৭. অনুৰুদ্ধসুত্তৱণ্ণনা

২৩০. এৱং মে সুতন্তি অনুৰুদ্ধসুত্তং. তত্থ এৱমাহংসূতি তস্স উপাসকস্স অফাসুককালো অহোসি, তদা উপসঙ্কমিত্ৱা এৱমাহংসু. অপণ্ণকন্তি অৱিৰাধিতং. একত্থাতি অপ্পমাণাতি ৱা মহগ্গতাতি ৱা ঝানমেৱ চিত্তেকগ্গতাযেৱ এৱং ৱুচ্চতীতি ইমং সন্ধায এৱমাহ.

২৩১. যাৱতা একং ৰুক্খমূলং মহগ্গতন্তি ফৰিত্ৱা অধিমুচ্চিত্ৱা ৱিহৰতীতি একৰুক্খমূলপমাণট্ঠানং কসিণনিমিত্তেন ওত্থৰিত্ৱা তস্মিং কসিণনিমিত্তে মহগ্গতজ্ঝানং ফৰিত্ৱা অধিমুচ্চিত্ৱা ৱিহৰতি. মহগ্গতন্তি পনস্স আভোগো নত্থি, কেৱলং মহগ্গতজ্ঝানপৱত্তিৱসেন পনেতং ৱুত্তং. এস নযো সব্বত্থ. ইমিনা খো এতং গহপতি পৰিযাযেনাতি ইমিনা কাৰণেন. এত্থ হি অপ্পমাণাতি ৱুত্তানং ব্ৰহ্মৱিহাৰানং নিমিত্তং ন ৱড্ঢতি, উগ্ঘাটনং ন জাযতি, তানি ঝানানি অভিঞ্ঞানং ৱা নিৰোধস্স ৱা পাদকানি ন হোন্তি, ৱিপস্সনাপাদকানি পন ৱট্টপাদকানি ভৱোক্কমনানি চ হোন্তি. ‘‘মহগ্গতা’’তি ৱুত্তানং পন কসিণজ্ঝানানং নিমিত্তং ৱড্ঢতি, উগ্ঘাটনং জাযতি, সমতিক্কমা হোন্তি, অভিঞ্ঞাপাদকানি নিৰোধপাদকানি ৱট্টপাদকানি ভৱোক্কমনানি চ হোন্তি. এৱমিমে ধম্মা নানত্থা, অপ্পমাণা মহগ্গতাতি এৱং নানাব্যঞ্জনা চ.

২৩২. ইদানি মহগ্গতসমাপত্তিতো নীহৰিত্ৱা ভৱূপপত্তিকাৰণং দস্সেন্তো চতস্সো খো ইমাতিআদিমাহ. পৰিত্তাভাতি ফৰিত্ৱা জানন্তস্স অযমাভোগো অত্থি, পৰিত্তাভেসু পন দেৱেসু নিব্বত্তিকাৰণং ঝানং ভাৱেন্তো এৱং ৱুত্তো. এস নযো সব্বত্থ. পৰিত্তাভা সিযা সংকিলিট্ঠাভা হোন্তি সিযা পৰিসুদ্ধাভা, অপ্পমাণাভা সিযা সংকিলিট্ঠাভা হোন্তি সিযা পৰিসুদ্ধাভা. কথং? সুপ্পমত্তে ৱা সৰাৱমত্তে ৱা কসিণপৰিকম্মং কত্ৱা সমাপত্তিং নিব্বত্তেত্ৱা পঞ্চহাকাৰেহি আচিণ্ণৱসিভাৱো পচ্চনীকধম্মানং সুট্ঠু অপৰিসোধিতত্তা দুব্বলমেৱ সমাপত্তিং ৱড়ঞ্জিত্ৱা অপ্পগুণজ্ঝানে ঠিতো কালং কত্ৱা পৰিত্তাভেসু নিব্বত্ততি, ৱণ্ণো পনস্স পৰিত্তো চেৱ হোতি সংকিলিট্ঠো চ. পঞ্চহি পনাকাৰেহি আচিণ্ণৱসিভাৱো পচ্চনীকধম্মানং সুট্ঠু পৰিসোধিতত্তা সুৱিসুদ্ধং সমাপত্তিং ৱড়ঞ্জিত্ৱা পগুণজ্ঝানে ঠিতো কালং কত্ৱা পৰিত্তাভেসু নিব্বত্ততি, ৱণ্ণো পনস্স পৰিত্তো চেৱ হোতি পৰিসুদ্ধো চ. এৱং পৰিত্তাভা সিযা সংকিলিট্ঠাভা হোন্তি সিযা পৰিসুদ্ধাভা. কসিণে পন ৱিপুলপৰিকম্মং কত্ৱা সমাপত্তিং নিব্বত্তেত্ৱা পঞ্চহাকাৰেহি আচিণ্ণৱসিভাৱোতি সব্বং পুৰিমসদিসমেৱ ৱেদিতব্বং. এৱং অপ্পমাণাভা সিযা সংকিলিট্ঠাভা হোন্তি সিযা পৰিসুদ্ধাভাতি.

