১০. পাৰাপৰিযত্থেৰগাথাৱণ্ণনা

সমণস্স অহু চিন্তাতিআদিকা আযস্মতো পাৰাপৰিযত্থেৰস্স গাথা. ইমস্স ৱত্থু হেট্ঠা আগতমেৱ. তা চ গাথা সত্থৰি ধৰন্তে অত্তনো পুথুজ্জনকালে মনচ্ছট্ঠানং ইন্দ্ৰিযানং নিগ্গণ্হনচিন্তায পকাসনৱসেন ভাসিতা. ইমা পন অপৰভাগে সত্থৰি পৰিনিব্বুতে অত্তনো চ পৰিনিব্বানে উপট্ঠিতে তদা আযতিঞ্চ ভিক্খূনং উদ্ধম্মপটিপত্তিযা পকাসনৱসেন ভাসিতা. তত্থ –

৯২০. ‘‘সমণস্স অহু চিন্তা, পুপ্ফিতম্হি মহাৱনে;

একগ্গস্স নিসিন্নস্স, পৱিৱিত্তস্স ঝাযিনো’’তি. –

অযং গাথা সঙ্গীতিকাৰেহি ঠপিতা. তস্সত্থো হেট্ঠা ৱুত্তনযোৱ. অযং পন সম্বন্ধো – সত্থৰি অগ্গসাৱকেসু একচ্চেসু মহাথেৰেসু চ পৰিনিব্বুতেসু অতীতসত্থুকে পাৱচনে সুব্বচেসু সিক্খাকামেসু ভিক্খূসু দুল্লভেসু, দুব্বচেসু মিচ্ছাপটিপত্তিবহুলেসু ভিক্খূসু চ জাতেসু সুপুপ্ফিতে মহন্তে সালৱনে নিসিন্নস্স পৱিৱিত্তস্স একগ্গস্স ঝাযনসীলস্স, সমিতপাপতায সমণস্স, পাৰাপৰিযত্থেৰস্স পটিপত্তিং নিস্সায চিন্তা ৱীমংসা অহোসীতি ইতৰা –

৯২১. ‘‘অঞ্ঞথা লোকনাথম্হি, তিট্ঠন্তে পুৰিসুত্তমে;

ইৰিযং আসি ভিক্খূনং, অঞ্ঞথা দানি দিস্সতি.

৯২২. ‘‘সীতৱাতপৰিত্তাণং, হিৰিকোপীনছাদনং;

মত্তট্ঠিযং অভুঞ্জিংসু, সন্তুট্ঠা ইতৰীতৰে.

৯২৩. ‘‘পণীতং যদি ৱা লূখং, অপ্পং ৱা যদি ৱা বহুং;

যাপনত্থং অভুঞ্জিংসু, অগিদ্ধা নাধিমুচ্ছিতা.

৯২৪. ‘‘জীৱিতানং পৰিক্খাৰে, ভেসজ্জে অথ পচ্চযে;

ন বাড়্হং উস্সুকা আসুং, যথা তে আসৱক্খযে.

৯২৫. ‘‘অৰঞ্ঞে ৰুক্খমূলেসু, কন্দৰাসু গুহাসু চ;

ৱিৱেকমনুব্ৰূহন্তা, ৱিহংসু তপ্পৰাযণা.

৯২৬. ‘‘নীচা নিৱিট্ঠা সুভৰা, মুদূ অথদ্ধমানসা;

অব্যাসেকা অমুখৰা, অত্থচিন্তাৱসানুগা.

৯২৭. ‘‘ততো পাসাদিকং আসি, গতং ভুত্তং নিসেৱিতং;

সিনিদ্ধা তেলধাৰাৱ, অহোসি ইৰিযাপথো.

৯২৮. ‘‘সব্বাসৱপৰিক্খীণা, মহাঝাযী মহাহিতা;

নিব্বুতা দানি তে থেৰা, পৰিত্তা দানি তাদিসা.

৯২৯. ‘‘কুসলানঞ্চ ধম্মানং, পঞ্ঞায চ পৰিক্খযা;

সব্বাকাৰৱৰূপেতং, লুজ্জতে জিনসাসনং.

৯৩০. ‘‘পাপকানঞ্চ ধম্মানং, কিলেসানঞ্চ যো উতু;

উপট্ঠিতা ৱিৱেকায, যে চ সদ্ধম্মসেসকা.

