১২. মুদিতত্থেৰগাথাৱণ্ণনা

পব্বজিন্তিআদিকা আযস্মতো মুদিতত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো একদিৱসং সত্থাৰং দিস্ৱা পসন্নমানসো একং মঞ্চমদাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে কোসলৰট্ঠে গহপতিকুলে নিব্বত্তিত্ৱা মুদিতোতি লদ্ধনামো ৱিঞ্ঞুতং পাপুণি. তেন চ সমযেন তং কুলং ৰঞ্ঞা কেনচিদেৱ কৰণীযেন পলিবুদ্ধং অহোসি. মুদিতো ৰাজভযাভীতো পলাযিত্ৱা অৰঞ্ঞং পৱিট্ঠো অঞ্ঞতৰস্স খীণাসৱত্থেৰস্স ৱসনট্ঠানং উপগচ্ছি. থেৰো তস্স ভীতভাৱং ঞত্ৱা ‘‘মা ভাযী’’তি সমস্সাসেসি. সো ‘‘কিত্তকেন নু খো, ভন্তে, কালেন ইদং মে ভযং ৱূপসমেস্সতী’’তি পুচ্ছিত্ৱা ‘‘সত্তট্ঠমাসে অতিক্কমিত্ৱা’’তি ৱুত্তে – ‘‘এত্তকং কালং অধিৱাসেতুং ন সক্কোমি, পব্বজিস্সামহং, ভন্তে, পব্বাজেথ ম’’ন্তি জীৱিতৰক্খণত্থং পব্বজ্জং যাচি. থেৰো তং পব্বাজেসি. সো পব্বজিত্ৱা সাসনে পটিলদ্ধসদ্ধো ভযে ৱূপসন্তেপি সমণধম্মংযেৱ ৰোচেন্তো কম্মট্ঠানং গহেত্ৱা ৱিপস্সনায কম্মং কৰোন্তো – ‘‘অৰহত্তং অপ্পত্ৱা ইমস্মা ৱসনগব্ভা বহি ন নিক্খমিস্সামী’’তিআদিনা পটিঞ্ঞং কত্ৱা ৱিপস্সনং উস্সুক্কাপেত্ৱা অৰহত্তং পাপুণি. তেন ৱুত্তং অপদানে (অপ. থেৰ ১.৩৬.৩০-৩৩) –

‘‘ৱিপস্সিনো ভগৱতো, লোকজেট্ঠস্স তাদিনো;

একং মঞ্চং মযা দিন্নং, পসন্নেন সপাণিনা.

‘‘হত্থিযানং অস্সযানং, দিব্বযানং সমজ্ঝগং;

তেন মঞ্চকদানেন, পত্তোম্হি আসৱক্খযং.

‘‘একনৱুতিতো কপ্পে, যং মঞ্চমদদিং তদা;

দুগ্গতিং নাভিজানামি, মঞ্চদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা ৱিমুত্তিসুখং পটিসংৱেদেন্তো সহাযভিক্খূহি অধিগতং পুচ্ছিতো অত্তনো পটিপন্নাকাৰং কথেন্তো –

৩১১. ‘‘পব্বজিং জীৱিকত্থোহং, লদ্ধান উপসম্পদং;

ততো সদ্ধং পটিলভিং, দড়্হৱীৰিযো পৰক্কমিং.

৩১২. ‘‘কামং ভিজ্জতুযং কাযো, মংসপেসী ৱিসীযৰুং;

উভো জণ্ণুকসন্ধীহি, জঙ্ঘাযো পপতন্তু মে.

৩১৩. ‘‘নাসিস্সং ন পিৱিস্সামি, ৱিহাৰা চ ন নিক্খমে;

নপি পস্সং নিপাতেস্সং, তণ্হাসল্লে অনূহতে.

৩১৪. ‘‘তস্স মেৱং ৱিহৰতো, পস্স ৱীৰিযপৰক্কমং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি. –

চতস্সো গাথা অভাসি.

তত্থ জীৱিকত্থোতি জীৱিকায অত্থিকো জীৱিকপ্পযোজনো. ‘‘এত্থ পব্বজিত্ৱা নিব্ভযো সুখেন অকিলমন্তো জীৱিস্সামী’’তি এৱং জীৱিকত্থায পব্বজিন্তি অত্থো. লদ্ধান উপসম্পদন্তি পঠমং সামণেৰপব্বজ্জাযং ঠিতো ঞত্তিচতুত্থেন কম্মেন উপসম্পদং লভিত্ৱা. ততো সদ্ধং পটিলভিন্তি ততো উপসম্পন্নকালতো পট্ঠায কল্যাণমিত্তে সেৱন্তো দ্ৱে মাতিকা, তিস্সো অনুমোদনা, একচ্চং সুত্তং, সমথকম্মট্ঠানং, ৱিপস্সনাৱিধিঞ্চ উগ্গণ্হন্তো বুদ্ধাদীনং মহানুভাৱতং দিস্ৱা – ‘‘সম্মাসম্বুদ্ধো ভগৱা, স্ৱাক্খাতো ধম্মো, সুপ্পটিপন্নো সঙ্ঘো’’তি ৰতনত্তযে সদ্ধং পটিলভিং. দড়্হৱীৰিযো পৰক্কমিন্তি এৱং পটিলদ্ধসদ্ধো হুত্ৱা ৱিপস্সনায কম্মং কৰোন্তো নচিৰস্সেৱ সচ্চপটিৱেধায দড়্হৱীৰিযো থিৰৱীৰিযো হুত্ৱা পৰক্কমিং, অকুসলানং ধম্মানং পহানায কুসলানং ধম্মানং উপসম্পদায সম্মদেৱ পদহিং.

যথা পন পৰক্কমিং, তং দস্সেতুং ‘‘কাম’’ন্তিআদি ৱুত্তং. তত্থ কামন্তি যথাকামং একংসতো ৱা ভিজ্জতু. অযং কাযোতি অযং মম পূতিকাযো, ইমিনা ৱীৰিযপতাপেন ভিজ্জতি চে, ভিজ্জতু ছিন্নভিন্নং হোতু. মংসপেসী ৱিসীযৰুন্তি ইমিনা দড়্হপৰক্কমেন ইমস্মা কাযা মংসপেসিযো ৱিসীযন্তি চে, ৱিসীযন্তু ইতো চিতো ৱিদ্ধংসন্তু. উভো জণ্ণুকসন্ধীহি, জঙ্ঘাযো পপতন্তু মেতি উভোহি জণ্ণুকসন্ধীহি সহ মম উভো জঙ্ঘাযো সত্থিযো ঊৰুবন্ধতো ভিজ্জিত্ৱা ভূমিযং পপতন্তু. ‘‘ম’’ন্তিপি পাঠো, সো এৱত্থো. সেসং হেট্ঠা ৱুত্তনযমেৱ.

মুদিতত্থেৰগাথাৱণ্ণনা নিট্ঠিতা.

চতুক্কনিপাতৱণ্ণনা নিট্ঠিতা.