৪. চণ্ডালিৱিমানৱণ্ণনা

চণ্ডালি ৱন্দ পাদানীতি চণ্ডালিৱিমানং. তস্স কা উপ্পত্তি? ভগৱা ৰাজগহে ৱিহৰন্তো পচ্চূসৱেলাযং বুদ্ধাচিণ্ণং মহাকৰুণাসমাপত্তিং সমাপজ্জিত্ৱা উট্ঠায লোকং ওলোকেন্তো অদ্দস তস্মিংযেৱ নগৰে চণ্ডালাৱসথে ৱসন্তিং একং মহল্লিকং চণ্ডালিং খীণাযুকং, নিৰযসংৱত্তনিকঞ্চস্সা কম্মং উপট্ঠিতং. সো মহাকৰুণায সমুস্সাহিতমানসো ‘‘সগ্গসংৱত্তনিকং কম্মং কাৰেত্ৱা তেনস্সা নিৰযূপপত্তিং নিসেধেত্ৱা সগ্গে পতিট্ঠাপেস্সামী’’তি চিন্তেত্ৱা মহতা ভিক্খুসঙ্ঘেন সদ্ধিং ৰাজগহং পিণ্ডায পৱিসতি. তেন চ সমযেন সা চণ্ডালী দণ্ডং ওলুব্ভ নগৰতো নিক্খমন্তী ভগৱন্তং আগচ্ছন্তং দিস্ৱা অভিমুখী হুত্ৱা অট্ঠাসি. ভগৱাপি তস্সা গমনং নিৱাৰেন্তো ৱিয পুৰতো অট্ঠাসি. অথাযস্মা মহামোগ্গল্লানো সত্থু চিত্তং ঞত্ৱা তস্সা চ আযুপৰিক্খযং ভগৱতো ৱন্দনায তং নিযোজেন্তো –

১৯৫. ‘‘চণ্ডালি ৱন্দ পাদানি, গোতমস্স যসস্সিনো;

তমেৱ অনুকম্পায, অট্ঠাসি ইসিসত্তমো.

১৯৬. ‘‘অভিপ্পসাদেহি মনং, অৰহন্তম্হি তাদিনি;

খিপ্পং পঞ্জলিকা ৱন্দ, পৰিত্তং তৱ জীৱিত’’ন্তি. – গাথাদ্ৱযমাহ;

১৯৫. তত্থ চণ্ডালীতি জাতিআগতেন নামেন তং আলপতি. ৱন্দাতি অভিৱাদয. পাদানীতি সদেৱকস্স লোকস্স সৰণানি চৰণানি. তমেৱ অনুকম্পাযাতি তমেৱ অনুগ্গণ্হনত্থং, অপাযূপপত্তিতো নিসেধেত্ৱা সগ্গে নিব্বত্তাপনত্থন্তি অধিপ্পাযো. অট্ঠাসীতি নগৰম্পি অপৱিসিত্ৱা ঠিতো. ইসিসত্তমোতি লোকিযসেক্খাসেক্খপচ্চেকবুদ্ধইসীহি উত্তমো উক্কট্ঠতমো, অথ ৱা বুদ্ধইসীনং ৱিপস্সিআদীনং সত্তমোতি ইসিসত্তমো.

১৯৬. অভিপ্পসাদেহি মনন্তি ‘‘সম্মাসম্বুদ্ধো ভগৱা’’তি তৱ চিত্তং পসাদেহি. অৰহন্তম্হি তাদিনীতি আৰকত্তা কিলেসানং, তেসংযেৱ অৰীনং হতত্তা, সংসাৰচক্কস্স অৰানং হতত্তা, পচ্চযানং অৰহত্তা, পাপকৰণে ৰহাভাৱা চ অৰহন্তে, ইট্ঠাদীসু তাদিভাৱপ্পত্তিযা তাদিম্হি. খিপ্পং পঞ্জলিকা ৱন্দাতি সীঘংযেৱ পগ্গহিতঅঞ্জলিকা হুত্ৱা ৱন্দস্সু. কস্মাতি চে? পৰিত্তং তৱ জীৱিতন্তি, ইদানেৱ ভিজ্জনসভাৱত্তা পৰিত্তং অতিইত্তৰং.

ইতি থেৰো গাথাদ্ৱযেন ভগৱতো গুণে পকিত্তেন্তো অত্তনো আনুভাৱে ঠত্ৱা তস্সা চ খীণাযুকতাৱিভাৱনেন সংৱেজেন্তো সত্থু ৱন্দনায নিযোজেসি. সা চ তং সুত্ৱা সংৱেগজাতা সত্থৰি পসন্নমানসাৱ হুত্ৱা পঞ্চপতিট্ঠিতেন ৱন্দিত্ৱা অঞ্জলিং কত্ৱা নমস্সমানা বুদ্ধগতায পীতিযা একগ্গচিত্তা হুত্ৱা অট্ঠাসি. ভগৱা ‘‘অলমেত্তকমেতিস্সা সগ্গূপপত্তিযা’’তি নগৰং পাৱিসি সদ্ধিং ভিক্খুসঙ্ঘেন. অথ নং একা ভন্তা গাৱী তৰুণৱচ্ছা ততো এৱ অভিধাৱন্তী সিঙ্গেন পহৰিত্ৱা জীৱিতা ৱোৰোপেসি. তং সব্বং দস্সেতুং সঙ্গীতিকাৰা –

১৯৭. ‘‘চোদিতা ভাৱিতত্তেন, সৰীৰন্তিমধাৰিনা;

চণ্ডালী ৱন্দি পাদানি, গোতমস্স যসস্সিনো.

