১০. পঠমভিক্খাদাযিকাৱিমানৱণ্ণনা

অভিক্কন্তেন ৱণ্ণেনাতি ভিক্খাদাযিকাৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন চ সমযেন উত্তৰমধুৰাযং অঞ্ঞতৰা ইত্থী খীণাযুকা হোতি অপাযে উপ্পজ্জনাৰহা. ভগৱা পচ্চূসৱেলাযং মহাকৰুণাসমাপত্তিতো ৱুট্ঠায লোকং ৱোলোকেন্তো তং ইত্থিং অপাযে উপ্পজ্জনাৰহং দিস্ৱা মহাকৰুণায সঞ্চোদিতমানসো তং সুগতিযং পতিট্ঠাপেতুকামো একো অদুতিযো মধুৰং অগমাসি. গন্ত্ৱা পুব্বণ্হসমযং নিৱাসেত্ৱা পত্তচীৱৰং আদায বহিনগৰং পিণ্ডায পাৱিসি. তেন সমযেন সা ইত্থী গেহে আহাৰং সম্পাদেত্ৱা একমন্তে পটিসামেত্ৱা ঘটং গহেত্ৱা উদকতিত্থং গন্ত্ৱা ন্হাযিত্ৱা ঘটেন উদকং গহেত্ৱা অত্তনো গেহং গচ্ছন্তী অন্তৰামগ্গে ভগৱন্তং পস্সিত্ৱা ‘‘অপি, ভন্তে, পিণ্ডো লদ্ধো’’তি ৱত্ৱা ‘‘লভিস্সামী’’তি চ ভগৱতা ৱুত্তে অলদ্ধভাৱং ঞত্ৱা ঘটং ঠপেত্ৱা ভগৱন্তং উপসঙ্কমিত্ৱা ৱন্দিত্ৱা ‘‘অহং, ভন্তে, পিণ্ডপাতং দস্সামি, অধিৱাসেথা’’তি আহ. অধিৱাসেসি ভগৱা তুণ্হীভাৱেন. সা ভগৱতো অধিৱাসনং ৱিদিত্ৱা পঠমতৰং গন্ত্ৱা সিত্তসম্মট্ঠে পদেসে আসনং পঞ্ঞাপেত্ৱা ভগৱতো পৱেসনং উদিক্খমানা অট্ঠাসি. ভগৱা গেহং পৱিসিত্ৱা পঞ্ঞত্তে আসনে নিসীদি. অথ সা ভগৱন্তং ভোজেসি. ভগৱা কতভত্তকিচ্চো ওনীতপত্তপাণী তস্সা অনুমোদনং কত্ৱা পক্কামি. সা অনুমোদনং সুত্ৱা অনপ্পকং পীতিসোমনস্সং পটিসংৱেদেন্তী যাৱ চক্খুপথসমতিক্কমা বুদ্ধাৰম্মণং পীতিং অৱিজহন্তী নমস্সমানা অট্ঠাসি. সা কতিপযদিৱসাতিক্কমেনেৱ কালং কত্ৱা তাৱতিংসভৱনে নিব্বত্তি, অচ্ছৰাসহস্সঞ্চস্সা পৰিৱাৰো অহোসি. তং আযস্মা মহামোগ্গল্লানো –

২৭০. ‘‘অভিক্কন্তেন ৱণ্ণেন…পে… ওসধী ৱিয তাৰকা.

২৭১. ‘‘কেন তেতাদিসো ৱণ্ণো…পে…

ৱণ্ণো চ তে সব্বদিসা পভাসতী’’তি. – গাথাহি পুচ্ছি;

২৭৩. ‘‘সা দেৱতা অত্তমনা…পে… যস্স কম্মস্সিদং ফলং’’.

২৭৪. ‘‘অহং মনুস্সেসু মনুস্সভূতা,

পুৰিমায জাতিযা মনুস্সলোকে.

২৭৫. ‘‘অদ্দসং ৱিৰজং বুদ্ধং, ৱিপ্পসন্নমনাৱিলং;

তস্স অদাসহং ভিক্খং, পসন্না সেহি পাণিভি.

২৭৬. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি. –

দেৱতা ব্যাকাসি. সেসং সব্বং হেট্ঠা ৱুত্তনযত্তা উত্তানত্থমেৱ.

পঠমভিক্খাদাযিকাৱিমানৱণ্ণনা নিট্ঠিতা.