১০. পঠমনাগৱিমানৱণ্ণনা

সুসুক্কখন্ধং অভিৰুয্হ নাগন্তি নাগৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন আযস্মা মহামোগ্গল্লানো হেট্ঠা ৱুত্তনযেনেৱ দেৱচাৰিকং চৰন্তো তাৱতিংসভৱনং উপগতো. তত্থ অদ্দস অঞ্ঞতৰং দেৱপুত্তং সব্বসেতং মহন্তং দিব্বনাগং অভিৰুয্হ মহন্তেন পৰিৱাৰেন মহতা দিব্বানুভাৱেন আকাসেন গচ্ছন্তং, সব্বা দিসা চন্দো ৱিয সূৰিযো ৱিয চ ওভাসযমানং. দিস্ৱা যেন সো দেৱপুত্তো তেনুপসঙ্কমি. অথ সো দেৱপুত্তো ততো ওৰুয্হ আযস্মন্তং মহামোগ্গল্লানং অভিৱাদেত্ৱা অঞ্জলিং পগ্গয্হ অট্ঠাসি. অথ থেৰো –

৯৬১. ‘‘সুসুক্কখন্ধং অভিৰুয্হ নাগং, অকাচিনং দন্তিং বলিং মহাজৱং;

অভিৰুয্হ গজৱৰং সুকপ্পিতং, ইধাগমা ৱেহাযসং অন্তলিক্খে.

৯৬২. ‘‘নাগস্স দন্তেসু দুৱেসু নিম্মিতা, অচ্ছোদকা পদুমিনিযো সুফুল্লা;

পদুমেসু চ তূৰিযগণা পৱজ্জৰে, ইমা চ নচ্চন্তি মনোহৰাযো.

৯৬৩. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি. –

তস্স সম্পত্তিকিত্তনমুখেন কতকম্মং পুচ্ছি.

৯৬১. তত্থ সুসুক্কখন্ধন্তি সুট্ঠু সেতখন্ধং. কিঞ্চাপি তস্স নাগস্স চত্তাৰো পাদা, ৱত্থিকোসং, মুখপ্পদেসো, উভো কণ্ণা, ৱালধীতি এত্তকং মুঞ্চিত্ৱা সব্বো কাযো সেতোৱ, খন্ধপ্পদেসস্স পন সাতিসযং ধৱলতৰতায ৱুত্তং ‘‘সুসুক্কখন্ধ’’ন্তি. নাগন্তি দিব্বং হত্থিনাগং. অকাচিনন্তি নিদ্দোসং, সবললৱঙ্কতিলকাদিছৱিদোসৱিৰহিতন্তি অত্থো. ‘‘আজানীয’’ন্তিপি পাড়ি, আজানীযলক্খণূপেতন্তি অত্থো. দন্তিন্তি ৱিপুলৰুচিৰদন্তৱন্তং. বলিন্তি বলৱন্তং মহাবলং. মহাজৱন্তি অতিজৱং সীঘগামিং. পুন অভিৰুয্হাতি এত্থ অনুনাসিকলোপো দট্ঠব্বো, অভিৰুয্হং আৰোহনীযন্তি ৱুত্তং হোতি. সেসং ৱুত্তনযমেৱ.

এৱং পন থেৰেন পুট্ঠো দেৱপুত্তো অত্তনা কতকম্মং কথেন্তো –

৯৬৫. ‘‘অট্ঠেৱ মুত্তপুপ্ফানি, কস্সপস্স মহেসিনো;

থূপস্মিং অভিৰোপেসিং, পসন্নো সেহি পাণিভি.

৯৬৬. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি. – ইমাহি গাথাহি ব্যাকাসি;

তস্সত্থো – অহং পুব্বে কস্সপসম্মাসম্বুদ্ধস্স যোজনিকে কনকথূপে ৱণ্টতো মুচ্চিত্ৱা গচ্ছমূলে পতিতানি অট্ঠ মুত্তপুপ্ফানি লভিত্ৱা তানি গহেত্ৱা পূজনৱসেন পসন্নচিত্তো হুত্ৱা অভিৰোপেসিং পূজেসিং.

অতীতে কিৰ কস্সপসম্মাসম্বুদ্ধে পৰিনিব্বুতে যোজনিকে কনকথূপে চ কাৰিতে সপৰিৱাৰো কিকী কাসিৰাজা চ নাগৰা চ নেগমা চ জানপদা চ দিৱসে দিৱসে পুপ্ফপূজং কৰোন্তি. তেসু তথা কৰোন্তেসু পুপ্ফানি মহগ্ঘানি দুল্লভানি চ অহেসুং. অথেকো উপাসকো মালাকাৰৱীথিযং ৱিচৰিত্ৱা একমেকেন কহাপণেন একমেকম্পি পুপ্ফং অলভন্তো অট্ঠ কহাপণানি গহেত্ৱা পুপ্ফাৰামং গন্ত্ৱা মালাকাৰং আহ ‘‘ইমেহি অট্ঠহি কহাপণেহি অট্ঠ পুপ্ফানি দেহী’’তি. ‘‘নত্থয্যো পুপ্ফানি, সম্মদেৱ উপধাৰেত্ৱা ওচিনিত্ৱা দিন্নানী’’তি. ‘‘অহং ওলোকেত্ৱা গণ্হামী’’তি. ‘‘যদি এৱং, আৰামং পৱিসিত্ৱা গৱেসাহী’’তি. সো পৱিসিত্ৱা গৱেসন্তো পতিতানি অট্ঠ পুপ্ফানি লভিত্ৱা মালাকাৰং আহ ‘‘গণ্হ, তাত, কহাপণানী’’তি. ‘‘তৱ পুঞ্ঞেন লদ্ধানি, নাহং কহাপণানি গণ্হামী’’তি আহ. ইতৰো ‘‘নাহং মুধা পুপ্ফানি গহেত্ৱা ভগৱতো পূজং কৰিস্সামী’’তি কহাপণানি তস্স পুৰতো ঠপেত্ৱা পুপ্ফানি গহেত্ৱা চেতিযঙ্গণং গন্ত্ৱা পসন্নচিত্তো পূজং অকাসি. সো অপৰভাগে কালং কত্ৱা তাৱতিংসেসু উপ্পজ্জিত্ৱা তত্থ যাৱতাযুকং ঠত্ৱা পুনপি দেৱলোকে, পুনপি দেৱলোকেতি এৱং অপৰাপৰং দেৱেসুযেৱ সংসৰন্তো তস্সেৱ কম্মস্স ৱিপাকাৱসেসেন ইমস্মিম্পি বুদ্ধুপ্পাদে তাৱতিংসেসুযেৱ উপ্পজ্জি. তং সন্ধায হেট্ঠা ৱুত্তং ‘‘তত্থ অদ্দস অঞ্ঞতৰং দেৱপুত্ত’’ন্তিআদি.

তং পনেতং পৱত্তিং আযস্মা মহামোগ্গল্লানো মনুস্সলোকং আগন্ত্ৱা ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ৱিত্থাৰেন ধম্মং দেসেসি. সা দেসনা মহাজনস্স সাত্থিকা অহোসীতি.

নাগৱিমানৱণ্ণনা নিট্ঠিতা.