১০. পাৰিচ্ছত্তকৱিমানৱণ্ণনা

পাৰিচ্ছত্তকে কোৱিড়াৰেতি পাৰিচ্ছত্তকৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন সাৱত্থিৱাসী অঞ্ঞতৰো উপাসকো ভগৱন্তং উপসঙ্কমিত্ৱা, স্ৱাতনায নিমন্তেত্ৱা, অত্তনো গেহদ্ৱাৰে মহন্তং মণ্ডপং সজ্জেত্ৱা সাণিপাকাৰং পৰিক্খিপিত্ৱা উপৰি ৱিতানং বন্ধিত্ৱা ধজপটাকাদযো উস্সাপেত্ৱা নানাৱিৰাগৱণ্ণানি ৱত্থানি গন্ধদামমালাদামানি চ ওলম্বেত্ৱা সিত্তসম্মট্ঠে পদেসে আসনানি পঞ্ঞাপেত্ৱা ভগৱতো কালং আৰোচেসি. অথ ভগৱা পুব্বণ্হসমযং নিৱাসেত্ৱা পত্তচীৱৰমাদায দেৱৱিমানং ৱিয অলঙ্কতপটিযত্তং মণ্ডপং পৱিসিত্ৱা সহস্সৰংসী ৱিয অণ্ণৱকুচ্ছিং ওভাসযমানো পঞ্ঞত্তে আসনে নিসীদি. উপাসকো গন্ধপুপ্ফধূমদীপেহি ভগৱন্তং পূজেসি.

তেন চ সমযেন অঞ্ঞতৰা কট্ঠহাৰিকা ইত্থী অন্ধৱনে সুপুপ্ফিতং অসোকৰুক্খং দিস্ৱা সপল্লৱঙ্কুৰানি পিণ্ডীকতানি বহূনি অসোকপুপ্ফানি গহেত্ৱা আগচ্ছন্তী, ভগৱন্তং তত্থ নিসিন্নং দিস্ৱা পসন্নচিত্তা আসনস্স সমন্ততো তেহি পুপ্ফেহি পুপ্ফসন্থৰং সন্থৰন্তী, ভগৱতো পূজং কত্ৱা ৱন্দিত্ৱা তিক্খত্তুং পদক্খিণং কত্ৱা নমস্সমানা অগমাসি. সা অপৰেন সমযেন কালং কত্ৱা তাৱতিংসেসু নিব্বত্তি, অচ্ছৰাসহস্সপৰিৱাৰা যেভুয্যেন নন্দনৱনে নচ্চন্তী গাযন্তী পাৰিচ্ছত্তকমালা গন্থেন্তী পমোদমানা কীড়ন্তী সুখং অনুভৱতি. অথাযস্মা মহামোগ্গল্লানো হেট্ঠা ৱুত্তনযেন দেৱচাৰিকং চৰন্তো তাৱতিংসভৱনং গন্ত্ৱা তং দিস্ৱা তায কতকম্মং ইমাহি গাথাহি পুচ্ছি –

৬৮০. ‘‘পাৰিচ্ছত্তকে কোৱিড়াৰে, ৰমণীযে মনোৰমে;

দিব্বমালং গন্থমানা, গাযন্তী সম্পমোদসি.

৬৮১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছৰন্তি, সৱনীযা মনোৰমা.

৬৮২. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৱাযন্তি, সুচিগন্ধা মনোৰমা.

৬৮৩. ‘‘ৱিৱত্তমানা কাযেন, যা ৱেণীসু পিড়ন্ধনা;

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৬৮৪. ‘‘ৱটংসকা ৱাতধুতা, ৱাতেন সম্পকম্পিতা;

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৬৮৫. ‘‘যাপি তে সিৰস্মিং মালা, সুচিগন্ধা মনোৰমা;

ৱাতি গন্ধো দিসা সব্বা, ৰুক্খো মঞ্জূসকো যথা.

৬৮৬. ‘‘ঘাযসে তং সুচিগন্ধং, ৰূপং পস্সসি অমানুসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৮০. তত্থ পাৰিচ্ছত্তকে কোৱিড়াৰেতি পাৰিচ্ছত্তকনামকে কোৱিড়াৰপুপ্ফে আদায দিব্বমালং গন্থমানাতি যোজনা. যঞ্হি লোকিযা ‘‘পাৰিজাত’’ন্তি ৱদন্তি, তং মাগধভাসায ‘‘পাৰিচ্ছত্তক’’ন্তি ৱুচ্চতি. কোৱিড়াৰোতি চ কোৱিড়াৰজাতিকো, সো চ মনুস্সলোকেপি দেৱলোকেপি কোৱিড়াৰো, তস্সাপি জাতীতি ৱদন্তি.

৬৮১. তস্সা পন দেৱতায নচ্চনকালে অঙ্গভাৰৱসেন সৰীৰতো চ পিড়ন্ধনতো চ অতিৱিয মধুৰো সদ্দো নিচ্ছৰতি, গন্ধো সদা সব্বা দিসাপি ফৰিত্ৱা তিট্ঠতি. তেনাহ ‘‘তস্সা তে নচ্চমানাযা’’তিআদি. তত্থ সৱনীযাতি সোতুং যুত্তা, সৱনস্স ৱা হিতা, কণ্ণসুখাতি অত্থো.