৯৩১. ‘‘তে কিলেসা পৱড্ঢন্তা, আৱিসন্তি বহুং জনং;

কীড়ন্তি মঞ্ঞে বালেহি, উম্মত্তেহিৱ ৰক্খসা.

৯৩২. ‘‘কিলেসেহাভিভূতা তে, তেন তেন ৱিধাৱিতা;

নৰা কিলেসৱত্থূসু, সসঙ্গামেৱ ঘোসিতে.

৯৩৩. ‘‘পৰিচ্চজিত্ৱা সদ্ধম্মং, অঞ্ঞমঞ্ঞেহি ভণ্ডৰে;

দিট্ঠিগতানি অন্ৱেন্তা, ইদং সেয্যোতি মঞ্ঞৰে.

৯৩৪. ‘‘ধনঞ্চ পুত্তং ভৰিযঞ্চ, ছড্ডযিত্ৱান নিগ্গতা;

কটচ্ছুভিক্খহেতূপি, অকিচ্ছানি নিসেৱৰে.

৯৩৫. ‘‘উদৰাৱদেহকং ভুত্ৱা, সযন্তুত্তানসেয্যকা;

কথা ৱড্ঢেন্তি পটিবুদ্ধা, যা কথা সত্থুগৰহিতা.

৯৩৬. ‘‘সব্বকাৰুকসিপ্পানি, চিত্তিং কত্ৱান সিক্খৰে;

অৱূপসন্তা অজ্ঝত্তং, সামঞ্ঞত্থোতিঅচ্ছতি.

৯৩৭. ‘‘মত্তিকং তেলচুণ্ণঞ্চ, উদকাসনভোজনং;

গিহীনং উপনামেন্তি, আকঙ্খন্তা বহুত্তৰং.

৯৩৮. ‘‘দন্তপোনং কপিত্থঞ্চ, পুপ্ফং খাদনিযানি চ;

পিণ্ডপাতে চ সম্পন্নে, অম্বে আমলকানি চ.

৯৩৯. ‘‘ভেসজ্জেসু যথা ৱেজ্জা, কিচ্চাকিচ্চে যথা গিহী;

গণিকাৱ ৱিভূসাযং, ইস্সৰে খত্তিযা যথা.

৯৪০. ‘‘নেকতিকা ৱঞ্চনিকা, কূটসক্খী অপাটুকা;

বহূহি পৰিকপ্পেহি, আমিসং পৰিভুঞ্জৰে.

৯৪১. ‘‘লেসকপ্পে পৰিযাযে, পৰিকপ্পেনুধাৱিতা;

জীৱিকত্থা উপাযেন, সঙ্কড্ঢন্তি বহুং ধনং.

৯৪২. ‘‘উপট্ঠাপেন্তি পৰিসং, কম্মতো নো চ ধম্মতো;

ধম্মং পৰেসং দেসেন্তি, লাভতো নো চ অত্থতো.

৯৪৩. ‘‘সঙ্ঘলাভস্স ভণ্ডন্তি, সঙ্ঘতো পৰিবাহিৰা;

পৰলাভোপজীৱন্তা, অহিৰীকা ন লজ্জৰে.

৯৪৪. ‘‘নানুযুত্তা তথা একে, মুণ্ডা সঙ্ঘাটিপাৰুতা;

সম্ভাৱনংযেৱিচ্ছন্তি, লাভসক্কাৰমুচ্ছিতা.

৯৪৫. ‘‘এৱং নানপ্পযাতম্হি, ন দানি সুকৰং তথা;

অফুসিতং ৱা ফুসিতুং, ফুসিতং ৱানুৰক্খিতুং.

৯৪৬. ‘‘যথা কণ্টকট্ঠানম্হি, চৰেয্য অনুপাহনো;

সতিং উপট্ঠপেত্ৱান, এৱং গামে মুনী চৰে.

৯৪৭. ‘‘সৰিত্ৱা পুব্বকে যোগী, তেসং ৱত্তমনুস্সৰং;

কিঞ্চাপি পচ্ছিমো কালো, ফুসেয্য অমতং পদং.

৯৪৮. ‘‘ইদং ৱত্ৱা সালৱনে, সমণো ভাৱিতিন্দ্ৰিযো;

ব্ৰাহ্মণো পৰিনিব্বাযী, ইসি খীণপুনব্ভৱো’’তি. –

ইমা গাথা থেৰেনেৱ ভাসিতা.

