৬. ৱিহাৰৱিমানৱণ্ণনা

অভিক্কন্তেন ৱণ্ণেনাতি ৱিহাৰৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন ৱিসাখা মহাউপাসিকা অঞ্ঞতৰস্মিং উস্সৱদিৱসে উয্যানে ৱিচৰণত্থং সহাযিকাহি পৰিজনেন চ উস্সাহিতা সুন্হাতানুলিত্তা সুভোজনং ভুঞ্জিত্ৱা মহালতাপসাধনং পিড়ন্ধিত্ৱা পঞ্চমত্তেহি সহাযিকাসতেহি পৰিৱাৰিতা মহন্তেন ইস্সৰিযেন মহতা পৰিচ্ছেদেন গেহতো নিক্খম্ম উয্যানং উদ্দিস্স গচ্ছন্তী চিন্তেসি ‘‘বালদাৰিকায ৱিয কিং মে মোঘকীড়িতেন, হন্দাহং ৱিহাৰং গন্ত্ৱা ভগৱন্তং মনোভাৱনীযে চ অয্যে ৱন্দিস্সামি, ধম্মঞ্চ সোস্সামী’’তি ৱিহাৰং গন্ত্ৱা একমন্তে ঠত্ৱা মহালতাপিড়ন্ধনং ওমুঞ্চিত্ৱা তং দাসিযা হত্থে দত্ৱা ভগৱন্তং ৱন্দিত্ৱা একমন্তং নিসীদি. তস্সা ভগৱা ধম্মং দেসেসি.

সা ধম্মং সুত্ৱা ভগৱন্তং ৱন্দিত্ৱা পদক্খিণং কত্ৱা মনোভাৱনীযে চ ভিক্খূ ৱন্দিত্ৱা ৱিহাৰতো নিক্খমিত্ৱা থোকং গন্ত্ৱা দাসিং আহ ‘‘হন্দ জে আভৰণং পিড়ন্ধিস্সামী’’তি. সা তং ভণ্ডিকং কত্ৱা বন্ধিত্ৱা ৱিহাৰে ঠপেত্ৱা তহং তহং ৱিচৰিত্ৱা গমনকালে ৱিস্সৰিত্ৱা গতত্তা ‘‘ৱিস্সৰিতং মযা, তিট্ঠ অয্যে আহৰিস্সামী’’তি নিৱত্তিতুকামা অহোসি. ৱিসাখা ‘‘সচে জে ৱিহাৰে ঠপেত্ৱা ৱিস্সৰিতং, তস্স ৱিহাৰস্সেৱ অত্থায তং পৰিচ্চজিস্সামী’’তি ৱিহাৰং গন্ত্ৱা ভগৱন্তং উপসঙ্কমিত্ৱা ৱন্দিত্ৱা অত্তনো অধিপ্পাযং পৱেদেন্তী ‘‘ৱিহাৰং, ভন্তে, কাৰেস্সামি, অধিৱাসেতু মে ভগৱা অনুকম্পং উপাদাযা’’তি আহ. অধিৱাসেসি ভগৱা তুণ্হীভাৱেন.