৬৮৩. ৱিৱত্তমানা কাযেনাতি তৱ কাযেন সৰীৰেন পৰিৱত্তমানেন, ইত্থম্ভূতলক্খণে চেতং কৰণৱচনং. যা ৱেণীসু পিড়ন্ধনাতি যানি তে কেসৱেণীসু পিড়ন্ধনানি, ৱিভত্তিলোপো চেত্থ দট্ঠব্বো, লিঙ্গৱিপল্লাসো ৱা.

৬৮৪. ৱটংসকাতি ৰতনমযা কণ্ণিকা ৱটংসকাতি অত্থো. ৱাতধুতাতি মন্দেন মালুতেন ধূপযমানা. ৱাতেন সম্পকম্পিতাতি ৱাতেন সমন্ততো ৱিসেসতো কম্পিতা চলিতা. অথ ৱা ৱটংসকা ৱাতধুতা, ৱাতেন সম্পকম্পিতাতি অৱাতেৰিতাপি ৱাতেৰিতাপি যে তে ৱটংসকা কম্পিতা, তেসং সুয্যতি নিগ্ঘোসোতি অত্থযোজনা.

৬৮৫. ৱাতি গন্ধো দিসা সব্বাতি তস্সা তে সিৰস্মিং দিব্বমালায গন্ধো ৱাযতি সব্বা দিসা. যথা কিং? ৰুক্খো মঞ্জূসকো যথাতি, যথা নাম মঞ্জূসকো ৰুক্খো সুপুপ্ফিতো অত্তনো গন্ধেন বহূনি যোজনানি ফৰমানো সব্বা দিসা ৱাযতি, এৱং তৱ সিৰস্মিং পিড়ন্ধনমালায গন্ধোতি অত্থো. সো কিৰ ৰুক্খো গন্ধমাদনে পচ্চেকবুদ্ধানং উপোসথকৰণমণ্ডলমাড়কমজ্ঝে তিট্ঠতি. যত্তকানি দেৱলোকে চ মনুস্সলোকে চ সুৰভিকুসুমানি, তানি তস্স সাখগ্গেসু নিব্বত্তন্তি. তেন সো অতিৱিয সুগন্ধো হোতি. এৱং তায দেৱতায পিড়ন্ধনমালায গন্ধোতি. তেন ৱুত্তং ‘‘ৰুক্খো মঞ্জূসকো যথা’’তি.

৬৮৬. যদিপি তস্স সগ্গস্স ছফস্সাযতনিকভাৱতো সব্বানিপি তত্থ আৰম্মণানি পিযৰূপানিযেৱ, গন্ধৰূপানং পন সৱিসেসানং তস্সা দেৱতায লাভিভাৱতো ‘‘ঘাযসে তং সুচিগন্ধং, ৰূপং পস্সসি অমানুস’’ন্তি ৱুত্তং.

অথ দেৱতা দ্ৱীহি গাথাহি ব্যাকাসি –

৬৮৭. ‘‘পভস্সৰং অচ্চিমন্তং, ৱণ্ণগন্ধেন সংযুতং;

অসোকপুপ্ফমালাহং, বুদ্ধস্স উপনামযিং.

৬৮৮. ‘‘তাহং কম্মং কৰিত্ৱান, কুসলং বুদ্ধৱণ্ণিতং;

অপেতসোকা সুখিতা, সম্পমোদামনামযা’’তি.

৬৮৭. তত্থ সুধোতপৱাড়সঙ্ঘাতসন্নিভস্স কিঞ্জক্খকেসৰসমুদাযেন ভাণুৰংসিজালস্স ৱিয অসোকপুপ্ফুত্তমস্স তদা উপট্ঠিততং সন্ধাযাহ ‘‘পভস্সৰং অচ্চিমন্ত’’ন্তি. সেসং ৱুত্তনযমেৱ.

অথাযস্মা মহামোগ্গল্লানো তায দেৱতায অত্তনো সুচৰিতকম্মে কথিতে সপৰিৱাৰায তস্সা ধম্মং দেসেত্ৱা ততো মনুস্সলোকং আগন্ত্ৱা ভগৱতো তং পৱত্তিং কথেসি. ভগৱা তং অট্ঠুপ্পত্তিং কত্ৱা সম্পত্তমহাজনস্স ধম্মং দেসেসি, সা দেসনা মহাজনস্স সাত্থিকা অহোসীতি.

পাৰিচ্ছত্তকৱিমানৱণ্ণনা নিট্ঠিতা.

ইতি পৰমত্থদীপনিযা খুদ্দক-অট্ঠকথায ৱিমানৱত্থুস্মিং

দসৱত্থুপটিমণ্ডিতস্স ততিযস্স পাৰিচ্ছত্তকৱগ্গস্স

অত্থৱণ্ণনা নিট্ঠিতা.