৪. কক্কটকৰসদাযকৱিমানৱণ্ণনা

উচ্চমিদং মণিথূণং ৱিমানন্তি কক্কটকৰসদাযকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন অঞ্ঞতৰো ভিক্খু আৰদ্ধৱিপস্সকো কণ্ণসূলেন পীড়িতো অকল্লসৰীৰতায ৱিপস্সনং উস্সুক্কাপেতুং নাসক্খি, ৱেজ্জেহি ৱুত্তৱিধিনা ভেসজ্জে কতেপি ৰোগো ন ৱূপসমি. সো ভগৱতো এতমত্থং আৰোচেসি. অথস্স ভগৱা ‘‘কক্কটকৰসভোজনং সপ্পায’’ন্তি ঞত্ৱা আহ ‘‘গচ্ছ ত্ৱং ভিক্খু মগধখেত্তে পিণ্ডায চৰাহী’’তি.

সো ভিক্খু ‘‘দীঘদস্সিনা অদ্ধা কিঞ্চি দিট্ঠং ভৱিস্সতী’’তি চিন্তেত্ৱা ‘‘সাধু ভন্তে’’তি ভগৱতো পটিস্সুণিত্ৱা ভগৱন্তং ৱন্দিত্ৱা পত্তচীৱৰমাদায মগধখেত্তং গন্ত্ৱা অঞ্ঞতৰস্স খেত্তপালস্স কুটিযা দ্ৱাৰে পিণ্ডায অট্ঠাসি. সো চ খেত্তপালো কক্কটকৰসং সম্পাদেত্ৱা ভত্তঞ্চ পচিত্ৱা ‘‘থোকং ৱিস্সমিত্ৱা ভুঞ্জিস্সামী’’তি নিসিন্নো থেৰং দিস্ৱা পত্তং গহেত্ৱা কুটিকাযং নিসীদাপেত্ৱা কক্কটকৰসভত্তং অদাসি. থেৰস্স তং ভত্তং থোকং ভুত্তস্সযেৱ কণ্ণসূলং পটিপ্পস্সম্ভি, ঘটসতেন ন্হাতো ৱিয অহোসি. সো সপ্পাযাহাৰৱসেন চিত্তফাসুকং লভিত্ৱা ৱিপস্সনাৱসেন চিত্তং অভিনিন্নামেন্তো অপৰিযোসিতেযেৱ ভোজনে অনৱসেসতো আসৱে খেপেত্ৱা অৰহত্তে পতিট্ঠায খেত্তপালং আহ ‘‘উপাসক, তৱ পিণ্ডপাতভোজনেন ময্হং ৰোগো ৱূপসন্তো, কাযচিত্তং কল্লং জাতং, ত্ৱম্পি ইমস্স পুঞ্ঞস্স ফলেন ৱিগতকাযচিত্তদুক্খো ভৱিস্সসী’’তি ৱত্ৱা অনুমোদনং কত্ৱা পক্কামি.

খেত্তপালো অপৰেন সমযেন কালং কত্ৱা তাৱতিংসভৱনে দ্ৱাদসযোজনিকে মণিথম্ভে কনকৱিমানে সত্তসতকূটাগাৰপটিমণ্ডিতে ৱেড়ুৰিযমযগব্ভে নিব্বত্তি, দ্ৱাৰে চস্স যথূপচিতকম্মসংসূচকো মুত্তাসিক্কাগতো সুৱণ্ণকক্কটকো ওলম্বমানো অট্ঠাসি. অথাযস্মা মহামোগ্গল্লানো পুব্বে ৱুত্তনযেন তত্থ গতো তং দিস্ৱা ইমাহি গাথাহি পুচ্ছি –

৯১০. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

৯১১. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

৯১২. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৯১৩. ‘‘পুচ্ছামি তং দেৱ মহানুভাৱ, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

সোপিস্স ব্যাকাসি, তং দস্সেতুং –

৯১৪. ‘‘সো দেৱপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৱিযাকাসি, যস্স কম্মস্সিদং ফল’’ন্তি. – ৱুত্তং;

৯১৫. ‘‘সতিসমুপ্পাদকৰো, দ্ৱাৰে কক্কটকো ঠিতো;

নিট্ঠিতো জাতৰূপস্স, সোভতি দসপাদকো.

৯১৬. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৯১৭. ‘‘অক্খামি তে ভিক্খু মহানুভাৱ, মনুস্সভূতো যমকাসি পুঞ্ঞং;

তেনম্হি এৱং জলিতানুভাৱো, ৱণ্ণো চ মে সব্বদিসা পভাসতী’’তি.

৯১০. তত্থ উচ্চন্তি অচ্চুগ্গতং. মণিথূণন্তি পদুমৰাগাদিমণিমযথম্ভং. সমন্ততোতি চতূসুপি পস্সেসু. ৰুচকত্থতাতি তস্সং তস্সং ভূমিযং সুৱণ্ণফলকেহি অত্থতা.

৯১১. পিৱসি খাদসি চাতি কালেন কালং উপযুজ্জমানং গন্ধপানং সুধাভোজনঞ্চ সন্ধায ৱদতি. পৱদন্তীতি পৱজ্জন্তি. দিব্বা ৰসা কামগুণেত্থ পঞ্চাতি দিব্বা ৰসা অনপ্পকা পঞ্চ কামগুণা এত্থ এতস্মিং তৱ ৱিমানে সংৱিজ্জন্তীতি অত্থো. সুৱণ্ণছন্নাতি হেমাভৰণৱিভূসিতা.

৯১৫. সতিসমুপ্পাদকৰোতি সতুপ্পাদকৰো, যেন পুঞ্ঞকম্মেন অযং দিব্বসম্পত্তি মযা লদ্ধা, তত্থ সতুপ্পাদস্স কাৰকো, ‘‘কক্কটকৰসদানেন অযং তযা সম্পত্তি লদ্ধা’’তি এৱং সতুপ্পাদং কৰোন্তোতি অত্থো. নিট্ঠিতো জাতৰূপস্সাতি জাতৰূপেন সিদ্ধো জাতৰূপমযো. একমেকস্মিং পস্সে পঞ্চ পঞ্চ কত্ৱা দস পাদা এতস্সাতি দসপাদকো দ্ৱাৰে কক্কটকো ঠিতো সোভতি. সো এৱ মম পুঞ্ঞকম্মং তাদিসানং মহেসীনং ৱিভাৱেতি, ন এত্থ মযা ৱত্তব্বং অত্থীতি অধিপ্পাযো. তেনাহ ‘‘তেন মেতাদিসো ৱণ্ণো’’তিআদি. সেসং ৱুত্তনযমেৱ.

কক্কটকৰসদাযকৱিমানৱণ্ণনা নিট্ঠিতা.