সা তং পিড়ন্ধনং সতসহস্সাধিকনৱকোটিঅগ্ঘনকং ৱিস্সজ্জেত্ৱা আযস্মতা মহামোগ্গল্লানেন নৱকম্মাধিট্ঠাযকেন সুৱিভত্তভিত্তিথম্ভতুলাগোপানসিকণ্ণিকদ্ৱাৰবাহৱাতপান সোপানাদিগেহাৱযৱং মনোহৰং সুৱিকপ্পিতকট্ঠকম্মৰমণীযং সুপৰিকম্মকতসুধাকম্মং মনুঞ্ঞং সুৱিৰচিতমালাকম্মলতাকম্মাদিচিত্তকম্মৱিচিত্তং সুপৰিনিট্ঠিতমণিকুট্টিম সদিসভূমিতলং দেৱৱিমানসদিসং হেট্ঠাভূমিযং পঞ্চ গব্ভসতানি, উপৰিভূমিযং পঞ্চ গব্ভসতানীতি গব্ভসহস্সপটিমণ্ডিতং বুদ্ধস্স ভগৱতো ভিক্খুসঙ্ঘস্স চ ৱসনানুচ্ছৱিকং মহন্তং পাসাদং তস্স পৰিৱাৰপাসাদসহস্সঞ্চ তেসং পৰিৱাৰভাৱেন কুটিমণ্ডপচঙ্কমনাদীনি চ কাৰেন্তী নৱহি মাসেহি ৱিহাৰং নিট্ঠাপেসি. পৰিনিট্ঠিতে চ ৱিহাৰে নৱহেৱ হিৰঞ্ঞকোটীহি ৱিহাৰমহং কাৰেন্তী পঞ্চমত্তেহি সহাযিকাসতেহি সদ্ধিং পাসাদং অভিৰুহিত্ৱা তস্স সম্পত্তিং দিস্ৱা সোমনস্সজাতা সহাযিকা আহ ‘‘ইমং এৱৰূপং পাসাদং কাৰেন্তিযা যং মযা পুঞ্ঞং পসুতং, তং অনুমোদথ, পত্তিদানং ৱো দম্মী’’তি. ‘‘অহো সাধু অহো সাধূ’’তি পসন্নচিত্তা সব্বাপি অনুমোদিংসু.

তত্থ অঞ্ঞতৰা উপাসিকা ৱিসেসতো তং পত্তিদানং মনসাকাসি. সা ন চিৰস্সেৱ কালং কত্ৱা তাৱতিংসেসু নিব্বত্তি. তস্সা পুঞ্ঞানুভাৱেন অনেককূটাগাৰপাকাৰউয্যানপোক্খৰণিআদিপটিমণ্ডিতং সোড়সযোজনাযামৱিত্থাৰব্বেধং অত্তনো পভায যোজনসতং ফৰন্তং আকাসচাৰিং মহন্তং ৱিমানং পাতুৰহোসি. সা গচ্ছন্তীপি অচ্ছৰাসহস্সপৰিৱাৰা সহ ৱিমানেন গচ্ছতি. ৱিসাখা পন মহাউপাসিকা ৱিপুলপৰিচ্চাগতায সদ্ধাসম্পত্তিযা চ নিম্মানৰতীসু নিব্বত্তিত্ৱা সুনিম্মিতদেৱৰাজস্স অগ্গমহেসিভাৱং সম্পাপুণি. অথাযস্মা অনুৰুদ্ধো দেৱচাৰিকং চৰন্তো তং ৱিসাখায সহাযিকং তাৱতিংসভৱনে উপ্পন্নং দিস্ৱা –

৭২৯. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

৭৩০. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছৰন্তি, সৱনীযা মনোৰমা.

৭৩১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৱাযন্তি, সুচিগন্ধা মনোৰমা.

৭৩২. ‘‘ৱিৱত্তমানা কাযেন, যা ৱেণীসু পিড়ন্ধনা;

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৭৩৩. ‘‘ৱটংসকা ৱাতধুতা, ৱাতেন সম্পকম্পিতা;

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৭৩৪. ‘‘যাপি তে সিৰস্মিং মালা, সুচিগন্ধা মনোৰমা;

ৱাতি গন্ধো দিসা সব্বা, ৰুক্খো মঞ্জূসকো যথা.

৭৩৫. ‘‘ঘাযসে তং সুচিগন্ধং, ৰূপং পস্সসি অমানুসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি. –

ইমাহি গাথাহি পুচ্ছি. সাপি তস্স এৱং ব্যাকাসি –

৭৩৬. ‘‘সাৱত্থিযং ময্হং সখী ভদন্তে, সঙ্ঘস্স কাৰেসি মহাৱিহাৰং;

তত্থপ্পসন্না অহমানুমোদিং, দিস্ৱা অগাৰঞ্চ পিযঞ্চ মেতং.

৭৩৭. ‘‘তাযেৱ মে সুদ্ধনুমোদনায, লদ্ধং ৱিমানব্ভুতদস্সনেয্যং;

সমন্ততো সোড়সযোজনানি, ৱেহাযসং গচ্ছতি ইদ্ধিযা মম.

