৯. দ্ৱেধাৱিতক্কসুত্তৱণ্ণনা

২০৬. মে সুতন্তি দ্ৱেধাৱিতক্কসুত্তং. তত্থ দ্ৱিধা কত্ৱা দ্ৱিধা কত্ৱাতি দ্ৱে দ্ৱে ভাগে কত্ৱা. কামৱিতক্কোতি কামপটিসংযুত্তো ৱিতক্কো. ব্যাপাদৱিতক্কোতি ব্যাপাদপটিসংযুত্তো ৱিতক্কো. ৱিহিংসাৱিতক্কোতি ৱিহিংসাপটিসংযুত্তো ৱিতক্কো. একং ভাগন্তি অজ্ঝত্তং ৱা বহিদ্ধা ৱা ওড়াৰিকো ৱা সুখুমো ৱা সব্বো পাযং ৱিতক্কো অকুসলপক্খিকোযেৱাতি তযোপি কামব্যাপাদৱিহিংসাৱিতক্কে একং কোট্ঠাসমকাসিং. কামেহি নিস্সটো নেক্খম্মপটিসংযুত্তো ৱিতক্কো নেক্খম্মৱিতক্কো নাম, সো যাৱ পঠমজ্ঝানা ৱট্টতি. অব্যাপাদপটিসংযুত্তো ৱিতক্কো অব্যাপাদৱিতক্কো, সো মেত্তাপুব্বভাগতো পট্ঠায যাৱ পঠমজ্ঝানা ৱট্টতি. অৱিহিংসাপটিসংযুত্তো ৱিতক্কো অৱিহিংসাৱিতক্কো, সো কৰুণাপুব্বভাগতো পট্ঠায যাৱ পঠমজ্ঝানা ৱট্টতি. দুতিযং ভাগন্তি সব্বোপাযং কুসলপক্খিকোযেৱাতি দুতিযং কোট্ঠাসমকাসিং. ইমিনা বোধিসত্তস্স ৱিতক্কনিগ্গহণকালো কথিতো.

বোধিসত্তস্স হি ছব্বস্সানি পধানং পদহন্তস্স নেক্খম্মৱিতক্কাদযো পুঞ্জপুঞ্জা মহানদিযং ওঘা ৱিয পৱত্তিংসু. সতিসম্মোসেন পন সহসা কামৱিতক্কাদযো উপ্পজ্জিত্ৱা কুসলৱাৰং পচ্ছিন্দিত্ৱা সযং অকুসলজৱনৱাৰা হুত্ৱা তিট্ঠন্তি. ততো বোধিসত্তো চিন্তেসি – ‘‘ময্হং ইমে কামৱিতক্কাদযো কুসলৱাৰং পচ্ছিন্দিত্ৱা তিট্ঠন্তি, হন্দাহং ইমে ৱিতক্কে দ্ৱে ভাগে কত্ৱা ৱিহৰামী’’তি কামৱিতক্কাদযো অকুসলপক্খিকাতি একং ভাগং কৰোতি নেক্খম্মৱিতক্কাদযো কুসলপক্খিকাতি একং. অথ পুন চিন্তেসি – ‘‘অকুসলপক্খতো আগতং ৱিতক্কং মন্তেন কণ্হসপ্পং উপ্পীড়েত্ৱা গণ্হন্তো ৱিয অমিত্তং গীৱায অক্কমন্তো ৱিয চ নিগ্গহেস্সামি, নাস্স ৱড্ঢিতুং দস্সামি. কুসলপক্খতো আগতং ৱিতক্কং মেঘসমযে মেঘং ৱিয সুখেত্তে সালকল্যাণিপোতকং ৱিয চ সীঘং ৱড্ঢেস্সামী’’তি. সো তথা কত্ৱা অকুসলৱিতক্কে নিগ্গণ্হি, কুসলৱিতক্কে ৱড্ঢেসি. এৱং ইমিনা বোধিসত্তস্স ৱিতক্কনিগ্গহণনকালো কথিতোতি ৱেদিতব্বো.

