৩. পাৰিচ্ছত্তকৱগ্গো

১. উড়াৰৱিমানৱণ্ণনা

পাৰিচ্ছত্তকৱগ্গে উড়াৰো তে যসো ৱণ্ণোতি উড়াৰৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন সমযেন ৰাজগহে আযস্মতো মহামোগ্গল্লানস্স উপট্ঠাককুলে একা দাৰিকা দানজ্ঝাসযা দানসংৱিভাগৰতা অহোসি. সা যং তস্মিং গেহে পুৰেভত্তং খাদনীযভোজনীযং উপ্পজ্জতি, তত্থ অত্তনা লদ্ধপটিৱীসতো উপড্ঢং দেতি, উপড্ঢং অত্তনা পৰিভুঞ্জতি, অদত্ৱা পন ন ভুঞ্জতি, দক্খিণেয্যে অপস্সন্তীপি ঠপেত্ৱা দিট্ঠকালে দেতি, যাচকানম্পি দেতিযেৱ. অথস্সা মাতা ‘‘মম ধীতা দানজ্ঝাসযা দানসংৱিভাগৰতা’’তি হট্ঠতুট্ঠা তস্সা দিগুণং ভাগং দেতি. দেন্তী চ একস্মিং ভাগে তায সংৱিভাগে কতে পুন অপৰং দেতি, সা ততোপি সংৱিভাগং কৰোতিযেৱ.

এৱং গচ্ছন্তে কালে তং ৱযপ্পত্তং মাতাপিতৰো তস্মিংযেৱ নগৰে অঞ্ঞতৰস্মিং কুলে কুমাৰস্স অদংসু. তং পন কুলং মিচ্ছাদিট্ঠিকং হোতি অস্সদ্ধং অপ্পসন্নং. অথাযস্মা মহামোগ্গল্লানো ৰাজগহে সপদানং পিণ্ডায চৰমানো তস্সা দাৰিকায সসুৰস্স গেহদ্ৱাৰে অট্ঠাসি. তং দিস্ৱা সা দাৰিকা পসন্নচিত্তা ‘‘পৱিসথ ভন্তে’’তি পৱেসেত্ৱা ৱন্দিত্ৱা সস্সুযা ঠপিতং পূৱং তং অপস্সন্তী ‘‘তস্সা কথেত্ৱা অনুমোদাপেস্সামী’’তি ৱিস্সাসেন গহেত্ৱা থেৰস্স অদাসি, থেৰো অনুমোদনং কত্ৱা পক্কামি. দাৰিকা ‘‘তুম্হেহি ঠপিতং পূৱং মহামোগ্গল্লানত্থেৰস্স অদাসি’’ন্তি সস্সুযা কথেসি. সা তং সুত্ৱা ‘‘কিন্নামিদং পাগব্ভিযং, অযং মম সন্তকং অনাপুচ্ছিত্ৱাৱ সমণস্স অদাসী’’তি তং কটতটাযমানা কোধাভিভূতা যুত্তাযুত্তং অচিন্তেন্তী পুৰতো ঠিতং মুসলখণ্ডং গহেত্ৱা অংসকূটে পহৰি. সা সুখুমালতায পৰিক্খীণাযুকতায চ তেনেৱ পহাৰেন বলৱদুক্খাভিভূতা হুত্ৱা কতিপাহেনেৱ কালং কত্ৱা তাৱতিংসেসু নিব্বত্তি. তস্সা সতিপি অঞ্ঞস্মিং সুচৰিতকম্মে থেৰস্স কতদানমেৱ সাতিসযং হুত্ৱা উপট্ঠাসি. তং আযস্মা মহামোগ্গল্লানো হেট্ঠা ৱুত্তনযেনেৱ গন্ত্ৱা –

২৮৬. ‘‘উড়াৰো তে যসো ৱণ্ণো, সব্বা ওভাসতে দিসা;

নাৰিযো নচ্চন্তি গাযন্তি, দেৱপুত্তা অলঙ্কতা.

২৮৭. ‘‘মোদেন্তি পৰিৱাৰেন্তি, তৱ পূজায দেৱতে;

সোৱণ্ণানি ৱিমানানি, তৱিমানি সুদস্সনে.

২৮৮. ‘‘তুৱংসি ইস্সৰা তেসং, সব্বকামসমিদ্ধিনী;

অভিজাতা মহন্তাসি, দেৱকাযে পমোদসি;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি. –

তীহি গাথাহি পুচ্ছি.

২৮৬. তত্থ যসোতি পৰিৱাৰো. ৱণ্ণোতি ৱণ্ণনিভা সৰীৰোভাসো. ‘‘উড়াৰো’’তি পন ৱিসেসেত্ৱা ৱুত্তত্তা তস্সা দেৱতায পৰিৱাৰসম্পত্তি চ ৱণ্ণসম্পত্তি চ ৱুত্তা হোতি. তাসু ‘‘উড়াৰো তে ৱণ্ণো’’তি সঙ্খেপতো ৱুত্তং ৱণ্ণসম্পত্তিং ৱিসযৱসেন ৱিত্থাৰতো দস্সেতুং ‘‘সব্বা ওভাসতে দিসা’’তি ৱত্ৱা ‘‘উড়াৰো তে যসো’’তি ৱুত্তং পৰিৱাৰসম্পত্তিং ৱত্থুৱসেন ৱিত্থাৰতো দস্সেতুং ‘‘নাৰিযো নচ্চন্তী’’তিআদি ৱুত্তং. তত্থ সব্বা ওভাসতে দিসাতি সব্বাসু দিসাসু ৱিজ্জোততে, সব্বা ৱা দিসা ওভাসযতে, ৱিজ্জোতযতীতি অত্থো. ‘‘ওভাসতে’’তি পদস্স ‘‘ওভাসন্তে’’তি কেচি ৱচনৱিপল্লাসেন অত্থং ৱদন্তি, তেহি ‘‘ৱণ্ণেনা’’তি ৱিভত্তি ৱিপৰিণামেতব্বা. ৱণ্ণেনাতি চ হেতুম্হি কৰণৱচনং, ৱণ্ণেন হেতুভূতেনাতি অত্থো. ‘‘সব্বা দিসা’’তি চ জাতিৱসেন দিসাসামঞ্ঞে অপেক্খিতে ৱচনৱিপল্লাসেনপি পযোজনং নত্থি. নাৰিযোতি এত্থাপি ‘‘অলঙ্কতা’’তি পদং আনেত্ৱা সম্বন্ধিতব্বং. দেৱপুত্তাতি এত্থ চ-সদ্দো লুত্তনিদ্দিট্ঠো. তেন নাৰিযো দেৱপুত্তা চাতি সমুচ্চযো ৱেদিতব্বো.

