২. পুগ্গলৱিসেসনিদ্দেসৱণ্ণনা

৮. দ্ৱে পুগ্গলাতিআদীহি পটিসম্ভিদপ্পত্তপুগ্গলৱিসেসপটিপাটিং দস্সেতি. তত্থ পুব্বযোগোতি অতীতজাতীসু পটিসম্ভিদপ্পত্তিহেতুভূতো পুঞ্ঞপযোগো. তেনাতি তেন পুব্বযোগকাৰণেন. এৱং সেসেসুপি. অতিৰেকো হোতীতি অতিৰিত্তো হোতি, অতিৰেকযোগতো ৱা ‘‘অতিৰেকো’’তি ৱুত্তো. অধিকো হোতীতি অগ্গো হোতি. ৱিসেসো হোতীতি ৱিসিট্ঠো হোতি, ৱিসেসযোগতো ৱা ৱিসেসো. ঞাণং পভিজ্জতীতি পটিসম্ভিদাঞাণপ্পভেদং পাপুণাতি.

বহুস্সুতোতি বুদ্ধৱচনৱসেন. দেসনাবহুলোতি ধম্মদেসনাৱসেন. গৰূপনিস্সিতোতি পঞ্ঞায অধিকং গৰুং উপনিস্সিতো. ৱিহাৰবহুলোতি ৱিপস্সনাৱিহাৰবহুলো, ফলসমাপত্তিৱিহাৰবহুলো ৱা. পচ্চৱেক্খণাবহুলোতি ৱিপস্সনাৱিহাৰে সতি ৱিপস্সনাপচ্চৱেক্খণাবহুলো, ফলসমাপত্তিৱিহাৰে সতি ফলসমাপত্তিপচ্চৱেক্খণাবহুলো. সেখপটিসম্ভিদপ্পত্তোতি সেখো হুত্ৱা পটিসম্ভিদপ্পত্তো. এৱং অসেখপটিসম্ভিদপ্পত্তো. সাৱকপাৰমিপ্পত্তোতি এত্থ মহাপঞ্ঞানং অগ্গস্স মহাসাৱকস্স সত্তসট্ঠিযা সাৱকঞাণানং পাৰগমনং পাৰমী, সাৱকস্স পাৰমী সাৱকপাৰমী, তং সাৱকপাৰমিং পত্তোতি সাৱকপাৰমিপ্পত্তো. সাৱকপাৰমিতাপ্পত্তোতি ৱা পাঠো. সত্তসট্ঠিযা সাৱকঞাণানং পালকো পূৰকো চ সো মহাসাৱকো পৰমো, তস্স পৰমস্স অযং সত্তসট্ঠিভেদা ঞাণকিৰিযা পৰমস্স ভাৱো, কম্মং ৱাতি পাৰমী, তস্স সাৱকস্স পাৰমী সাৱকপাৰমী, তং পত্তোতি সাৱকপাৰমিপ্পত্তো. সাৱকপাৰমিপ্পত্তোতি মহামোগ্গল্লানত্থেৰাদিকো যো কোচি সাৱকো. সাৱকপাৰমিপ্পত্তসাৱকতো অতিৰেকস্স অঞ্ঞস্স সাৱকস্স অভাৱা একো পচ্চেকসম্বুদ্ধোতি আহ. পুন পঞ্ঞাপভেদকুসলোতিআদীহি ৱুত্তত্থমেৱ নিগমেত্ৱা দস্সেসীতি. ঞাণকথায যেভুয্যেন অনেকানি ঞাণানি নিদ্দিট্ঠানি. পঞ্ঞাকথায যেভুয্যেন একাপি পঞ্ঞা নানাকাৰৱসেন নানাকত্ৱা ৱুত্তাতি অযং ৱিসেসো.

মহাপঞ্ঞাকথাৱণ্ণনা নিট্ঠিতা.