তত্থ ইৰিযং আসি ভিক্খূনন্তি পুৰিসুত্তমে লোকনাথম্হি সম্মাসম্বুদ্ধে তিট্ঠন্তে ধৰন্তে এতৰহি পটিপত্তিভাৱতো. অঞ্ঞথা অঞ্ঞেন পকাৰেন ভিক্খূনং ইৰিযং চৰিতং অহোসি যথানুসিট্ঠং পটিপত্তিভাৱতো. অঞ্ঞথা দানি দিস্সতীতি ইদানি পন ততো অঞ্ঞথা ভিক্খূনং ইৰিযং দিস্সতি অযাথাৱপটিপত্তিভাৱতোতি অধিপ্পাযো.

ইদানি সত্থৰি ধৰন্তে যেনাকাৰেন ভিক্খূনং পটিপত্তি অহোসি, তং তাৱ দস্সেতুং ‘‘সীতৱাতপৰিত্তাণ’’ন্তিআদি ৱুত্তং. তত্থ মত্তট্ঠিযন্তি তং মত্তং পযোজনং. যাৱদেৱ সীতৱাতপৰিত্তাণং, যাৱদেৱ হিৰীকোপীনপটিচ্ছাদনং কত্ৱা চীৱৰং পৰিভুঞ্জিংসু. কথং? সন্তুট্ঠা ইতৰীতৰে যস্মিং তস্মিং হীনে পণীতে ৱা যথালদ্ধে পচ্চযে সন্তোসং আপন্না.

পণীতন্তি উড়াৰং সপ্পিআদিনা সংসট্ঠং, তদভাৱেন লূখং. অপ্পন্তি, চতুপঞ্চালোপমত্তম্পি. বহুং যাপনত্থং অভুঞ্জিংসূতি পণীতং বহুং ভুঞ্জন্তাপি যাপনমত্তমেৱ আহাৰং ভুঞ্জিংসু. ততো এৱ অগিদ্ধা গেধং অনাপন্না. নাধিমুচ্ছিতা ন অজ্ঝোসিতা অক্খব্ভঞ্জনং ৱিয সাকটিকা, ৱণলেপনং ৱিয ৱণিনো অভুঞ্জিংসু.

জীৱিতানং পৰিক্খাৰে, ভেসজ্জে অথ পচ্চযেপি জীৱিতানং পৱত্তিযা পৰিক্খাৰভূতে ভেসজ্জসঙ্খাতে পচ্চযে গিলানপচ্চযে. যথা তেতি যথা তে পুৰিমকা ভিক্খূ আসৱক্খযে উস্সুকা যুত্তা আসুং, তথা তে ৰোগাভিভূতাপি গিলানপচ্চযে বাড়্হং অতিৱিয উস্সুকা নাহেসুন্তি অত্থো.

তপ্পৰাযণাতি ৱিৱেকপৰাযণা ৱিৱেকপোণা. এৱং চতূহি গাথাহি চতুপচ্চযসন্তোসং ভাৱনাভিৰতিঞ্চ দস্সেন্তেন তেসং অৰিযৱংসপটিপদা দস্সিতা.

নীচাতি ‘‘মযং পংসুকূলিকা পিণ্ডপাতিকা’’তি অত্তুক্কংসনপৰৱম্ভনানি অকত্ৱা নীচৱুত্তিনো, নিৱাতৱুত্তিনোতি অত্থো. নিৱিট্ঠাতি সাসনে নিৱিট্ঠসদ্ধা. সুভৰাতি অপ্পিচ্ছতাদিভাৱেন সুপোসা. মুদূতি ৱত্তপটিপত্তিযং সকলে চ ব্ৰহ্মচৰিযে মুদূ, সুপৰিকম্মকতসুৱণ্ণং ৱিয ৱিনিযোগক্খমা. মুদূতি ৱা অভাকুটিকা উত্তানমুখা পুপ্ফিতমুখেন পটিসন্থাৰৱুত্তিনো, সুতিত্থং ৱিয সুখাৱহাতি ৱুত্তং হোতি. অথদ্ধমানসাতি অকথিনচিত্তা তেন সুব্বচভাৱমাহ. অব্যাসেকাতি সতিৱিপ্পৱাসাভাৱতো কিলেসব্যাসেকৰহিতা, অন্তৰন্তৰা তণ্হাদিট্ঠিমানাদীহি অৱোকিণ্ণাতি অত্থো. অমুখৰাতি ন মুখৰা, ন মুখেন খৰা ৱচীপাগব্ভিযৰহিতাতি ৱা অত্থো. অত্থচিন্তাৱসানুগাতি হিতচিন্তাৱসানুগাহিতচিন্তাৱসিকা, অত্তনো পৰেসঞ্চ হিতচিন্তমেৱ অনুপৰিৱত্তনকা.

