৭. পেসৱতীৱিমানৱণ্ণনা

ফলিকৰজতহেমজালছন্নন্তি পেসৱতীৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন মগধেসু নালকগামে একস্মিং গহপতিমহাসাৰকুলে পেসৱতী নাম কুলসুণ্হা অহোসি. সা কিৰ কস্সপস্স ভগৱতো যোজনিকে কনকথূপে কযিৰমানে দাৰিকা হুত্ৱা মাতৰা সদ্ধিং চেতিযট্ঠানং গন্ত্ৱা মাতৰং পুচ্ছি ‘‘কিং ইমে, অম্ম, কৰোন্তী’’তি? ‘‘চেতিযং কাতুং সুৱণ্ণিট্ঠকা কৰোন্তী’’তি. তং সুত্ৱা দাৰিকা পসন্নমানসা মাতৰং আহ – ‘‘অম্ম, মম গীৱায ইদং সোৱণ্ণমযং খুদ্দকপিড়ন্ধনং অত্থি, ইমাহং চেতিযত্থায দেমী’’তি. মাতা ‘‘সাধু দেহী’’তি ৱত্ৱা তং গীৱতো ওমুঞ্চিত্ৱা সুৱণ্ণকাৰস্স হত্থে অদাসি ‘‘ইদং ইমায দাৰিকায পৰিচ্চজিতং, ইমম্পি পক্খিপিত্ৱা ইট্ঠকং কৰোহী’’তি. সুৱণ্ণকাৰো তথা অকাসি. সা দাৰিকা অপৰভাগে কালং কত্ৱা তেনেৱ পুঞ্ঞকম্মেন দেৱলোকে নিব্বত্তিত্ৱা সুগতিযংযেৱ অপৰাপৰং সংসৰন্তী অম্হাকং ভগৱতো কালে নালকগামে নিব্বত্তা অনুক্কমেন দ্ৱাদসৱস্সিকা জাতা.

সা একদিৱসং মাতৰা পেসিতং মূলং গহেত্ৱা তেলত্থায অঞ্ঞতৰং আপণং অগমাসি. তস্মিঞ্চ আপণে অঞ্ঞতৰো কুটুম্বিযপুত্তো পিতৰা নিদহিত্ৱা ঠপিতং বহুং হিৰঞ্ঞসুৱণ্ণং মুত্তামণিৰতনানি চ গহেতুং উদ্ধৰন্তো আপণিকো কম্মবলেন কথলপাসাণসক্খৰৰূপেন উপট্ঠহন্তানি দিস্ৱা ততো একদেসং ‘‘পুঞ্ঞৱন্তানং ৱসেন হিৰঞ্ঞসুৱণ্ণাদি ভৱিস্সতী’’তি ৱীমংসিতুং ৰাসিং কত্ৱা ঠপেসি. অথ নং সা দাৰিকা দিস্ৱা ‘‘কস্মা আপণে ৰতনানি এৱং ঠপিতানি, ননু নাম সম্মদেৱ পটিসামেতব্বানী’’তি আহ. আপণিকো তং সুত্ৱা ‘‘মহাপুঞ্ঞা অযং দাৰিকা, ইমিস্সা ৱসেন সব্বমিদং হিৰঞ্ঞাদি এৱ হুত্ৱা অম্হাকং ৱিনিযোগং গমিস্সতি, সঙ্গণ্হিস্সামি ন’’ন্তি চিন্তেত্ৱা তস্সা মাতু সন্তিকং গন্ত্ৱা ‘‘ইমং দাৰিকং ময্হং পুত্তস্সত্থায দেহী’’তি ৱাৰেত্ৱা বহুধনং দত্ৱা আৱাহৱিৱাহং কত্ৱা তং অত্তনো গেহং আনেসি. অথস্সা সীলাচাৰং ঞত্ৱা ভণ্ডাগাৰং ৱিৱৰিত্ৱা ‘‘কিং এত্থ পস্সসী’’তি ৱত্ৱা তায ‘‘হিৰঞ্ঞসুৱণ্ণমণিমেৱ ৰাসিকতং পস্সামী’’তি ৱুত্তে ‘‘এতানি অম্হাকং কম্মবলেন অন্তৰধাযন্তানি তৱ পুঞ্ঞৱিসেসেন পুন ৱিসেসানি জাতানি, তস্মা ইতো পট্ঠায ইমস্মিং গেহে সব্বং ত্ৱংযেৱ ৱিচাৰেহি, তযা দিন্নমেৱ মযং পৰিভুঞ্জিস্সামা’’তি ৱত্ৱা ততো পভুতি তং ‘‘পেসৱতী’’তি ৱোহৰিংসু.