২৮৭. মোদেন্তীতি পমোদযন্তি. পূজাযাতি পূজনত্থং পূজানিমিত্তং ৱা, নচ্চন্তি গাযন্তীতি যোজনা. তৱিমানীতি তৱ ইমানি.

২৮৮. সব্বকামসমিদ্ধিনীতি সব্বেহি পঞ্চহি কামগুণেহি, সব্বেহি ৱা তযা কামিতেহি ইচ্ছিতেহি ৱত্থূহি সমিদ্ধা. অভিজাতাতি সুজাতা. মহন্তাসীতি মহতী মহানুভাৱা অসি. দেৱকাযে পমোদসীতি ইমস্মিং দেৱনিকাযে দিব্বসম্পত্তিহেতুকেন পৰমেন পমোদনেন পমোদসি.

এৱং থেৰেন পুচ্ছিতা সা দেৱতা তমত্থং ৱিস্সজ্জেসি –

২৮৯. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দুস্সীলকুলে সুণিসা অহোসিং, অস্সদ্ধেসু কদৰিযেসু অহং.

২৯০. ‘‘সদ্ধা সীলেন সম্পন্না, সংৱিভাগৰতা সদা;

পিণ্ডায চৰমানস্স, অপূৱং তে অদাসহং.

২৯১. ‘‘তদাহং সস্সুযাচিক্খিং, ‘সমণো আগতো ইধ;

তস্স অদাসহং পূৱং, পসন্না সেহি পাণিভি’.

২৯২. ‘‘ইতিস্সা সস্সু পৰিভাসি, অৱিনীতাসি ত্ৱং ৱধু;

ন মং সম্পুচ্ছিতুং ইচ্ছি, ‘সমণস্স দদামহং’.

২৯৩. ‘‘ততো মে সস্সু কুপিতা, পহাসি মুসলেন মং;

কূটঙ্গচ্ছি অৱধি মং, নাসক্খিং জীৱিতুং চিৰং.

২৯৪. ‘‘অহং কাযস্স ভেদা, ৱিপ্পমুত্তা ততো চুতা;

দেৱানং তাৱতিংসানং, উপপন্না সহব্যতং.

২৯৫. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

২৮৯. তত্থ অস্সদ্ধেসূতি ৰতনত্তযসদ্ধায কম্মফলসদ্ধায চ অভাৱেন অস্সদ্ধেসু, থদ্ধমচ্ছৰিযতায কদৰিযেসু সস্সুআদীসু অহং সদ্ধা সীলেন সম্পন্না অহোসিন্তি যোজনা.

২৯০-১. অপূৱন্তি কপল্লপূৱং. তেতি নিপাতমত্তং. সস্সুযা আচিক্খিং গহিতভাৱঞাপনত্থঞ্চ অনুমোদনত্থঞ্চাতি অধিপ্পাযো.

২৯২. ইতিস্সাতি এত্থ অস্সাতি নিপাতমত্তং. সমণস্স দদামহন্তি অহং সমণস্স অপূৱং দদামীতি. যস্মা ন মং সম্পুচ্ছিতুং ইচ্ছি, তস্মা ত্ৱং ৱধু অৱিনীতাসীতি সস্সু পৰিভাসীতি যোজনা.

২৯৩. পহাসীতি পহৰি. কূটঙ্গচ্ছি অৱধি মন্তি এত্থ কূটন্তি অংসকূটং ৱুত্তং পুৰিমপদলোপেন, কূটমেৱ অঙ্গন্তি কূটঙ্গং, তং ছিন্দতীতি কূটঙ্গচ্ছি. এৱং কোধাভিভূতা হুত্ৱা মং অৱধি, মম অংসকূটং ছিন্দি, তেনেৱ উপক্কমেন মতত্তা মং মাৰেসীতি অত্থো. তেনাহ ‘‘নাসক্খিং জীৱিতুং চিৰ’’ন্তি.

২৯৪. ৱিপ্পমুত্তাতি ততো দুক্খতো সুট্ঠু মুত্তা. সেসং ৱুত্তনযমেৱ.

উড়াৰৱিমানৱণ্ণনা নিট্ঠিতা.

২. উচ্ছুদাযিকাৱিমানৱণ্ণনা

ওভাসযিত্ৱা পথৱিং সদেৱকন্তি উচ্ছুদাযিকাৱিমানং. তস্স কা উপ্পত্তি? ভগৱা ৰাজগহে ৱিহৰতীতিআদি সব্বং অনন্তৰৱিমানে ৱুত্তসদিসং. অযং পন ৱিসেসো – ইধ উচ্ছু দিন্না, সস্সুযা চ পীঠকেন পহটা, তঙ্খণঞ্ঞেৱ মতা তাৱতিংসেসু উপ্পন্না, তস্সংযেৱ ৰত্তিযং থেৰস্স উপট্ঠানং আগতা, কেৱলকপ্পং গিজ্ঝকূটং চন্দো ৱিয সূৰিযো ৱিয চ ওভাসেন্তী থেৰং ৱন্দিত্ৱা পঞ্জলিকা নমস্সমানা একমন্তং অট্ঠাসি. অথ নং থেৰো –

২৯৬. ‘‘ওভাসযিত্ৱা পথৱিং সদেৱকং, অতিৰোচসি চন্দিমসূৰিযা ৱিয;

সিৰিযা চ ৱণ্ণেন যসেন তেজসা, ব্ৰহ্মাৱ দেৱে তিদসে সহিন্দকে.

২৯৭. ‘‘পুচ্ছামি তং উপ্পলমালধাৰিনী, আৱেড়িনী কঞ্চনসন্নিভত্তচে;

অলঙ্কতে উত্তমৱত্থধাৰিনী, কা ত্ৱং সুভে দেৱতে ৱন্দসে মমং.

২৯৮. ‘‘কিং ত্ৱং পুৰে কম্মমকাসি অত্তনা, মনুস্সভূতা পুৰিমায জাতিযা;

দানং সুচিণ্ণং অথ সীলসংযমং, কেনূপপন্না সুগতিং যসস্সিনী;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি. –

ইমাহি গাথাহি পুচ্ছি.