৭৩৮. ‘‘কূটাগাৰা নিৱেসা মে, ৱিভত্তা ভাগসো মিতা;

দদ্দল্লমানা আভন্তি, সমন্তা সতযোজনং.

৭৩৯. ‘‘পোক্খৰঞ্ঞো চ মে এত্থ, পুথুলোমনিসেৱিতা;

অচ্ছোদকা ৱিপ্পসন্না, সোণ্ণৱালুকসন্থতা.

৭৪০. ‘‘নানাপদুমসঞ্ছন্না, পুণ্ডৰীকসমোততা;

সুৰভী সম্পৱাযন্তি, মনুঞ্ঞা মালুতেৰিতা.

৭৪১. ‘‘জম্বুযো পনসা তালা, নাড়িকেৰৱনানি চ;

অন্তোনিৱেসনে জাতা, নানাৰুক্খা অৰোপিমা.

৭৪২. ‘‘নানাতূৰিযসঙ্ঘুট্ঠং, অচ্ছৰাগণঘোসিতং;

যোপি মং সুপিনে পস্সে, সোপি ৱিত্তো সিযা নৰো.

৭৪৩. ‘‘এতাদিসং অব্ভুতদস্সনেয্যং, ৱিমানং সব্বসো পভং;

মম কম্মে হি নিব্বত্তং, অলং পুঞ্ঞানি কাতৱে’’তি.

৭৩৬. তত্থ সাৱত্থিযং ময্হং সখী ভদন্তে, সঙ্ঘস্স কাৰেসি মহাৱিহাৰন্তি ভন্তে অনুৰুদ্ধ, সাৱত্থিযা সমীপে পাচীনপস্সে ময্হং মম সক্খী সহাযিকা ৱিসাখা মহাউপাসিকা আগতাগতং চাতুদ্দিসং ভিক্খুসঙ্ঘং উদ্দিস্স নৱহিৰঞ্ঞকোটিপৰিচ্চাগেন পুব্বাৰামং নাম মহন্তং ৱিহাৰং কাৰেসি. তত্থপ্পসন্না অহমানুমোদিন্তি তস্মিং ৱিহাৰে কতপৰিযোসিতে সঙ্ঘস্স নিয্যাদিযমানে তায কতে পত্তিদানে ‘‘অহো ঠানে ৱত পৰিচ্চাগো কতো’’তি পসন্না ৰতনত্তযে কম্মফলে চ সঞ্জাতপসাদা অহং অনুমোদিং. ৱত্থুৱসেন তস্সা অনুমোদনায উড়াৰভাৱং দস্সেতুং ‘‘দিস্ৱা অগাৰঞ্চ পিযঞ্চ মেত’’ন্তি আহ. সহস্সগব্ভং অতিৱিয ৰমণীযং দেৱৱিমানসদিসং তঞ্চ অগাৰং মহন্তং পাসাদং পিযঞ্চ মে বুদ্ধপ্পমুখং সঙ্ঘং উদ্দিস্স তাদিসং মহন্তং ধনপৰিচ্চাগং দিস্ৱা অনুমোদিন্তি যোজনা.

৭৩৭. তাযেৱ মে সুদ্ধনুমোদনাযাতি যথাৱুত্তায দেয্যধম্মপৰিচ্চাগাভাৱেন সুদ্ধায কেৱলায অনুমোদনাযেৱ. লদ্ধং ৱিমানব্ভুতদস্সনেয্যন্তি ময্হং পুব্বে ঈদিসস্স অভূতপুব্বতায অব্ভুতং সমন্তভদ্দকভাৱেন অতিৱিয সুৰূপতায চ দস্সনেয্যং ইমং ৱিমানং লদ্ধং অধিগতং. এৱং তস্স ৱিমানস্স অভিৰূপতং দস্সেত্ৱা ইদানি পমাণমহত্তং পভাৱমহত্তং উপভোগৱত্থুমহত্তঞ্চ দস্সেতুং ‘‘সমন্ততো সোড়সযোজনানী’’তিআদি ৱুত্তং. তত্থ ইদ্ধিযা মমাতি মম পুঞ্ঞিদ্ধিযা.

