৭. ৱনপত্থপৰিযাযসুত্তৱণ্ণনা

১৯০. এৱং মে সুতন্তি ৱনপত্থপৰিযাযং. তত্থ ৱনপত্থপৰিযাযন্তি ৱনপত্থকাৰণং, ৱনপত্থদেসনং ৱা.

১৯১. ৱনপত্থং উপনিস্সায ৱিহৰতীতি মনুস্সূপচাৰাতিক্কন্তং ৱনসণ্ডসেনাসনং নিস্সায সমণধম্মং কৰোন্তো ৱিহৰতি. অনুপট্ঠিতাতিআদীসু পুব্বে অনুপট্ঠিতা সতি তং উপনিস্সায ৱিহৰতোপি ন উপট্ঠাতি, পুব্বে অসমাহিতং চিত্তং ন সমাধিযতি, পুব্বে অপৰিক্খীণা আসৱা ন পৰিক্খযং গচ্ছন্তি, পুব্বে অননুপ্পত্তং অনুত্তৰং যোগক্খেমসঙ্খাতং অৰহত্তঞ্চ ন পাপুণাতীতি অত্থো. জীৱিতপৰিক্খাৰাতি জীৱিতসম্ভাৰা. সমুদানেতব্বাতি সমাহৰিতব্বা. কসিৰেন সমুদাগচ্ছন্তীতি দুক্খেন উপ্পজ্জন্তি. ৰত্তিভাগং ৱা দিৱসভাগং ৱাতি ৰত্তিকোট্ঠাসে ৱা দিৱসকোট্ঠাসে ৱা. এত্থ চ ৰত্তিভাগে পটিসঞ্চিক্খমানেন ঞত্ৱা ৰত্তিংযেৱ পক্কমিতব্বং, ৰত্তিং চণ্ডৱাড়াদীনং পৰিবন্ধে সতি অৰুণুগ্গমনং আগমেতব্বং. দিৱসভাগে ঞত্ৱা দিৱাৱ পক্কমিতব্বং, দিৱা পৰিবন্ধে সতি সূৰিযত্থঙ্গমনং আগমেতব্বং.

১৯২. সঙ্খাপীতি এৱং সমণধম্মস্স অনিপ্ফজ্জনভাৱং জানিত্ৱা. অনন্তৰৱাৰে পন সঙ্খাপীতি এৱং সমণধম্মস্স নিপ্ফজ্জনভাৱং জানিত্ৱা.

১৯৪. যাৱজীৱন্তি যাৱ জীৱিতং পৱত্ততি, তাৱ ৱত্থব্বমেৱ.

১৯৫. সো পুগ্গলোতি পদস্স নানুবন্ধিতব্বোতি ইমিনা সম্বন্ধো. অনাপুচ্ছাতি ইধ পন তং পুগ্গলং অনাপুচ্ছা পক্কমিতব্বন্তি অত্থো.

১৯৭. সঙ্খাপীতি এৱং সমণধম্মস্স অনিপ্ফজ্জনভাৱং ঞত্ৱা সো পুগ্গলো নানুবন্ধিতব্বো, তং আপুচ্ছা পক্কমিতব্বং.

১৯৮. অপি পনুজ্জমানেনাপীতি অপি নিক্কড্ঢীযমানেনাপি. এৱৰূপো হি পুগ্গলো সচেপি দাৰুকলাপসতং ৱা উদকঘটসতং ৱা ৱালিকম্বণসতং ৱা দণ্ডং আহৰাপেতি, মা ইধ ৱসীতি নিক্কড্ঢাপেতি ৱা, তং তং খমাপেত্ৱা যাৱজীৱং ৱত্থব্বমেৱাতি.

পপঞ্চসূদনিযা মজ্ঝিমনিকাযট্ঠকথায

ৱনপত্থপৰিযাযসুত্তৱণ্ণনা নিট্ঠিতা.