৮. ৱিপল্লাসকথা

ৱিপল্লাসকথাৱণ্ণনা

২৩৬. ইদানি তস্স কম্মস্স পচ্চযভূতে ৱিপল্লাসে দস্সেন্তেন কথিতায সুত্তন্তপুব্বঙ্গমায ৱিপল্লাসকথায অপুব্বত্থানুৱণ্ণনা. সুত্তন্তে তাৱ সঞ্ঞাৱিপল্লাসাতি সঞ্ঞায ৱিপল্লত্থভাৱা ৱিপৰীতভাৱা, ৱিপৰীতসঞ্ঞাতি অত্থো. সেসদ্ৱযেসুপি এসেৱ নযো. চিত্তকিচ্চস্স দুব্বলট্ঠানে দিট্ঠিৱিৰহিতায অকুসলসঞ্ঞায সককিচ্চস্স বলৱকালে সঞ্ঞাৱিপল্লাসো. দিট্ঠিৱিৰহিতস্সেৱ অকুসলচিত্তস্স সককিচ্চস্স বলৱকালে চিত্তৱিপল্লাসো. দিট্ঠিসম্পযুত্তে চিত্তে দিট্ঠিৱিপল্লাসো. তস্মা সব্বদুব্বলো সঞ্ঞাৱিপল্লাসো, ততো বলৱতৰো চিত্তৱিপল্লাসো, সব্ববলৱতৰো দিট্ঠিৱিপল্লাসো. অজাতবুদ্ধিদাৰকস্স কহাপণদস্সনং ৱিয হি সঞ্ঞা আৰম্মণস্স উপট্ঠানাকাৰমত্তগ্গহণতো. গামিকপুৰিসস্স কহাপণদস্সনং ৱিয চিত্তং লক্খণপটিৱেধস্সাপি সম্পাপনতো. কম্মাৰস্স মহাসণ্ডাসেন অযোগহণং ৱিয দিট্ঠি অভিনিৱিস্স পৰামসনতো. অনিচ্চে নিচ্চন্তি সঞ্ঞাৱিপল্লাসোতি অনিচ্চে ৱত্থুস্মিং ‘‘নিচ্চং ইদ’’ন্তি এৱং গহেত্ৱা উপ্পজ্জনকসঞ্ঞা সঞ্ঞাৱিপল্লাসো. ইমিনা নযেন সব্বপদেসু অত্থো ৱেদিতব্বো. ন সঞ্ঞাৱিপল্লাসো ন চিত্তৱিপল্লাসো ন দিট্ঠিৱিপল্লাসোতি চতূসু ৱত্থূসু দ্ৱাদসন্নং ৱিপল্লাসগ্গাহানং অভাৱা যাথাৱগ্গহণং ৱুত্তং.

গাথাসু অনত্তনি চ অত্তাতি অনত্তনি অত্তাতি এৱংসঞ্ঞিনোতি অত্থো. মিচ্ছাদিট্ঠিহতাতি ন কেৱলং সঞ্ঞিনোৱ, সঞ্ঞায ৱিয উপ্পজ্জমানায মিচ্ছাদিট্ঠিযাপি হতা. খিত্তচিত্তাতি সঞ্ঞাদিট্ঠীহি ৱিয উপ্পজ্জমানেন খিত্তেন ৱিব্ভন্তেন চিত্তেন সমন্নাগতা. ৱিসঞ্ঞিনোতি দেসনামত্তমেতং, ৱিপৰীতসঞ্ঞাচিত্তদিট্ঠিনোতি অত্থো. অথ ৱা সঞ্ঞাপুব্বঙ্গমত্তা দিট্ঠিযা পঠমং চতূহি পদেহি সঞ্ঞাৱিপল্লাসো ৱুত্তো, ততো মিচ্ছাদিট্ঠিহতাতি দিট্ঠিৱিপল্লাসো, খিত্তচিত্তাতি চিত্তৱিপল্লাসো. ৱিসঞ্ঞিনোতি তীহি ৱিপল্লাসগ্গাহেহি পকতিসঞ্ঞাৱিৰহিতা মোহং গতা ‘‘মুচ্ছিতো ৱিসৱেগেন, ৱিসঞ্ঞী সমপজ্জথা’’তিএত্থ (জা. ২.২২.৩২৮) ৱিয. তে যোগযুত্তা মাৰস্সাতি তে জনা সত্তা মাৰস্স যোগে যুত্তা নাম হোন্তি. অযোগক্খেমিনোতি চতূহি যোগেহি ঈতীহি খেমং নিব্বানং অপ্পত্তা. সত্তা গচ্ছন্তি সংসাৰন্তি তেযেৱ পুগ্গলা সংসাৰং সংসৰন্তি. কস্মা? জাতিমৰণগামিনো হি তে, তস্মা সংসৰন্তীতি অত্থো. বুদ্ধাতি চতুসচ্চবুদ্ধা সব্বঞ্ঞুনো. কালত্তযসাধাৰণৱসেন বহুৱচনং. লোকস্মিন্তি ওকাসলোকে. পভঙ্কৰাতি লোকস্স পঞ্ঞালোকং কৰা. ইমং ধম্মং পকাসেন্তীতি ৱিপল্লাসপ্পহানং ধম্মং জোতেন্তি. দুক্খূপসমগামিনন্তি দুক্খৱূপসমং নিব্বানং গচ্ছন্তং. তেসং সুত্ৱানাতি তেসং বুদ্ধানং ধম্মং সুত্ৱান. সপ্পঞ্ঞাতি ভব্বভূতা পঞ্ঞৱন্তো. সচিত্তং পচ্চলদ্ধূতি ৱিপল্লাসৱজ্জিতং সকচিত্তং পটিলভিত্ৱা. পটিঅলদ্ধূতি পদচ্ছেদো. অথ ৱা পটিলভিংসু পটিঅলদ্ধুন্তি পদচ্ছেদো. অনিচ্চতো দক্খুন্তি অনিচ্চৱসেনেৱ অদ্দসংসু. অনত্তনি অনত্তাতি অনত্তানং অনত্তাতি অদ্দক্খুং. অথ ৱা অনত্তনি ৱত্থুস্মিং অত্তা নত্থীতি অদ্দক্খুং. সম্মাদিট্ঠিসমাদানাতি গহিতসম্মাদস্সনা. সব্বং দুক্খং উপচ্চগুন্তি সকলং ৱট্টদুক্খং সমতিক্কন্তা.