তেন চ সমযেন আযস্মা ধম্মসেনাপতি অত্তনো আযুসঙ্খাৰানং পৰিক্খীণভাৱং ঞত্ৱা ‘‘ময্হং মাতুযা ৰূপসাৰিব্ৰাহ্মণিযা পোসাৱনিকমূলং দত্ৱা পৰিনিব্বাযিস্সামী’’তি চিন্তেত্ৱা ভগৱন্তং উপসঙ্কমিত্ৱা পৰিনিব্বানং অনুজানাপেত্ৱা সত্থু আণায মহন্তং পাটিহাৰিযং দস্সেত্ৱা অনেকেহি থুতিসহস্সেহি ভগৱন্তং থোমেত্ৱা যাৱ দস্সনৱিসযাতিক্কমা অভিমুখোৱ অপক্কমিত্ৱা পুন ৱন্দিত্ৱা ভিক্খুসঙ্ঘপৰিৱুতো ৱিহাৰা নিক্খম্ম ভিক্খুসঙ্ঘস্স ওৱাদং দত্ৱা আযস্মন্তং আনন্দং সমস্সাসেত্ৱা চতস্সোপি পৰিসা নিৱত্তেত্ৱা অনুক্কমেন নালকগামং পত্ৱা মাতৰং সোতাপত্তিফলে পতিট্ঠাপেত্ৱা পচ্চূসসমযে জাতোৱৰকে পৰিনিব্বাযি. পৰিনিব্বুতস্স চস্স সৰীৰসক্কাৰকৰণৱসেন দেৱা চেৱ মনুস্সা চ সত্তাহং ৱীতিনামেসুং, অগৰুচন্দনাদীহি হত্থসতুব্বেধং চিতকমকংসু.

পেসৱতীপি থেৰস্স পৰিনিব্বানং সুত্ৱা ‘‘গন্তা পূজেস্সামী’’তি সুৱণ্ণপুপ্ফেহি গন্ধজাতেহি চ পূৰিতানি চঙ্কোটকানি গাহাপেত্ৱা গন্তুকামা সসুৰং আপুচ্ছিত্ৱা তেন ‘‘ত্ৱং গৰুভাৰা, তত্থ চ মহাজনসম্মদ্দো, পুপ্ফগন্ধানি পেসেত্ৱা ইধেৱ হোহী’’তি ৱুত্তাপি সদ্ধাজাতা ‘‘যদিপি মে তত্থ জীৱিতন্তৰাযো সিযা, গন্তাৱ পূজাসক্কাৰং কৰিস্সামী’’তি তং ৱচনং অগ্গহেত্ৱা সপৰিৱাৰা তত্থ গন্ত্ৱা গন্ধপুপ্ফাদীহি পূজেত্ৱা কতঞ্জলী অট্ঠাসি. তস্মিঞ্চ সমযে থেৰং পূজেতুং আগতানং ৰাজপৰিসানং হত্থী মত্তো হুত্ৱা তং পদেসং উপগঞ্ছি. তং দিস্ৱা মৰণভযভীতেসু মনুস্সেসু পলাযন্তেসু জনসম্মদ্দেন পতিতং পেসৱতিং মহাজনো অক্কমিত্ৱা মাৰেসি. সা পূজাসক্কাৰং কত্ৱা থেৰগতায সদ্ধায সম্পন্নচিত্তা এৱ কালং কত্ৱা তাৱতিংসভৱনে নিব্বত্তি, অচ্ছৰাসহস্সঞ্চস্সা পৰিৱাৰো অহোসি.