ততোতি তস্মা নীচৱুত্তাদিহেতু. পাসাদিকন্তি পসাদজনিকং পটিপত্তিং পস্সন্তানং সুণন্তানঞ্চ পসাদাৱহং. গতন্তি অভিক্কন্তপটিক্কন্তপৰিৱত্তনাদিগমনং. গতন্তি ৱা কাযৱাচাপৱত্তি. ভুত্তন্তি চতুপচ্চযপৰিভোগো. নিসেৱিতন্তি গোচৰনিসেৱনং. সিনিদ্ধা তেলধাৰাৱাতি যথা অনিৱত্তিতা কুসলজনাভিসিঞ্চিতা সৱন্তী তেলধাৰা অৱিচ্ছিন্না সিনিদ্ধা মট্ঠা দস্সনীযা পাসাদিকা হোতি, এৱং তেসং আকপ্পসম্পন্নানং ইৰিযাপথো অচ্ছিদ্দো সণ্হো মট্ঠো দস্সনীযো পাসাদিকো অহোসি.

মহাঝাযীতি মহন্তেহি ঝানেহি ঝাযনসীলা, মহন্তং ৱা নিব্বানং ঝাযন্তীতি মহাঝাযী. ততো এৱ মহাহিতা, মহন্তেহি হিতেহি সমন্নাগতাতি অত্থো. তে থেৰাতি তে যথাৱুত্তপ্পকাৰা পটিপত্তিপৰাযণা থেৰা ইদানি পৰিনিব্বুতাতি অত্থো. পৰিত্তা দানি তাদিসাতি ইদানি পচ্ছিমে কালে তাদিসা তথাৰূপা থেৰা পৰিত্তা অপ্পকা কতিপযা এৱাতি ৱুত্তং হোতি.

কুসলানঞ্চ ধম্মানন্তি ৱিৱট্টস্স উপনিস্সযভূতানং ৱিমোক্খসম্ভাৰানং অনৱজ্জধম্মানং. পঞ্ঞায চাতি তথাৰূপায পঞ্ঞায চ. পৰিক্খযাতি অভাৱতো অনুপ্পত্তিতো. কামঞ্চেত্থ পঞ্ঞাপি সিযা অনৱজ্জধম্মা, বহুকাৰভাৱদস্সনত্থং পনস্সা ৱিসুং গহণং যথা পুঞ্ঞঞাণসম্ভাৰাতি. সব্বাকাৰৱৰূপেতন্তি আদিকল্যাণতাদীহি সব্বেহি আকাৰৱৰেহি পকাৰৱিসেসেহি উপেতং যুত্তং জিনস্স ভগৱতো সাসনং লুজ্জতি ৱিনস্সতীতি অত্থো.

পাপকানঞ্চ ধম্মানং, কিলেসানঞ্চ যো উতূতি কাযদুচ্চৰিতাদীনং পাপধম্মানং লোভাদীনঞ্চ কিলেসানং যো উতু যো কালো, সো অযং ৱত্ততীতি ৱচনসেসো. উপট্ঠিতা ৱিৱেকায, যে চ সদ্ধম্মসেসকাতি যে পন এৱৰূপে কালে কাযচিত্তউপধিৱিৱেকত্থায উপট্ঠিতা আৰদ্ধৱীৰিযা, তে চ সেসপটিপত্তিসদ্ধম্মকা হোন্তি. অযঞ্হেত্থ অধিপ্পাযো – সুৱিসুদ্ধসীলাচাৰাপি সমানা ইদানি একচ্চে ভিক্খূ ইৰিযাপথসণ্ঠাপনং, সমথৱিপস্সনাভাৱনাৱিধানং, মহাপলিবোধূপচ্ছেদো, খুদ্দকপলিবোধূপচ্ছেদোতি এৱমাদিপুব্বকিচ্চং সম্পাদেত্ৱা ভাৱনমনুযুঞ্জন্তি. তে সেসপটিপত্তিসদ্ধম্মকা, পটিপত্তিং মত্থকং পাপেতুং ন সক্কোন্তীতি.

