১১. সচ্চৱিভঙ্গসুত্তৱণ্ণনা

৩৭১. এৱং মে সুতন্তি সচ্চৱিভঙ্গসুত্তং. তত্থ আচিক্খনাতি ইদং দুক্খং অৰিযসচ্চং নাম…পে… অযং দুক্খনিৰোধগামিনী পটিপদা অৰিযসচ্চং নামাতি. সেসপদেসুপি এসেৱ নযো. অপিচেত্থ পঞ্ঞাপনা নাম দুক্খসচ্চাদীনং ঠপনা. আসনং ঠপেন্তো হি আসনং পঞ্ঞপেতীতি ৱুচ্চতি. পট্ঠপনাতি পঞ্ঞাপনা. ৱিৱৰণাতি ৱিৱটকৰণা. ৱিভজনাতি ৱিভাগকিৰিযা. উত্তানীকম্মন্তি পাকটভাৱকৰণং.

অনুগ্গাহকাতি আমিসসঙ্গহেন ধম্মসঙ্গহেনাতি দ্ৱীহিপি সঙ্গহেহি অনুগ্গাহকা. জনেতাতি জনিকা মাতা. আপাদেতাতি পোসেতা. পোসিকমাতা ৱিয মোগ্গল্লানোতি দীপেতি. জনিকমাতা হি নৱ ৱা দস ৱা মাসে লোণম্বিলাদীনি পৰিহৰমানা কুচ্ছিযা দাৰকং ধাৰেত্ৱা কুচ্ছিতো নিক্খন্তং পোসিকমাতৰং ধাতিং পটিচ্ছাপেতি. সা খীৰনৱনীতাদীহি দাৰকং পোসেত্ৱা ৱড্ঢেতি, সো ৱুদ্ধিমাগম্ম যথাসুখং ৱিচৰতি. এৱমেৱ সাৰিপুত্তো অত্তনো ৱা পৰেসং ৱা সন্তিকে পব্বজিতে দ্ৱীহি সঙ্গহেহি সঙ্গণ্হন্তো গিলানে পটিজগ্গন্তো কম্মট্ঠানে যোজেত্ৱা সোতাপন্নভাৱং ঞত্ৱা অপাযভযেহি ৱুট্ঠিতকালতো পট্ঠায – ‘‘ইদানি পচ্চত্তপুৰিসকাৰেন উপৰিমগ্গে নিব্বত্তেস্সন্তী’’তি তেসু অনপেক্খো হুত্ৱা অঞ্ঞে নৱে নৱে ওৱদতি. মহামোগ্গল্লানোপি অত্তনো ৱা পৰেসং ৱা সন্তিকে পব্বজিতে তথেৱ সঙ্গণ্হিত্ৱা কম্মট্ঠানে যোজেত্ৱা হেট্ঠা তীণি ফলানি পত্তেসুপি অনপেক্খতং ন আপজ্জতি. কস্মা? এৱং কিৰস্স হোতি – ৱুত্তং ভগৱতা – ‘‘সেয্যথাপি, ভিক্খৱে, অপ্পমত্তকোপি গূথো দুগ্গন্ধো হোতি…পে… অপ্পমত্তকম্পি মুত্তং… খেড়ো… পুব্বো… লোহিতং দুগ্গন্ধং হোতি, এৱমেৱ খো অহং, ভিক্খৱে, অপ্পমত্তকম্পি ভৱং ন ৱণ্ণেমি অন্তমসো অচ্ছৰাসঙ্ঘতমত্তম্পী’’তি (অ. নি. ১.৩২০-৩২১). তস্মা যাৱ অৰহত্তং ন পাপুণন্তি, তাৱ তেসু অনপেক্খতং অনাপজ্জিত্ৱা অৰহত্তং পত্তেসুযেৱ আপজ্জতীতি. তেনাহ ভগৱা – ‘‘সেয্যথাপি, ভিক্খৱে, জনেতা এৱং সাৰিপুত্তো. সেয্যথাপি জাতস্স আপাদেতা, এৱং মোগ্গল্লানো. সাৰিপুত্তো, ভিক্খৱে, সোতাপত্তিফলে ৱিনেতি, মোগ্গল্লানো উত্তমত্থে’’তি. পহোতীতি সক্কোতি.

দুক্খে ঞাণন্তি সৱনসম্মসনপটিৱেধঞাণং, তথা দুক্খসমুদযে. দুক্খনিৰোধে সৱনপটিৱেধঞাণন্তি ৱট্টতি, তথা দুক্খনিৰোধগামিনিযা পটিপদায. নেক্খম্মসঙ্কপ্পাদীসু কামপচ্চনীকট্ঠেন, কামতো নিস্সটভাৱেন ৱা, কামং সম্মসন্তস্স উপ্পন্নোতি ৱা, কামপদঘাতং কামৱূপসমং কৰোন্তো উপ্পন্নোতি ৱা, কামৱিৱিত্তন্তে উপ্পন্নোতি ৱা নেক্খম্মসঙ্কপ্পো. সেসপদদ্ৱযেপি এসেৱ নযো. সব্বেপি চেতে পুব্বভাগে নানাচিত্তেসু, মগ্গক্খণে একচিত্তে লব্ভন্তি. তত্ৰ হি মিচ্ছাসঙ্কপ্পচেতনায সমুগ্ঘাতকো একোৱ সঙ্কপ্পো লব্ভতি, ন নানা লব্ভতি. সম্মাৱাচাদযোপি পুব্বভাগে নানাচিত্তেসু, ৱুত্তনযেনেৱ মগ্গক্খণে একচিত্তে লব্ভন্তি. অযমেত্থ সঙ্খেপো, ৱিত্থাৰেন পন সচ্চকথা ৱিসুদ্ধিমগ্গে চ সম্মাদিট্ঠিসুত্তে (ম. নি. ১.৮৯ আদযো) চ ৱুত্তাযেৱাতি.

পপঞ্চসূদনিযা মজ্ঝিমনিকাযট্ঠকথায

সচ্চৱিভঙ্গসুত্তৱণ্ণনা নিট্ঠিতা.