সা তাৱদেৱ অত্তনো দিব্বসম্পত্তিং ওলোকেত্ৱা ‘‘কীদিসেন নু খো পুঞ্ঞেন মযা এসা লদ্ধা’’তি, তস্সা হেতুং উপধাৰেন্তী থেৰং উদ্দিস্স কতং পূজাসক্কাৰং দিস্ৱা, ৰতনত্তযে অভিপ্পসন্নমানসা সত্থাৰং ৱন্দিতুং অচ্ছৰাসহস্সপৰিৱুতা সট্ঠিসকটভাৰালঙ্কাৰপটিমণ্ডিতত্তভাৱা সুমহতিযা দেৱিদ্ধিযা চন্দো ৱিয চ সূৰিযো ৱিয চ দস দিসা ওভাসযমানা সহ ৱিমানেন আগন্ত্ৱা ৱিমানতো ওৰুয্হ ভগৱন্তং ৱন্দিত্ৱা অঞ্জলিং পগ্গয্হ অট্ঠাসি. তেন চ সমযেন আযস্মা ৱঙ্গীসো ভগৱতো সমীপে নিসিন্নো ভগৱন্তং এৱমাহ ‘‘পটিভাতি মং ভগৱা ইমিস্সা দেৱতায কতকম্মং পুচ্ছিতু’’ন্তি. ‘‘পটিভাতু তং, ৱঙ্গীসা’’তি ভগৱা অৱোচ. অথ আযস্মা ৱঙ্গীসো তায দেৱতায কতকম্মং পুচ্ছিতুকামো পঠমং তাৱস্সা ৱিমানং সংৱণ্ণেন্তো আহ –

৬৪৬. ‘‘ফলিকৰজতহেমজালছন্নং, ৱিৱিধচিত্ৰতলমদ্দসং সুৰম্মং;

ব্যম্হং সুনিম্মিতং তোৰণূপপন্নং, ৰুচকুপকিণ্ণমিদং সুভং ৱিমানং.

৬৪৭. ‘‘ভাতি চ দস দিসা নভেৱ সুৰিযো, সৰদে তমোনুদো সহস্সৰংসী;

তথা তপতি মিদং তৱ ৱিমানং, জলমিৱ ধূমসিখো নিসে নভগ্গে.

৬৪৮. ‘‘মুসতীৱ নযনং সতেৰতাৱ, আকাসে ঠপিতমিদং মনুঞ্ঞং;

ৱীণামুৰজসম্মতাড়ঘুট্ঠং, ইদ্ধং ইন্দপুৰং যথা তৱেদং.

৬৪৯. ‘‘পদুমকুমুদুপ্পলকুৱলযং, যোধিকবন্ধুকনোজকা চ সন্তি;

সালকুসুমিতপুপ্ফিতা অসোকা, ৱিৱিধদুমগ্গসুগন্ধসেৱিতমিদং.

৬৫০. ‘‘সড়ললবুজভুজকসংযুত্তা, কুসকসুফুল্লিতলতাৱলম্বিনীহি;

মণিজালসদিসা যসস্সিনী, ৰম্মা পোক্খৰণী উপট্ঠিতা তে.

৬৫১. ‘‘উদকৰুহা চ যেত্থি পুপ্ফজাতা, থলজা যে চ সন্তি ৰুক্খজাতা;

মানুসকামানুস্সকা চ দিব্বা, সব্বে তুয্হং নিৱেসনম্হি জাতা.

৬৫২. ‘‘কিস্স সংযমদমস্সযং ৱিপাকো, কেনাসি কম্মফলেনিধূপপন্না;

যথা চ তে অধিগতমিদং ৱিমানং, তদনুপদং অৱচাসিড়াৰপম্হে’’তি.

৬৪৬. তত্থ ফলিকৰজতহেমজালছন্নন্তি ফলিকমণীহি ৰজতহেমজালেহি চ ছাদিতং, ফলিকমণিমযাহি ভিত্তীহি ৰজতহেমমযেহি জালেহি চ সমন্ততো হেট্ঠা চ উপৰি চ ছাদিতং, ৱিৱিধৱণ্ণানং ৱিচিত্তসন্নিৱেসানঞ্চ তলানং ভূমীনং ৱসেন ৱিৱিধচিত্ৰতলং অদ্দসং পস্সিং. সুৰম্মন্তি সুট্ঠু ৰমণীযং. ৱিহৰিতুকামা ৱসন্তি এত্থাতি ব্যম্হং, ভৱনং. তোৰণূপপন্নন্তি ৱিৱিধমালাকম্মাদিৱিচিত্তেন সত্তৰতনমযেন তোৰণেন উপেতং. তোৰণন্তি ৱা দ্ৱাৰকোট্ঠকপাসাদস্স নামং, তেন চ অনেকভূমকেন ৱিচিত্তাকাৰেন তং ৱিমানং উপেতং. ৰুচকুপতিণ্ণন্তি সুৱণ্ণৱালিকাহি ওকিণ্ণঙ্গণং. ৱালিকসদিসা হি সুৱণ্ণখণ্ডা ৰুচা নাম, ৰুচমেৱ ৰুচকন্তি ৱুত্তং. সুভন্তি সোভতি, সুট্ঠু ভাতীতি ৱা সুভং. ৱিমানন্তি ৱিসিট্ঠমানং, পমাণতো মহন্তন্তি অত্থো.

