৫. অজিনত্থেৰগাথাৱণ্ণনা

অপি চে হোতি তেৱিজ্জোতিআদিকা আযস্মতো অজিনত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো বুদ্ধসুঞ্ঞে লোকে কুলগেহে নিব্বত্তিত্ৱা ৱিঞ্ঞুতং পত্তো কেনচিদেৱ কৰণীযেন অৰঞ্ঞং গতো তত্থ সুচিন্তিতং নাম পচ্চেকসম্বুদ্ধং আবাধেন পীড়িতং নিসিন্নং দিস্ৱা উপসঙ্কমিত্ৱা ৱন্দিত্ৱা ভেসজ্জত্থায পসন্নমানসো ঘতমণ্ডং অদাসি. সো তেন পুঞ্ঞকম্মেন দেৱলোকে নিব্বত্তিত্ৱা অপৰাপৰং পুঞ্ঞানি কত্ৱা সুগতীসুযেৱ সংসৰন্তো ইমস্মিং বুদ্ধুপ্পাদে সাৱত্থিযং অঞ্ঞতৰস্স দলিদ্দব্ৰাহ্মণস্স গেহে পটিসন্ধিং গণ্হি. তং ৱিজাযনকালে অজিনচম্মেন সম্পটিচ্ছিংসু. তেনস্স অজিনোত্ৱেৱ নামং অকংসু. সো ভোগসংৱত্তনিযস্স কম্মস্স অকতত্তা দলিদ্দকুলে নিব্বত্তো ৱযপ্পত্তোপি অপ্পন্নপানভোজনো হুত্ৱা ৱিচৰন্তো জেতৱনপটিগ্গহণে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা ৱিপস্সনায কম্মং কৰোন্তো নচিৰস্সেৱ ছড়ভিঞ্ঞো অহোসি. তেন ৱুত্তং অপদানে (অপ. থেৰ ২.৪৩.৭৮-৮৭) –

‘‘সুচিন্তিতং ভগৱন্তং, লোকজেট্ঠং নৰাসভং;

উপৱিট্ঠং মহাৰঞ্ঞং, ৱাতাবাধেন পীড়িতং.

‘‘দিস্ৱা চিত্তং পসাদেত্ৱা, ঘতমণ্ডমুপানযিং;

কতত্তা আচিতত্তা চ, গঙ্গা ভাগীৰথী অযং.

‘‘মহাসমুদ্দা চত্তাৰো, ঘতং সম্পজ্জৰে মম;

অযঞ্চ পথৱী ঘোৰা, অপ্পমাণা অসঙ্খিযা.

‘‘মম সঙ্কপ্পমঞ্ঞায, ভৱতে মধুসক্কৰা;

চাতুদ্দীপা ইমে ৰুক্খা, পাদপা ধৰণীৰুহা.

‘‘মম সঙ্কপ্পমঞ্ঞায, কপ্পৰুক্খা ভৱন্তি তে;

পঞ্ঞাসক্খত্তুং দেৱিন্দো, দেৱৰজ্জমকাৰযিং.

‘‘একপঞ্ঞাসক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, ঘতমণ্ডস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱাপি পুৰিমকম্মনিস্সন্দেন অপ্পলাভী অপ্পঞ্ঞাতোৱ অহোসি. উদ্দেসভত্তসলাকভত্তানিপি লামকানেৱ পাপুণন্তি. কম্মফলেনেৱ চ নং পুথুজ্জনা ভিক্খূ সামণেৰা চ ‘‘অপ্পঞ্ঞাতো’’তি অৱমঞ্ঞন্তি. থেৰো তে ভিক্খূ সংৱেজেন্তো –

১২৯. ‘‘অপি চে হোতি তেৱিজ্জো, মচ্চুহাযী অনাসৱো;

অপ্পঞ্ঞাতোতি নং বালা, অৱজানন্তি অজানতা.

১৩০. ‘‘যো চ খো অন্নপানস্স, লাভী হোতীধ পুগ্গলো;

পাপধম্মোপি চে হোতি, সো নেসং হোতি সক্কতো’’তি. –

গাথাদ্ৱযং অভাসি.

তত্থ অপীতি সম্ভাৱনে নিপাতো. চেতি পৰিকপ্পনে. হোতীতি ভৱতি. তিস্সো ৱিজ্জা এতস্সাতি তেৱিজ্জো. মচ্চুং পজহতীতি মচ্চুহাযী. কামাসৱাদীনং অভাৱেন অনাসৱো. ইদং ৱুত্তং হোতি – দিব্বচক্খুঞাণং পুব্বেনিৱাসঞাণং আসৱক্খযঞাণন্তি ইমাসং তিস্সন্নং ৱিজ্জানং অধিগতত্তা তেৱিজ্জো ততো এৱ সব্বসো কামাসৱাদীনং পৰিক্খীণত্তা অনাসৱো আযতিং পুনব্ভৱস্স অগ্গহণতো মৰণাভাৱেন মচ্চুহাযী যদিপি হোতি, এৱং সন্তেপি অপ্পঞ্ঞাতোতি নং বালা অৱজানন্তি যস্সত্থায কুলপুত্তা সম্মদেৱ অগাৰস্মা অনগাৰিযং পব্বজন্তি, তং সদত্থং অনুপাপুণিত্ৱা ঠিতম্পি নং উত্তমং পুৰিসং ‘‘ধুতৱাদো বহুস্সুতো ধম্মকথিকো’’তি উপ্পন্নলাভস্স অভাৱতো ‘‘ন পঞ্ঞাতো ন পাকটো’’তি বালা দুম্মেধপুগ্গলা অৱজানন্তি, কস্মা? অজানতা অজাননকাৰণা গুণানং অজাননমেৱ তত্থ কাৰণন্তি দস্সেতি.

যথা চ গুণানং অজাননতো বালা লাভগৰুতায সম্ভাৱনীযম্পি অৱজানন্তি, এৱং গুণানং অজাননতো লাভগৰুতায এৱং অৱজানিতব্বম্পি সম্ভাৱেন্তীতি দস্সেন্তো দুতিযং গাথং আহ. তত্থ যোতি অনিযমৱচনং. চ-সদ্দো ব্যতিৰেকে, তেন যথাৱুত্তপুগ্গলতো ইমস্স পুগ্গলস্স ৱুচ্চমানংযেৱ ৱিসেসং জনেতি. খোতি অৱধাৰণে. অন্নপানস্সাতি নিদস্সনমত্তং. লাভীতি লাভৱা. ইধাতি ইমস্মিং লোকে. জৰামৰণেহি তস্স তস্স সত্তাৱাসস্স পূৰণতো গলনতো চ পুগ্গলো. পাপধম্মোতি লামকধম্মো. অযঞ্হেত্থ অত্থো – যো পন পুগ্গলো চীৱৰাদিপচ্চযমত্তস্সেৱ লাভী হোতি, ন ঝানাদীনং, সো পাপিচ্ছতায দুস্সীলভাৱেন হীনধম্মোপি সমানো ইধ ইমস্মিং লোকে বালানং লাভগৰুতায সক্কতো গৰুকতো হোতীতি.

অজিনত্থেৰগাথাৱণ্ণনা নিট্ঠিতা.