৮. সিঙ্গালপিতুত্থেৰগাথাৱণ্ণনা

অহু বুদ্ধস্স দাযাদোতি সিঙ্গালকপিতুত্থেৰস্স গাথা. কা উপ্পত্তি? সো কিৰ ইতো চতুনৱুতে কপ্পে সতৰংসিং নাম পচ্চেকসম্বুদ্ধং পিণ্ডায চৰন্তং দিস্ৱা পসন্নমানসো ৱন্দিত্ৱা অত্তনো হত্থগতং তালফলং অদাসি. তেন পুঞ্ঞকম্মেন দেৱলোকে নিব্বত্তো অপৰাপৰং পুঞ্ঞানি কত্ৱা সুগতীসুযেৱ সংসৰন্তো কস্সপস্স ভগৱতো কালে মনুস্সযোনিযং নিব্বত্তো সাসনে পটিলদ্ধসদ্ধো হুত্ৱা পব্বজিত্ৱা অট্ঠিকসঞ্ঞং ভাৱেসি. পুন ইমস্মিং বুদ্ধুপ্পাদে সাৱত্থিযং কুলগেহে নিব্বত্তিত্ৱা ৱযপ্পত্তো দাৰপৰিগ্গহং কত্ৱা একং পুত্তং লভিত্ৱা তস্স ‘‘সিঙ্গালকো’’তি নামং অকাসি. তেন নং সিঙ্গালকপিতাতি ৱোহৰন্তি. সো অপৰভাগে ঘৰবন্ধনং পহায সাসনে পব্বজি. তস্স ভগৱা অজ্ঝাসযং ওলোকেন্তো অট্ঠিকসঞ্ঞাকম্মট্ঠানং অদাসি. সো তং গহেত্ৱা ভগ্গেসু ৱিহৰতি সুসুমাৰগিৰে ভেসকড়াৱনে, অথস্স তস্মিং ৱনে অধিৱত্থা দেৱতা উস্সাহজননত্থং ‘‘ভাৱনাফলং নচিৰস্সেৱ হত্থগতং কৰিস্সতী’’তি ইমমত্থং অঞ্ঞাপদেসেন ৱিভাৱেন্তী ‘‘অহু বুদ্ধস্স দাযাদো’’তি গাথং অভাসি.

১৮. তত্থ অহূতি হোতি, ৱত্তমানত্থে হি ইদং অতীতকালৱচনং. বুদ্ধস্সাতি সব্বঞ্ঞুবুদ্ধস্স. দাযাদোতি ধম্মদাযাদো নৱৱিধস্স লোকুত্তৰধম্মদাযস্স অত্তনো সম্মাপটিপত্তিযা আদাযকো গণ্হনকো. অথ ৱা অহূতি অহোসি. এৱংনামস্স বুদ্ধস্স দাযাদভাৱে কোচি ৱিবন্ধো ইদানেৱ ভৱিস্সতীতি অধিপ্পাযো. তেনাহ ‘‘মঞ্ঞেহং কামৰাগং সো, খিপ্পমেৱ ৱহিস্সতী’’তি. ভেসকড়াৱনেতি ভেসকেন নাম যক্খেন লভিতত্তা পৰিগ্গহিতত্তা, ভেসকড়ানং ৱা কট্ঠাদীনং বহুলতায ‘‘ভেসকড়াৱন’’ন্তি লদ্ধনামে অৰঞ্ঞে. তস্স ভিক্খুনো বুদ্ধস্স দাযাদভাৱে কাৰণং ৱদন্তো ‘‘কেৱলং অট্ঠিসঞ্ঞায, অফৰী পথৱিং ইম’’ন্তি আহ. তত্থ কেৱলন্তি সকলং অনৱসেসং. অট্ঠিসঞ্ঞাযাতি অট্ঠিকভাৱনায. অফৰীতি ‘‘অট্ঠী’’তি অধিমুচ্চনৱসেন পত্থৰি. পথৱিন্তি অত্তভাৱপথৱিং. অত্তভাৱো হি ইধ ‘‘পথৱী’’তি ৱুত্তো ‘‘কো ইমং পথৱিং ৱিচ্চেস্সতী’’তিআদীসু ৱিয. মঞ্ঞেহন্তি মঞ্ঞে অহং. ‘‘মঞ্ঞাহ’’ন্তিপি পাঠো. সোতি সো ভিক্খু. খিপ্পমেৱ নচিৰস্সেৱ কামৰাগং পহিস্সতি পজহিস্সতীতি মঞ্ঞে. কস্মা? অট্ঠিকসঞ্ঞায কামৰাগস্স উজুপটিপক্খভাৱতো. ইদং ৱুত্তং হোতি – যো একস্মিং পদেসে লদ্ধায অত্থিকসঞ্ঞায সকলং অত্তনো সব্বেসং ৱা অত্তভাৱং ‘‘অট্ঠী’’ত্ৱেৱ ফৰিত্ৱা ঠিতো, সো ভিক্খু তং অট্ঠিকঝানং পাদকং কত্ৱা ৱিপস্সন্তো নচিৰেনেৱ অনাগামিমগ্গেন কামৰাগং, সব্বং ৱা কামনট্ঠেন ‘‘কামো’’, ৰঞ্জনট্ঠেন ‘‘ৰাগো’’তি চ লদ্ধনামং তণ্হং অগ্গমগ্গেন পজহিস্সতীতি. ইমং গাথং সুত্ৱা সো থেৰো ‘‘অযং দেৱতা ময্হং উস্সাহজননত্থং এৱমাহা’’তি অপ্পটিৱানৱীৰিযং অধিট্ঠায ৱিপস্সনং ৱড্ঢেত্ৱা অৰহত্তং পাপুণি. তেন ৱুত্তং অপদানে (অপ. থেৰ ২.৫১.৮৫-৯০) –

‘‘সতৰংসী নাম ভগৱা, সযম্ভূ অপৰাজিতো;

ৱিৱেকা উট্ঠহিত্ৱান, গোচৰাযাভিনিক্খমি.

‘‘ফলহত্থো অহং দিস্ৱা, উপগচ্ছিং নৰাসভং;

পসন্নচিত্তো সুমনো, তালফলমদাসহং.

‘‘চতুন্নৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা তায দেৱতায ৱুত্তৱচনং পতিমানেন্তো তমেৱ গাথং উদানৱসেন অভাসি. তদেৱস্স থেৰস্স অঞ্ঞাব্যাকৰণং অহোসীতি.

সিঙ্গালপিতুত্থেৰগাথাৱণ্ণনা নিট্ঠিতা.