১০. কণ্হদিন্নত্থেৰগাথাৱণ্ণনা

উপাসিতা সপ্পুৰিসাতি আযস্মতো কণ্হদিন্নত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো ইতো চতুনৱুতে কপ্পে কুলগেহে নিব্বত্তিত্ৱা ৱিঞ্ঞুতং পত্তো একদিৱসং সোভিতং নাম পচ্চেকবুদ্ধং দিস্ৱা পসন্নচিত্তো পুন্নাগপুপ্ফেহি পূজং অকাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে ৰাজগহে ব্ৰাহ্মণকুলে নিব্বত্তিত্ৱা কণ্হদিন্নোতি লদ্ধনামো ৱযপ্পত্তো উপনিস্সযসম্পত্তিযা চোদিযমানো ধম্মসেনাপতিং উপসঙ্কমিত্ৱা ধম্মং সুত্ৱা পটিলদ্ধসদ্ধো পব্বজিত্ৱা ৱিপস্সনং ৱড্ঢেত্ৱা অৰহত্তং পাপুণি. তেন ৱুত্তং অপদানে (অপ. থেৰ ২.৪৮.৬১-৬৫) –

‘‘সোভিতো নাম সম্বুদ্ধো, চিত্তকূটে ৱসী তদা;

গহেত্ৱা গিৰিপুন্নাগং, সযম্ভুং অভিপূজযিং.

‘‘চতুন্নৱুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অঞ্ঞং ব্যাকৰোন্তো –

১৭৯. ‘‘উপাসিতা সপ্পুৰিসা, সুতা ধম্মা অভিণ্হসো;

সুত্ৱান পটিপজ্জিস্সং, অঞ্জসং অমতোগধং.

১৮০. ‘‘ভৱৰাগহতস্স মে সতো, ভৱৰাগো পুন মে ন ৱিজ্জতি;

ন চাহু ন চ মে ভৱিস্সতি, ন চ মে এতৰহি ৱিজ্জতী’’তি. –

গাথাদ্ৱযং অভাসি.

তত্থ উপাসিতাতি পৰিচৰিতা পটিপত্তিপযিৰুপাসনায পযিৰুপাসিতা. সপ্পুৰিসাতি সন্তেহি সীলাদিগুণেহি সমন্নাগতা পুৰিসা, অৰিযপুগ্গলা সাৰিপুত্তত্থেৰাদযো. এতেন পুৰিমচক্কদ্ৱযসম্পত্তিমত্তনো দস্সেতি. ন হি পতিৰূপদেসৱাসেন ৱিনা সপ্পুৰিসূপনিস্সযো সম্ভৱতি. সুতা ধম্মাতি সচ্চপটিচ্চসমুপ্পাদাদিপটিসংযুত্তধম্মা সোতদ্ৱাৰানুসাৰেন উপধাৰিতা. এতেন অত্তনো বাহুসচ্চং দস্সেন্তো পচ্ছিমচক্কদ্ৱযসম্পত্তিং দস্সেতি. অভিণ্হসোতি বহুসো ন কালেন কালং. ইদঞ্চ পদং ‘‘উপাসিতা সপ্পুৰিসা’’তি এত্থাপি যোজেতব্বং. সুত্ৱান পটিপজ্জিস্সং, অঞ্জসং অমতোগধন্তি তে ধম্মে সুত্ৱা তত্থ ৱুত্তৰূপাৰূপধম্মে সলক্খণাদিতো পৰিগ্গহেত্ৱা অনুক্কমেন ৱিপস্সনং ৱড্ঢেত্ৱা অমতোগধং নিব্বানপতিট্ঠং তংসম্পাপকং অঞ্জসং অৰিযং অট্ঠঙ্গিকং মগ্গং পটিপজ্জিং পাপুণিং.

ভৱৰাগহতস্স মে সতোতি ভৱৰাগেন ভৱতণ্হায অনাদিমতি সংসাৰে হতস্স উপদ্দুতস্স মম সতো সমানস্স, অগ্গমগ্গেন ৱা হতভৱৰাগস্স. ভৱৰাগো পুন মে ন ৱিজ্জতীতি ততো এৱ পুন ইদানি ভৱৰাগো মে নত্থি. ন চাহু ন মে ভৱিস্সতি, ন চ মে এতৰহি ৱিজ্জতীতি যদিপি পুব্বে পুথুজ্জনকালে সেক্খকালে চ মে ভৱৰাগো অহোসি, অগ্গমগ্গপ্পত্তিতো পন পট্ঠায ন চাহু ন চ অহোসি, আযতিম্পি ন মে ভৱিস্সতি, এতৰহি অধুনাপি ন চ মে ৱিজ্জতি ন চ উপলব্ভতি, পহীনোতি অত্থো. ভৱৰাগৱচনেনেৱ চেত্থ তদেকট্ঠতায মানাদীনম্পি অভাৱো ৱুত্তোতি সব্বসো পৰিক্খীণভৱসংযোজনতং দস্সেতি.

কণ্হদিন্নত্থেৰগাথাৱণ্ণনা নিট্ঠিতা.

ততিযৱগ্গৱণ্ণনা নিট্ঠিতা.