১০. উচ্ছুৱিমানৱণ্ণনা

ওভাসযিত্ৱা পথৱিং সদেৱকন্তি উচ্ছুৱিমানং. তং হেট্ঠা উচ্ছুৱিমানেন পাড়িতো চ অট্ঠুপ্পত্তিতো চ সদিসমেৱ. কেৱলং তত্থ সস্সু সুণিসং পীঠকেন পহৰিত্ৱা মাৰেসি, ইধ পন লেড্ডুনাতি অযমেৱ ৱিসেসো. ৱত্থুনো পন ভিন্নত্তা উভযম্পি ৱিসুংযেৱ সঙ্গহং আৰুড়্হন্তি ৱেদিতব্বং.

৮০৮. ‘‘ওভাসযিত্ৱা পথৱিং সদেৱকং, অতিৰোচসি চন্দিমসূৰিযা ৱিয;

সিৰিযা চ ৱণ্ণেন যসেন তেজসা, ব্ৰহ্মাৱ দেৱে তিদসে সহিন্দকে.

৮০৯. ‘‘পুচ্ছামি তং উপ্পলমালধাৰিনী, আৱেড়িনী কঞ্চনসন্নিভত্তচে;

অলঙ্কতে উত্তমৱত্থধাৰিনী, কা ত্ৱং সুভে দেৱতে ৱন্দসে মমং.

৮১০. ‘‘কিং ত্ৱং পুৰে কম্মমকাসি অত্তনা, মনুস্সভূতা পুৰিমায জাতিযা;

দানং সুচিণ্ণং অথ সীলসঞ্ঞমং, কেনুপপন্না সুগতিং যসস্সিনী;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি. –

আযস্মা মহামোগ্গল্লানত্থেৰো পুচ্ছি. ততো দেৱতা ইমাহি গাথাহি ব্যাকাসি –

৮১১. ‘‘ইদানি ভন্তে ইমমেৱ গামং, পিণ্ডায অম্হাকং ঘৰং উপাগমি;

ততো তে উচ্ছুস্স অদাসিং খণ্ডিকং, পসন্নচিত্তা অতুলায পীতিযা.

৮১২. ‘‘সস্সু চ পচ্ছা অনুযুঞ্জতে মমং, কহং নু উচ্ছুং ৱধুকে অৱাকিৰি;

ন ছড্ডিতং নো পন খাদিতং মযা, সন্তস্স ভিক্খুস্স সযং অদাসহং.

৮১৩. ‘‘‘তুয্হং ন্ৱিদং ইস্সৰিযং অথো মম’, ইতিস্সা সস্সু পৰিভাসতে মমং;

লেড্ডুং গহেত্ৱা পহাৰং অদাসি মে, ততো চুতা কালকতাম্হি দেৱতা.

৮১৪. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৮১৫. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱিন্দগুত্তা তিদসেহি ৰক্খিতা, সমপ্পিতা কামগুণেহি পঞ্চহি.

৮১৬. ‘‘এতাদিসং পুঞ্ঞফলং অনপ্পকং, মহাৱিপাকা মম উচ্ছুদক্খিণা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৮১৭. ‘‘এতাদিসং পুঞ্ঞফলং অনপ্পকং, মহাজুতিকা মম উচ্ছুদক্খিণা;

দেৱিন্দগুত্তা তিদসেহি ৰক্খিতা, সহস্সনেত্তোৰিৱ নন্দনে ৱনে.

৮১৮. ‘‘তুৱঞ্চ ভন্তে অনুকম্পকং ৱিদুং, উপেচ্চ ৱন্দিং কুসলঞ্চ পুচ্ছিসং;

ততো তে উচ্ছুস্স অদাসিং খণ্ডিকং, পসন্নচিত্তা অতুলায পীতিযা’’তি.

সেসং ৱুত্তসদিসমেৱাতি.

উচ্ছুৱিমানৱণ্ণনা নিট্ঠিতা.