তে কিলেসা পৱড্ঢন্তাতি যে ভগৱতো ওৰসপুত্তেহি চ তদা পৰিক্খযং পৰিযাদানং গমিতা কিলেসা, তে এতৰহি লদ্ধোকাসা ভিক্খূসু ৱুদ্ধিং ৱিৰূড়্হিং ৱেপুল্লং আপজ্জন্তা. আৱিসন্তি বহুং জনন্তি কল্যাণমিত্তৰহিতং অযোনিসোমনসিকাৰবহুলং অন্ধবালজনং অভিভৱিত্ৱা অৱসং কৰোন্তা আৱিসন্তি সন্তানং অনুপৱিসন্তি. এৱংভূতা চ তে কীড়ন্তি মঞ্ঞে বালেহি, উম্মত্তেহিৱ ৰক্খসা, যথা নাম কেড়িসীলা ৰক্খসা ভিসক্কৰহিতে উম্মত্তে আৱিসিত্ৱা তে অনযব্যসনং আপাদেন্তা তেহি কীড়ন্তি, এৱং তে কিলেসা সম্মাসম্বুদ্ধভিসক্কৰহিতে অন্ধবালে ভিক্খূ আৱিসিত্ৱা তেসং দিট্ঠধম্মিকাদিভেদং অনত্থং উপ্পাদেন্তা তেহি সদ্ধিং কীড়ন্তি মঞ্ঞে, কীড়ন্তা ৱিয হোন্তীতি অত্থো.

তেন তেনাতি তেন তেন আৰম্মণভাগেন. ৱিধাৱিতাতি ৱিৰূপং ধাৱিতা অসাৰুপ্পৱসেন পটিপজ্জন্তা. কিলেসৱত্থূসূতি পঠমং উপ্পন্নং কিলেসা পচ্ছা উপ্পজ্জনকানং কাৰণভাৱতো কিলেসাৱ কিলেসৱত্থূনি, তেসু কিলেসৱত্থূসু সমূহিতেসু. সসঙ্গামেৱ ঘোসিতেতি হিৰঞ্ঞসুৱণ্ণমণিমুত্তাদিকং ধনং ৱিপ্পকিৰিত্ৱা ‘‘যং যং হিৰঞ্ঞসুৱণ্ণাদি যস্স যস্স হত্থগতং, তং তং তস্স তস্সেৱ হোতূ’’তি এৱং কামঘোসনা সসঙ্গামঘোসনা নাম. তত্থাযমত্থো – কিলেসৱত্থূসু ‘‘যো যো কিলেসো যং যং সত্তং গণ্হাতি অভিভৱতি, সো সো তস্স তস্স হোতূ’’তি কিলেসসেনাপতিনা মাৰেন সসঙ্গামে ঘোসিতে ৱিয. তেহি তেহি কিলেসেহি অভিভূতা তে বালপুথুজ্জনা তেন তেন আৰম্মণভাগেন ৱিধাৱিতা ৱোসিতাতি.

তে এৱং ৱিধাৱিতা কিং কৰোন্তীতি আহ ‘‘পৰিচ্চজিত্ৱা সদ্ধম্মং, অঞ্ঞমঞ্ঞেহি ভণ্ডৰে’’তি. তস্সত্থো – পটিপত্তিসদ্ধম্মং ছড্ডেত্ৱা আমিসকিঞ্জক্খহেতু অঞ্ঞমঞ্ঞেহি ভণ্ডৰে কলহং কৰোন্তীতি. দিট্ঠিগতানীতি ‘‘ৱিঞ্ঞাণমত্তমেৱ অত্থি, নত্থেৱ ৰূপধম্মা’’তি, ‘‘যথা পুগ্গলো নাম পৰমত্থতো নত্থি, এৱং সভাৱধম্মাপি পৰমত্থতো নত্থি, ৱোহাৰমত্তমেৱা’’তি চ এৱমাদীনি দিট্ঠিগতানি মিচ্ছাগাহে অন্ৱেন্তা অনুগচ্ছন্তা ইদং সেয্যো ইদমেৱ সেট্ঠং, অঞ্ঞং মিচ্ছাতি মঞ্ঞন্তি.

নিগ্গতাতি গেহতো নিক্খন্তা. কটচ্ছুভিক্খহেতূপীতি কটচ্ছুমত্তভিক্খানিমিত্তম্পি. তং দদন্তস্স গহট্ঠস্স অননুলোমিকসংসগ্গৱসেন অকিচ্চানি পব্বজিতেন অকত্তব্বানি কম্মানি নিসেৱৰে কৰোন্তি.

