২. ৰেৱতীৱিমানৱণ্ণনা

উট্ঠেহি ৰেৱতে সুপাপধম্মেতি ৰেৱতীৱিমানং. তস্স কা উপ্পত্তি? ভগৱা বাৰাণসিযং ৱিহৰতি ইসিপতনে মিগদাযে. তেন সমযেন বাৰাণসিযং সদ্ধাসম্পন্নস্স কুলস্স পুত্তো নন্দিযো নাম উপাসকো অহোসি সদ্ধাসম্পন্নো দাযকো দানপতি সঙ্ঘুপট্ঠাকো. অথস্স মাতাপিতৰো সম্মুখগেহতো মাতুলধীতৰং ৰেৱতিং নাম কঞ্ঞং আনেতুকামা অহেসুং. সা পন অস্সদ্ধা অদানসীলা, নন্দিযো তং ন ইচ্ছি. তস্স মাতা ৰেৱতিং আহ ‘‘অম্ম, ত্ৱং ইমং গেহং আগন্ত্ৱা ভিক্খুসঙ্ঘস্স নিসীদনট্ঠানং হৰিতেন গোমযেন উপলিম্পিত্ৱা আসনানি পঞ্ঞাপেহি, আধাৰকে ঠপেহি, ভিক্খূনং আগতকালে ৱন্দিত্ৱা পত্তং গহেত্ৱা নিসীদাপেত্ৱা ধমকৰণেন পানীযং পৰিস্সাৱেত্ৱা ভুত্তকালে পত্তানি ধোৱাহি, এৱং মে পুত্তস্স আৰাধিকা ভৱিস্সসী’’তি. সা তথা অকাসি. অথ নং ‘‘ওৱাদক্খমা জাতা’’তি পুত্তস্স আৰোচেত্ৱা তেন ‘‘সাধূ’’তি সম্পটিচ্ছিতে দিৱসং ঠপেত্ৱা আৱাহং কৰিংসু.

অথ নং নন্দিযো আহ ‘‘সচে ভিক্খুসঙ্ঘং মাতাপিতৰো চ মে উপট্ঠহিস্সসি, এৱং ইমস্মিং গেহে ৱসিতুং লভিস্সসি, অপ্পমত্তা হোহী’’তি. সা ‘‘সাধূ’’তি পটিস্সুণিত্ৱা কিঞ্চি কালং সদ্ধা ৱিয হুত্ৱা ভত্তাৰং অনৱত্তেন্তী দ্ৱে পুত্তে ৱিজাযি. নন্দিযস্স মাতাপিতৰো কালমকংসু. গেহে সব্বিস্সৰিযং তস্সা এৱ অহোসি. নন্দিযোপি মহাদানপতি হুত্ৱা ভিক্খুসঙ্ঘস্স দানং পট্ঠপেসি, কপণদ্ধিকাদীনম্পি গেহদ্ৱাৰে পাকৱত্তং পট্ঠপেসি. ইসিপতনমহাৱিহাৰে চতূহি গব্ভেহি পটিমণ্ডিতং চতুসালং কাৰেত্ৱা মঞ্চপীঠাদীনি অত্থৰাপেত্ৱা বুদ্ধপ্পমুখস্স ভিক্খুসঙ্ঘস্স মহাদানং দত্ৱা তথাগতস্স হত্থে দক্খিণোদকং পাতেত্ৱা নিয্যাদেসি, সহ দক্খিণোদকদানেন তাৱতিংসভৱনে আযামতো চ ৱিত্থাৰতো চ সমন্তা দ্ৱাদসযোজনিকো যোজনসতুব্বেধো সত্তৰতনমযো অচ্ছৰাগণসহস্সসঙ্ঘুট্ঠো দিব্বপাসাদো উগ্গঞ্ছি.

