৪. ইসিদিন্নত্থেৰগাথাৱণ্ণনা

দিট্ঠা মযাতি আযস্মতো ইসিদিন্নত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি কৰোন্তো ৱিপস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো বীজনিং গহেত্ৱা বোধিযা পূজং অকাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে সুনাপৰন্তজনপদে সেট্ঠিকুলে নিব্বত্তিত্ৱা ইসিদিন্নোতি লদ্ধনামো ৱযপ্পত্তো সত্থু চন্দনমাড়পটিগ্গহণে পাটিহাৰিযং দিস্ৱা পসন্নমানসো সত্থাৰং উপসঙ্কমিত্ৱা ধম্মং সুত্ৱা সোতাপন্নো হুত্ৱা অগাৰং অজ্ঝাৱসতি. তস্স হিতানুকম্পিনী দেৱতা তং চোদেন্তী –

১৮৭. ‘‘দিট্ঠা মযা ধম্মধৰা উপাসকা, কামা অনিচ্চা ইতি ভাসমানা;

সাৰত্তৰত্তা মণিকুণ্ডলেসু, পুত্তেসু দাৰেসু চ তে অপেক্খা.

১৮৮. ‘‘অদ্ধা ন জানন্তি যতোধ ধম্মং, কামা অনিচ্চা ইতি চাপি আহু;

ৰাগঞ্চ তেসং ন বলত্থি ছেত্তুং, তস্মা সিতা পুত্তদাৰং ধনঞ্চা’’তি. –

গাথাদ্ৱযমভাসি.

তত্থ দিট্ঠা মযা ধম্মধৰা উপাসকা, কামা অনিচ্চা ইতি ভাসমানাতি ইধেকচ্চে পৰিযত্তিধম্মধৰা উপাসকা মযা দিট্ঠা, পৰিযত্তিধম্মধৰত্তা এৱ ‘‘কামা নামেতে অনিচ্চা দুক্খা ৱিপৰিণামধম্মা’’তি কামেসু আদীনৱপটিসংযুত্তং ধম্মং ভাসমানা, সযং পন সাৰত্তৰত্তা মণিকুণ্ডলেসু, পুত্তেসু দাৰেসু চ তে অপেক্খাতি সাৰত্তা হুত্ৱা বহলৰাগৰত্তা মণীসু কুণ্ডলেসু চ, মণিচিতেসু ৱা কুণ্ডলেসু, পুত্তেসু পুত্তধীতাসু দাৰেসু চ অধিগতস্নেহা, অঞ্ঞং ভণন্তা অঞ্ঞং কৰোন্তা দিট্ঠা মযাতি অত্থো.

যতোতি যস্মা তে উপাসকা সাৰত্তৰত্তা মণিকুণ্ডলেসু পুত্তেসু দাৰেসু চ অপেক্খৱন্তো, তস্মা ইধ ইমস্মিং বুদ্ধসাসনে ধম্মং যাথাৱতো অদ্ধা একংসেন ন জানন্তি. এৱং ভূতা চ ‘‘কামা অনিচ্চা’’ইতি চাপি আহু অহোসি, সত্তপকতি ৱিচিত্তসভাৱাতি অধিপ্পাযো. ৰাগঞ্চ তেসং ন বলত্থি ছেত্তুন্তি তেসং উপাসকানং যস্মা ৰাগং ছেত্তুং সমুচ্ছিন্দিতুং তাদিসং ঞাণবলং নত্থি, তস্মা তেন কাৰণেন সিতা তণ্হাৱসেন নিস্সিতা পুত্তদাৰং ধনঞ্চ অল্লীনা ন ৱিস্সজ্জেন্তীতি সব্বমেতং দেৱতা তংযেৱ উপাসকং উদ্দিস্স অঞ্ঞাপদেসেন কথেসি. তং সুত্ৱা উপাসকো সংৱেগজাতো পব্বজিত্ৱা নচিৰস্সেৱ অৰহত্তং পাপুণি. তেন ৱুত্তং অপদানে (অপ. থেৰ ২.৪৮.৪৬-৫০) –

‘‘ৱিপস্সিনো ভগৱতো, বোধিযা পাদপুত্তমে;

সুমনো বীজনিং গয্হ, অবীজিং বোধিমুত্তমং.

‘‘একনৱুতিতো কপ্পে, অবীজিং বোধিমুত্তমং;

দুগ্গতিং নাভিজানামি, বীজনায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অঞ্ঞং ব্যাকৰোন্তো ইমা এৱ গাথা অভাসীতি.

ইসিদিন্নত্থেৰগাথাৱণ্ণনা নিট্ঠিতা.