২০৭. ইদানি যথাস্স তে ৱিতক্কা উপ্পজ্জিংসু, যথা চ নে নিগ্গহেসি, তং দস্সেন্তো তস্স ময্হং, ভিক্খৱেতিআদিমাহ. তত্থ অপ্পমত্তস্সাতি সতিযা অৱিপ্পৱাসে ঠিতস্স. আতাপিনোতি আতাপৱীৰিযৱন্তস্স. পহিতত্তস্সাতি পেসিতচিত্তস্স. উপ্পজ্জতি কামৱিতক্কোতি বোধিসত্তস্স ছব্বস্সানি পধানং পদহতো ৰজ্জসুখং ৱা আৰব্ভ, পাসাদে ৱা নাটকানি ৱা ওৰোধে ৱা কিঞ্চিদেৱ ৱা সম্পত্তিং আৰব্ভ কামৱিতক্কো নাম ন উপ্পন্নপুব্বো. দুক্কৰকাৰিকায পনস্স আহাৰূপচ্ছেদেন অধিমত্তকসিমানং পত্তস্স এতদহোসি – ‘‘ন সক্কা আহাৰূপচ্ছেদেন ৱিসেসং নিব্বত্তেতুং, যংনূনাহং ওড়াৰিকং আহাৰং আহাৰেয্য’’ন্তি. সো উৰুৱেলং পিণ্ডায পাৱিসি. মনুস্সা – ‘‘মহাপুৰিসো পুব্বে আহৰিত্ৱা দিন্নম্পি ন গণ্হি, অদ্ধাস্স ইদানি মনোৰথো মত্থকং পত্তো, তস্মা সযমেৱ আগতো’’তি পণীতপণীতং আহাৰং উপহৰিংসু. বোধিসত্তস্স অত্তভাৱো নচিৰস্সেৱ পাকতিকো অহোসি. জৰাজিণ্ণত্তভাৱো হি সপ্পাযভোজনং লভিত্ৱাপি পাকতিকো ন হোতি. বোধিসত্তো পন দহৰো. তেনস্স সপ্পাযভোজনং ভুঞ্জতো অত্তভাৱো ন চিৰস্সেৱ পাকতিকো জাতো, ৱিপ্পসন্নানি ইন্দ্ৰিযানি, পৰিসুদ্ধো ছৱিৱণ্ণো, সমুগ্গততাৰাগণং ৱিয নভং পৰিপুণ্ণদ্ৱত্তিংসমহাপুৰিসলক্খণপ্পটিমণ্ডিতসৰীৰং অহোসি. সো তং ওলোকেত্ৱা ‘‘তাৱ কিলন্তো নাম অত্তভাৱো এৱং পটিপাকতিকো জাতো’’তি চিন্তেত্ৱা অত্তনো পঞ্ঞামহন্ততায এৱং পৰিত্তকম্পি ৱিতক্কং গহেত্ৱা কামৱিতক্কোতি অকাসি.

পণ্ণসালায পুৰতো নিসিন্নো চমৰপসদগৱযৰোহিতমিগাদিকে মগগণে মনুঞ্ঞসদ্দৰৱনে মোৰৱনকুক্কুটাদিকে পক্খিগণে নীলুপ্পলকুমুদকমলাদিসঞ্ছন্নানি পল্ললানি নানাকুসুমসঞ্ছন্নৱিটপা ৱনৰাজিযো মণিক্খন্ধনিম্মলজলপৱাহঞ্চ নদিং নেৰঞ্জৰং পস্সতি. তস্স এৱং হোতি ‘‘সোভনা ৱতিমে মিগজাতা পক্খিগণা পল্ললানি ৱনৰাজিযো নদী নেৰঞ্জৰা’’তি. সো তম্পি এৱং পৰিত্তকং ৱিতক্কং গহেত্ৱা কামৱিতক্কমকাসি, তেনাহ ‘‘উপ্পজ্জতি কামৱিতক্কো’’তি.