অথাযস্মা মহামোগ্গল্লানো দেৱচাৰিকং চৰন্তো তং পাসাদং দিস্ৱা অত্তানং ৱন্দিতুং আগতে দেৱপুত্তে পুচ্ছি ‘‘কস্সাযং পাসাদো’’তি? ‘‘ইমস্স, ভন্তে, পাসাদস্স সামিকো মনুস্সলোকে বাৰাণসিযং নন্দিযো নাম কুটুম্বিযপুত্তো সঙ্ঘস্স ইসিপতনমহাৱিহাৰে চতুসালং কাৰেসি, তস্সাযং নিব্বত্তো পাসাদো’’তি আহংসু. পাসাদে নিব্বত্তদেৱচ্ছৰাযোপি থেৰং ৱন্দিত্ৱা ‘‘ভন্তে, মযং বাৰাণসিযং নন্দিযস্স নাম উপাসকস্স পৰিচাৰিকা ভৱিতুং ইধ নিব্বত্তা, তস্স এৱং ৱদেথ ‘‘তুয্হং পৰিচাৰিকা ভৱিতুং নিব্বত্তা, দেৱতাযো তযি চিৰাযন্তে উক্কণ্ঠিতা, দেৱলোকসম্পত্তি নাম মত্তিকাভাজনং ভিন্দিত্ৱা সুৱণ্ণভাজনস্স গহণং ৱিয অতিমনাপ’ন্তি ৱত্ৱা ইধাগমনত্থায তস্স ৱদেথা’’তি আহংসু. থেৰো ‘‘সাধূ’’তি পটিস্সুণিত্ৱা সহসা দেৱলোকতো আগন্ত্ৱা চতুপৰিসমজ্ঝে ভগৱন্তং পুচ্ছি ‘‘নিব্বত্ততি নু খো, ভন্তে, কতপুঞ্ঞানং মনুস্সলোকে ঠিতানংযেৱ দিব্বসম্পত্তী’’তি? ‘‘ননু তে, মোগ্গল্লান, নন্দিযস্স দেৱলোকে নিব্বত্তা দিব্বসম্পত্তি সামং দিট্ঠা, কস্মা মং পুচ্ছসী’’তি? ‘‘এৱং, ভন্তে, নিব্বত্ততী’’তি. অথস্স সত্থা ‘‘যথা চিৰং ৱিপ্পৱসিত্ৱা আগতং পুৰিসং মিত্তবন্ধৱা অভিনন্দন্তি সম্পটিচ্ছন্তি, এৱং কতপুঞ্ঞং পুগ্গলং ইতো পৰলোকং গতং সকানি পুঞ্ঞানি সম্পত্তিহত্থেহি সম্পটিচ্ছন্তি পটিগ্গণ্হন্তী’’তি দস্সেন্তো –

৮৬১. ‘‘চিৰপ্পৱাসিং পুৰিসং, দূৰতো সোত্থিমাগতং;

ঞাতিমিত্তা সুহজ্জা চ, অভিনন্দন্তি আগতং.

৮৬২. ‘‘তথেৱ কতপুঞ্ঞম্পি, অস্মা লোকা পৰং গতং;

পুঞ্ঞানি পটিগ্গণ্হন্তি, পিযং ঞাতীৱ আগত’’ন্তি. – গাথা অভাসি;

নন্দিযো তং সুত্ৱা ভিয্যোসোমত্তায দানানি দেতি, পুঞ্ঞানি কৰোতি, সো ৱণিজ্জায গচ্ছন্তো ৰেৱতিং আহ ‘‘ভদ্দে, মযা পট্ঠপিতং সঙ্ঘস্স দানং অনাথানং পাকৱত্তঞ্চ ত্ৱং অপ্পমত্তা পৱত্তেয্যাসী’’তি. সা ‘‘সাধূ’’তি পটিস্সুণি. সো পৱাসগতোপি যত্থ যত্থ ৱাসং কপ্পেতি, তত্থ তত্থ ভিক্খূনং অনাথানঞ্চ যথাৱিভৱং দানং দেতিযেৱ. তস্স অনুকম্পায খীণাসৱা দূৰতোপি আগন্ত্ৱা দানং সম্পটিচ্ছন্তি. ৰেৱতী পন তস্মিং গতে কতিপাহমেৱ দানং পৱত্তেত্ৱা অনাথানং ভত্তং উপচ্ছিন্দি, ভিক্খূনম্পি ভত্তং কণাজকং বিলঙ্গদুতিযং অদাসি. ভিক্খূনং ভুত্তট্ঠানে অত্তনা ভুত্তাৱসেসানি সিত্থানি মচ্ছমংসখণ্ডমিস্সকানি চলকট্ঠিকানি চ পকিৰিত্ৱা মনুস্সানং দস্সেতি ‘‘পস্সথ সমণানং কম্মং, সদ্ধাদেয্যং নাম এৱং ছড্ডেন্তী’’তি.