৭৩৯. পোক্খৰঞ্ঞোতি পোক্খৰণিযো. পুথুলোমনিসেৱিতাতি দিব্বমচ্ছেহি উপসেৱিতা.

৭৪০. নানাপদুমসঞ্ছন্নাতি সতপত্তসহস্সপত্তাদিভেদেহি নানাৱিধেহি ৰত্তপদুমেহি ৰত্তকমলেহি চ সঞ্ছাদিতা. পুণ্ডৰীকসমোততাতি নানাৱিধেহি সেতকমলেহি সমন্ততো অৱততা, নানাৰুক্খা অৰোপিমা সুৰভী সম্পৱাযন্তীতি যোজনা.

৭৪২. সোপীতি সো সুপিনদস্সাৱীপি. ৱিত্তোতি তুট্ঠো.

৭৪৩. সব্বসো পভন্তি সমন্ততো ওভাসমানং. কম্মে হীতি কম্মনিমিত্তং. হীতি নিপাতমত্তং. চেতনানং ৱা অপৰাপৰুপ্পত্তিযা বহুভাৱতো ‘‘কম্মেহী’’তি ৱুত্তং. অলন্তি যুত্তং. কাতৱেতি কাতুং.

ইদানি থেৰো ৱিসাখায নিব্বত্তট্ঠানং কথাপেতুকামো ইমং গাথমাহ –

৭৪৪. ‘‘তাযেৱ তে সুদ্ধনুমোদনায,

লদ্ধং ৱিমানব্ভুতদস্সনেয্যং;

যা চেৱ সা দানমদাসি নাৰী,

তস্সা গতিং ব্ৰূহি কুহিং উপ্পন্না সা’’তি.

৭৪৪. তত্থ যা চেৱ সা দানমদাসি নাৰীতি যস্স দানস্স অনুমোদনায ত্ৱং ঈদিসং সম্পত্তিং পটিলভি, তং দানং যা চেৱ সা নাৰী অদাসীতি ৱিসাখং মহাউপাসিকং সন্ধায ৱদতি. তায এৱ দেৱতায তস্সা সম্পত্তিং কথাপেতুকামো আহ ‘‘তস্সা গতিং ব্ৰূহি কুহিং উপ্পন্না সা’’তি. তস্সা গতিন্তি তায নিব্বত্তদেৱগতিং.

ইদানি থেৰেন পুচ্ছিতমত্থং দস্সেন্তী আহ –

৭৪৫. ‘‘যা সা অহু ময্হং সখী ভদন্তে, সঙ্ঘস্স কাৰেসি মহাৱিহাৰং;

ৱিঞ্ঞাতধম্মা সা অদাসি দানং, উপ্পন্না নিম্মানৰতীসু দেৱেসু.

৭৪৬. ‘‘পজাপতী তস্স সুনিম্মিতস্স,

অচিন্তিযো কম্মৱিপাক তস্সা;

যমেতং পুচ্ছসি ‘কুহিং উপ্পন্না সা’তি,

তং তে ৱিযাকাসিং অনঞ্ঞথা অহ’’ন্তি.

৭৪৫. তত্থ ৱিঞ্ঞাতধম্মাতি ৱিঞ্ঞাতসাসনধম্মা, পটিৱিদ্ধচতুসচ্চধম্মাতি অত্থো.

৭৪৬. সুনিম্মিতস্সাতি সুনিম্মিতস্স দেৱৰাজস্স. অচিন্তিযো কম্মৱিপাক তস্সাতি ৱিভত্তিলোপং কত্ৱা নিদ্দেসো, তস্সা মম সখিযা নিব্বানৰতীসু নিব্বত্তায কম্মৱিপাকো পুঞ্ঞকম্মস্স ৱিপাকভূতা দিব্বসম্পত্তি অচিন্তিযা অপ্পমেয্যাতি অত্থো. অনঞ্ঞথাতি অৱিপৰীতং যথাসভাৱতো. কথং পনাযং তস্সা সম্পত্তিং অঞ্ঞাসীতি? সুভদ্দা ৱিয ভদ্দায, ৱিসাখাপি দেৱধীতা ইমিস্সা সন্তিকং অগমাসি.