অত্তব্যাবাধাযপীতি অত্তদুক্খাযপি. এসেৱনযো সব্বত্থ. কিং পন মহাসত্তস্স উভযদুক্খায সংৱত্তনকৱিতক্কো নাম অত্থীতি? নত্থি. অপৰিঞ্ঞাযং ঠিতস্স পন ৱিতক্কো যাৱ উভযব্যাবাধায সংৱত্ততীতি এতানি তীণি নামানি লভতি, তস্মা এৱমাহ. পঞ্ঞানিৰোধিকোতি অনুপ্পন্নায লোকিযলোকুত্তৰায পঞ্ঞায উপ্পজ্জিতুং ন দেতি, লোকিযপঞ্ঞং পন অট্ঠসমাপত্তিপঞ্চাভিঞ্ঞাৱসেন উপ্পন্নম্পি সমুচ্ছিন্দিত্ৱা খিপতীতি পঞ্ঞানিৰোধিকো. ৱিঘাতপক্খিকোতি দুক্খকোট্ঠাসিকো. অসঙ্খতং নিব্বানং নাম, তং পচ্চক্খং কাতুং ন দেতীতি অনিব্বানসংৱত্তনিকো. অব্ভত্থং গচ্ছতীতি খযং নত্থিভাৱং গচ্ছতি. উদকপুপ্ফুড়কো ৱিয নিৰুজ্ঝতি. পজহমেৱাতি পজহিমেৱ. ৱিনোদমেৱাতি নীহৰিমেৱ. ব্যন্তমেৱ নং অকাসিন্তি ৱিগতন্তং নিস্সেসং পৰিৱটুমং পৰিচ্ছিন্নমেৱ নং অকাসিং.

২০৮. ব্যাপাদৱিতক্কোতি ন বোধিসত্তস্স পৰূপঘাতপ্পটিসংযুত্তো নাম ৱিতক্কো চিত্তে উপ্পজ্জতি, অথস্স অতিৱস্সঅচ্চুণ্হঅতিসীতাদীনি পন পটিচ্চ চিত্তৱিপৰিণামভাৱো হোতি, তং সন্ধায ‘‘ব্যাপাদৱিতক্কো’’তি আহ. ৱিহিংসাৱিতক্কোতি ন মহাসত্তস্স পৰেসং দুক্খুপ্পাদনপ্পটিসংযুত্তো ৱিতক্কো উপ্পজ্জতি, চিত্তে পন উদ্ধতাকাৰো অনেকগ্গতাকাৰো হোতি, তং গহেত্ৱা ৱিহিংসাৱিতক্কমকাসি. পণ্ণসালাদ্ৱাৰে নিসিন্নো হি সীহব্যগ্ঘাদিকে ৱাড়মিগে সূকৰাদযো খুদ্দমিগে ৱিহিংসন্তে পস্সতি. অথ বোধিসত্তো ইমস্মিম্পি নাম অকুতোভযে অৰঞ্ঞে ইমেসং তিৰচ্ছানগতানং পচ্চত্থিকা উপ্পজ্জন্তি, বলৱন্তো দুব্বলে খাদন্তি, বলৱন্তখাদিতা ৱত্তন্তীতি কাৰুঞ্ঞং উপ্পাদেতি. অঞ্ঞেপি বিড়াৰাদযো কুক্কুটমূসিকাদীনি খাদন্তে পস্সতি, গামং পিণ্ডায পৱিট্ঠো মনুস্সে ৰাজকম্মিকেহি উপদ্দুতে ৱধবন্ধাদীনি অনুভৱন্তে অত্তনো কসিৱণিজ্জাদীনি কম্মানি কত্ৱা জীৱিতুং ন লভন্তীতি কাৰুঞ্ঞং উপ্পাদেতি, তং সন্ধায ‘‘উপ্পজ্জতি ৱিহিংসাৱিতক্কো’’তি আহ. তথা তথাতি তেন তেন আকাৰেন. ইদং ৱুত্তং হোতি – কামৱিতক্কাদীসু যং যং ৱিতক্কেতি, যং যং ৱিতক্কং পৱত্তেতি, তেন তেনে চস্সাকাৰেন কামৱিতক্কাদিভাৱো চেতসো ন হি হোতীতি. পহাসি নেক্খম্মৱিতক্কন্তি নেক্খম্মৱিতক্কং পজহতি. বহুলমকাসীতি বহুলং কৰোতি. তস্স তং কামৱিতক্কায চিত্তন্তি তস্স তং চিত্তং কামৱিতক্কত্থায. যথা কামৱিতক্কসম্পযুত্তং হোতি, এৱমেৱং নমতীতি অত্থো. সেসপদেসুপি এসেৱ নযো.