অথ নন্দিযো ৱোহাৰকসিদ্ধি যথালাভো আগন্ত্ৱা তং পৱত্তিং সুত্ৱা ৰেৱতিং গেহতো নীহৰিত্ৱা গেহং পাৱিসি. দুতিযদিৱসে বুদ্ধপ্পমুখস্স ভিক্খুসঙ্ঘস্স মহাদানং পৱত্তেত্ৱা নিচ্চভত্তং অনাথভত্তঞ্চ সম্মদেৱ পৱত্তেসি, অত্তনো সহাযেহি উপনীতং ৰেৱতিং ঘাসচ্ছাদনপৰমতায ঠপেসি. সো অপৰেন সমযেন কালং কত্ৱা তাৱতিংসভৱনে অত্তনো ৱিমানেযেৱ নিব্বত্তি. ৰেৱতী পন সব্বং দানং পচ্ছিন্দিত্ৱা ‘‘ইমেসং ৱসেন ময্হং লাভসক্কাৰো পৰিহাযী’’তি ভিক্খুসঙ্ঘং অক্কোসন্তী পৰিভাসন্তী ৱিচৰতি. অথ ৱেস্সৱণো দ্ৱে যক্খে আণাপেসি ‘‘গচ্ছথ, ভণে, বাৰাণসিনগৰে উগ্ঘোসথ ‘‘ইতো সত্তমে দিৱসে ৰেৱতী জীৱন্তীযেৱ নিৰযে পক্খিপীযতী’তি’’. তং সুত্ৱা মহাজনো সংৱেগজাতো ভীততসিতো অহোসি.

অথ ৰেৱতী পন পাসাদং অভিৰুহিত্ৱা দ্ৱাৰং থকেত্ৱা নিসীদি. সত্তমে দিৱসে তস্সা পাপকম্মসঞ্চোদিতেন ৱেস্সৱণেন ৰঞ্ঞা আণত্তা জলিতকপিলকেসমস্সুকা চিপিটৱিৰূপনাসিকা পৰিণতদাঠা লোহিতক্খা সজলধৰসমানৱণ্ণা অতিৱিয ভযানকৰূপা দ্ৱে যক্খা উপগন্ত্ৱা ‘‘উট্ঠেহি, ৰেৱতে, সুপাপধম্মে’’তিআদীনি ৱদন্তা নানাবাহাসু গহেত্ৱা ‘‘মহাজনো পস্সতূ’’তি সকলনগৰে ৱীথিতো ৱীথিং পৰিব্ভমাপেত্ৱা আকাসং অব্ভুগ্গন্ত্ৱা তাৱতিংসভৱনং নেত্ৱা নন্দিযস্স ৱিমানং সম্পত্তিঞ্চস্সা দস্সেত্ৱা তং ৱিলপন্তিংযেৱ উস্সদনিৰযসমীপং পাপেসুং. তং যমপুৰিসা উস্সদনিৰযে খিপিংসু. তেনাহ –

৮৬৩. ‘‘উট্ঠেহি ৰেৱতে সুপাপধম্মে, অপাৰুতদ্ৱাৰে অদানসীলে;

নেস্সাম তং যত্থ থুনন্তি দুগ্গতা, সমপ্পিতা নেৰযিকা দুখেনা’’তি.

