৬. জৰাসুত্তৱণ্ণনা

৮১১. অপ্পং ৱত জীৱিতন্তি জৰাসুত্তং. কা উপ্পত্তি? একং সমযং ভগৱা সাৱত্থিযং ৱস্সং ৱসিত্ৱা যানি তানি বুদ্ধানং সৰীৰাৰোগ্যসম্পাদনং অনুপ্পন্নসিক্খাপদপঞ্ঞাপনং ৱেনেয্যদমনং তথাৰূপায অট্ঠুপ্পত্তিযা জাতকাদিকথনন্তিআদীনি জনপদচাৰিকানিমিত্তানি, তানি সমৱেক্খিত্ৱা জনপদচাৰিকং পক্কামি. অনুপুব্বেন চাৰিকং চৰমানো সাযং সাকেতং অনুপ্পত্তো অঞ্জনৱনং পাৱিসি. সাকেতৱাসিনো সুত্ৱা ‘‘অকালো ইদানি ভগৱন্তং দস্সনাযা’’তি ৱিভাতায ৰত্তিযা মালাগন্ধাদীনি গহেত্ৱা ভগৱতো সন্তিকং গন্ত্ৱা পূজনৱন্দনসম্মোদনাদীনি কত্ৱা পৰিৱাৰেত্ৱা অট্ঠংসু যাৱ ভগৱতো গামপ্পৱেসনৱেলা, অথ ভগৱা ভিক্খুসঙ্ঘপৰিৱুতো পিণ্ডায পাৱিসি. তং অঞ্ঞতৰো সাকেতকো ব্ৰাহ্মণমহাসালো নগৰা নিক্খন্তো নগৰদ্ৱাৰে অদ্দস. দিস্ৱা পুত্তসিনেহং উপ্পাদেত্ৱা ‘‘চিৰদিট্ঠোসি, পুত্ত, মযা’’তি পৰিদেৱযমানো অভিমুখো অগমাসি. ভগৱা ভিক্খূ সঞ্ঞাপেসি – ‘‘অযং, ভিক্খৱে, ব্ৰাহ্মণো যং ইচ্ছতি, তং কৰোতু, ন ৱাৰেতব্বো’’তি.

ব্ৰাহ্মণোপি ৱচ্ছগিদ্ধিনীৱ গাৱী আগন্ত্ৱা ভগৱতো কাযং পুৰতো চ পচ্ছতো চ দক্খিণতো চ ৱামতো চাতি সমন্তা আলিঙ্গি ‘‘চিৰদিট্ঠোসি, পুত্ত, চিৰং ৱিনা অহোসী’’তি ভণন্তো. যদি পন সো তথা কাতুং ন লভেয্য, হদযং ফালেত্ৱা মৰেয্য. সো ভগৱন্তং অৱোচ – ‘‘ভগৱা তুম্হেহি সদ্ধিং আগতভিক্খূনং অহমেৱ ভিক্খং দাতুং সমত্থো, মমেৱ অনুগ্গহং কৰোথা’’তি. অধিৱাসেসি ভগৱা তুণ্হীভাৱেন. ব্ৰাহ্মণো ভগৱতো পত্তং গহেত্ৱা পুৰতো গচ্ছন্তো ব্ৰাহ্মণিযা পেসেসি – ‘‘পুত্তো মে আগতো, আসনং পঞ্ঞাপেতব্ব’’ন্তি. সা তথা কত্ৱা আগমনং পস্সন্তী ঠিতা ভগৱন্তং অন্তৰৱীথিযংযেৱ দিস্ৱা পুত্তসিনেহং উপ্পাদেত্ৱা ‘‘চিৰদিট্ঠোসি, পুত্ত, মযা’’তি পাদেসু গহেত্ৱা ৰোদিত্ৱা ঘৰং অতিনেত্ৱা সক্কচ্চং ভোজেসি. ভুত্তাৱিনো ব্ৰাহ্মণো পত্তং অপনামেসি. ভগৱা তেসং সপ্পাযং ৱিদিত্ৱা ধম্মং দেসেসি, দেসনাপৰিযোসানে উভোপি সোতাপন্না অহেসুং. অথ ভগৱন্তং যাচিংসু – ‘‘যাৱ, ভন্তে, ভগৱা ইমং নগৰং উপনিস্সায ৱিহৰতি, অম্হাকংযেৱ ঘৰে ভিক্খা গহেতব্বা’’তি. ভগৱা ‘‘ন বুদ্ধা এৱং একং নিবদ্ধট্ঠানংযেৱ গচ্ছন্তী’’তি পটিক্খিপি. তে আহংসু – ‘‘তেন হি, ভন্তে, ভিক্খুসঙ্ঘেন সদ্ধিং পিণ্ডায চৰিত্ৱাপি তুম্হে ইধেৱ ভত্তকিচ্চং কত্ৱা ধম্মং দেসেত্ৱা ৱিহাৰং গচ্ছথা’’তি. ভগৱা তেসং অনুগ্গহত্থায তথা অকাসি. মনুস্সা ব্ৰাহ্মণঞ্চ ব্ৰাহ্মণিঞ্চ ‘‘বুদ্ধপিতা বুদ্ধমাতা’’ ত্ৱেৱ ৱোহৰিংসু. তম্পি কুলং ‘‘বুদ্ধকুল’’ন্তি নামং লভি.