২৯৬-৭. তত্থ ওভাসযিত্ৱা পথৱিং সদেৱকন্তি চন্দিমসূৰিযৰস্মিসম্মিস্সেহি সিনেৰুপস্সৱিনিগ্গতেহি পভাৱিসৰেহি ৱিজ্জোতযমানতায দেৱেন আকাসেন সহাতি সদেৱকং উপগতভূমিভাগভূতং ইমং পথৱিং ৱিজ্জোতেত্ৱা, একোভাসং একপজ্জোতং কত্ৱাতি অত্থো. ওভাসযিত্ৱা পথৱিং চন্দিমসূৰিযা ৱিযাতি যোজনা. অতিৰোচসীতি অতিক্কমিত্ৱা ৰোচসি. তং পন অতিৰোচনং কেন কিং ৱিয কেন ৱাতি আহ ‘‘সিৰিযা’’তিআদি. তত্থ সিৰিযাতি সোভগ্গাদিসোভাৱিসেসেন. তেজসাতি অত্তনো আনুভাৱেন. আৱেড়িনীতি ৰতনমযপুপ্ফাৱেড়ৱতী.

এৱং থেৰেন পুচ্ছিতা দেৱতা ইমাহি গাথাহি ৱিস্সজ্জেসি –

২৯৯. ‘‘ইদানি ভন্তে ইমমেৱ গামং, পিণ্ডায অম্হাকং ঘৰং উপাগমি;

ততো তে উচ্ছুস্স অদাসি খণ্ডিকং, পসন্নচিত্তা অতুলায পীতিযা.

৩০০. ‘‘সস্সু চ পচ্ছা অনুযুঞ্জতে মমং, কহং নু উচ্ছুং ৱধুকে অৱাকিৰি;

ন ছড্ডিতং নো পন খাদিতং মযা, সন্তস্স ভিক্খুস্স সযং অদাসহং.

৩০১. ‘‘তুয্হং ন্ৱিদং ইস্সৰিযং অথো মম, ইতিস্সা সস্সু পৰিভাসতে মমং;

পীঠং গহেত্ৱা পহাৰং অদাসি মে, ততো চুতা কালকতাম্হি দেৱতা.

৩০২. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৩০৩. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱিন্দগুত্তা তিদসেহি ৰক্খিতা, সমপ্পিতা কামগুণেহি পঞ্চহি.

৩০৪. ‘‘এতাদিসং পুঞ্ঞফলং অনপ্পকং, মহাৱিপাকা মম উচ্ছুদক্খিণা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৩০৫. ‘‘এতাদিসং পুঞ্ঞফলং অনপ্পকং, মহাজুতিকা মম উচ্ছুদক্খিণা;

দেৱিন্দগুত্তা তিদসেহি ৰক্খিতা, সহস্সনেত্তোৰিৱ নন্দনে ৱনে.

৩০৬. ‘‘তুৱঞ্চ ভন্তে অনুকম্পকং ৱিদুং, উপেচ্চ ৱন্দিং কুসলঞ্চ পুচ্ছিসং;

ততো তে উচ্ছুস্স অদাসি খণ্ডিকং, পসন্নচিত্তা অতুলায পীতিযা’’তি.

২৯৯. তত্থ ইদানীতি অনন্তৰাতীতদিৱসত্তা আহ, অধুনাতি অত্থো. ইমমেৱ গামন্তি ইমস্মিংযেৱ গামে, ৰাজগহং সন্ধায ৱদতি. ৱুত্তঞ্হি ‘‘গামোপি নিগমোপি নগৰম্পি ‘গামো’ ইচ্চেৱ ৱুচ্চতী’’তি. ভুম্মত্থে চেতং উপযোগৱচনং. উপাগমীতি উপগতো অহোসি. অতুলাযাতি অনুপমায, অপ্পমাণায ৱা.

৩০০. অৱাকিৰীতি অপনেসি ছড্ডেসি, ৱিনাসেসি ৱা. সন্তস্সাতি সাধুৰূপস্স সন্তকিলেসস্স পৰিস্সমমপ্পত্তস্স ৱা.

৩০১. তুয্হং নূতি নু-সদ্দো অনত্তমনতাসূচনে নিপাতো, সো ‘‘মমা’’তি এত্থাপি আনেত্ৱা যোজেতব্বো ‘‘মম নূ’’তি. ইদং ইস্সৰিযন্তি গেহে আধিপচ্চং সন্ধাযাহ. ততো চুতাতি ততো মনুস্সলোকতো চুতা. যস্মা ঠিতট্ঠানতো অপগতাপি ‘‘চুতা’’তি ৱুচ্চতি, তস্মা চুতিং ৱিসেসেতুং ‘‘কালকতা’’তি ৱুত্তং. কালকতাপি চ ন যত্থ কত্থচি নিব্বত্তা, অপিচ খো দেৱত্তং উপগতাতি দস্সেন্তী আহ ‘‘অম্হি দেৱতা’’তি.

৩০২. তদেৱ কম্মং কুসলং কতং মযাতি তদেৱ উচ্ছুখণ্ডদানমত্তং কুসলং কম্মং কতং মযা, অঞ্ঞং ন জানামীতি অত্থো. সুখঞ্চ কম্মন্তি সুখঞ্চ কম্মফলং. কম্মফলঞ্হি ইধ ‘‘কম্ম’’ন্তি ৱুত্তং উত্তৰপদলোপেন, কাৰণোপচাৰেন ৱা ‘‘কুসলানং, ভিক্খৱে, ধম্মানং সমাদানহেতু এৱমিদং পুঞ্ঞং পৱড্ঢতি (দী. নি. ৩.৮০). অনুভোমি সকং পুঞ্ঞ’’ন্তি (ৱি. ৱ. ১৩৩) চ আদীসু ৱিয. কম্মন্তি ৱা কৰণত্থে উপযোগৱচনং, কম্মেনাতি অত্থো. কম্মে ৱা ভৱং কম্মং যথা কম্মন্তি. অথ ৱা কামেতব্বতায কম্মং. তঞ্হি সুখৰজনীযভাৱতো কামূপসংহিতং কামেতব্বন্তি কমনীযং. অত্তনাতি অত্তনা এৱ, সযংৱসিতায সেৰিভাৱেন সযমেৱাতি অত্থো. পৰিচাৰযামহং অত্তানন্তি পুৰিমগাথায ‘‘অত্তনা’’তি ৱুত্তং পদং ৱিভত্তিৱিপৰিণামেন ‘‘অত্তান’’ন্তি যোজেতব্বং.