তত্থ উট্ঠেহীতি উট্ঠহ, ন দানেস পাসাদো তং নিৰযভযতো ৰক্খিতুং সক্কোতি, তস্মা সীঘং উট্ঠহিত্ৱা আগচ্ছাহীতি অত্থো. ৰেৱতেতি তং নামেন আলপতি. সুপাপধম্মেতিআদিনা উট্ঠানস্স কাৰণং ৱদতি. যস্মা ত্ৱং অৰিযানং অক্কোসনপৰিভাসনাদিনা সুট্টু লামকপাপধম্মা, যস্মা চ অপাৰুতং দ্ৱাৰং নিৰযস্স তৱ পৱেসনত্থং, তস্মা উট্ঠেহীতি. অদানসীলেতি কস্সচি কিঞ্চি ন দানসীলে কদৰিযে মচ্ছৰিনী, ইদম্পি উট্ঠানস্সেৱ কাৰণৱচনং. যস্মা দানসীলানং অমচ্ছৰীনং তৱ সামিকসদিসানং সুগতিযং নিৱাসো, তাদিসানং পন অদানসীলানং মচ্ছৰীনং নিৰযে নিৱাসো, তস্মা উট্ঠেহি, মুহুত্তমত্তম্পি তৱ ইধ ঠাতুং ন দস্সামীতি অধিপ্পাযো. যত্থ থুনন্তি দুগ্গতাতি দুক্খগতত্তা দুগ্গতা. নেৰযিকাতি নিৰযদুক্খেন সমপ্পিতা সমঙ্গীভূতা যস্মিং নিৰযে থুনন্তি, যাৱ পাপকম্মং ন ব্যন্তি হোতি, তাৱ নিক্খমিতুং অলভন্তা নিত্থুনন্তি, তত্থ তং নেস্সাম নযিস্সাম খিপিস্সামাতি যোজনা.

৮৬৪. ‘‘ইচ্চেৱ ৱত্ৱান যমস্স দূতা, তে দ্ৱে যক্খা লোহিতক্খা ব্ৰহন্তা;

পচ্চেকবাহাসু গহেত্ৱা ৰেৱতং, পক্কামযুং দেৱগণস্স সন্তিকে’’তি. –

ইদং সঙ্গীতিকাৰৱচনং.

তত্থ ইচ্চেৱ ৱত্ৱানাতি ইতি এৱ ‘‘উট্ঠেহী’’তিআদিনা ৱত্ৱা, ৱচনসমনন্তৰমেৱাতি অত্থো. যমস্স দূতাতি অপ্পটিসেধনিযতস্স যমস্স ৰঞ্ঞো দূতসদিসা. ৱেস্সৱণেন হি তে পেসিতা. তথা হি তে তাৱতিংসভৱনং নযিংসু. কেচি ‘‘ন যমস্স দূতা’’তি ন-কাৰং ‘‘যমস্সা’’তি পদেন সম্বন্ধিত্ৱা ‘‘ৱেস্সৱণস্স দূতা’’তি অত্থং ৱদন্তি, তং ন যুজ্জতি. ন হি ন যমদূততায ৱেস্সৱণস্স দূতাতি সিজ্ঝতি. যজন্তি তত্থ বলিং উপহৰন্তীতি যক্খা. লোহিতক্খাতি ৰত্তনযনা. যক্খানঞ্হি নেত্তানি অতিলোহিতানি হোন্তি. ব্ৰহন্তাতি মহন্তা. পচ্চেকবাহাসূতি একো একবাহাযং, ইতৰো ইতৰবাহাযন্তি পচ্চেকং বাহাসু. ৰেৱতন্তি ৰেৱতিং. ৰেৱতাতিপি তস্সা নামমেৱ. তথা হি ‘‘ৰেৱতে’’তি ৱুত্তং. পক্কামযুন্তি পক্কামেসুং, উপনেসুন্তি অত্থো. দেৱগণস্সাতি তাৱতিংসভৱনে দেৱসঙ্ঘস্স.