উদৰাৱদেহকং ভুত্ৱাতি ‘‘ঊনূদৰো মিতাহাৰো’’তি (থেৰগা. ৯৮২; মি. প. ৬.৫.১০) ৱুত্তৱচনং অচিন্তেত্ৱা উদৰপূৰং ভুঞ্জিত্ৱা. সযন্তুত্তানসেয্যকাতি ‘‘দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো’’তি (অ. নি. ৮.৯; ৱিভ. ৫১৯) ৱুত্তৱিধানং অননুস্সৰিত্ৱা উত্তানসেয্যকা সযন্তি. যা কথা সত্থুগৰহিতাতি ৰাজকথাদিতিৰচ্ছানকথং সন্ধায ৱদতি.

সব্বকাৰুকসিপ্পানীতি সব্বেহি ৱেস্সাদীহি কাৰুকেহি কত্তব্বানি ভত্ততালৱণ্টকৰণাদীনি হত্থসিপ্পানি. চিত্তিং কত্ৱানাতি সক্কচ্চং সাদৰং কত্ৱা. অৱূপসন্তা অজ্ঝত্তন্তি কিলেসৱূপসমাভাৱতো গদ্দুহনমত্তম্পি সমাধানাভাৱতো চ অজ্ঝত্তং অৱূপসন্তা, অৱূপসন্তচিত্তাতি অত্থো. সামঞ্ঞত্থোতি সমণধম্মো. অতিঅচ্ছতীতি তেসং আজীৱকিচ্চপসুততায একদেসম্পি অফুসনতো ৱিসুংযেৱ নিসীদতি, অনল্লীযতীতি ৱুত্তং হোতি.

মত্তিকন্তি পাকতিকং ৱা পঞ্চৱণ্ণং ৱা গিহীনং ৱিনিযোগক্খমং মত্তিকং. তেলচুণ্ণঞ্চাতি পাকতিকং, অভিসঙ্খতং ৱা তেলঞ্চ চুণ্ণঞ্চ. উদকাসনভোজনন্তি উদকঞ্চ আসনঞ্চ ভোজনঞ্চ. আকঙ্খন্তা বহুত্তৰন্তি বহুং পিণ্ডপাতাদিউত্তৰুত্তৰং আকঙ্খন্তা ‘‘অম্হেহি মত্তিকাদীসু দিন্নেসু মনুস্সা দড়্হভত্তিকা হুত্ৱা বহুং উত্তৰুত্তৰং চতুপচ্চযজাতং দস্সন্তী’’তি অধিপ্পাযেন গিহীনং উপনামেন্তীতি অত্থো.

দন্তে পুনন্তি সোধেন্তি এতেনাতি দন্তপোনং, দন্তকট্ঠং. কপিত্থন্তি কপিত্থফলং. পুপ্ফন্তি সুমনচম্পকাদিপুপ্ফং. খাদনীযানীতি অট্ঠাৰসৱিধেপি খজ্জকৱিসেসে. পিণ্ডপাতে চ সম্পন্নেতি ৱণ্ণাদিসম্পযুত্তে ওদনৱিসেসে. ‘‘অম্বে আমলকানি চা’’তি চ-সদ্দেন মাতুলুঙ্গতালনাড়িকেৰাদিফলানি অৱুত্তানি সঙ্গণ্হাতি. সব্বত্থ গিহীনং উপনামেন্তি আকঙ্খন্তা বহুত্তৰন্তি যোজনা.

ভেসজ্জেসু যথা ৱেজ্জাতি গিহীনং ভেসজ্জপ্পযোগেসু যথা ৱেজ্জা, তথা ভিক্খূ পটিপজ্জন্তীতি অধিপ্পাযো. কিচ্চাকিচ্চে যথা গিহীতি গহট্ঠানং খুদ্দকে চেৱ মহন্তে চ কিচ্চে কত্তব্বে গিহী ৱিয. গণিকাৱ ৱিভূসাযন্তি অত্তনো সৰীৰস্স ৱিভূসনে ৰূপূপজীৱিনিযো ৱিয. ইস্সৰে খত্তিযা যথাতি ইস্সৰে ইস্সৰিযপৱত্তনে যথা খত্তিযা, এৱং কুলপতী হুত্ৱা ৱত্তন্তীতি অত্থো.

