১১. সপ্পকত্থেৰগাথাৱণ্ণনা

যদা বলাকাতিআদিকা আযস্মতো সপ্পকত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো ইতো একতিংসে কপ্পে মহানুভাৱো নাগৰাজা হুত্ৱা নিব্বত্তো সম্ভৱস্স নাম পচ্চেকবুদ্ধস্স অব্ভোকাসে সমাপত্তিযা নিসিন্নস্স মহন্তং পদুমং গহেত্ৱা উপৰিমুদ্ধনি ধাৰেন্তো পূজং অকাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে সাৱত্থিযং ব্ৰাহ্মণকুলে নিব্বত্তিত্ৱা সপ্পকোতি লদ্ধনামো ৱিঞ্ঞুতং পত্তো ভগৱতো সন্তিকে ধম্মং সুত্ৱা পটিলদ্ধসদ্ধো পব্বজিত্ৱা কম্মট্ঠানং গহেত্ৱা অজকৰণিযা নাম নদিযা তীৰে লেণগিৰিৱিহাৰে ৱসন্তো নচিৰস্সেৱ অৰহত্তং পাপুণি. তেন ৱুত্তং অপদানে (অপ. থেৰ ২.৫২.৭৮-৮৩) –

‘‘হিমৱন্তস্সাৱিদূৰে, ৰোমসো নাম পব্বতো;

বুদ্ধোপি সম্ভৱো নাম, অব্ভোকাসে ৱসী তদা.

‘‘ভৱনা নিক্খমিত্ৱান, পদুমং ধাৰযিং অহং;

একাহং ধাৰযিত্ৱান, ভৱনং পুনৰাগমিং.

‘‘একতিংসে ইতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অৰহত্তং পত্ৱা সত্থাৰং ৱন্দিতুং সাৱত্থিং আগতো ঞাতীহি উপট্ঠীযমানো তত্থ কতিপাহং ৱসিত্ৱা ধম্মং দেসেত্ৱা ঞাতকে সৰণেসু চ সীলেসু চ পতিট্ঠাপেত্ৱা যথাৱুত্তট্ঠানমেৱ গন্তুকামো অহোসি. তং ঞাতকা ‘‘ইধেৱ, ভন্তে, ৱসথ, মযং পটিজগ্গিস্সামা’’তি যাচিংসু. সো গমনাকাৰং দস্সেত্ৱা ঠিতো অত্তনা ৱসিতট্ঠানকিত্তনাপদেসেন ৱিৱেকাভিৰতিং পকাসেন্তো –

৩০৭. ‘‘যদা বলাকা সুচিপণ্ডৰচ্ছদা, কাড়স্স মেঘস্স ভযেন তজ্জিতা;

পলেহিতি আলযমালযেসিনী, তদা নদী অজকৰণী ৰমেতি মং.

৩০৮. ‘‘যদা বলাকা সুৱিসুদ্ধপণ্ডৰা, কাড়স্স মেঘস্স ভযেন তজ্জিতা;

পৰিযেসতি লেণমলেণদস্সিনী, তদা নদী অজকৰণী ৰমেতি মং.

৩০৯. ‘‘কং নু তত্থ ন ৰমেন্তি, জম্বুযো উভতো তহিং;

সোভেন্তী আপগাকূলং, মম লেণস্স পচ্ছতো.

৩১০. ‘‘তামতমদসঙ্ঘসুপ্পহীনা, ভেকা মন্দৱতী পনাদযন্তি;

নাজ্জ গিৰিনদীহি ৱিপ্পৱাসসমযো,

খেমা অজকৰণী সিৱা সুৰম্মা’’তি. – চতস্সো গাথা অভাসি;