৬৪৭. ভাতীতি জোততি উজ্জলতি. নভেৱ সুৰিযোতি আকাসে আদিচ্চো ৱিয. সৰদেতি সৰদসমযে. তমোনুদোতি অন্ধকাৰৱিদ্ধংসনো. তথা তপতি মিদন্তি যথা সৰদকালে সহস্সৰংসী সূৰিযো, তথা তপতি দিব্বতি ইদং তৱ ৱিমানং, ম-কাৰো পদসন্ধিকৰো. জলমিৱ ধূমসিখোতি জলন্তো অগ্গি ৱিয. অগ্গি হি তস্স অগ্গতো ধূমো পঞ্ঞাযতীতি ‘‘ধূমসিখো ধূমকেতূ’’তি চ ৱুচ্চতি. নিসেতি নিসতি, ৰত্তিযন্তি অত্থো. নভগ্গেতি নভকোট্ঠাসে, আকাসপদেসেতি ৱুত্তং হোতি. ‘‘নগগ্গে’’তি ৱা পাঠো, পব্বতসিখৰেতি অত্থো. ইদং তৱ ৱিমানন্তি যোজনা.

৬৪৮. মুসতীৱ নযনন্তি অতিৱিয অত্তনো পভস্সৰতায পটিহনন্তং দস্সনকিচ্চং কাতুং অদেন্তং ওলোকেন্তানং চক্খুং মুসতি ৱিয. তেনাহ ‘‘সতেৰতাৱা’’তি, ৱিজ্জুলতা ৱিযাতি অত্থো. ৱীণামুৰজসম্মতাড়ঘুট্ঠন্তি মহতীআদিৱীণানং ভেৰিআদিপটহানং হত্থতাড়কংসতাড়ানঞ্চ সদ্দেহি ঘোসিতং একনিন্নাদং. ইদ্ধন্তি দেৱপুত্তেহি দেৱধীতাহি দিব্বসম্পত্তিযা চ সমিদ্ধং. ইন্দপুৰং যথাতি সুদস্সননগৰং ৱিয.

৬৪৯. পদুমানি চ কুমুদানি চ উপ্পলানি চ কুৱলযানি চ পদুমকুমুদুপ্পলকুৱলযন্তি একত্তৱসেন ৱুত্তং. অত্থীতি ৱচনং পৰিণামেত্ৱা যোজেতব্বং. তত্থ পদুমগ্গহণেন পুণ্ডৰীকম্পি গহিতং, কুমুদগ্গহণেন সেতৰত্তভেদানি সব্বানি কুমুদানি, উপ্পলগ্গহণেন ৰত্তউপ্পলং সব্বা ৱা উপ্পলজাতি, কুৱলযগ্গহণেন নীলুপ্পলমেৱ গহিতন্তি ৱেদিতব্বং. যোধিকবন্ধুকনোজকা চ সন্তীতি চ-কাৰো নিপাতমত্তং, যোধিকবন্ধুজীৱকঅনোজকৰুক্খা চ সন্তীতি অত্থো. কেচি ‘‘অনোজকাপি সন্তী’’তি পাঠং ৱত্ৱা ‘‘অনোজকাপীতি ৱুত্তং হোতী’’তি অত্থং ৱদন্তি. সালকুসুমিতপুপ্ফিতা অসোকাতি সালা কুসুমিতা পুপ্ফিতা অসোকাতি যোজেতব্বং. ৱিৱিধদুমগ্গসুগন্ধসেৱিতমিদন্তি নানাৱিধানং উত্তমৰুক্খানং সোভনেহি গন্ধেহি সেৱিতং পৰিভাৱিতং ইদং তে ৱিমানন্তি অত্থো.