৩০৩-৫. দেৱিন্দগুত্তাতি দেৱিন্দেন সক্কেন গুত্তা, দেৱিন্দো ৱিয ৱা গুত্তা মহাপৰিৱাৰতায. সমপ্পিতাতি সুট্ঠু অপ্পিতা সমন্নাগতা. মহাৱিপাকাতি ৱিপুলফলা. মহাজুতিকাতি মহাতেজা, মহানুভাৱাতি অত্থো.

৩০৬. তুৱন্তি তং. অনুকম্পকন্তি কাৰুণিকং. ৱিদুন্তি সপ্পঞ্ঞং, সাৱকপাৰমিযা মত্থকং পত্তন্তি অত্থো. উপেচ্চাতি উপগন্ত্ৱা. ৱন্দিন্তি পঞ্চপতিট্ঠিতেন অভিৱাদযিং. কুসলঞ্চ আৰোগ্য পুচ্ছিসং অপুচ্ছিং, অতুলায পীতিযা ইদঞ্চ কুসলং অনুস্সৰামীতি অধিপ্পাযো. সেসং হেট্ঠা ৱুত্তনযমেৱ.

উচ্ছুদাযিকাৱিমানৱণ্ণনা নিট্ঠিতা.

৩. পল্লঙ্কৱিমানৱণ্ণনা

পল্লঙ্কসেট্ঠে মণিসোণ্ণচিত্তেতি পল্লঙ্কৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন চ সমযেন সাৱত্থিযং অঞ্ঞতৰস্স উপাসকস্স ধীতা কুলপদেসাদিনা সদিসস্স তত্থেৱ অঞ্ঞতৰস্স কুলপুত্তস্স দিন্না, সা চ হোতি অক্কোধনা সীলাচাৰসম্পন্না পতিদেৱতা সমাদিন্নপঞ্চসীলা, উপোসথে সক্কচ্চং উপোসথসীলানি চ ৰক্খতি. সা অপৰভাগে কালং কত্ৱা তাৱতিংসেসু উপ্পজ্জি. তং আযস্মা মহামোগ্গল্লানত্থেৰো হেট্ঠা ৱুত্তনযেনেৱ গন্ত্ৱা –

৩০৭. ‘‘পল্লঙ্কসেট্ঠে মণিসোণ্ণচিত্তে, পুপ্ফাভিকিণ্ণে সযনে উড়াৰে;

তত্থচ্ছসি দেৱি মহানুভাৱে, উচ্চাৱচা ইদ্ধি ৱিকুব্বমানা.

৩০৮. ‘‘ইমা চ তে অচ্ছৰাযো সমন্ততো, নচ্চন্তি গাযন্তি পমোদযন্তি;

দেৱিদ্ধিপত্তাসি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি. –

গাথাহি পুচ্ছি.

সাপিস্স ইমাহি গাথাহি ব্যাকাসি –

৩০৯. ‘‘অহং মনুস্সেসু মনুস্সভূতা, অড্ঢে কুলে সুণিসা অহোসিং;

অক্কোধনা ভত্তু ৱসানুৱত্তিনী, উপোসথে অপ্পমত্তা অহোসিং.

৩১০. ‘‘মনুস্সভূতা দহৰা অপাপিকা, পসন্নচিত্তা পতিমাভিৰাধযিং;

দিৱা চ ৰত্তো চ মনাপচাৰিনী, অহং পুৰে সীলৱতী অহোসিং.

৩১১. ‘‘পাণাতিপাতা ৱিৰতা অচোৰিকা, সংসুদ্ধকাযা সুচিব্ৰহ্মচাৰিনী;

অমজ্জপা নো চ মুসা অভাণিং, সিক্খাপদেসু পৰিপূৰকাৰিনী.

৩১২. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, পসন্নমানসা অহং.

৩১৩. ‘‘অট্ঠঙ্গুপেতং অনুধম্মচাৰিনী, উপোসথং পীতিমনা উপাৱসিং;

ইমঞ্চ অৰিযং অট্ঠঙ্গৱৰেহুপেতং, সমাদিযিত্ৱা কুসলং সুখুদ্ৰযং;

পতিম্হি কল্যাণী ৱসানুৱত্তিনী, অহোসিং পুব্বে সুগতস্স সাৱিকা.

৩১৪. ‘‘এতাদিসং কুসলং জীৱলোকে, কম্মং কৰিত্ৱান ৱিসেসভাগিনী;

কাযস্স ভেদা অভিসম্পৰাযং, দেৱিদ্ধিপত্তা সুগতিম্হি আগতা.

৩১৫. ‘‘ৱিমানপাসাদৱৰে মনোৰমে, পৰিৱাৰিতা অচ্ছৰাসঙ্গণেন;

সযংপভা দেৱগণা ৰমেন্তি মং, দীঘাযুকিং দেৱৱিমানমাগত’’ন্তি.

৩০৭. তত্থ পল্লঙ্কসেট্ঠেতি পল্লঙ্কৱৰে উত্তমপল্লঙ্কে. তংযেৱস্স সেট্ঠতং দস্সেতুং ‘‘মণিসোণ্ণচিত্তে’’তি ৱুত্তং, ৱিৱিধৰতনৰংসিজালসমুজ্জলেহি মণীহি চেৱ সুৱণ্ণেন চ ৱিচিত্তে ‘‘তত্থা’’তি ‘‘সযনে’’তি চ ৱুত্তে সযিতব্বট্ঠানভূতে পল্লঙ্কসেট্ঠে.

৩০৮. তেতি তুয্হং সমন্ততো. ‘‘পমোদযন্তী’’তি পদং পন অপেক্খিত্ৱা ‘‘ত’’ন্তি ৱিভত্তি ৱিপৰিণামেতব্বা. পমোদযন্তীতি ৱা পমোদনং কৰোন্তি, পমোদনং তুয্হং উপ্পাদেন্তীতি অত্থো.

৩১০. দহৰা অপাপিকাতি দহৰাপি অপাপিকা. ‘‘দহৰাসু পাপিকা’’তি ৱা পাঠো, সোযেৱত্থো. ‘‘দহৰস্সাপাপিকা’’তিপি পঠন্তি, দহৰস্স সামিকস্স অপাপিকা, সক্কচ্চং উপট্ঠানেন অনতিচৰিযায চ ভদ্দিকাতি অত্থো. তেন ৱুত্তং ‘‘পসন্নচিত্তা’’তিআদি. অভিৰাধযিন্তি আৰাধেসিং. ৰত্তোতি ৰত্তিযং.