আনন্দত্থেৰো ভগৱন্তং পুচ্ছি – ‘‘অহং ভগৱতো মাতাপিতৰো জানামি, ইমে পন কস্মা ৱদন্তি ‘অহং বুদ্ধমাতা অহং বুদ্ধপিতা’’’তি. ভগৱা আহ – ‘‘নিৰন্তৰং মে, আনন্দ, ব্ৰাহ্মণী চ ব্ৰাহ্মণো চ পঞ্চ জাতিসতানি মাতাপিতৰো অহেসুং, পঞ্চ জাতিসতানি মাতাপিতূনং জেট্ঠকা, পঞ্চ জাতিসতানি কনিট্ঠকা. তে পুব্বসিনেহেনেৱ কথেন্তী’’তি ইমঞ্চ গাথমভাসি –

‘‘পুব্বেৱ সন্নিৱাসেন, পচ্চুপ্পন্নহিতেন ৱা;

এৱং তং জাযতে পেমং, উপ্পলংৱ যথোদকে’’তি. (জা. ১.২.১৭৪);

ততো ভগৱা সাকেতে যথাভিৰন্তং ৱিহৰিত্ৱা পুন চাৰিকং চৰমানো সাৱত্থিমেৱ অগমাসি. সোপি ব্ৰাহ্মণো চ ব্ৰাহ্মণী চ ভিক্খূ উপসঙ্কমিত্ৱা পতিৰূপং ধম্মদেসনং সুত্ৱা সেসমগ্গে পাপুণিত্ৱা অনুপাদিসেসায নিব্বানধাতুযা পৰিনিব্বাযিংসু. নগৰে ব্ৰাহ্মণা সন্নিপতিংসু ‘‘অম্হাকং ঞাতকে সক্কৰিস্সামা’’তি. সোতাপন্নসকদাগামিঅনাগামিনো উপাসকাপি সন্নিপতিংসু উপাসিকাযো চ ‘‘অম্হাকং সহধম্মিকে সক্কৰিস্সামা’’তি. তে সব্বেপি কম্বলকূটাগাৰং আৰোপেত্ৱা মালাগন্ধাদীহি পূজেন্তা নগৰা নিক্খামেসুং.

ভগৱাপি তং দিৱসং পচ্চূসসমযে বুদ্ধচক্খুনা লোকং ৱোলোকেন্তো তেসং পৰিনিব্বানভাৱং ঞত্ৱা ‘‘তত্থ মযি গতে ধম্মদেসনং সুত্ৱা বহুজনস্স ধম্মাভিসমযো ভৱিস্সতী’’তি ঞত্ৱা পত্তচীৱৰমাদায সাৱত্থিতো আগন্ত্ৱা আড়াহনমেৱ পাৱিসি. মনুস্সা দিস্ৱা ‘‘মাতাপিতূনং সৰীৰকিচ্চং কাতুকামো ভগৱা আগতো’’তি ৱন্দিত্ৱা অট্ঠংসু. নাগৰাপি কূটাগাৰং পূজেন্তা আড়াহনং আনেত্ৱা ভগৱন্তং পুচ্ছিংসু – ‘‘গহট্ঠঅৰিযসাৱকা কথং পূজেতব্বা’’তি. ভগৱা ‘‘যথা অসেক্খা পূজিযন্তি, তথা পূজেতব্বা ইমে’’তি অধিপ্পাযেন তেসং অসেক্খমুনিভাৱং দীপেন্তো ইমং গাথমাহ –

‘‘অহিংসকা যে মুনযো, নিচ্চং কাযেন সংৱুতা;

তে যন্তি অচ্চুতং ঠানং, যত্থ গন্ত্ৱা ন সোচৰে’’তি. (ধ. প. ২২৫);

তঞ্চ পৰিসং ওলোকেত্ৱা তঙ্খণানুৰূপং ধম্মং দেসেন্তো ইমং সুত্তমভাসি.