ইদানি দেৱধীতা থেৰং অঞ্ঞেসম্পি দানসমাদপনে নিযোজেন্তী ইমাহি গাথাহি ধম্মং দেসেসি –

৭৪৭. ‘‘তেনহঞ্ঞেপি সমাদপেথ, সঙ্ঘস্স দানানি দদাথ ৱিত্তা;

ধম্মঞ্চ সুণাথ পসন্নমানসা, সুদুল্লভো লদ্ধো মনুস্সলাভো.

৭৪৮. ‘‘যং মগ্গং মগ্গাধিপতী অদেসযি, ব্ৰহ্মস্সৰো কঞ্চনসন্নিভত্তচো;

সঙ্ঘস্স দানানি দদাথ ৱিত্তা, মহপ্ফলা যত্থ ভৱন্তি দক্খিণা.

৭৪৯. ‘‘যে পুগ্গলা অট্ঠ সতং পসত্থা, চত্তাৰি এতানি যুগানি হোন্তি;

তে দক্খিণেয্যা সুগতস্স সাৱকা, এতেসু দিন্নানি মহপ্ফলানি.

৭৫০. ‘‘চত্তাৰো চ পটিপন্না, চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

৭৫১. ‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, সঙ্ঘে দিন্নং মহপ্ফলং.

৭৫২. ‘‘এসো হি সঙ্ঘো ৱিপুলো মহগ্গতো, এসপ্পমেয্যো উদধীৱ সাগৰো;

এতে হি সেট্ঠা নৰৱীৰসাৱকা, পভঙ্কৰা ধম্মমুদীৰযন্তি.

৭৫৩. ‘‘তেসং সুদিন্নং সুহুতং সুযিট্ঠং, যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা, মহপ্ফলা লোকৱিদূন ৱণ্ণিতা.

৭৫৪. ‘‘এতাদিসং যঞ্ঞমনুস্সৰন্তা, যে ৱেদজাতা ৱিচৰন্তি লোকে;

ৱিনেয্য মচ্ছেৰমলং সমূলং, অনিন্দিতা সগ্গমুপেন্তি ঠান’’ন্তি.

৭৪৭. তত্থ তেনহঞ্ঞেপীতি তেনহি অঞ্ঞেপি. তেনাতি চ তেন কাৰণেন, হীতি নিপাতমত্তং. ‘‘সমাদপেথা’’তি ৱত্ৱা সমাদপনাকাৰং দস্সেতুং ‘‘সঙ্ঘস্স দানানি দদাথা’’তিআদি ৱুত্তং. অট্ঠহি অক্খণেহি ৱজ্জিতং মনুস্সভাৱং সন্ধাযাহ ‘‘সুদুল্লভো লদ্ধো মনুস্সলাভো’’তি. তত্থ অট্ঠ অক্খণা নাম তযো অপাযা অৰূপা অসঞ্ঞসত্তা পচ্চন্তদেসো ইন্দ্ৰিযানং ৱেকল্লং নিযতমিচ্ছাদিট্ঠিকতা অপাতুভাৱো বুদ্ধস্সাতি.

৭৪৮. যং মগ্গন্তি যং খেত্তৱিসেসে কতং দানং, তং একন্তেন সুগতিসম্পাপনতো সুগতিগামিমগ্গং অপাযমগ্গতো জগ্ঘমগ্গাদিতো চ অতিৱিয সেট্ঠভাৱেন মগ্গাধিপন্তি কত্ৱা. দানম্পি হি সদ্ধাহিৰিযো ৱিয ‘‘দেৱলোকগামিমগ্গো’’তি ৱুচ্চতি. যথাহ –

‘‘সদ্ধা হিৰিযং কুসলঞ্চ দানং, ধম্মা এতে সপ্পুৰিসানুযাতা;

এতঞ্হি মগ্গং দিৱিযং ৱদন্তি, এতেন হি গচ্ছতি দেৱলোক’’ন্তি.(অ. নি. ৮.৩২; কথা. ৪৮০);

‘‘মগ্গাধিপতী’’তি ৱা পাঠো, তস্স অৰিযমগ্গেন সদেৱকস্স লোকস্স অধিপতিভূতো সত্থাতি অত্থো দট্ঠব্বো. সঙ্ঘস্স দানানি দদাথাতিআদিনা পুনপি দক্খিণেয্যেসু দানসংৱিভাগে নিযোজেন্তী আহ.