ইদানি অত্থদীপিকং উপমং দস্সেন্তো সেয্যথাপী তিআদিমাহ. তত্থ কিট্ঠসম্বাধেতি সস্সসম্বাধে. আকোটেয্যাতি উজুকং পিট্ঠিযং পহৰেয্য. পটিকোটেয্যাতি তিৰিযং ফাসুকাসু পহৰেয্য. সন্নিৰুন্ধেয্যাতি আৱৰিত্ৱা তিট্ঠেয্য. সন্নিৱাৰেয্যাতি ইতো চিতো চ গন্তুং ন দদেয্য. ততোনিদানন্তি তেন কাৰণেন, এৱং অৰক্খিতানং গুন্নং পৰেসং সস্সখাদনকাৰণেনাতি অত্থো. বালো হি গোপালোকো এৱং গাৱো অৰক্খমানো ‘‘অযং অম্হাকং ভত্তৱেতনং খাদতি, উজুং গাৱো ৰক্খিতুম্পি ন সক্কোতি, কুলেহি সদ্ধিং ৱেৰং গণ্হাপেতী’’তি গোসামিকানম্পি সন্তিকা ৱধাদীনি পাপুণাতি, কিট্ঠসামিকানম্পি. পণ্ডিতো পন ইমানি চত্তাৰি ভযানি সম্পস্সন্তো গাৱো সাধুকং ৰক্খতি, তং সন্ধাযেতং ৱুত্তং. আদীনৱন্তি উপদ্দৱং. ওকাৰন্তি লামকং, খন্ধেসু ৱা ওতাৰং. সংকিলেসন্তি কিলিট্ঠভাৱং. নেক্খম্মেতি নেক্খম্মম্হি. আনিসংসন্তি ৱিসুদ্ধিপক্খং. ৱোদানপক্খন্তি ইদং তস্সেৱ ৱেৱচনং, কুসলানং ধম্মানং নেক্খম্মম্হি ৱিসুদ্ধিপক্খং অদ্দসন্তি অত্থো.

২০৯. নেক্খম্মন্তি চ কামেহি নিস্সটং সব্বকুসলং, একধম্মে সঙ্গয্হমানে নিব্বানমেৱ. তত্ৰিদং ওপম্মসংসন্দনং – কিট্ঠসম্বাধং ৱিয হি ৰূপাদিআৰম্মণং, কূটগাৱো ৱিয কূটচিত্তং, পণ্ডিতগোপালকো ৱিয বোধিসত্তো, চতুব্বিধভযং ৱিয অত্তপৰূভযব্যাবাধায সংৱত্তনৱিতক্কো, পণ্ডিতগোপালকস্স চতুব্বিধং ভযং দিস্ৱা কিট্ঠসম্বাধে অপ্পমাদেন গোৰক্খণং ৱিয বোধিসত্তস্স ছব্বস্সানি পধানং পদহতো অত্তব্যাবাধাদিভযং দিস্ৱা ৰূপাদীসু আৰম্মণেসু যথা কামৱিতক্কাদযো ন উপ্পজ্জন্তি, এৱং চিত্তৰক্খণং. পঞ্ঞাৱুদ্ধিকোতিআদীসু অনুপ্পন্নায লোকিযলোকুত্তৰপঞ্ঞায উপ্পাদায, উপ্পন্নায চ ৱুদ্ধিযা সংৱত্ততীতি পঞ্ঞাৱুদ্ধিকো. ন দুক্খকোট্ঠাসায সংৱত্ততীতি অৱিঘাতপক্খিকো. নিব্বানধাতুসচ্ছিকিৰিযায সংৱত্ততীতি নিব্বানসংৱত্তনিকো. ৰত্তিং চেপি নং, ভিক্খৱে, অনুৱিতক্কেয্যন্তি সকলৰত্তিং চেপি তং ৱিতক্কং পৱত্তেয্যং. ততোনিদানন্তি তংমূলকং. ওহঞ্ঞেয্যাতি উগ্ঘাতীযেয্য, উদ্ধচ্চায সংৱত্তেয্যাতি অত্থো. আৰাতি দূৰে. সমাধিম্হাতি উপচাৰসমাধিতোপি অপ্পনাসমাধিতোপি. সো খো অহং, ভিক্খৱে, অজ্ঝত্তমেৱ চিত্তন্তি সো অহং, ভিক্খৱে, মা মে চিত্তং সমাধিম্হা দূৰে হোতূতি অজ্ঝত্তমেৱ চিত্তং সণ্ঠপেমি, গোচৰজ্ঝত্তে ঠপেমীতি অত্থো. সন্নিসাদেমীতি তত্থেৱ চ নং সন্নিসীদাপেমি. একোদিং কৰোমীতি একগ্গং কৰোমি. সমাদহামীতি সম্মা আদহামি, সুট্ঠু আৰোপেমীতি অত্থো. মা মে চিত্তং ঊহঞ্ঞীতি মা ময্হং চিত্তং উগ্ঘাতীযিত্থ, মা উদ্ধচ্চায সংৱত্ততূতি অত্থো.

