৫. দ্ৱাৰপালকৱিমানৱণ্ণনা

উচ্চমিদং মণিথূণন্তি দ্ৱাৰপালকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন চ সমযেন ৰাজগহে অঞ্ঞতৰো উপাসকো চত্তাৰি নিচ্চভত্তানি সঙ্ঘস্স দেতি. তস্স পন গেহং পৰিযন্তে ঠিতং চোৰভযেন যেভুয্যেন পিহিতদ্ৱাৰমেৱ হোতি. ভিক্খূ গন্ত্ৱা কদাচি দ্ৱাৰস্স পিহিতত্তা ভত্তং অলদ্ধাৱ পটিগচ্ছন্তি. উপাসকো ভৰিযং আহ ‘‘কিং, ভদ্দে, অয্যানং সক্কচ্চং ভিক্খা দীযতী’’তি? সা আহ ‘‘একেসু দিৱসেসু অয্যা নাগমিংসূ’’তি. ‘‘কিং কাৰণ’’ন্তি? ‘‘দ্ৱাৰস্স পিহিতত্তা মঞ্ঞে’’তি. তং সুত্ৱা উপাসকো সংৱেগপ্পত্তো হুত্ৱা একং পুৰিসং দ্ৱাৰপালং কত্ৱা ঠপেসি ‘‘ত্ৱং অজ্জতো পট্ঠায দ্ৱাৰং ৰক্খন্তো নিসীদ, যদা চ অয্যা আগমিস্সন্তি, তদা তে পৱেসেত্ৱা পৱিট্ঠানং নেসং পত্তপটিগ্গহণআসনপঞ্ঞাপনাদি সব্বং যুত্তপযুত্তং জানাহী’’তি. সো ‘‘সাধূ’’তি তথা কৰোন্তো ভিক্খূনং সন্তিকে ধম্মং সুত্ৱা উপ্পন্নসদ্ধো কম্মফলং সদ্দহিত্ৱা সৰণেসু চ সীলেসু চ পতিট্ঠহি, সক্কচ্চং ভিক্খূ উপট্ঠহি.

অপৰভাগে নিচ্চভত্তদাযকো উপাসকো কালং কত্ৱা যামেসু নিব্বত্তি. দ্ৱাৰপালো পন সক্কচ্চং ভিক্খূনং উপট্ঠহিত্ৱা পৰস্স পৰিচ্চাগে ৱেয্যাৱচ্চকৰণেন অনুমোদনেন চ তাৱতিংসেসু উপ্পজ্জি. তস্স দ্ৱাদসযোজনিকং কনকৱিমানন্তিআদি সব্বং কক্কটকৱিমানে ৱুত্তনযেনেৱ ৱেদিতব্বং. পুচ্ছাৱিস্সজ্জনগাথা এৱমাগতা –

৯১৮. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

৯১৯. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

৯২০. ‘‘কেন তেতাদিসো ৱণ্ণো…পে… ৱণ্ণো চ তে সব্বদিসা পভাসতী’’তি.

৯২২. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

৯২৩. ‘‘দিব্বং মমং ৱস্সসহস্সমাযু, ৱাচাভিগীতং মনসা পৱত্তিতং;

এত্তাৱতা ঠস্সতি পুঞ্ঞকম্মো, দিব্বেহি কামেহি সমঙ্গিভূতো.

৯২৪. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

৯২৩. তত্থ দিব্বং মমং ৱস্সসহস্সমাযূতি যস্মিং দেৱনিকাযে সযং উপ্পন্নো, তেসং তাৱতিংসদেৱানং আযুপ্পমাণমেৱ ৱদতি. তেসঞ্হি মনুস্সানং গণনায ৱস্সসতং একো ৰত্তিদিৱো, তায ৰত্তিযা তিংসৰত্তিকো মাসো, তেন মাসেন দ্ৱাদসমাসিকো সংৱচ্ছৰো, তেন সংৱচ্ছৰেন সহস্সসংৱচ্ছৰানি আযু, তং মনুস্সানং গণনায তিস্সো ৱস্সকোটিযো সট্ঠি চ ৱস্সসতসহস্সানি হোন্তি. ৱাচাভিগীতন্তি ৱাচায অভিগীতং, ‘‘আগচ্ছন্তু অয্যা, ইদং আসনং পঞ্ঞত্তং, ইধ নিসীদথা’’তিআদিনা, ‘‘কিং অয্যানং সৰীৰস্স আৰোগ্যং, কিং ৱসনট্ঠানং ফাসুক’’ন্তিআদিনা পটিসন্থাৰৱসেন চ ৱাচায কথিতমত্তং. মনসা পৱত্তিতন্তি ‘‘ইমে অয্যা পেসলা ব্ৰহ্মচাৰিনো ধম্মচাৰিনো’’তিআদিনা চিত্তেন পৱত্তিতং পসাদমত্তং, ন পন মম সন্তকং কিঞ্চি পৰিচ্চত্তং অত্থীতি দস্সেতি. এত্তাৱতাতি এত্তকেন এৱং কথনমত্তেন পসাদমত্তেনপি. ঠস্সতি পুঞ্ঞকম্মোতি কতপুঞ্ঞো নাম হুত্ৱা দেৱলোকে ঠস্সতি চিৰং পৱত্তিস্সতি, তিট্ঠন্তো চ দিব্বেহি কামেহি সমঙ্গীভূতো তস্মিং দেৱনিকাযে দেৱানং ৱলঞ্জনিযামেনেৱ দিব্বেহি পঞ্চহি কামগুণেহি সমঙ্গীভূতো সমন্নাগতো হুত্ৱা ইন্দ্ৰিযানি পৰিচাৰেন্তো ৱিহৰতীতি অত্থো. সেসং ৱুত্তনযমেৱ.

দ্ৱাৰপালকৱিমানৱণ্ণনা নিট্ঠিতা.