৬৫০. সড়ললবুজভুজকসংযুত্তাতি তীৰে ঠিতেহি সড়লেহি লবুজেহি ভুজকৰুক্খেহি চ সহিতা. ভুজকো নাম একো সুগন্ধৰুক্খো দেৱলোকে চ গন্ধমাদনে চ অত্থি, অঞ্ঞত্থ নত্থীতি ৱদন্তি. কুসকসুফুল্লিতলতাৱলম্বিনীহীতি কুসকেহি তালনাড়িকেৰাদীহি তিণজাতীহি ওলম্বমানাহি সন্তানকৱল্লিআদীহি সুট্ঠু কুসুমিতলতাহি চ সংযুত্তাতি যোজনা. মণিজালসদিসাতি মণিজালসদিসজলা. ‘‘মণিজলসদিসা’’তিপি পাড়ি, মণিসদিসজলাতি অত্থো. যসস্সিনীতি দেৱতায আলপনং. উপট্ঠিতা তেতি যথাৱুত্তগুণা ৰমণীযা পোক্খৰণী তৱ ৱিমানসমীপে ঠিতা.

৬৫১. উদকৰুহাতি যথাৱুত্তে পদুমাদিকে সন্ধায ৱদতি. যেত্থীতি যে অত্থি. থলজাতি যোধিকাদিকা. যে চ সন্তীতি যে অঞ্ঞেপি ৰুক্খজাতা পুপ্ফূপগা চ ফলূপগা চ, তেপি তৱ ৱিমানসমীপে সন্তিযেৱ.

৬৫২. কিস্স সংযমদমস্সযং ৱিপাকোতি কাযসংযমাদীসু কীদিসস্স সংযমস্স, ইন্দ্ৰিযদমনাদীসু কীদিসস্স দমস্স অযং ৱিপাকো. কেনাসীতি অঞ্ঞমেৱ উপপত্তিনিব্বত্তকং, অঞ্ঞং উপভোগসুখনিব্বত্তকং হোতীতি ‘‘কেনাসি কম্মফলেনিধূপপন্না’’তি ৱত্ৱা পুন ‘‘যথা চ তে অধিগতমিদং ৱিমান’’ন্তি আহ. তত্থ কম্মফলেনাতি কম্মফলেন ৱিপচ্চিতুং আৰদ্ধেনাতি ৱচনসেসো, ইত্থম্ভূতলক্খণে চেতং কৰণৱচনং. তদনুপদং অৱচাসীতি তং কম্মং মযা ৱুত্তপদস্স অনুপদং অনুৰূপপদং কত্ৱা কথেয্যাসি. অড়াৰপম্হেতি বহলসংহতপখুমে, গোপখুমেতি অধিপ্পাযো.

অথ দেৱতা আহ –

৬৫৩. ‘‘যথা চ মে অধিগতমিদং ৱিমানং, কোঞ্চমযূৰচকোৰ সঙ্ঘচৰিতং;

দিব্যপিলৱহংসৰাজচিণ্ণং, দিজকাৰণ্ডৱকোকিলাভিনদিতং.

৬৫৪. ‘‘নানাসন্তানকপুপ্ফৰুক্খৱিৱিধা, পাটলিজম্বুঅসোকৰুক্খৱন্তং;

যথা চ মে অধিগতমিদং ৱিমানং, তং তে পৱেদযামি সুণোহি ভন্তে.

৬৫৫. ‘‘মগধৱৰপুৰত্থিমেন, নালকগামো নাম অত্থি ভন্তে;

তত্থ অহোসিং পুৰে সুণিসা, পেসৱতীতি তত্থ জানিংসু মমং.

৬৫৬. ‘‘সাহমপচিতত্থধম্মকুসলং, দেৱমনুস্সপূজিতং মহন্তং;

উপতিস্সং নিব্বুতমপ্পমেয্যং, মুদিতমনা কুসুমেহি অব্ভুকিৰিং.

৬৫৭. ‘‘পৰমগতিগতঞ্চ পূজযিত্ৱা, অন্তিমদেহধৰং ইসিং উড়াৰং;

পহায মানুসকং সমুস্সযং, তিদসগতা ইধ মাৱসামি ঠান’’ন্তি.