নেকতিকাতি নিকতিযং নিযুত্তা, অমণিংযেৱ মণিং, অসুৱণ্ণংযেৱ সুৱণ্ণং কত্ৱা পটিৰূপসাচিযোগনিৰতা. ৱঞ্চনিকাতি কূটমানাদীহি ৱিপ্পলম্বকা. কূটসক্খীতি অযাথাৱসক্খিনো. অপাটুকাতি ৱামকা, অসংযতৱুত্তীতি অত্থো. বহূহি পৰিকপ্পেহীতি যথাৱুত্তেহি অঞ্ঞেহি চ বহূহি মিচ্ছাজীৱপ্পকাৰেহি.

লেসকপ্পেতি কপ্পিযলেসে কপ্পিযপটিৰূপে. পৰিযাযেতি, পচ্চযেসু পৰিযাযস্স যোগে. পৰিকপ্পেতি ৱড্ঢিআদিৱিকপ্পনে, সব্বত্থ ৱিসযে ভুম্মং. অনুধাৱিতাতি মহিচ্ছতাদীহি পাপধম্মেহি অনুধাৱিতা ৱোসিতা. জীৱিকত্থা জীৱিকপ্পযোজনা আজীৱহেতুকা. উপাযেনাতি পৰিকথাদিনা উপাযেন পচ্চযুপ্পাদননযেন. সঙ্কড্ঢন্তীতি সংহৰন্তি.

উপট্ঠাপেন্তি পৰিসন্তি পৰিসায অত্তানং উপট্ঠপেন্তি, যথা পৰিসা অত্তানং উপট্ঠপেন্তি, এৱং পৰিসং সঙ্গণ্হন্তীতি অত্থো. কম্মতোতি কম্মহেতু. তে হি অত্তনো কত্তব্বৱেয্যাৱচ্চনিমিত্তং উপট্ঠপেন্তি. নো চ ধম্মতোতি ধম্মনিমিত্তং নো চ উপট্ঠপেন্তি. যো সত্থাৰা উল্লুম্পনসভাৱসণ্ঠিতায পৰিসায সঙ্গহো অনুঞ্ঞাতো, তেন ন সঙ্গণ্হন্তীতি অত্থো. লাভতোতি লাভহেতু, ‘‘অয্যো বহুস্সুতো, ভাণকো, ‘ধম্মকথিকো’তি এৱং সম্ভাৱেন্তো মহাজনো ময্হং লাভসক্কাৰে উপনযিস্সতী’’তি ইচ্ছাচাৰে ঠত্ৱা লাভনিমিত্তং পৰেসং ধম্মং দেসেন্তি. নো চ অত্থতোতি যো সো ৱিমুত্তাযতনসীসে ঠত্ৱা সদ্ধম্মং কথেন্তেন পত্তব্বো অত্থো, ন তংদিট্ঠধম্মিকাদিভেদহিতনিমিত্তং ধম্মং দেসেন্তীতি অত্থো.

সঙ্ঘলাভস্স ভণ্ডন্তীতি সঙ্ঘলাভহেতু ভণ্ডন্তি ‘‘ময্হং পাপুণাতি, ন তুয্হ’’ন্তিআদিনা কলহং কৰোন্তি. সঙ্ঘতো পৰিবাহিৰাতি, অৰিযসঙ্ঘতো বহিভূতা অৰিযসঙ্ঘে তদভাৱতো. পৰলাভোপজীৱন্তাতি সাসনে লাভস্স অন্ধবালপুথুজ্জনেহি পৰে সীলাদিগুণসম্পন্নে সেক্খে উদ্দিস্স উপ্পন্নত্তা তং পৰলাভং, পৰতো ৱা দাযকতো লদ্ধব্বলাভং উপজীৱন্তা ভণ্ডনকাৰকা ভিক্খূ পাপজিগুচ্ছায অভাৱতো অহিৰিকা সমানা চ ‘‘মযং পৰলাভং ভুঞ্জাম, পৰপটিবদ্ধজীৱিকা’’তিপি ন লজ্জৰে ন হিৰীযন্তি.