এৱং তেহি যক্খেহি তাৱতিংসভৱনং নেত্ৱা নন্দিযৱিমানস্স অৱিদূৰে ঠপিতা ৰেৱতী তং সূৰিযমণ্ডলসদিসং অতিৱিয পভস্সৰং দিস্ৱা –

৮৬৫. ‘‘আদিচ্চৱণ্ণং ৰুচিৰং পভস্সৰং, ব্যম্হং সুভং কঞ্চনজালছন্নং;

কস্সেতমাকিণ্ণজনং ৱিমানং, সুৰিযস্স ৰংসীৰিৱ জোতমানং.

৮৬৬. ‘‘নাৰীগণা চন্দনসাৰলিত্তা, উভতো ৱিমানং উপসোভযন্তি;

তং দিস্সতি সুৰিযসমানৱণ্ণং, কো মোদতি সগ্গপত্তো ৱিমানে’’তি. –

তে যক্খে পুচ্ছি. তেপি তস্সা –

৮৬৭. ‘‘বাৰাণসিযং নন্দিযো নামাসি, উপাসকো অমচ্ছৰী দানপতি ৱদঞ্ঞূ;

তস্সেতমাকিণ্ণজনং ৱিমানং, সূৰিযস্স ৰংসীৰিৱ জোতমানং.

৮৬৮. ‘‘নাৰীগণা চন্দনসাৰলিত্তা, উভতো ৱিমানং উপসোভযন্তি;

তং দিস্সতি সূৰিযসমানৱণ্ণং, সো মোদতি সগ্গপত্তো ৱিমানে’’তি. –

আচিক্খিংসু.

৮৬৮. তত্থ চন্দনসাৰলিত্তাতি সাৰভূতেন চন্দনগন্ধেন অনুলিত্তসৰীৰা. উভতো ৱিমানন্তি ৱিমানং উভতো অন্তো চেৱ বহি চ সঙ্গীতাদীহি উপেচ্চ সোভযন্তি.

অথ ৰেৱতী –

৮৬৯. ‘‘নন্দিযস্সাহং ভৰিযা, অগাৰিনী সব্বকুলস্স ইস্সৰা;

ভত্তু ৱিমানে ৰমিস্সামি দানহং, ন পত্থযে নিৰযং দস্সনাযা’’তি. –

আহ. তত্থ অগাৰিনীতি গেহসামিনী. ‘‘ভৰিযা সগামিনী’’তিপি পঠন্তি, ভৰিযা সহগামিনীতি অত্থো. সব্বকুলস্স ইস্সৰা ভত্তূতি মম ভত্তু নন্দিযস্স সব্বকুটুম্বিকস্স ইস্সৰা সামিনী অহোসিং, তস্মা ইদানিপি ৱিমানে ইস্সৰা ভৱিস্সামীতি আহ. ৱিমানে ৰমিস্সামি দানহন্তি এৱং পলোভেতুমেৱ হি তং তে তত্থ নেসুং. ন পত্থযে নিৰযং দস্সনাযাতি যং পন নিৰযং মং তুম্হে নেতুকামা, তং নিৰযং দস্সনাযপি ন পত্থযে, কুতো পৱিসিতুন্তি ৱদতি.

এৱং ৱদন্তিমেৱ ‘‘ত্ৱং তং পত্থেহি ৱা মা ৱা, কিং তৱ পত্থনাযা’’তি নিৰযসমীপং নেত্ৱা –

৮৭০. ‘‘এসো তে নিৰযো সুপাপধম্মে, পুঞ্ঞং তযা অকতং জীৱলোকে;

ন হি মচ্ছৰী ৰোসকো পাপধম্মো, সগ্গূপগানং লভতি সহব্যত’’ন্তি. –

গাথমাহংসু. তস্সত্থো – এসো তৱ নিৰযো, তযা দীঘৰত্তং মহাদুক্খং অনুভৱিতব্বট্ঠানভূতো. কস্মা? পুঞ্ঞং তযা অকতং জীৱলোকে, যস্মা মনুস্সলোকে অপ্পমত্তকম্পি তযা পুঞ্ঞং নাম ন কতং, এৱং অকতপুঞ্ঞো পন তাদিসো সত্তো মচ্ছৰী অত্তনো সম্পত্তিনিগূহনলক্খণেন মচ্ছৰেন সমন্নাগতো, পৰেসং ৰোসুপ্পাদনেন ৰোসকো, লোভাদীহি পাপধম্মেহি সমঙ্গীভাৱতো পাপধম্মো সগ্গূপগানং দেৱানং সহব্যতং সহভাৱং ন লভতীতি যোজনা.

