৮. অম্বৱিমানৱণ্ণনা

দিব্বং তে অম্বৱনং ৰম্মন্তি অম্বৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন সাৱত্থিযং অঞ্ঞতৰা উপাসিকা আৱাসদানস্স মহপ্ফলতং মহানিসংসতঞ্চ সুত্ৱা ছন্দজাতা ভগৱন্তং অভিৱাদেত্ৱা এৱমাহ ‘‘অহং, ভন্তে, একং আৱাসং কাৰেতুকামা, ইচ্ছামি তাদিসং ওকাসং, আচিক্খতূ’’তি. ভগৱা ভিক্খূ আণাপেসি, ভিক্খূ তস্সা ওকাসং দস্সেসুং. সা তত্থ ৰমণীযং আৱাসং কাৰেত্ৱা তস্স সমন্ততো অম্বৰুক্খে ৰোপেসি. সো আৱাসো সমন্ততো অম্বপন্তীহি পৰিক্খিত্তো ছাযূদকসম্পন্নো মুত্তাজালসদিসৱালুকাকিণ্ণপণ্ডৰভূমিভাগো অতিৱিয মনোহৰো অহোসি. সা তং ৱিহাৰং নানাৱণ্ণেহি ৱত্থেহি পুপ্ফদামগন্ধদামাদীহি চ দেৱৱিমানং ৱিয অলঙ্কৰিত্ৱা তেলপদীপং আৰোপেত্ৱা অম্বৰুক্খে চ অহতেহি ৱত্থেহি ৱেঠেত্ৱা সঙ্ঘস্স নিয্যাদেসি.

সা অপৰভাগে কালং কত্ৱা তাৱতিংসভৱনে নিব্বত্তি, তস্সা মহন্তং ৱিমানং পাতুৰহোসি অম্বৱনপৰিক্খিত্তং. সা তত্থ অচ্ছৰাগণপৰিৱাৰিতা দিব্বসম্পত্তিং অনুভৱতি. তং আযস্মা মহামোগ্গল্লানো উপগন্ত্ৱা ইমাহি গাথাহি পুচ্ছি –

৭৮৩. ‘‘দিব্বং তে অম্বৱনং ৰম্মং, পাসাদেত্থ মহল্লকো;

নানাতূৰিযসঙ্ঘুট্ঠো, অচ্ছৰাগণঘোসিতো.

৭৮৪. ‘‘পদীপো চেত্থ জলতি, নিচ্চং সোৱণ্ণযো মহা;

দুস্সফলেহি ৰুক্খেহি, সমন্তা পৰিৱাৰিতো.

৭৮৫. ‘‘কেন তেতাদিসো ৱণ্ণো…পে…ৱণ্ণো চ তে সব্বদিসা পভাসতী’’তি.

৭৮৭. ‘‘সা দেৱতা অত্তমনা…পে… যস্স কম্মস্সিদং ফলং’’.

৭৮৮. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

ৱিহাৰং সঙ্ঘস্স কাৰেসিং, অম্বেহি পৰিৱাৰিতং.

৭৮৯. ‘‘পৰিযোসিতে ৱিহাৰে, কাৰেন্তে নিট্ঠিতে মহে;

অম্বেহি ছাদযিত্ৱান, কত্ৱা দুস্সমযে ফলে.

৭৯০. ‘‘পদীপং তত্থ জালেত্ৱা, ভোজযিত্ৱা গণুত্তমং;

নিয্যাদেসিং তং সঙ্ঘস্স, পসন্না সেহি পাণিভি.

৭৯১. ‘‘তেন মে অম্বৱনং ৰম্মং, পাসাদেত্থ মহল্লকো;

নানাতূৰিযসঙ্ঘুট্ঠো, অচ্ছৰাগণঘোসিতো.

৭৯২. ‘‘পদীপো চেত্থ জলতি, নিচ্চং সোৱণ্ণযো মহা;

দুস্সফলেহি ৰুক্খেহি, সমন্তা পৰিৱাৰিতো.

৭৯৩. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

সা দেৱতা ব্যাকাসি.

৭৮৩. তত্থ মহল্লকোতি মহন্তো আযামৱিত্থাৰেহি উব্বেধেন চ ৱিপুলো, উড়াৰতমোতি অত্থো. অচ্ছৰাগণঘোসিতোতি তং পমোদিতুং সঙ্গীতিৱসেন চেৱ পিযসল্লাপৱসেন চ অচ্ছৰাসঙ্ঘেন সমুগ্ঘোসিতো.

৭৮৪. পদীপো চেত্থ জলতীতি সূৰিযৰস্মিসমুজ্জলকিৰণৱিতানো ৰতনপ্পদীপো চ এত্থ এতস্মিং পাসাদে অভিজলতি. দুস্সফলেহীতি দুস্সানি ফলানি এতেসন্তি দুস্সফলা. তেহি সমুগ্গিৰিযমানদিব্বৱত্থেহীতি অত্থো.

৭৮৯. কাৰেন্তে নিট্ঠিতে মহেতি কতপৰিযোসিতস্স ৱিহাৰস্স মহে পূজায কৰীযমানায চ. কত্ৱা দুস্সমযে ফলেতি দুস্সেযেৱ তেসং অম্বানং ফলং কত্ৱা.

৭৯০. গণুত্তমন্তি গণানং উত্তমং ভগৱতো সাৱকসঙ্ঘং. নিয্যাদেসিন্তি সম্পটিচ্ছাপেসিং, অদাসিন্তি অত্থো. সেসং ৱুত্তনযমেৱ.

অম্বৱিমানৱণ্ণনা নিট্ঠিতা.