৭. চতুৰিত্থিৱিমানৱণ্ণনা

অভিক্কন্তেন ৱণ্ণেনাতি চতুৰিত্থিৱিমানং. তস্স কা উপ্পত্তি? ভগৱতি সাৱত্থিযং ৱিহৰন্তে আযস্মা মহামোগ্গল্লানো হেট্ঠা ৱুত্তনযেন দেৱচাৰিকং চৰন্তো তাৱতিংসভৱনং গতো. সো তত্থ পটিপাটিযা ঠিতেসু চতূসু ৱিমানেসু চতস্সো দেৱধীতৰো পচ্চেকং অচ্ছৰাসহস্সপৰিৱাৰা দিব্বসম্পত্তিং অনুভৱন্তিযো দিস্ৱা তাহি পুব্বে কতকম্মং পুচ্ছন্তো –

৭৫৫. ‘‘অভিক্কন্তেন ৱণ্ণেন…পে…ৱণ্ণো চ তে সব্বদিসা পভাসতী’’তি. –

ইমাহি গাথাহি পটিপাটিযা পুচ্ছি. তাপি তস্স পুচ্ছানন্তৰং পটিপাটিযা ব্যাকৰিংসু. তং দস্সেতুং –

৭৫৮. ‘‘সা দেৱতা অত্তমনা…পে…যস্স কম্মস্সিদং ফল’’ন্তি. –

অযং গাথা ৱুত্তা.

তা কিৰ কস্সপস্স ভগৱতো কালে এসিকানামকে ৰট্ঠে পণ্ণকতে নাম নগৰে কুলগেহে নিব্বত্তা ৱযপ্পত্তা তস্মিংযেৱ নগৰে পতিকুলং গতা সমগ্গৱাসং ৱসন্তি. তাসু একা অঞ্ঞতৰং পিণ্ডচাৰিকং ভিক্খুং দিস্ৱা পসন্নচিত্তা ইন্দীৱৰকলাপং অদাসি, অপৰা অঞ্ঞস্স নীলুপ্পলহত্থকং অদাসি, অপৰা পদুমহত্থকং অদাসি, অপৰা সুমনমকুড়ানি অদাসি. তা অপৰেন সমযেন কালং কত্ৱা তাৱতিংসভৱনে নিব্বত্তিংসু, তাসং অচ্ছৰাসহস্সং পৰিৱাৰো অহোসি. তা তত্থ যাৱতাযুকং দিব্বসম্পত্তিং অনুভৱিত্ৱা ততো চুতা তস্সেৱ কম্মস্স ৱিপাকাৱসেসেন অপৰাপৰং তত্থেৱ সংসৰন্তিযো ইমস্মিং বুদ্ধুপ্পাদে তত্থেৱ উপ্পন্না ৱুত্তনযেন আযস্মতা মহামোগ্গল্লানেন পুচ্ছিতা. তাসু একা অত্তনা কতং পুব্বকম্মং থেৰস্স কথেন্তী –

৭৫৯. ‘‘ইন্দীৱৰানং হত্থকং অহমদাসিং, ভিক্খুনো পিণ্ডায চৰন্তস্স;

এসিকানং উণ্ণতস্মিং, নগৰৱৰে পণ্ণকতে ৰম্মে.

৭৬০. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

আহ. অপৰা –

৭৬৬. ‘‘নীলুপ্পলহত্থকং অহমদাসিং, ভিক্খুনো পিণ্ডায চৰন্তস্স;

এসিকানং উণ্ণতস্মিং, নগৰৱৰে পণ্ণকতে ৰম্মে.

৭৬৭. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

আহ. অপৰা –

৭৭৩. ‘‘ওদাতমূলকং হৰিতপত্তং, উদকস্মিং সৰে জাতং অহমদাসিং;

ভিক্খুনো পিণ্ডায চৰন্তস্স, এসিকানং উণ্ণতস্মিং;

নগৰৱৰে পণ্ণকতে ৰম্মে.

৭৭৪. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

আহ. অপৰা –

৭৮০. ‘‘অহং সুমনা সুমনস্স সুমনমকুড়ানি, দন্তৱণ্ণানি অহমদাসিং;

ভিক্খুনো পিণ্ডায চৰন্তস্স, এসিকানং উণ্ণতস্মিং;

নগৰৱৰে পণ্ণকতে ৰম্মে.

৭৮১. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

আহ.

৭৫৯. তত্থ ইন্দীৱৰানং হত্থকন্তি উদ্দালকপুপ্ফহত্থং ৱাতঘাতকপুপ্ফকলাপং. এসিকানন্তি এসিকাৰট্ঠস্স. উণ্ণতস্মিং নগৰৱৰেতি উণ্ণতে ভূমিপদেসে নিৱিট্ঠে মেঘোদৰং লিহন্তেহি ৱিয অচ্চুগ্গতেহি পাসাদকূটাগাৰাদীহি উণ্ণতে উত্তমনগৰে. পণ্ণকতেতি এৱংনামকে নগৰে.

৭৬৬. নীলুপ্পলহত্থকন্তি কুৱলযকলাপং.

৭৭৩. ওদাতমূলকন্তি সেতমূলং, ভিসমূলানং ধৱলতায ৱুত্তং, পদুমকলাপং সন্ধায ৱদতি. তেনাহ ‘‘হৰিতপত্ত’’ন্তিআদি. তত্থ হৰিতপত্তন্তি নীলপত্তং. অৱিজহিতমকুড়পত্তস্স হি পদুমস্স বাহিৰপত্তানি হৰিতৱণ্ণানি এৱ হোন্তি. উদকস্মিং সৰে জাতন্তি সৰে উদকম্হি জাতং, সৰোৰুহন্তি অত্থো.

৭৮০. সুমনাতি এৱংনামা. সুমনস্সাতি সুন্দৰচিত্তস্স. সুমনমকুড়ানীতি জাতিসুমনপুপ্ফমকুড়ানি. দন্তৱণ্ণানীতি সজ্জুকং উল্লিখিতহত্থিদন্তসদিসৱণ্ণানি.

এৱং তাহি অত্তনা কতকম্মে কথিতে থেৰো তাসং অনুপুব্বিং কথং কথেত্ৱা সচ্চানি পকাসেসি. সচ্চপৰিযোসানে সা সব্বাপি সহপৰিৱাৰা সোতাপন্না অহেসুং. থেৰো তং পৱত্তিং মনুস্সলোকং আগন্ত্ৱা ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা ধম্মদেসনা মহাজনস্স সাত্থিকা জাতাতি.

চতুৰিত্থিৱিমানৱণ্ণনা নিট্ঠিতা.