২১০. উপ্পজ্জতি অব্যাপাদৱিতক্কো…পে… অৱিহিংসাৱিতক্কোতি এত্থ যো সো ইমায হেট্ঠা ৱুত্ততৰুণৱিপস্সনায সদ্ধিং উপ্পন্নৱিতক্কো কামপচ্চনীকট্ঠেন নেক্খম্মৱিতক্কোতি ৱুত্তো. সোযেৱ ব্যাপাদপচ্চনীকট্ঠেন অব্যাপাদৱিতক্কোতি চ ৱিহিংসাপচ্চনীকট্ঠেন অৱিহিংসাৱিতক্কোতি চ ৱুত্তো.

এত্তাৱতা বোধিসত্তস্স সমাপত্তিং নিস্সায ৱিপস্সনাপট্ঠপনকালো কথিতো. যস্স হি সমাধিপি তৰুণো, ৱিপস্সনাপি. তস্স ৱিপস্সনং পট্ঠপেত্ৱা অতিচিৰং নিসিন্নস্স কাযো কিলমতি, অন্তো অগ্গি ৱিয উট্ঠহতি, কচ্ছেহি সেদা মুচ্চন্তি, মত্থকতো উসুমৱট্টি ৱিয উট্ঠহতি, চিত্তং হঞ্ঞতি ৱিহঞ্ঞতি ৱিপ্ফন্দতি. সো পুন সমাপত্তিং সমাপজ্জিত্ৱা তং পৰিদমেত্ৱা মুদুকং কত্ৱা সমস্সাসেত্ৱা পুন ৱিপস্সনং পট্ঠপেতি. তস্স পুন অতিচিৰং নিসিন্নস্স তথেৱ হোতি. সো পুন সমাপত্তিং সমাপজ্জিত্ৱা তথেৱ কৰোতি. ৱিপস্সনায হি বহূপকাৰা সমাপত্তি.

যথা যোধস্স ফলককোট্ঠকো নাম বহূপকাৰো হোতি, সো তং নিস্সায সঙ্গামং পৱিসতি, তত্থ হত্থীহিপি অস্সেহিপি যোধেহিপি সদ্ধিং কম্মং কত্ৱা আৱুধেসু ৱা খীণেসু ভুঞ্জিতুকামতাদিভাৱে ৱা সতি নিৱত্তিত্ৱা ফলককোট্ঠকং পৱিসিত্ৱা আৱুধানিপি গণ্হাতি, ৱিস্সমতিপি, ভুঞ্জতিপি, পানীযম্পি পিৱতি, সন্নাহম্পি পটিসন্নয্হতি, তং তং কত্ৱা পুন সঙ্গামং পৱিসতি, তত্থ কম্মং কত্ৱা পুন উচ্চাৰাদিপীড়িতো ৱা কেনচিদেৱ ৱা কৰণীযেন ফলককোট্ঠকং পৱিসতি. তত্থ সন্থম্ভিত্ৱা পুন সঙ্গামং পৱিসতি, এৱং যোধস্স ফলককোট্ঠকো ৱিয ৱিপস্সনায বহূপকাৰা সমাপত্তি.