৩১১. অচোৰিকাতি চোৰিযৰহিতা, অদিন্নাদানা পটিৱিৰতাতি অত্থো. ‘‘ৱিৰতা চ চোৰিযা’’তিপি পাঠো, থেয্যতো চ ৱিৰতাতি অত্থো. সংসুদ্ধকাযাতি পৰিসুদ্ধকাযকম্মন্ততায সম্মদেৱ সুদ্ধকাযা, ততো এৱ সুচিব্ৰহ্মচাৰিনী সামিকতো অঞ্ঞত্থ অব্ৰহ্মচৰিযাসম্ভৱতো. তথা হি ৱুত্তং –

‘‘মযঞ্চ ভৰিযা নাতিক্কমাম,

অম্হেপি ভৰিযা নাতিক্কমন্তি;

অঞ্ঞত্ৰ তাহি ব্ৰহ্মচৰিযং চৰাম,

তস্মা হি অম্হং দহৰা নি মিয্যৰে’’তি. (জা. ১.১০.৯৭);

অথ ৱা সুচিব্ৰহ্মচাৰিনীতি সুচিনো সুদ্ধস্স ব্ৰহ্মস্স সেট্ঠস্স উপোসথসীলস্স, মগ্গব্ৰহ্মচৰিযস্স ৱা অনুৰূপস্স পুব্বভাগব্ৰহ্মচৰিযস্স ৱসেন সুচিব্ৰহ্মচাৰিনী.

৩১৩. অনুধম্মচাৰিনীতি অৰিযানং ধম্মস্স অনুধম্মং চৰণসীলা. ইমঞ্চ অনন্তৰং ৱুত্তং নিদ্দোসতায অৰিযং, অট্ঠঙ্গৱৰেহি অট্ঠহি উত্তমঙ্গেহি অৰিযত্তা এৱ ৱা অৰিযট্ঠঙ্গৱৰেহি উপেতং আৰোগ্যট্ঠেন অনৱজ্জট্ঠেন চ কুসলং সুখৱিপাকতায সুখানিসংসতায চ সুখুদ্ৰযং উপাৱসিন্তি যোজনা.

৩১৪. ৱিসেসভাগিনীতি ৱিসেসস্স দিব্বস্স সম্পত্তিভৱস্স ভাগিনী. সুগতিম্হি আগতাতি সুগতিং আগতা উপগতা, সুগতিম্হি ৱা সুগতিযং দিব্বসম্পত্তিযং আগতা. ‘‘সুগতিঞ্হি আগতা’’তিপি পাঠো. তত্থ হীতি নিপাতমত্তং, হেতুঅত্থো ৱা, যস্মা সুগতিং আগতা, তস্মা ৱিসেসভাগিনীতি যোজনা.

৩১৫. ৱিমানপাসাদৱৰেতি ৱিমানেসু উত্তমপাসাদে, ৱিমানসঙ্খাতে ৱা অগ্গপাসাদে, ৱিমানে ৱা ৱিগতমানে অপ্পমাণে মহন্তে ৱৰপাসাদে পৰিৱাৰিতা অচ্ছৰাসঙ্গণেন সযংপভা পমোদামি, ‘‘অম্হী’’তি ৱা পদং আনেত্ৱা যোজেতব্বং. দীঘাযুকিন্তি হেট্ঠিমেহি দেৱেহি দীঘতৰাযুকতায তত্ৰূপপন্নেহি অনপ্পাযুকতায চ দীঘাযুকিং মং যথাৱুত্তং দেৱৱিমানমাগতং উপগতং দেৱগণা ৰমেন্তীতি যোজনা. সেসং ৱুত্তনযমেৱ.

পল্লঙ্কৱিমানৱণ্ণনা নিট্ঠিতা.

৪. লতাৱিমানৱণ্ণনা

লতা চ সজ্জা পৱৰা চ দেৱতাতি লতাৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন চ সমযেন সাৱত্থিৱাসিনো অঞ্ঞতৰস্স উপাসকস্স ধীতা লতা নাম পণ্ডিতা ব্যত্তা মেধাৱিনী পতিকুলং গতা ভত্তু সস্সুসসুৰানঞ্চ মনাপচাৰিনী পিযৱাদিনী পৰিজনস্স সঙ্গহকুসলা গেহে কুটুম্বভাৰস্স নিত্থৰণসমত্থা অক্কোধনা সীলাচাৰসম্পন্না দানসংৱিভাগৰতা অখণ্ডপঞ্চসীলা উপোসথৰক্খণে চ অপ্পমত্তা অহোসি. সা অপৰভাগে কালং কত্ৱা ৱেস্সৱণস্স মহাৰাজস্স ধীতা হুত্ৱা নিব্বত্তি লতাত্ৱেৱ নামেন. অঞ্ঞাপি তস্সা সজ্জা, পৱৰা, অচ্চিমতী, সুতাতি চতস্সো ভগিনিযো অহেসুং. তা পঞ্চপি সক্কেন দেৱৰাজেন আনেত্ৱা নাটকিত্থিভাৱেন পৰিচাৰিকট্ঠানে ঠপিতা. লতা পনস্স নচ্চগীতাদীসু ছেকতায ইট্ঠতৰা অহোসি.

তাসং একতো সমাগন্ত্ৱা সুখনিসজ্জায নিসিন্নানং সঙ্গীতনেপুঞ্ঞং পটিচ্চ ৱিৱাদো উপ্পন্নো. তা সব্বাপি ৱেস্সৱণস্স মহাৰাজস্স সন্তিকং গন্ত্ৱা পুচ্ছিংসু ‘‘তাত, কতমা অম্হাকং নচ্চাদীসু কুসলা’’তি? সো এৱমাহ ‘‘গচ্ছথ ধীতৰো অনোতত্তদহতীৰে দেৱসমাগমে সঙ্গীতং পৱত্তেথ, তত্থ ৱো ৱিসেসো পাকটো ভৱিস্সতী’’তি. তা তথা অকংসু. তত্থ দেৱপুত্তা লতায নচ্চমানায অত্তনো সভাৱেন ঠাতুং নাসক্খিংসু, সঞ্জাতপহাসা অচ্ছৰিযব্ভুতচিত্তজাতা নিৰন্তৰং সাধুকাৰং দেন্তা উক্কুট্ঠিসদ্দে চেলুক্খেপে চ পৱত্তেন্তা হিমৱন্তং কম্পযমানা ৱিয মহন্তং কোলাহলমকংসু. ইতৰাসু পন নচ্চন্তীসু সিসিৰকালে কোকিলা ৱিয তুণ্হীভূতা নিসীদিংসু. এৱং তত্থ সঙ্গীতে লতায ৱিসেসো পাকটো অহোসি.