এৱং পন ৱত্ৱা তে দ্ৱে যক্খা তত্থেৱন্তৰধাযিংসু. তংসদিসে পন দ্ৱে নিৰযপালে সংসৱকে নাম গূথনিৰযে পক্খিপিতুং আকড্ঢন্তে পস্সিত্ৱা –

৮৭১. ‘‘কিং নু গূথঞ্চ মুত্তঞ্চ, অসুচি পটিদিস্সতি;

দুগ্গন্ধং কিমিদং মীড়্হং, কিমেতং উপৱাযতী’’তি. –

তং নিৰযং পুচ্ছি.

৮৭২. ‘‘এস সংসৱকো নাম, গম্ভীৰো সতপোৰিসো;

যত্থ ৱস্সসহস্সানি, তুৱং পচ্চসি ৰেৱতে’’তি. –

তস্মিং কথিতে তত্থ অত্তনো নিব্বত্তিহেতুভূতং কম্মং পুচ্ছন্তী –

৮৭৩. ‘‘কিং নু কাযেন ৱাচায, মনসা দুক্কটং কতং;

কেন সংসৱকো লদ্ধো, গম্ভীৰো সতপোৰিসো’’তি. – আহ;

৮৭৪. ‘‘সমণে ব্ৰাহ্মণে চাপি, অঞ্ঞে ৱাপি ৱনিব্বকে;

মুসাৱাদেন ৱঞ্চেসি, তং পাপং পকতং তযা’’তি. –

তস্সা তং কম্মং কথেত্ৱা পুন তে –

৮৭৫. ‘‘তেন সংসৱকো লদ্ধো, গম্ভীৰো সতপোৰিসো;

তত্থে ৱস্সসহস্সানি, তুৱং পচ্চসি ৰেৱতে’’তি. –

আহংসু. তত্থ সংসৱকো নামাতি নিচ্চকালং গূথমুত্তাদিঅসুচিস্স সংসৱনতো পগ্ঘৰণতো সংসৱকো নাম.

ন কেৱলং তুয্হং ইধ সংসৱকলাভো এৱ, অথ খো এত্থ অনেকানি ৱস্সসহস্সানি পচ্চিত্ৱা উত্তিণ্ণায হত্থচ্ছেদাদিলাভোপীতি দস্সেতুং –

৮৭৬. ‘‘হত্থেপি ছিন্দন্তি অথোপি পাদে, কণ্ণেপি ছিন্দন্তি অথোপি নাসং;

অথোপি কাকোড়গণা সমেচ্চ, সঙ্গম্ম খাদন্তি ৱিফন্দমান’’ন্তি. –

তত্থ লদ্ধব্বকাৰণং আহংসু. তত্থ কাকোড়গণাতি কাকসঙ্ঘা. তে কিৰস্সা তিগাৱুতপ্পমাণে সৰীৰে অনেকসতানি অনেকসহস্সানি পতিত্ৱা তালক্খন্ধপৰিমাণেহি সুনিসিতগ্গেহি অযোমযেহি মুখতুণ্ডেহি ৱিজ্ঝিত্ৱা ৱিজ্ঝিত্ৱা খাদন্তি, মংসং গহিতগহিতট্ঠানে কম্মবলেন পূৰতেৱ. তেনাহ ‘‘কাকোড়গণা সমেচ্চ, সঙ্গম্ম খাদন্তি ৱিফন্দমান’’ন্তি.