সমাপত্তিযা পন সঙ্গামনিত্থৰণকযোধস্স ফলককোট্ঠকতোপি ৱিপস্সনা বহূপকাৰতৰা. কিঞ্চাপি হি সমাপত্তিং নিস্সায ৱিপস্সনং পট্ঠপেতি, ৱিপস্সনা পন থামজাতা সমাপত্তিম্পি ৰক্খতি. থামজাতং কৰোতি.

যথা হি থলে নাৱম্পি নাৱায ভণ্ডম্পি সকটভাৰং কৰোন্তি. উদকং পত্ৱা পন সকটম্পি সকটভণ্ডম্পি যুত্তগোণেপি নাৱাভাৰং কৰোন্তি. নাৱা তিৰিযং সোতং ছিন্দিত্ৱা সোত্থিনা সুপট্টনং গচ্ছতি, এৱমেৱং কিঞ্চাপি সমাপত্তিং নিস্সায ৱিপস্সনং পট্ঠপেতি, ৱিপস্সনা পন থামজাতা সমাপত্তিম্পি ৰক্খতি, থামজাতং কৰোতি. থলং পত্ৱা সকটং ৱিয হি সমাপত্তি. উদকং পত্ৱা নাৱা ৱিয ৱিপস্সনা. ইতি বোধিসত্তস্স এত্তাৱতা সমাপত্তিং নিস্সায ৱিপস্সনাপট্ঠপনকালো কথিতোতি ৱেদিতব্বো.

যঞ্ঞদেৱাতিআদি কণ্হপক্খে ৱুত্তানুসাৰেনেৱ ৱেদিতব্বং, ইধাপি অত্থদীপিকং উপমং দস্সেতুং সেয্যথাপীতিআদিমাহ. তত্থ গামন্তসম্ভতেসূতি গামন্তং আহটেসু. সতিকৰণীযমেৱ হোতীতি এতা গাৱোতি সতিউপ্পাদনমত্তমেৱ কাতব্বং হোতি. ইতো চিতো চ গন্ত্ৱা আকোটনাদিকিচ্চং নত্থি. এতে ধম্মাতি এতে সমথৱিপস্সনা ধম্মাতি সতুপ্পাদনমত্তমেৱ কাতব্বং হোতি. ইমিনা বোধিসত্তস্স সমথৱিপস্সনানং থামজাতকালো কথিতো. তদা কিৰস্স সমাপত্তিং অপ্পনত্থায নিসিন্নস্স অট্ঠ সমাপত্তিযো একাৱজ্জনেন আপাথং আগচ্ছন্তি, ৱিপস্সনং পট্ঠপেত্ৱা নিসিন্নো সত্ত অনুপস্সনা একপ্পহাৰেনেৱ আৰুড়্হো হোতি.

২১৫. সেয্যথাপীতি ইধ কিং দস্সেতি? অযং পাটিযেক্কো অনুসন্ধি, সত্তানঞ্হি হিতূপচাৰং অত্তনো সত্থুভাৱসম্পদঞ্চ দস্সেন্তো ভগৱা ইমং দেসনং আৰভি. তত্থ অৰঞ্ঞেতি অটৱিযং. পৱনেতি ৱনসণ্ডে. অত্থতো হি ইদং দ্ৱযং একমেৱ, পঠমস্স পন দুতিযং ৱেৱচনং. অযোগক্খেমকামোতি চতূহি যোগেহি খেমং নিব্ভযট্ঠানং অনিচ্ছন্তো ভযমেৱ ইচ্ছন্তো. সোৱত্থিকোতি সুৱত্থিভাৱাৱহো. পীতিগমনীযোতি তুট্ঠিং গমনীযো. ‘‘পীতগমনীযো’’তি ৱা পাঠো. পিদহেয্যাতি সাখাদীহি থকেয্য. ৱিৱৰেয্যাতি ৱিসদমুখং কত্ৱা ৱিৱটং কৰেয্য. কুম্মগ্গন্তি উদকৱনপব্বতাদীহি সন্নিৰুদ্ধং অমগ্গং. ওদহেয্য ওকচৰন্তি তেসং ওকে চৰমানং ৱিয একং দীপকমিগং একস্মিং ঠানে ঠপেয্য. ওকচাৰিকন্তি দীঘৰজ্জুযা বন্ধিতংযেৱ মিগিং.