নানুযুত্তাতি সমণকৰণেহি ধম্মেহি অননুযুত্তা. তথাতি যথা পুব্বে ৱুত্তা বন্ধনকাৰকাদযো, তথা. একেতি একচ্চে. মুণ্ডা সঙ্ঘাটিপাৰুতাতি কেৱলং মুণ্ডিতকেসতায মুণ্ডা পিলোতিকখণ্ডেহি সঙ্ঘটিতট্ঠেন ‘‘সঙ্ঘাটী’’তি লদ্ধনামেন চীৱৰেন পাৰুতসৰীৰা. সম্ভাৱনংযেৱিচ্ছন্তি, লাভসক্কাৰমুচ্ছিতাতি লাভসক্কাৰাসায মুচ্ছিতা অজ্ঝোসিতা হুত্ৱা, ‘‘পেসলো ধুতৱাদো বহুস্সুতো’’তি ৱা মধুৰৱচনমনুযুত্তা ‘‘অৰিযো’’তি চ কেৱলং সম্ভাৱনং বহুমানংযেৱ ইচ্ছন্তি এসন্তি, ন তন্নিমিত্তে গুণেতি অত্থো.

এৱন্তি ‘‘কুসলানঞ্চ ধম্মানং পঞ্ঞায চ পৰিক্খযা’’তি ৱুত্তনযেন. নানপ্পযাতম্হীতি নানপ্পকাৰে ভেদনধম্মে পযাতে সমকতে, নানপ্পকাৰেন ৱা সংকিলেসধম্মে পযাতুং পৱত্তিতুং আৰদ্ধে. ন দানি সুকৰং তথাতি ইদানি ইমস্মিং দুল্লভকল্যাণমিত্তে দুল্লভসপ্পাযসদ্ধম্মস্সৱনে চ কালে যথা সত্থৰি ধৰন্তে অফুসিতং অফুট্ঠং, অনধিগতং ঝানৱিপস্সনং ফুসিতুং অধিগন্তুং, ফুসিতং ৱা হানভাগিযং ঠিতিভাগিযমেৱ ৱা অহুত্ৱা যথা ৱিসেসভাগিযং হোতি, তথা অনুৰক্খিতুং পালেতুং সুকৰং, তথা ন সুকৰং, তথা সম্পাদেতুং ন সক্কাতি অত্থো.

ইদানি অত্তনো পৰিনিব্বানকালস্স আসন্নত্তা সংখিত্তেন ওৱাদেন সব্ৰহ্মচাৰিং ওৱদন্তো ‘‘যথা কণ্টকট্ঠানম্হী’’তিআদিমাহ. তস্সত্থো – যথা পুৰিসো কেনচিদেৱ পযোজনেন কণ্টকনিচিতে পদেসে অনুপাহনো ৱিচৰন্তো ‘‘মা মং কণ্টকো ৱিজ্ঝী’’তি সতিং উপট্ঠপেত্ৱাৱ ৱিচৰতি, এৱং কিলেসকণ্টকনিচিতে গোচৰগামে পযোজনেন চৰন্তো মুনি সতিং উপট্ঠপেত্ৱান সতিসম্পজঞ্ঞযুত্তো অপ্পমত্তোৱ চৰেয্য কম্মট্ঠানং অৱিজহন্তোতি ৱুত্তং হোতি.

সৰিত্ৱা পুব্বকে যোগী, তেসং ৱত্তমনুস্সৰন্তি পুৰিমকে যোগে ভাৱনায যুত্ততায যোগী আৰদ্ধৱিপস্সকে সৰিত্ৱা তেসং ৱত্তং আগমানুসাৰেন সম্মাপটিপত্তিভাৱনাৱিধিং অনুস্সৰন্তো ধুৰনিক্খেপং অকত্ৱা যথাপটিপজ্জন্তো. কিঞ্চাপি পচ্ছিমো কালোতি যদিপাযং অতীতসত্থুকো চৰিমো কালো, তথাপি যথাধম্মমেৱ পটিপজ্জন্তো ৱিপস্সনং উস্সুক্কাপেন্তো ফুসেয্য অমতং পদং নিব্বানং অধিগচ্ছেয্য.

ইদং ৱত্ৱাতি, যথাদস্সিতং সংকিলেসৱোদানেসু ইমং পটিপত্তিৱিধিং কথেত্ৱা. অযঞ্চ ওসানগাথা সঙ্গীতিকাৰেহি থেৰস্স পৰিনিব্বানং পকাসেতুং ৱুত্তাতি ৱেদিতব্বা.

পাৰাপৰিযত্থেৰগাথাৱণ্ণনা নিট্ঠিতা.

ৱীসতিনিপাতৱণ্ণনা নিট্ঠিতা.