৬৫৩. তত্থ কোঞ্চমযূৰচকোৰসঙ্ঘচৰিতন্তি সাৰসসিখণ্ডিকুম্ভকাৰকুক্কুটগণেহি তত্থ তত্থ ৱিচৰিতং. দিব্যপিলৱহংসৰাজচিণ্ণন্তি উদকে পিলৱিত্ৱা ৱিচৰণতো ‘‘পিলৱা’’তি লদ্ধনামেহি উদকসকুণেহি হংসৰাজেহি চ তহিং তহিং ৱিচৰিতং. দিজকাৰণ্ডৱকোকিলাভিনদিতন্তি কাৰণ্ডৱেহি কাদম্বেহি কোকিলেহি অঞ্ঞেহি চ দিজেহি অভিনাদিতং.

৬৫৪. নানাসন্তানকপুপ্ফৰুক্খৱিৱিধাতি নানাৱিধসাখাপসাখৱন্তা নানাপুপ্ফৰুক্খা নানাসন্তানকপুপ্ফৰুক্খা, তেহি ৱিৱিধং চিত্তাকাৰং ৱিচিত্তসন্নিৱেসং নানাসন্তানকপুপ্ফৰুক্খৱিৱিধা. ‘‘ৱিৱিধ’’ন্তি হি ৱত্তব্বে ‘‘ৱিৱিধা’’তি ৱুত্তং. সন্তানকাতি হি কামৱল্লিযো, নানাৱিধপুপ্ফৰুক্খা চ ৱিৱিধা এত্থ সন্তি, তেহি ৱা ৱিৱিধন্তি নানাসন্তানকপুপ্ফৰুক্খৱিৱিধা. ‘‘নানাসন্তানকপুপ্ফৰুক্খৱিৱিধং, পাটলিজম্বুঅসোকৰুক্খৱন্ত’’ন্তি চ কেচি পঠন্তি. তেহি ‘‘পুপ্ফৰুক্খা সন্তী’’তি পদং আনেত্ৱা সম্বন্ধিতব্বং. ‘‘পুপ্ফৰুক্খা’’তি ৱা অৱিভত্তিকনিদ্দেসো, পুপ্ফৰক্খন্তি ৱুত্তং হোতি.

৬৫৫. মগধৱৰপুৰত্থিমেনাতি মগধৱৰে পুৰত্থিমেন, অভিসম্বোধিট্ঠানতায উত্তমে মগধৰট্ঠে পুৰত্থিমদিসায. তত্থ অহোসিং পুৰে সুণিসাতি পুব্বে অহং তস্মিং নালকগামে একস্মিং গহপতিকুলে সুণিসা সুণ্হা অহোসিং.

৬৫৬. সাতি সযং. অত্থে চ ধম্মে চ কুসলোতি অত্থধম্মকুসলো, ভগৱা. অপচিতো অত্থধম্মকুসলো এতেনাতি অপচিতত্থধম্মকুসলো, ধম্মসেনাপতি, তং. অপচিতং ৱা অপচযো, নিব্বানং, তস্মিং অৱসিট্ঠঅত্থধম্মে চ কুসলং, অপচিতে ৱা পূজনীযে অত্থে ধম্মে নিৰোধে মগ্গে চ কুসলং. মহন্তেহি উড়াৰেহি সীলক্খন্ধাদীহি সমন্নাগতত্তা মহন্তং. কুসুমেহীতি ৰতনমযেহি ইতৰেহি চ কুসুমেহি.

৬৫৭. পৰমগতিগতন্তি অনুপাদিসেসনিব্বানং পত্তং. সমুস্সযন্তি সৰীৰং. তিদসগতাতি তিদসভৱনং গতা, তাৱতিংসং দেৱনিকাযং উপপন্না. ইধাতি ইমস্মিং দেৱলোকে. আৱসামি ঠানন্তি ইমং ৱিমানং অধিৱসামি. সেসং ৱুত্তনযমেৱ.

এৱং আযস্মতা ৱঙ্গীসেন দেৱতায চ কথিতকথামগ্গং অট্ঠুপ্পত্তিং কত্ৱা ভগৱা সম্পত্তপৰিসায ৱিত্থাৰেন ধম্মং দেসেসি. সা দেসনা মহাজনস্স সাত্থিকা অহোসীতি.

পেসৱতীৱিমানৱণ্ণনা নিট্ঠিতা.