মিগলুদ্দকো হি অৰঞ্ঞং মিগানং ৱসনট্ঠানং গন্ত্ৱা ‘‘ইধ ৱসন্তি, ইমিনা মগ্গেন নিক্খমন্তি, এত্থ চৰন্তি, এত্থ পিৱন্তি, ইমিনা মগ্গেন পৱিসন্তী’’তি সল্লক্খেত্ৱা মগ্গং পিধায কুম্মগ্গং ৱিৱৰিত্ৱা ওকচৰঞ্চ ওকচাৰিকঞ্চ ঠপেত্ৱা সযং পটিচ্ছন্নট্ঠানে সত্তিং গহেত্ৱা তিট্ঠতি. অথ সাযন্হসমযে মিগা অকুতোভযে অৰঞ্ঞে চৰিত্ৱা পানীযং পিৱিত্ৱা মিগপোতকেহি সদ্ধিং কীড়মানা ৱসনট্ঠানসন্তিকং আগন্ত্ৱা ওকচৰঞ্চ ওকচাৰিকঞ্চ দিস্ৱা ‘‘সহাযকা নো আগতা ভৱিস্সন্তী’’তি নিৰাসঙ্কা পৱিসন্তি, তে মগ্গং পিহিতং দিস্ৱা ‘‘নাযং মগ্গো, অযং মগ্গো ভৱিস্সতী’’তি কুম্মগ্গং পটিপজ্জন্তি. মিগলুদ্দকো ন তাৱ কিঞ্চি কৰোতি, পৱিট্ঠেসু পন সব্বপচ্ছিমং সণিকং পহৰতি. সো উত্তসতি, ততো সব্বে উত্তসিত্ৱা ‘‘ভযং উপ্পন্ন’’ন্তি পুৰতো ওলোকেন্তা উদকেন ৱা ৱনেন ৱা পব্বতেন ৱা সন্নিৰুদ্ধং মগ্গং দিস্ৱা উভোহি পস্সেহি অঙ্গুলিসঙ্খলিকং ৱিয গহনৱনং পৱিসিতুং অসক্কোন্তা পৱিট্ঠমগ্গেনেৱ নিক্খমিতুং আৰভন্তি. লুদ্দকো তেসং নিৱত্তনভাৱং ঞত্ৱা আদিতো পট্ঠায তিংসম্পি চত্তালীসম্পি মিগে ঘাতেতি. ইদং সন্ধায এৱঞ্হি সো, ভিক্খৱে, মহামিগসঙ্ঘো অপৰেন সমযেন অনযব্যসনং আপজ্জেয্যাতি ৱুত্তং.

‘‘নন্দীৰাগস্সেতং অধিৱচনং, অৱিজ্জাযেতং অধিৱচন’’ন্তি এত্থ যস্মা ইমে সত্তা অৱিজ্জায অঞ্ঞাণা হুত্ৱা নন্দীৰাগেন আবন্ধিত্ৱা ৰূপাৰম্মণাদীনি উপনীতা ৱট্টদুক্খসত্তিযা ঘাতং লভন্তি. তস্মা ভগৱা ওকচৰং নন্দীৰাগোতি, ওকচাৰিকং অৱিজ্জাতি কত্ৱা দস্সেসি.

