১০. পুণ্ণমাসত্থেৰগাথাৱণ্ণনা

ৱিহৰি অপেক্খন্তি আযস্মতো পুণ্ণমাসত্থেৰস্স গাথা. কা উপ্পত্তি? সো কিৰ ৱিপস্সিস্স ভগৱতো কালে চক্কৱাকযোনিযং নিব্বত্তো ভগৱন্তং গচ্ছন্তং দিস্ৱা পসন্নমানসো অত্তনো মুখতুণ্ডকেন সালপুপ্ফং গহেত্ৱা পূজং অকাসি. সো তেন পুঞ্ঞকম্মেন দেৱমনুস্সেসু সংসৰন্তো ইতো সত্তৰসে কপ্পে অট্ঠক্খত্তুং চক্কৱত্তী ৰাজা অহোসি. ইমস্মিং পন কপ্পে কস্সপস্স ভগৱতো সাসনে ওসক্কমানে কুটুম্বিযকুলে নিব্বত্তিত্ৱা পব্বজিত্ৱা সমণধম্মং কত্ৱা ততো চুতো দেৱমনুস্সেসু সংসৰন্তো ইমস্মিং বুদ্ধুপ্পাদে সাৱত্থিনগৰে সমিদ্ধিস্স নাম ব্ৰাহ্মণস্স পুত্তো হুত্ৱা নিব্বত্তি. তস্স জাতদিৱসে তস্মিং গেহে সব্বা ৰিত্তকুম্ভিযো সুৱণ্ণমাসানং পুণ্ণা অহেসুং. তেনস্স পুণ্ণমাসোতি নামং অকংসু. সো ৱযপ্পত্তো ব্ৰাহ্মণৱিজ্জাসু নিপ্ফত্তিং পত্ৱা ৱিৱাহকম্মং কত্ৱা একং পুত্তং লভিত্ৱা উপনিস্সযসম্পন্নতায ঘৰাৱাসং জিগুচ্ছন্তো ভগৱন্তং উপসঙ্কমিত্ৱা ধম্মং সুত্ৱা পটিলদ্ধসদ্ধো পব্বজিত্ৱা লদ্ধূপসম্পদো পুব্বকিচ্চসম্পন্নো চতুসচ্চকম্মট্ঠানে যুত্তপ্পযুত্তো ৱিপস্সনং উস্সুক্কাপেত্ৱা অৰহত্তং পাপুণি. তেন ৱুত্তং অপদানে (অপ. থেৰ ১.৭.১৩-১৯) –

‘‘সিন্ধুযা নদিযা তীৰে, চক্কৱাকো অহং তদা;

সুদ্ধসেৱালভক্খোহং, পাপেসু চ সুসঞ্ঞতো.

‘‘অদ্দসং ৱিৰজং বুদ্ধং, গচ্ছন্তং অনিলঞ্জসে;

তুণ্ডেন সালং পগ্গয্হ, ৱিপস্সিস্সাভিৰোপযিং.

‘‘যস্স সদ্ধা তথাগতে, অচলা সুপ্পতিট্ঠিতা;

তেন চিত্তপ্পসাদেন, দুগ্গতিং সো ন গচ্ছতি.

‘‘স্ৱাগতং ৱত মে আসি, বুদ্ধসেট্ঠস্স সন্তিকে;

ৱিহঙ্গমেন সন্তেন, সুবীজং ৰোপিতং মযা.

‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘সুচাৰুদস্সনা নাম, অট্ঠেতে একনামকা;

কপ্পে সত্তৰসে আসুং, চক্কৱত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথস্স পুৰাণদুতিযিকা তং পলোভেতুকামা অলঙ্কতপটিযত্তা পুত্তেন সদ্ধিং উপগন্ত্ৱা পিযালাপভাৱাদিকেহি ভাৱৱিৱৰণকম্মং নাম কাতুং আৰভি. থেৰো তস্সা কাৰণং দিস্ৱা অত্তনো কত্থচিপি অলগ্গভাৱং পকাসেন্তো ‘‘ৱিহৰি অপেক্খ’’ন্তি গাথং অভাসি.

১০. তত্থ ৱিহৰীতি ৱিসেসতো হৰি অপহৰি অপনেসি. অপেক্খন্তি তণ্হং. ইধাতি ইমস্মিং লোকে অত্তভাৱে ৱা. হুৰন্তি অপৰস্মিং অনাগতে অত্তভাৱে ৱা. ইধাতি ৱা অজ্ঝত্তিকেসু আযতনেসু. হুৰন্তি বাহিৰেসু. ৱা-সদ্দো সমুচ্চযত্থো ‘‘অপদা ৱা দ্ৱিপদা ৱা’’তিআদীসু (ইতিৱু. ৯০; অ. নি. ৪.৩৪; ৫.৩২) ৱিয. যোতি অত্তানমেৱ পৰং ৱিয দস্সেতি. ৱেদগূতি ৱেদেন গতো মগ্গঞাণেন নিব্বানং গতো অধিগতো, চত্তাৰি ৱা সচ্চানি পৰিঞ্ঞাপহানসচ্ছিকিৰিযাভাৱনাভিসমযৱসেন অভিসমেচ্চ ঠিতো. যতত্তোতি মগ্গসংৱৰেন সংযতসভাৱো, সম্মাৱাযামেন ৱা সংযতসভাৱো. সব্বেসু ধম্মেসু অনূপলিত্তোতি সব্বেসু আৰম্মণেসু ধম্মেসু তণ্হাদিট্ঠিলেপৱসেন ন উপলিত্তো, তেন লাভাদিলোকধম্মে সমতিক্কমং দস্সেতি. লোকস্সাতি উপাদানক্খন্ধপঞ্চকস্স. তঞ্হি লুজ্জনপলুজ্জনট্ঠেন লোকো. জঞ্ঞাতি জানিত্ৱা. উদযব্বযঞ্চাতি উপ্পাদঞ্চেৱ ৱযঞ্চ, এতেন যথাৱুত্তগুণানং পুব্বভাগপটিপদং দস্সেতি. অযং পনেত্থ অত্থো – যো সকলস্স খন্ধাদিলোকস্স সমপঞ্ঞাসায আকাৰেহি উদযব্বযং জানিত্ৱা ৱেদগূ যতত্তো কত্থচি অনুপলিত্তো, সো সব্বত্থ অপেক্খং ৱিনেয্য সন্তুসিতো তাদিসানং ৱিপ্পকাৰানং ন কিঞ্চি মঞ্ঞতি, তস্মা ত্ৱং অন্ধবালে যথাগতমগ্গেনেৱ গচ্ছাতি. অথ সা ইত্থী ‘‘অযং সমণো মযি পুত্তে চ নিৰপেক্খো, ন সক্কা ইমং পলোভেতু’’ন্তি পক্কামি.

পুণ্ণমাসত্থেৰগাথাৱণ্ণনা নিট্ঠিতা.

পৰমত্থদীপনিযা থেৰগাথাসংৱণ্ণনায

পঠমৱগ্গৱণ্ণনা নিট্ঠিতা.