অথ তাসং দেৱধীতানং সুতায দেৱধীতায এতদহোসি ‘‘কিং নু খো কম্মং কত্ৱা অযং লতা অম্হে অভিভুয্য তিট্ঠতি ৱণ্ণেন চেৱ যসসা চ, যংনূনাহং লতায কতকম্মং পুচ্ছেয্য’’ন্তি. সা তং পুচ্ছি. ইতৰাপি তস্সা এতমত্থং ৱিস্সজ্জেসি. তযিদং সব্বং ৱেস্সৱণমহাৰাজা দেৱচাৰিকৱসেন উপগতস্স আযস্মতো মহামোগ্গল্লানস্স আচিক্খি. থেৰো তমত্থং পুচ্ছায মূলকাৰণতো পট্ঠায ভগৱতো আৰোচেন্তো –

৩১৬. ‘‘লতা চ সজ্জা পৱৰা চ দেৱতা, অচ্চিমতী ৰাজৱৰস্স সিৰীমতো;

সুতা চ ৰঞ্ঞো ৱেস্সৱণস্স ধীতা, ৰাজীমতী ধম্মগুণেহি সোভথ.

৩১৭. ‘‘পঞ্চেত্থ নাৰিযো আগমংসু ন্হাযিতুং, সীতোদকং উপ্পলিনিং সিৱং নদিং;

তা তত্থ ন্হাযিত্ৱা ৰমেত্ৱা দেৱতা, নচ্চিত্ৱা গাযিত্ৱা সুতা লতং ব্ৰৱি.

৩১৮. ‘‘পুচ্ছামি তং উপ্পলমালধাৰিনি, আৱেড়িনি কঞ্চনসন্নিভত্তচে;

তিমিৰতম্বক্খি নভেৱ সোভনে, দীঘাযুকী কেন কতো যসো তৱ.

৩১৯. ‘‘কেনাসি ভদ্দে পতিনো পিযতৰা, ৱিসিট্ঠকল্যাণিতৰস্সু ৰূপতো;

পদক্খিণা নচ্চনগীতৱাদিতে, আচিক্খ নো ত্ৱং নৰনাৰিপুচ্ছিতা’’তি. –

সুতায পুচ্ছা.

৩২০. ‘‘অহং মনুস্সেসু মনুস্সভূতা, উড়াৰভোগে কুলে সুণিসা অহোসিং;

অক্কোধনা ভত্তু ৱসানুৱত্তিনী, উপোসথে অপ্পমত্তা অহোসিং.

৩২১. ‘‘মনুস্সভূতা দহৰা অপাপিকা, পসন্নচিত্তা পতিমাভিৰাধযিং;

সদেৱৰং সস্সসুৰং সদাসকং, অভিৰাধযিং তম্হি কতো যসো মম.

৩২২. ‘‘সাহং তেন কুসলেন কম্মুনা, চতুব্ভি ঠানেহি ৱিসেসমজ্ঝগা;

আযুঞ্চ ৱণ্ণঞ্চ সুখং বলঞ্চ, খিড্ডাৰতিং পচ্চনুভোমনপ্পকং.

৩২৩. ‘‘সুতং নু তং ভাসতি যং অযং লতা, যং নো অপুচ্ছিম্হ অকিত্তযী নো;

পতিনো কিৰম্হাকং ৱিসিট্ঠ নাৰীনং, গতী চ তাসং পৱৰা চ দেৱতা.

৩২৪. ‘‘পতীসু ধম্মং পচৰাম সব্বা, পতিব্বতা যত্থ ভৱন্তি ইত্থিযো;

পতীসু ধম্মং পচৰিত্ৱা সব্বা, লচ্ছামসে ভাসতি যং অযং লতা.

৩২৫. ‘‘সীহো যথা পব্বতসানুগোচৰো, মহিন্ধৰং পব্বতমাৱসিত্ৱা;

পসয্হ হন্ত্ৱা ইতৰে চতুপ্পদে, খুদ্দে মিগে খাদতি মংসভোজনো.

৩২৬. ‘‘তথেৱ সদ্ধা ইধ অৰিযসাৱিকা, ভত্তাৰং নিস্সায পতিং অনুব্বতা;

কোধং ৱধিত্ৱা অভিভুয্য মচ্ছৰং, সগ্গম্হি সা মোদতি ধম্মচাৰিনী’’তি. –

লতায ৱিস্সজ্জনন্তি আহ.

৩১৬. তত্থ লতা চ সজ্জা পৱৰা অচ্চিমতী সুতাতি তাসং নামং. চ-সদ্দো সমুচ্চযত্থো. ৰাজৱৰস্সাতি চতুন্নং মহাৰাজানং ৱৰস্স সেট্ঠস্স দেৱৰাজস্স. সক্কস্স পৰিচাৰিকাতি অধিপ্পাযো. ৰঞ্ঞোতি মহাৰাজস্স. তেনাহ ‘‘ৱেস্সৱণস্স ধীতা’’তি, ইদং পচ্চেকং যোজেতব্বং, ৱচনৱিপল্লাসো ৱা, ধীতৰোতি অত্থো. ৰাজতি ৱিজ্জোততীতি ৰাজী, ৰাজীতি মতা পঞ্ঞাতা ৰাজীমতী, ইদং তাসং সব্বাসং ৱিসেসনং. নামমেৱ এতং একিস্সা দেৱতাযাতি কেচি, তেসং মতেন ‘‘পৱৰা’’তি সব্বাসং ৱিসেসনমেৱ. ধম্মগুণেহীতি ধম্মিযেহি ধম্মতো অনপেতেহি গুণেহি, যথাভুচ্চগুণেহীতি অত্থো. সোভথাতি ৱিৰোচথ.