১৯৮. ‘‘তমেনং অৱধী গাৱী, চণ্ডালিং পঞ্জলিং ঠিতং;

নমস্সমানং সম্বুদ্ধং, অন্ধকাৰে পভঙ্কৰ’’ন্তি. – গাথাদ্ৱযমাহংসু;

১৯৮. তত্থ পঞ্জলিং ঠিতং নমস্সমানং সম্বুদ্ধন্তি গতেপি ভগৱতি বুদ্ধাৰম্মণায পীতিযা সমাহিতা হুত্ৱা সম্মুখা ৱিয অঞ্জলিং পগ্গয্হ নমস্সমানং ঠিতং. অন্ধকাৰেতি অৱিজ্জন্ধকাৰেন সকলেন কিলেসন্ধকাৰেন চ অন্ধকাৰে লোকে. পভঙ্কৰন্তি ঞাণোভাসকৰং.

সা চ ততো চুতা তাৱতিংসেসু নিব্বত্তি, অচ্ছৰানং সতসহস্সং চস্সা পৰিৱাৰো অহোসি. তদহেৱ চ সা সহ ৱিমানেন আগন্ত্ৱা ৱিমানতো ওতৰিত্ৱা আযস্মন্তং মহামোগ্গল্লানং উপসঙ্কমিত্ৱা ৱন্দি. তমত্থং দস্সেতুং –

১৯৯. ‘‘খীণাসৱং ৱিগতৰজং অনেজং, একং অৰঞ্ঞম্হি ৰহো নিসিন্নং;

দেৱিদ্ধিপত্তা উপসঙ্কমিত্ৱা, ৱন্দামি তং ৱীৰ মহানুভাৱ’’ন্তি. –

দেৱতা আহ. তং থেৰো পুচ্ছি –

২০০. ‘‘সুৱণ্ণৱণ্ণা জলিতা মহাযসা, ৱিমানমোৰুয্হ অনেকচিত্তা;

পৰিৱাৰিতা অচ্ছৰাসঙ্গণেন, কা ত্ৱং সুভে দেৱতে ৱন্দসে মম’’ন্তি.

২০০. তত্থ জলিতাতি অত্তনো সৰীৰপ্পভায ৱত্থাভৰণাদীনং ওভাসেন চ জলন্তী জোতেন্তী. মহাযসাতি মহাপৰিৱাৰা. ৱিমানমোৰুয্হাতি ৱিমানতো ওৰুয্হ. অনেকচিত্তাতি অনেকৱিধচিত্ততাযুত্তা. সুভেতি সুভগুণে. মমন্তি মং.

এৱং থেৰেন পুচ্ছিতা পুন সা –

২০১. ‘‘অহং ভদ্দন্তে চণ্ডালী, তযা ৱীৰেন পেসিতা;

ৱন্দিং অৰহতো পাদে, গোতমস্স যসস্সিনো.

২০২. ‘‘সাহং ৱন্দিত্ৱা পাদানি, চুতা চণ্ডালযোনিযা;

ৱিমানং সব্বতো ভদ্দং, উপপন্নম্হি নন্দনে.

২০৩. ‘‘অচ্ছৰানং সতসহস্সং, পুৰক্খত্ৱান তিট্ঠতি;

তাসাহং পৱৰা সেট্ঠা, ৱণ্ণেন যসসাযুনা.

২০৪. ‘‘পহূতকতকল্যাণা, সম্পজানা পটিস্সতা;

মুনিং কাৰুণিকং লোকে, তং ভন্তে ৱন্দিতুমাগতা’’তি. –

চতস্সো গাথাযো আহ.

২০১-৪. তত্থ পেসিতাতি ‘‘চণ্ডালি, ৱন্দ পাদানী’’তিআদিনা ৱন্দনায উয্যোজিতা. যদিপি তং ৱন্দনামযং পুঞ্ঞং পৱত্তিক্খণৱসেন পৰিত্তং, খেত্তমহন্ততায পন ফলমহন্ততায চ অতিৱিয মহন্তমেৱাতি আহ ‘‘পহূতকতকল্যাণা’’তি. তথা বুদ্ধাৰম্মণায পীতিযা পৱত্তিক্খণে পঞ্ঞায সতিযা চ ৱিসদভাৱং সন্ধাযাহ ‘‘সম্পজানা পটিস্সতা’’তি. পুন –

২০৫. ‘‘ইদং ৱত্ৱান চণ্ডালী, কতঞ্ঞূ কতৱেদিনী;

ৱন্দিত্ৱা অৰহতো পাদে, তত্থেৱন্তৰধাযথা’’তি. –

গাথা সঙ্গীতিকাৰেহি ঠপিতা.

২০৫. তত্থ চণ্ডালীতি চণ্ডালীভূতপুব্বাতি কত্ৱা ৱুত্তং, দেৱলোকে চ ইদমাচিণ্ণং, যং মনুস্সলোকে নিৰুড়্হসমঞ্ঞায ৱোহাৰো. সেসং ৱুত্তনযমেৱ.

আযস্মা পন মহামোগ্গল্লানো ইমং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি, সা দেসনা মহাজনস্স সাত্থিকা অহোসীতি.

চণ্ডালিৱিমানৱণ্ণনা নিট্ঠিতা.