৭৪৯. ইদানি তং দক্খিণেয্যং অৰিযসঙ্ঘং সৰূপতো দস্সেন্তী ‘‘যে পুগ্গলা অট্ঠ সতং পসত্থা’’তি গাথমাহ. তত্থ যেতি অনিযমিতনিদ্দেসো. পুগ্গলাতি সত্তা. অট্ঠাতি তেসং গণনপৰিচ্ছেদো. তে হি চত্তাৰো চ পটিপন্না চত্তাৰো চ ফলে ঠিতাতি অট্ঠ হোন্তি. সতং পসত্থাতি সপ্পুৰিসেহি বুদ্ধপচ্চেকবুদ্ধসাৱকেহি অঞ্ঞেহি চ দেৱমনুস্সেহি পস্সত্থা. কস্মা? সহজাতসীলাদিগুণযোগতো. তেসঞ্হি চম্পকবকুলকুসুমাদীনং ৱিয সহজাতৱণ্ণগন্ধাদযো সহজাতসীলসমাধিআদযো গুণা, তেন তে ৱণ্ণগন্ধাদিসম্পন্নানি ৱিয পুপ্ফানি দেৱমনুস্সানং সতং পিযা মনাপা পাসংসিযা চ হোন্তি. তেন ৱুত্তং ‘‘যে পুগ্গলা অট্ঠ সতং পসত্থা’’তি. তে পন সঙ্খেপতো সোতাপত্তিমগ্গট্ঠো ফলট্ঠোতি একং যুগং, এৱং যাৱ অৰহত্তমগ্গট্ঠো ফলট্ঠোতি একং যুগন্তি চত্তাৰি যুগানি হোন্তি. তেনাহ ‘‘চত্তাৰি এতানি যুগানি হোন্তি তে দক্খিণেয্যা’’তি. তেতি পুব্বে অনিযমতো উদ্দিট্ঠানং নিযমেত্ৱা দস্সনং. তে হি সব্বেপি কম্মং কম্মফলঞ্চ সদ্দহিত্ৱা দাতব্বদেয্যধম্মসঙ্খাতং দক্খিণং অৰহন্তীতি দক্খিণেয্যা গুণৱিসেসযোগেন দানস্স মহপ্ফলভাৱসাধনতো. সুগতস্স সাৱকাতি সম্মাসম্বুদ্ধস্স ধম্মসৱনন্তে অৰিযায জাতিযা জাততায তং ধম্মং সুণন্তীতি সাৱকা. এতেসু দিন্নানি মহপ্ফলানীতি এতেসু সুগতস্স সাৱকেসু অপ্পকানিপি দানানি দিন্নানি পটিগ্গাহকতো দক্খিণাৱিসুদ্ধিযা মহপ্ফলানি হোন্তি. তেনাহ ভগৱা ‘‘যাৱতা, ভিক্খৱে, সঙ্ঘা ৱা গণা ৱা, তথাগতসাৱকসঙ্ঘো তেসং অগ্গমক্খাযতী’’তিআদি (অ. নি. ৪.৩৪; ৫.৩২; ইতিৱু. ৯০).

৭৫০. চত্তাৰো চ পটিপন্নাতিআদি হেট্ঠা ৱুত্তত্থমেৱ.

ইধ পন আযস্মা অনুৰুদ্ধো অত্তনা দেৱতায চ ৱুত্তমত্থং মনুস্সলোকং আগন্ত্ৱা ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

ৱিহাৰৱিমানৱণ্ণনা নিট্ঠিতা.