১১. ৱন্দনৱিমানৱণ্ণনা

অভিক্কন্তেন ৱণ্ণেনাতি ৱন্দনৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন সমযেন সম্বহুলা ভিক্খূ অঞ্ঞতৰস্মিং গামকাৱাসে ৱস্সং ৱসিত্ৱা ৱুত্থৱস্সা পৱাৰেত্ৱা সেনাসনং পটিসামেত্ৱা পত্তচীৱৰমাদায সাৱত্থিং উদ্দিস্স ভগৱন্তং দস্সনত্থায গচ্ছন্তা অঞ্ঞতৰস্স গামস্স মজ্ঝেন অতিক্কমন্তি. তত্থ অঞ্ঞতৰা ইত্থী তে ভিক্খূ দিস্ৱা পসন্নচিত্তা সঞ্জাতগাৰৱবহুমানা পঞ্চপতিট্ঠিতেন ৱন্দিত্ৱা সিৰস্মিং অঞ্জলিং পগ্গয্হ যাৱ দস্সনূপচাৰা পসাদসোম্মানি অক্খীনি উম্মীলেত্ৱা ওলোকেন্তী অট্ঠাসি. সা অপৰেন সমযেন কালং কত্ৱা তাৱতিংসেসু নিব্বত্তি. অথ নং তত্থ দিব্বসম্পত্তিং অনুভৱন্তিং আযস্মা মহামোগ্গল্লানো ইমাহি গাথাহি পটিপুচ্ছি –

৮১৯. ‘‘অভিক্কন্তেন ৱণ্ণেন…পে…ৱণ্ণো চ তে সব্বদিসা পভাসতী’’তি.

৮২২. ‘‘সা দেৱতা অত্তমনা…পে… যস্স কম্মস্সিদং ফলং’’.

৮২৩. ‘‘অহং মনুস্সেসু মনুস্সভূতা, দিস্ৱান সমণে সীলৱন্তে;

পাদানি ৱন্দিত্ৱা মনং পসাদযিং, ৱিত্তা চহং অঞ্জলিকং অকাসিং.

৮২৪. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

ইমাহি গাথাহি ব্যাকাসি.

৮২৩. তত্থ সমণেতি সমিতপাপে. সীলৱন্তেতি সীলগুণযুত্তে. মনং পসাদযিন্তি ‘‘সাধুৰূপা ৱতিমে অয্যা ধম্মচাৰিনো সমচাৰিনো ব্ৰহ্মচাৰিনো’’তি তেসং গুণে আৰব্ভ চিত্তং পসাদেসিং. ৱিত্তা চহং অঞ্জলিকং অকাসিন্তি তুট্ঠা সোমনস্সজাতা অহং ৱন্দিং. পেসলানং ভিক্খূনং পসাদৱিকসিতানি অক্খীনি উম্মীলেত্ৱা দস্সনমত্তম্পি ইমেসং সত্তানং বহূপকাৰং, পগেৱ ৱন্দনাতি. তেনাহ ‘‘তেন মেতাদিসো ৱণ্ণো’’তিআদি. সেসং ৱুত্তনযমেৱ.

ৱন্দনৱিমানৱণ্ণনা নিট্ঠিতা.