৩১৭. পঞ্চেত্থ নাৰিযোতি পঞ্চ যথাৱুত্তনামা দেৱধীতৰো এত্থ ইমস্মিং হিমৱন্তপদেসে. সীতোদকং উপ্পলিনিং সিৱং নদিন্তি অনোতত্তদহতো নিক্খন্তনদিমুখং সন্ধায ৱদতি. নচ্চিত্ৱা গাযিত্ৱাতি পিতু ৱেস্সৱণস্স আণায দেৱসমাগমে তাহি কতস্স নচ্চগীতস্স ৱসেন ৱুত্তং. সুতা লতং ব্ৰৱীতি সুতা দেৱধীতা লতং অত্তনো ভগিনিং কথেসি. ‘‘সুতা লতং ব্ৰৱু’’ন্তিপি পঠন্তি, সুতা ধীতৰো ৱেস্সৱণস্স মহাৰাজস্স লতং কথেসুন্তি অত্থো.

৩১৮. তিমিৰতম্বক্খীতি নিচুলকেসৰভাসসদিসেহি তম্বৰাজীহি সমন্নাগতক্খি. নভেৱ সোভনেতি নভং ৱিয সোভমানে, সৰদসমযে অব্ভমহিকাদিউপক্কিলেসৱিমুত্তং নভং ৱিয সুৱিসুদ্ধঙ্গপচ্চঙ্গতায ৱিৰাজমানেতি অত্থো. অথ ৱা নভেৱাতি নভে এৱ, সমুচ্চযত্থো এৱ-সদ্দো, আকাসট্ঠৱিমানেসু হিমৱন্তযুগন্ধৰাদিভূমিপটিবদ্ধট্ঠানেসু চাতি সব্বত্থেৱ সোভমানেতি অত্থো. কেন কতোতি কেন কীদিসেন পুঞ্ঞেন নিব্বত্তিতো. যসোতি পৰিৱাৰসম্পত্তি কিত্তিসদ্দো চ. কিত্তিসদ্দগ্গহণেন চ কিত্তিসদ্দহেতুভূতা গুণা গয্হন্তি.

৩১৯. পতিনো পিযতৰাতি সামিনো পিযতৰা সামিৱল্লভা. তেনস্সা সুভগতং দস্সেতি. ৱিসিট্ঠকল্যাণিতৰস্সূ ৰূপতোতি ৰূপসম্পত্তিযা ৱিসিট্ঠা উত্তমা কল্যাণিতৰা সুন্দৰতৰা, অস্সূতি নিপাতমত্তং. ‘‘ৱিসিট্ঠকল্যাণিতৰাসি ৰূপতো’’তি চ পঠন্তি. পদক্খিণাতি পকাৰেহি, ৱিসেসেন ৱা দক্খিণা কুসলা. নচ্চনগীতৱাদিতেতি এত্থ নচ্চনাতি ৱিভত্তিলোপো কতো, নচ্চে চ গীতে চ ৱাদিতে চাতি অত্থো. নৰনাৰিপুচ্ছিতাতি দেৱপুত্তেহি দেৱধীতাহি চ ‘‘কহং লতা, কিং কৰোতি লতা’’তি ৰূপদস্সনত্থঞ্চেৱ সিপ্পদস্সনত্থঞ্চ পুচ্ছিতা.

৩২১. নিচ্চং কাযেন অসংসট্ঠতায দেৱো ৱিয ৰমেতি, দুতিযো ৱৰোতি ৱা দেৱৰো, ভত্তু কনিট্ঠভাতা, সহ দেৱৰেনাতি সদেৱৰং. সস্সু চ সসুৰো চ সসুৰা, সহ সসুৰেহীতি সস্সসুৰং. সহ দাসেহি দাসীহি চাতি সদাসকং পতিমাভিৰাধযিন্তি সম্বন্ধো. তম্হি কতোতি তম্হি কুলে, কালে ৱা সুণিসাকালে কতো যসো তন্নিব্বত্তকপুঞ্ঞস্স নিব্বত্তনেনাতি অধিপ্পাযো. মমাতি ইদং ‘‘কতো’’তি পদং অপেক্খিত্ৱা ‘‘মযা’’তি পৰিণামেতব্বং.

৩২২. চতুব্ভি ঠানেহীতি চতূহি কাৰণেহি, চতূসু ৱা ঠানেসু নিমিত্তভূতেসু. ৱিসেসমজ্ঝগাতি অঞ্ঞাহি অতিসযং অধিগতা. আযুঞ্চ ৱণ্ণঞ্চ সুখং বলঞ্চাতি ‘‘চতূহি ঠানেহী’’তি ৱুত্তানং সৰূপতো দস্সনং. আযুআদযো এৱ হিস্সা অঞ্ঞাহি ৱিসিট্ঠসভাৱতায ৱিসেসা তস্সা তথা সম্ভাৱনাৱসেন গহেতব্বতায হেতুভাৱতো ‘‘ঠান’’ন্তি চ ৱুত্তং. ৱিসেসমজ্ঝগা. কীদিসং? আযুঞ্চ ৱণ্ণঞ্চ সুখঞ্চ বলঞ্চাতি যোজনা.

৩২৩. সুতং নু তং ভাসতি যং অযং লতাতি অযং লতা অম্হাকং জেট্ঠভগিনী যং ভাসতি, তং তুম্হেহি সুতং নু কিং অসুত’’ন্তি ইতৰা তিস্সো ভগিনিযো পুচ্ছতি. যং নোতি যং অম্হাকং সংসযিতং. নোতি নিপাতমত্তং, পুন নোতি অম্হাকং, অৱধাৰণে ৱা ‘‘ন নো সমং অত্থী’’তিআদীসু (খু. পা. ৬.৩; সু. নি. ২২৬) ৱিয, তেন অকিত্তযিযেৱ, অৱিপৰীতং ব্যাকাসিযেৱাতি অত্থো. পতিনো কিৰম্হাকং ৱিসিট্ঠ নাৰীনং, গতী চ তাসং পৱৰা চ দেৱতাতি অনত্থতো পালনতো পতিনো সামিকা না অম্হাকং নাৰীনং ইত্থীনং ৱিসিট্ঠা গতি চ তাসং পটিসৰণঞ্চ, তাসং মাতুগামানং সৰণতো পৱৰা উত্তমা দেৱতা চ সম্মদেৱ আৰাধিতা সম্পতি আযতিঞ্চ হিতসুখাৱহাতি অত্থো.

