলানি ধম্মচক্খুন্তি ৱেদিতব্বানি. তত্থ হি কাচি দেৱতা সোতাপন্না অহেসুং, কাচি সকদাগামী, অনাগামী, খীণাসৱা. তাসঞ্চ পন দেৱতানং এত্তকাতি গণনৱসেন পৰিচ্ছেদো নত্থি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

ৰাহুলোৱাদসুত্তৱণ্ণনা নিট্ঠিতা.