তত্থ যদাতি যস্মিং কালে. বলাকাতি বলাকাসকুণিকা. সুচিপণ্ডৰচ্ছদাতি সুচিসুদ্ধধৱলপক্খা. কাড়স্স মেঘস্স ভযেন তজ্জিতাতি জলভাৰভৰিততায কাড়স্স অঞ্জনগিৰিসন্নিকাসস্স পাৱুস্সকমেঘস্স গজ্জতো ৱুট্ঠিভযেন নিব্বিজ্জিতা ভিংসাপিতা. পলেহিতীতি গোচৰভূমিতো উপ্পতিত্ৱা গমিস্সতি. আলযন্তি নিলযং অত্তনো কুলাৱকং. আলযেসিনীতি তত্থ আলযনং নিলীযনমেৱ ইচ্ছন্তী. তদা নদী অজকৰণী ৰমেতি মন্তি তস্মিং পাৱুস্সককালে অজকৰণীনামিকা নদী নৱোদকস্স পূৰা হাৰহাৰিনী কুলঙ্কসা মং ৰমেতি মম চিত্তং আৰাধেতীতি উতুপদেসৱিসেসকিত্তনাপদেসেন ৱিৱেকাভিৰতিং পকাসেসি.

সুৱিসুদ্ধপণ্ডৰাতি সুট্ঠু ৱিসুদ্ধপণ্ডৰৱণ্ণা, অসম্মিস্সৱণ্ণা সব্বসেতাতি অত্থো. পৰিযেসতীতি মগ্গতি. লেণন্তি ৱসনট্ঠানং. অলেণদস্সিনীতি ৱসনট্ঠানং অপস্সন্তী. পুব্বে নিবদ্ধৱসনট্ঠানস্স অভাৱেন অলেণদস্সিনী, ইদানি পাৱুস্সককালে মেঘগজ্জিতেন আহিতগব্ভা পৰিযেসতি লেণন্তি নিবদ্ধৱসনট্ঠানং কুলাৱকং কৰোতীতি অত্থো.

কং নু তত্থ…পে… পচ্ছতোতি মম ৱসনকমহালেণস্স পচ্ছতো পচ্ছাভাগে আপগাকূলং অজকৰণীনদিযা উভতোতীৰং তহিং তহিং ইতো চিতো চ সোভেন্তিযো নিচ্চকালং ফলভাৰনমিতসাখা সিনিদ্ধপণ্ণচ্ছাযা জম্বুযো তত্থ তস্মিং ঠানে কং নাম সত্তং ন ৰমেন্তি নু, সব্বং ৰমেন্তিযেৱ.

তামতমদসঙ্ঘসুপ্পহীনাতি অমতং ৱুচ্চতি অগদং, তেন মজ্জন্তীতি অমতমদা, সপ্পা, তেসং সঙ্ঘো অমতমদসঙ্ঘো, ততো সুট্ঠু পহীনা অপগতা. ভেকা মণ্ডূকিযো, মন্দৱতী সৰৱতিযো, পনাদযন্তি তং ঠানং মধুৰেন ৱস্সিতেন নিন্নাদযন্তি. নাজ্জ গিৰিনদীহি ৱিপ্পৱাসসমযোতি অজ্জ এতৰহি অঞ্ঞাহিপি পব্বতেয্যাহি নদীহি ৱিপ্পৱাসসমযো ন হোতি, ৱিসেসতো পন ৱাড়মচ্ছসুসুমাৰাদিৱিৰহিততো খেমা অজকৰণী নদী. সুন্দৰতলতিত্থপুলিনসম্পত্তিযা সিৱা. সুট্ঠু ৰম্মা ৰমণীযা, তস্মা তত্থেৱ মে মনো ৰমতীতি অধিপ্পাযো.

এৱং পন ৱত্ৱা ঞাতকে ৱিস্সজ্জেত্ৱা অত্তনো ৱসনট্ঠানমেৱ গতো. সুঞ্ঞাগাৰাভিৰতিদীপনেন ইদমেৱ চ থেৰস্স অঞ্ঞাব্যাকৰণং অহোসীতি.

সপ্পকত্থেৰগাথাৱণ্ণনা নিট্ঠিতা.