৩২৪. পতীসু ধম্মং পচৰাম সব্বাতি সব্বাৱ মযং পতীসু অত্তনো সামিকেসু পুব্বুট্ঠানাদিকং চৰিতব্বধম্মং পচৰাম. যত্থাতি যং নিমিত্তং, যস্মিং ৱা পতীসু চৰিতব্বধম্মে চৰিযমানে ইত্থিযো পতিব্বতা নাম ভৱন্তি. লচ্ছামসে ভাসতি যং অযং লতাতি অযং লতা যং সম্পত্তিং এতৰহি লভতীতি ভাসতি, তং সম্পত্তিং পতীসু ধম্মং পচৰিত্ৱাতি লভিস্সাম.

৩২৫. পব্বতসানুগোচৰোতি পব্বতৱনসণ্ডচাৰী. মহিন্ধৰং পব্বতমাৱসিত্ৱাতি মহিং ধাৰেতীতি মহিন্ধৰনামকং পব্বতং অচলং আৱসিত্ৱা অধিৱসিত্ৱা, তত্থ ৱসন্তোতি অত্থো. ‘‘আৱসিত্ৱা’’তি হি পদং অপেক্খিত্ৱা ভুম্মত্থে চেতং উপযোগৱচনং. পসয্হাতি অভিভৱিত্ৱা. খুদ্দেতি বলৱসেননিহীনে পমাণতো পন মহন্তে হত্থিআদিকেপি মিগে সো হন্তিযেৱ.

৩২৬. তথেৱাতি গাথায অযং উপমাসংসন্দনেন সদ্ধিং অত্থযোজনা – যথা সীহো অত্তনো নিৱাসগোচৰট্ঠানভূতং পব্বতং নিস্সায ৱসন্তো অত্তনো যথিচ্ছিতমত্থং সাধেতি, এৱমেৱ সা সদ্ধা পসন্না অৰিযসাৱিকা ঘাসচ্ছাদনাদীহি ভৰণতো পোসনতো ভত্তাৰং পতিং সামিকং নিস্সায ৱসন্তী সব্বত্থাপি পতিঅনুকূলতাসঙ্খাতেন ৱতেন তং অনুব্বতা পৰিজনাদীসু উপ্পজ্জনকং কোধং ৱধিত্ৱা পজহিত্ৱা পৰিগ্গহৱত্থূসু উপ্পজ্জনকং মচ্ছেৰং অভিভুয্য অভিভৱিত্ৱা অনুপ্পাদেত্ৱা পতিব্বতাধম্মস্স চ উপাসিকাধম্মস্স চ সম্মদেৱ চৰণতো ধম্মচাৰিনী সা সগ্গম্হি দেৱলোকে মোদতি, পমোদং আপজ্জতীতি. সেসং ৱুত্তনযমেৱ.

লতাৱিমানৱণ্ণনা নিট্ঠিতা.

৫. গুত্তিলৱিমানৱণ্ণনা

সত্ততন্তিং সুমধুৰন্তি গুত্তিলৱিমানং. তস্স কা উপ্পত্তি? ভগৱতি ৰাজগহে ৱিহৰন্তে আযস্মা মহামোগ্গল্লানো হেট্ঠা ৱুত্তনযেনেৱ দেৱচাৰিকং চৰন্তো তাৱতিংসভৱনং গন্ত্ৱা তত্থ পটিপাটিযা ঠিতেসু ছত্তিংসায ৱিমানেসু ছত্তিংস দেৱধীতৰো পচ্চেকং অচ্ছৰাসহস্সপৰিৱাৰা মহতিং দিব্বসম্পত্তিং অনুভৱন্তিযো দিস্ৱা তাহি পুব্বে কতকম্মং ‘‘অভিক্কন্তেন ৱণ্ণেনা’’তিআদীহি তীহি গাথাহি পটিপাটিযা পুচ্ছি. তাপি তস্স পুচ্ছানন্তৰং ‘‘ৱত্থুত্তমদাযিকা নাৰী’’তিআদিনা ব্যাকৰিংসু. অথ থেৰো ততো মনুস্সলোকং আগন্ত্ৱা ভগৱতো এতমত্থং আৰোচেসি. তং সুত্ৱা ভগৱা ‘‘মোগ্গল্লান, তা দেৱতা ন কেৱলং তযা এৱ পুচ্ছিতা এৱং ব্যাকৰিংসু, অথ খো পুব্বে মযাপি পুচ্ছিতা এৱমেৱ ব্যাকৰিংসূ’’তি ৱত্ৱা থেৰেন যাচিতো অতীতং অত্তনো গুত্তিলাচৰিযং কথেসি.

অতীতে বাৰাণসিযং ব্ৰহ্মদত্তে ৰজ্জং কাৰেন্তে বোধিসত্তো গন্ধব্বকুলে নিব্বত্তিত্ৱা গন্ধব্বসিপ্পে পৰিযোদাতসিপ্পতায তিম্বৰুনাৰদসদিসো সব্বদিসাসু পাকটো পঞ্ঞাতা আচৰিযো অহোসি নামেন গুত্তিলো নাম. সো অন্ধে জিণ্ণে মাতাপিতৰো পোসেসি. তস্স সিপ্পনিপ্ফত্তিং সুত্ৱা উজ্জেনিৱাসী মুসিলো নাম গন্ধব্বো উপগন্ত্ৱা তং ৱন্দিত্ৱা একমন্তং ঠিতো ‘‘কস্মা আগতোসী’’তি চ ৱুত্তে ‘‘তুম্হাকং সন্তিকে সিপ্পং উগ্গণ্হিতু’’ন্তি আহ. গুত্তিলাচৰিযো তং ওলোকেত্ৱা লক্খণকুসলতায ‘‘অযং পুৰিসো ৱিসমজ্ঝাসযো কক্খড়ো ফৰুসো অকতঞ্ঞূ ভৱিস্সতি, ন সঙ্গহেতব্বো’’তি সিপ্পুগ্গহণত্থং ওকাসং নাকাসি. সো তস্স মাতাপিতৰো পযিৰুপাসিত্ৱা তেহি যাচাপেসি. গুত্তিলাচৰিযো মাতাপিতূহি নিপ্পীড়িযমানো ‘‘গৰুৱচনং অলঙ্ঘনীয’’ন্তি তস্স সিপ্পং পট্ঠপেত্ৱা ৱিগতমচ্ছৰিযতায কাৰুণিকতায চ আচৰিযমুট্ঠিং অকত্ৱা অনৱসেসতো সিপ্পং সিক্খাপেসি.