পহীনাপহীনপুচ্ছায দিট্ঠিসম্পন্নস্সাতি সোতাপন্নস্স. দুক্খে সুখন্তি সঞ্ঞা উপ্পজ্জতি. চিত্তং উপ্পজ্জতীতি মোহকালুস্সিযস্স অপ্পহীনত্তা সঞ্ঞামত্তং ৱা চিত্তমত্তং ৱা উপ্পজ্জতি, অনাগামিস্সপি উপ্পজ্জতি, কিং পন সোতাপন্নস্স. ইমে দ্ৱে অৰহতোযেৱ পহীনা. অসুভে সুভন্তি সঞ্ঞা উপ্পজ্জতি. চিত্তং উপ্পজ্জতীতি সকদাগামিস্সপি উপ্পজ্জতি, কিং পন সোতাপন্নস্স. ইমে দ্ৱে অনাগামিস্স পহীনাতি অট্ঠকথাযং ৱুত্তং. তস্মা ইদং দ্ৱযং সোতাপন্নসকদাগামিনো সন্ধায ৱুত্তন্তি ৱেদিতব্বং. অনাগামিনো কামৰাগস্স পহীনত্তা ‘‘অসুভে সুভ’’ন্তি সঞ্ঞাচিত্তৱিপল্লাসানঞ্চ পহানং ৱুত্তন্তি ৱেদিতব্বং. দ্ৱীসু ৱত্থূসূতিআদীহি পদেহি পহীনাপহীনে নিগমেত্ৱা দস্সেতি. তত্থ ‘‘অনিচ্চে নিচ্চ’’ন্তি, ‘‘অনত্তনি অত্তা’’তি ইমেসু দ্ৱীসু ৱত্থূসু ছ ৱিপল্লাসা পহীনা. ‘‘দুক্খে সুখ’’ন্তি, ‘‘অসুভে সুভ’’ন্তি ইমেসু দ্ৱীসু ৱত্থূসু দ্ৱে দিট্ঠিৱিপল্লাসা পহীনা. কেসুচি পোত্থকেসু দ্ৱেতি পঠমং লিখিতং, পচ্ছা ছাতি. চতূসু ৱত্থূসূতি চত্তাৰি একতো কত্ৱা ৱুত্তং. অট্ঠাতি দ্ৱীসু ছ, দ্ৱীসু দ্ৱেতি অট্ঠ. চত্তাৰোতি দুক্খাসুভৱত্থূসু একেকস্মিং দ্ৱে দ্ৱে সঞ্ঞাচিত্তৱিপল্লাসাতি চত্তাৰো. কেসুচি পোত্থকেসু ‘‘ছ দ্ৱীসূ’’তি ৱুত্তট্ঠানেসুপি এৱমেৱ লিখিতন্তি.

ৱিপল্লাসকথাৱণ্ণনা নিট্ঠিতা.