মিগলুদ্দকো হি একদাপি তেসং সাখাভঙ্গেন সৰীৰং পুঞ্ছিত্ৱা মনুস্সগন্ধং অপনেত্ৱা ওকচৰং একস্মিং ঠানে ঠপেত্ৱা ওকচাৰিকং সহ ৰজ্জুযা ৱিস্সজ্জেত্ৱা অত্তানং পটিচ্ছাদেত্ৱা সত্তিং আদায ওকচৰস্স সন্তিকে তিট্ঠতি, ওকচাৰিকা মিগগণস্স চৰণট্ঠানাভিমুখী গচ্ছতি. তং দিস্ৱা মিগা সীসানি উক্খিপিত্ৱা তিট্ঠন্তি, সাপি সীসং উক্খিপিত্ৱা তিট্ঠতি, তে ‘‘অম্হাকং সমজাতিকা অয’’ন্তি গোচৰং গণ্হন্তি. সাপি তিণানি খাদন্তী ৱিয সণিকং উপগচ্ছতি. আৰঞ্ঞিকো যূথপতিমিগো তস্সা ৱাতং লভিত্ৱা সকভৰিযং ৱিস্সজ্জেত্ৱা তদভিমুখো হোতি.

সত্তানঞ্হি নৱনৱমেৱ পিযং হোতি. ওকচাৰিকা আৰঞ্ঞিকস্স মিগস্স অচ্চাসন্নভাৱং অদত্ৱা তদভিমুখীৱ পচ্ছতো পটিক্কমিত্ৱা ওকচৰস্স সন্তিকং গচ্ছতি, যত্থ যত্থস্সা ৰজ্জু লগ্গতি, তত্থ তত্থ খুৰেন পহৰিত্ৱা মোচেতি, আৰঞ্ঞিকো মিগো ওকচৰং দিস্ৱা ওকচাৰিকায সম্মত্তো হুত্ৱা ওকচৰে উসূযং কত্ৱা পিট্ঠিং নামেত্ৱা সীসং কম্পেন্তো তিট্ঠতি, তস্মিং খণে সত্তিং জিৱ্হায লেহন্তোপি ‘‘কিং এত’’ন্তি ন জানাতি, ওকচৰোপি সচস্স উপৰিভাগেন তং মিগং পহৰিতুং সুখং হোতি, পিট্ঠিং নামেতি. সচস্স হেট্ঠাভাগেন পহৰিতুং সুখং হোতি, হদযং উন্নামেতি. অথ লুদ্দকো আৰঞ্ঞিকং মিগং সত্তিযা পহৰিত্ৱা তত্থেৱ ঘাতেত্ৱা মংসং আদায গচ্ছতি. এৱমেৱ যথা সো মিগো ওকচাৰিকায সম্মত্তো ওকচৰে উসূযং কত্ৱা সত্তিং জিৱ্হায লেহন্তোপি কিঞ্চি ন জানাতি, তথা ইমে সত্তা অৱিজ্জায সম্মত্তা অন্ধভূতা কিঞ্চি অজানন্তা ৰূপাদীসু নন্দীৰাগং উপগম্ম ৱট্টদুক্খসত্তিযা ৱধং লভন্তীতি ভগৱা ওকচৰং নন্দীৰাগোতি, ওকচাৰিকং অৱিজ্জাতি কত্ৱা দস্সেসি.

ইতি খো, ভিক্খৱে, ৱিৱটো মযা খেমো মগ্গোতি ইতি খো, ভিক্খৱে, মযা ইমেসং সত্তানং হিতচৰণেন সম্মাসম্বোধিং পত্ৱা অহং বুদ্ধোস্মীতি তুণ্হীভূতেন অনিসীদিত্ৱা ধম্মচক্কপ্পৱত্তনতো পট্ঠায ধম্মং দেসেন্তেন ৱিৱটো খেমো অৰিযো অট্ঠঙ্গিকো মগ্গো, পিহিতো কুম্মগ্গো, অঞ্ঞাতকোণ্ডঞ্ঞাদীনং ভব্বপুগ্গলানং ঊহতো ওকচৰো নন্দীৰাগো দ্ৱেধা ছেত্ৱা পাতিতো, নাসিতা ওকচাৰিকা অৱিজ্জা সব্বেন সব্বং সমুগ্ঘাতিতাতি অত্তনো হিতূপচাৰং দস্সেসি. সেসং সব্বত্থ উত্তানত্থমেৱাতি.

পপঞ্চসূদনিযা মজ্ঝিমনিকাযট্ঠকথায

দ্ৱেধাৱিতক্কসুত্তৱণ্ণনা নিট্ঠিতা.