তত্থ অপ্পং ৱত জীৱিতং ইদন্তি ‘‘ইদং ৱত মনুস্সানং জীৱিতং অপ্পং পৰিত্তং ঠিতিপৰিত্ততায সৰসপৰিত্ততাযা’’তি সল্লসুত্তেপি ৱুত্তনযমেতং. ওৰং ৱস্সসতাপি মিয্যতীতি ৱস্সসতা ওৰং কললাদিকালেপি মিয্যতি. অতিচ্চাতি ৱস্সসতং অতিক্কমিত্ৱা. জৰসাপি মিয্যতীতি জৰাযপি মিয্যতি.

৮১২-৬. মমাযিতেতি মমাযিতৱত্থুকাৰণা. ৱিনাভাৱসন্তমেৱিদন্তি সন্তৱিনাভাৱং ৱিজ্জমানৱিনাভাৱমেৱ ইদং, ন সক্কা অৱিনাভাৱেন ভৱিতুন্তি ৱুত্তং হোতি. মামকোতি মম উপাসকো ভিক্খু ৱাতি সঙ্খং গতো, বুদ্ধাদীনি ৱা ৱত্থূনি মমাযমানো. সঙ্গতন্তি সমাগতং দিট্ঠপুব্বং ৱা. পিযাযিতন্তি পিযং কতং. নামংযেৱাৱসিস্সতি অক্খেয্যন্তি সব্বং ৰূপাদিধম্মজাতং পহীযতি, নামমত্তমেৱ তু অৱসিস্সতি ‘‘বুদ্ধৰক্খিতো, ধম্মৰক্খিতো’’তি এৱং সঙ্খাতুং কথেতুং. মুনযোতি খীণাসৱমুনযো. খেমদস্সিনোতি নিব্বানদস্সিনো.

৮১৭. সত্তমগাথা এৱং মৰণব্ভাহতে লোকে অনুৰূপপটিপত্তিদস্সনত্থং ৱুত্তা. তত্থ পতিলীনচৰস্সাতি ততো ততো পতিলীনং চিত্তং কত্ৱা চৰন্তস্স. ভিক্খুনোতি কল্যাণপুথুজ্জনস্স সেক্খস্স ৱা. সামগ্গিযমাহু তস্সতং,যো অত্তানং ভৱনে ন দস্সযেতি তস্সেতং পতিৰূপমাহু, যো এৱংপটিপন্নো নিৰযাদিভেদে ভৱনে অত্তানং ন দস্সেয্য. এৱঞ্হি সো ইমম্হা মৰণা মুচ্চেয্যাতি অধিপ্পাযো.

৮১৮-২০. ইদানি যো ‘‘অত্তানং ভৱনে ন দস্সযে’’তি এৱং খীণাসৱো ৱিভাৱিতো, তস্স ৱণ্ণভণনত্থং ইতো পৰা তিস্সো গাথাযো আহ. তত্থ সব্বত্থাতি দ্ৱাদসসু আযতনেসু. যদিদং দিট্ঠসুতং মুতেসু ৱাতি এত্থ পন যদিদং দিট্ঠসুতং, এত্থ ৱা মুতেসু ৱা ধম্মেসু এৱং মুনি ন উপলিম্পতীতি এৱং সম্বন্ধো ৱেদিতব্বো. ধোনো ন হি তেন মঞ্ঞতি, যদিদং দিট্ঠসুতং মুতেসু ৱাতি অত্ৰাপি যদিদং দিট্ঠসুত্তং, তেন ৱত্থুনা ন মঞ্ঞতি, মুতেসু ৱা ধম্মেসু ন মঞ্ঞতীতি এৱমেৱ সম্বন্ধো ৱেদিতব্বো. ন হি সো ৰজ্জতি নো ৱিৰজ্জতীতি. বালপুথুজ্জনা ৱিয ন ৰজ্জতি, কল্যাণপুথুজ্জনসেক্খা ৱিয ন ৱিৰজ্জতি, ৰাগস্স পন খীণত্তা ‘‘ৱিৰাগো’’ত্ৱেৱ সঙ্খং গচ্ছতি. সেসং সব্বত্থ পাকটমেৱাতি. দেসনাপৰিযোসানে চতুৰাসীতিযা পাণসহস্সানং ধম্মাভিসমযো অহোসীতি.

পৰমত্থজোতিকায খুদ্দক-অট্ঠকথায

সুত্তনিপাত-অট্ঠকথায জৰাসুত্তৱণ্ণনা নিট্ঠিতা.