পুন সা মনুস্সলোকং পচ্চানযনায যাচনাদিৱসেন তং তং ৱিপ্পলপি. তেন ৱুত্তং –

৮৭৭. ‘‘সাধু খো মং পটিনেথ, কাহামি কুসলং বহুং;

দানেন সমচৰিযায, সংযমেন দমেন চ;

যং কত্ৱা সুখিতা হোন্তি, ন চ পচ্ছানুতপ্পৰে’’তি.

পুন নিৰযপালা –

৮৭৮. ‘‘পুৰে তুৱং পমজ্জিত্ৱা, ইদানি পৰিদেৱসি;

সযং কতানং কম্মানং, ৱিপাকং অনুভোস্সসী’’তি. –

আহংসু. পুন সা আহ –

৮৭৯. ‘‘কো দেৱলোকতো মনুস্সলোকং, গন্ত্ৱান পুট্ঠো মে এৱং ৱদেয্য;

নিক্খিত্তদণ্ডেসু দদাথ দানং, অচ্ছাদনং সেয্যমথন্নপানং;

ন হি মচ্ছৰী ৰোসকো পাপধম্মো, সগ্গূপগানং লভতি সহব্যতং.

৮৮০. ‘‘সাহং নূন ইতো গন্ত্ৱা, যোনিং লদ্ধান মানুসিং;

ৱদঞ্ঞূ সীলসম্পন্না, কাহামি কুসলং বহুং;

দানেন সমচৰিযায, সংযমেন দমেন চ.

৮৮১. ‘‘আৰামানি চ ৰোপিস্সং, দুগ্গে সঙ্কমানি চ;

পপঞ্চ উদপানঞ্চ, ৱিপ্পসন্নেন চেতসা.

৮৮২. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

৮৮৩. ‘‘উপোসথং উপৱসিস্সং, সদা সীলেসু সংৱুতা;

ন চ দানে পমজ্জিস্সং, সামং দিট্ঠমিদং মযা’’তি.

৮৮৪. ‘‘ইচ্চেৱং ৱিপ্পলপন্তিং, ফন্দমানং ততো ততো;

খিপিংসু নিৰযে ঘোৰে, উদ্ধংপাদং অৱংসিৰ’’ন্তি. –

ইদং সঙ্গীতিকাৰৱচনং. পুন সা –

৮৮৫. ‘‘অহং পুৰে মচ্ছৰিনী অহোসিং, পৰিভাসিকা সমণব্ৰাহ্মণানং;

ৱিতথেন চ সামিকং ৱঞ্চযিত্ৱা, পচ্চামহং নিৰযে ঘোৰৰূপে’’তি. –

ওসানগাথমাহ. তত্থ ‘‘অহং পুৰে মচ্ছৰিনী’’তি গাথা নিৰযে নিব্বত্তায ৱুত্তা, ইতৰা অনিব্বত্তায এৱাতি ৱেদিতব্বা. সেসং সুৱিঞ্ঞেয্যমেৱাতি.

ভিক্খূ ৰেৱতিযা যক্খেহি গহেত্ৱা নীতভাৱং ভগৱতো আৰোচেসুং. তং সুত্ৱা ভগৱা আদিতো পট্ঠায ইমং ৱত্থুং কথেত্ৱা উপৰি ৱিত্থাৰেন ধম্মং দেসেসি, দেসনাপৰিযোসানে বহূ সোতাপত্তিফলাদীনি পাপুণিংসু. কামঞ্চেতং ৰেৱতীপটিবদ্ধায কথায যেভুয্যভাৱতো ‘‘ৰেৱতীৱিমান’’ন্তি ৱোহৰীযতি, যস্মা পন ৰেৱতী ৱিমানদেৱতা ন হোতি, নন্দিযস্স পন দেৱপুত্তস্স ৱিমানাদিসম্পত্তিপটিসংযুত্তঞ্চেতং, তস্মা পুৰিসৱিমানেস্ৱেৱ সঙ্গহং আৰোপিতন্তি দট্ঠব্বং.

ৰেৱতীৱিমানৱণ্ণনা নিট্ঠিতা.