৬. মেড়জিনত্থেৰগাথাৱণ্ণনা

যদাহং ধম্মমস্সোসিন্তিআদিকা আযস্মতো মেড়জিনত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো সুমেধস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো একদিৱসং ভগৱন্তং পিণ্ডায গচ্ছন্তং দিস্ৱা পসন্নমানসো মধুৰং আমোদফলং অদাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে বাৰাণসিযং খত্তিযকুলে নিব্বত্তিত্ৱা মেড়জিনোতি লদ্ধনামো ৱিজ্জাসিপ্পেসু নিপ্ফত্তিং গতো পণ্ডিতো ব্যত্তো দিসাসু পাকটো অহোসি. সো ভগৱতি বাৰাণসিযং ইসিপতনে ৱিহৰন্তে ৱিহাৰং গন্ত্ৱা সত্থাৰং উপসঙ্কমিত্ৱা ধম্মং সুত্ৱা পটিলদ্ধসদ্ধো পব্বজিত্ৱা ৱিপস্সনং পট্ঠপেত্ৱা তদহেৱ অৰহত্তং পাপুণি. তেন ৱুত্তং অপদানে (অপ. থেৰ ২.৫১.৫৭-৬২) –

‘‘সহস্সৰংসী ভগৱা, সযম্ভূ অপৰাজিতো;

ৱিৱেকা ৱুট্ঠহিত্ৱান, গোচৰাযাভিনিক্খমি.

‘‘ফলহত্থো অহং দিস্ৱা, উপগচ্ছিং নৰাসভং;

পসন্নচিত্তো সুমনো, অৱটং অদদিং ফলং.

‘‘চতুন্নৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অপৰভাগে ভিক্খূহি, ‘‘আৱুসো, কিং তযা উত্তৰিমনুস্সধম্মো অধিগতো’’তি পুট্ঠো সীহনাদং নদন্তো –

১৩১. ‘‘যদাহং ধম্মমস্সোসিং, ভাসমানস্স সত্থুনো;

ন কঙ্খমভিজানামি, সব্বঞ্ঞূ অপৰাজিতে.

১৩২. ‘‘সত্থৱাহে মহাৱীৰে, সাৰথীনং ৱৰুত্তমে;

মগ্গে পটিপদাযং ৱা, কঙ্খা ময্হং ন ৱিজ্জতী’’তি. – গাথাদ্ৱযং অভাসি;

তত্থ যদাতি যস্মিং কালে. অহন্তি অত্তানং নিদ্দিসতি. ধম্মন্তি চতুসচ্চধম্মং. অস্সোসিন্তি সুণিং. সত্থুনোতি দিট্ঠধম্মিকাদিঅত্থেহি ৱেনেয্যানং সাসনট্ঠেন সত্থুনো. কঙ্খন্তি সংসযং. সঙ্খতমসঙ্খতঞ্চ অনৱসেসতো জাননট্ঠেন সব্বঞ্ঞূ. কুতোচিপি পৰাজিতা ভাৱেন অপৰাজিতে. ৱেনেয্যসত্তানং সংসাৰকন্তাৰতো নিব্বানং পটিৱাহনট্ঠেন সত্থৱাহে. ইদং ৱুত্তং হোতি – যতো পভুতি অহং সত্থুনো ধম্মং দেসেন্তস্স চতুসচ্চধম্মং অস্সোসিং সোতদ্ৱাৰানুসাৰেন উপধাৰেসিং উপলভিং, ততো পট্ঠায অনৱসেসসঙ্খতাসঙ্খতসম্মুতিধম্মানং সযম্ভূঞাণেন জাননতো সব্বঞ্ঞূ অনাৱৰণদস্সাৱিম্হি, পঞ্চন্নম্পি মাৰানং অভিভৱনতো তেহি অপৰাজিতত্তা সদেৱকে লোকে অপ্পটিহতধম্মচক্কত্তা চ অপৰাজিতে, ৱেনেয্যসত্তানং লোভকন্তাৰাদিতো ৱাহনট্ঠেন সত্থৱাহে, মহাৱিক্কন্ততায মহাৱীৰে, অঞ্ঞেহি দুদ্দমানং পুৰিসদম্মানং সৰণতো অচ্চন্তিকেন দমথেন দমনতো সাৰথীনং পৱৰভূতে উত্তমে সম্মাসম্বুদ্ধে, ‘‘বুদ্ধো নু খো নো নু খো’’তি কঙ্খং নাভিজানামি অপৰপ্পচ্চযভাৱতো. তথাৰূপে দেসিতে অৰিযমগ্গে তদুপাদাযভূতায চ সীলাদিপটিপদায ‘‘নিয্যানিকো নু খো ন নু খো’’তি কঙ্খা ৱিচিকিচ্ছা ন ৱিজ্জতি নত্থীতি. এত্থ চ অৰিযধম্মে সংসযাভাৱকথনেন অৰিযসঙ্ঘেপি সংসযাভাৱো কথিতোযেৱাতি দট্ঠব্বং তত্থ পতিট্ঠিতস্স অনঞ্ঞথাভাৱতোতি.

মেড়জিনত্থেৰগাথাৱণ্ণনা নিট্ঠিতা.