ৱণ্ণনানত্তন্তি সৰীৰৱণ্ণস্স নানত্তং. নো চ আভানানত্তন্তি আলোকে নানত্তং ন পঞ্ঞাযতি. অচ্চিনানত্তন্তি দীঘৰস্সঅণুথূলৱসেন অচ্চিযা নানত্তং.

যত্থ যত্থাতি উয্যানৱিমানকপ্পৰুক্খনদীতীৰপোক্খৰণীতীৰেসু যত্থ যত্থ. অভিনিৱিসন্তীতি ৱসন্তি. অভিৰমন্তীতি ৰমন্তি ন উক্কণ্ঠন্তি. কাজেনাতি যাগুভত্ততেলফাণিতমচ্ছমংসকাজেসু যেন কেনচি কাজেন. ‘‘কাচেনাতি’’পি পাঠো, অযমেৱ অত্থো. পিটকেনাতি পচ্ছিযা. তত্থ তত্থেৱাতি সপ্পিমধুফাণিতাদীনং সুলভট্ঠানতো লোণপূতিমচ্ছাদীনং উস্সন্নট্ঠানং নীতা ‘‘পুব্বে অম্হাকং ৱসনট্ঠানং ফাসুকং, তত্থ সুখং ৱসিম্হা, ইধ লোণং ৱা নো বাধতি পূতিমচ্ছগন্ধো ৱা সীসৰোগং উপ্পাদেতী’’তি এৱং চিত্তং অনুপ্পাদেত্ৱা তত্থ তত্থেৱ ৰমন্তি.

২৩৪. আভাতি আভাসম্পন্না. তদঙ্গেনাতি তস্সা ভৱূপপত্তিযা অঙ্গেন, ভৱূপপত্তিকাৰণেনাতি অত্থো. ইদানি তং কাৰণং পুচ্ছন্তো কো নু খো, ভন্তেতিআদিমাহ.

কাযদুট্ঠুল্লন্তি কাযালসিযভাৱো. ঝাযতোতি জলতো.

২৩৫. দীঘৰত্তং খো মেতি থেৰো কিৰ পাৰমিযো পূৰেন্তো ইসিপব্বজ্জং পব্বজিত্ৱা সমাপত্তিং নিব্বত্তেত্ৱা নিৰন্তৰং তীণি অত্তভাৱসতানি ব্ৰহ্মলোকে পটিলভি, তং সন্ধাযেতং আহ. ৱুত্তম্পি চেতং –

‘‘অৱোকিণ্ণং তীণি সতং, যং পব্বজিং ইসিপব্বজ্জং;

অসঙ্খতং গৱেসন্তো, পুব্বে সঞ্চৰিতং মম’’ন্তি.

সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

অনুৰুদ্ধসুত্তৱণ্ণনা নিট্ঠিতা.