৮. নিসভত্থেৰগাথাৱণ্ণনা

পঞ্চ কামগুণে হিত্ৱাতি আযস্মতো নিসভত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো একদিৱসং সত্থাৰং পিণ্ডায চৰন্তং দিস্ৱা পসন্নচিত্তো কপিত্থফলমদাসি. সো তেন পুঞ্ঞকম্মেন সুগতীসুযেৱ সংসৰন্তো ইমস্মিং বুদ্ধুপ্পাদে কোলিযজনপদে কুলগেহে নিব্বত্তিত্ৱা নিসভোতি লদ্ধনামো ৱযপ্পত্তো সাকিযকোলিযানং সঙ্গামে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা তদহেৱ অৰহত্তং পাপুণি. তেন ৱুত্তং অপদানে (অপ. থেৰ ২.৫২.৭-১১) –

‘‘সুৱণ্ণৱণ্ণং সম্বুদ্ধং, আহুতীনং পটিগ্গহং;

ৰথিযং পটিপজ্জন্তং, কপিত্থং অদদিং ফলং.

‘‘একনৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অৰহত্তং পন পত্ৱা অত্তনো সহাযভিক্খূ পমাদৱিহাৰেন কালং ৱীতিনামেন্তে দিস্ৱা তে ওৱদন্তো –

১৯৫. ‘‘পঞ্চ কামগুণে হিত্ৱা, পিযৰূপে মনোৰমে;

সদ্ধায ঘৰা নিক্খম্ম, দুক্খস্সন্তকৰো ভৱে’’তি. –

পঠমং গাথং অভাসি.

তস্সত্থো – বালপুথুজ্জনস্স পিযাযিতব্বসভাৱতায পিযৰূপে মনুঞ্ঞসভাৱতায মনোৰমে ৰূপাদিকে পঞ্চ কামগুণে কামকোট্ঠাসে হিত্ৱা পহায পৰিচ্চজিত্ৱা কম্মফলসদ্ধায ৰতনত্তযসদ্ধায চ ৱসেন ঘৰা ঘৰবন্ধনতো নিক্খম্ম নিক্খমিত্ৱা পব্বজ্জং উপগতো ৱিঞ্ঞুজাতিকো পব্বজিতকালতো পট্ঠায ঘটেন্তো ৱাযমন্তো ৱট্টদুক্খস্স অন্তকৰো ভৱে ভৱেয্যাতি. এৱং তে ভিক্খূ ওৱদিত্ৱা ‘‘অযং পৰে এৱ সঞ্ঞাপেন্তো ৱিহৰতি, ‘‘সযং পন অকাৰকো’তি মা চিন্তযিত্থা’’তি তেসং অত্তনো পটিপন্নভাৱং পকাসেন্তো –

১৯৬. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, সম্পজানো পতিস্সতো’’তি. –

দুতিযগাথায অঞ্ঞং ব্যাকাসি. তত্থ নাভিনন্দামি মৰণন্তি মৰণং ন অভিকঙ্খামি. নাভিনন্দামি জীৱিতন্তি ইদং পন তস্স কাৰণৱচনং, যস্মা নাভিনন্দামি জীৱিতং, তস্মা নাভিনন্দামি মৰণন্তি. যো হি আযতিং জাতিজৰামৰণায কিলেসাভিসঙ্খাৰে আচিনোতি উপচিনোতি, সো পুনব্ভৱাভিনিব্বত্তিং অভিনন্দন্তো নান্তৰিযকতায অত্তনো মৰণম্পি অভিনন্দতি নাম কাৰণস্স অপ্পহীনত্তা, খীণাসৱো পন সব্বসো আচযগামিধম্মে পহায অপচযগামিধম্মে পতিট্ঠিতো পৰিঞ্ঞাতৱত্থুকো সব্বসো জীৱিতং অনভিনন্দন্তো মৰণম্পি অনভিনন্দতি নাম কাৰণস্স এৱ সুপ্পহীনত্তা. তেনাহ – ‘‘নাভিনন্দামি মৰণং, নাভিনন্দামি জীৱিত’’ন্তি. যদি এৱং খীণাসৱস্স পৰিনিব্বানাভিকঙ্খা, যাৱ পৰিনিব্বানা অৱট্ঠানঞ্চ কথন্তি আহ ‘‘কালঞ্চ পটিকঙ্খামি, সম্পজানো পতিস্সতো’’তি, কিলেসপৰিনিব্বানে সিদ্ধে সতিপঞ্ঞাৱেপুল্লপ্পত্তিযা সতো সম্পজানো কেৱলং খন্ধপৰিনিব্বানকালং পটিকঙ্খামি, তং উদিক্খমানো আগমযমানো ৱিহৰামি, ন পন মে মৰণে জীৱিতে ৱা অভিনন্দনা অত্থি অৰহত্তমগ্গেনেৱ তস্স সমুগ্ঘাটিতত্তাতি.

নিসভত্থেৰগাথাৱণ্ণনা নিট্ঠিতা.