৫৫. আসৱক্খযঞাণনিদ্দেসৱণ্ণনা

১০৭. আসৱক্খযঞাণনিদ্দেসে অনঞ্ঞাতঞ্ঞস্সামীতিন্দ্ৰিযাদীনি ৱুত্তত্থানি. কতি ঠানানি গচ্ছতীতি একেকস্স উপ্পত্তিট্ঠাননিযমনত্থং পুচ্ছা. একং ঠানং গচ্ছতীতি একস্মিং ঠানে উপ্পজ্জতীতি ৱুত্তং হোতি. উপ্পত্তিওকাসট্ঠানঞ্হি তিট্ঠতি এত্থাতি ঠানন্তি ৱুচ্চতি. ছ ঠানানীতি ছ মগ্গফলক্খণে. ইন্দ্ৰিযানং অনঞ্ঞাতঞ্ঞস্সামীতিন্দ্ৰিযাদীসু তীসু একেকমেৱ অধিকং হোতীতি দস্সনত্থং সদ্ধিন্দ্ৰিযং অধিমোক্খপৰিৱাৰং হোতীতিআদি ৱুত্তং. যথা ‘‘সদ্ধিন্দ্ৰিযস্স অধিমোক্খট্ঠো’’তিআদীসু (পটি. ম. ১.১২) অধিমোক্খাদযো সদ্ধিন্দ্ৰিযাদীনং কিচ্চৱসেন ৱুত্তা, এৱমিধাপি ‘‘অধিমোক্খপৰিৱাৰং হোতী’’তি সদ্ধিন্দ্ৰিযং অধিমোক্খত্থেন পৰিৱাৰং হোতীতি ৱুত্তং হোতি. এস নযো সেসেসুপি. পৰিৱাৰন্তি চ লিঙ্গৱিপল্লাসো কতো. পঞ্ঞিন্দ্ৰিযন্তি অনঞ্ঞাতঞ্ঞস্সামীতিন্দ্ৰিযমেৱ পজাননসভাৱদস্সনত্থং ৱিসুং কত্ৱা ৱুত্তং. অভিধম্মেপি (ৱিভ. ২১৯) হি পঞ্ঞায কিচ্চৱিসেসদস্সনত্থং মগ্গক্খণে চ ফলক্খণে চ একাৱ পঞ্ঞা অট্ঠধা ৱিভত্তা. অভিসন্দনপৰিৱাৰন্তি ন্হানিযচুণ্ণানং উদকং ৱিয চিত্তচেতসিকানং সিনেহনকিচ্চেন পৰিৱাৰং হোতি. ইদং সোমনস্সসম্পযুত্তমগ্গৱসেনেৱ ৱুত্তং. উপেক্খাসম্পযুত্তমগ্গে পন সোমনস্সিন্দ্ৰিযট্ঠানে উপেক্খিন্দ্ৰিযং দট্ঠব্বং. তং পন সম্পযুত্তানং নাতিউপব্ৰূহনপৰিৱাৰন্তি গহেতব্বং. পৱত্তসন্ততাধিপতেয্যপৰিৱাৰন্তি পৱত্তা সন্ততি পৱত্তসন্ততি, ৱত্তমানসন্তানন্তি অত্থো. অধিপতিভাৱো আধিপতেয্যং, পৱত্তসন্ততিযা আধিপতেয্যং পৱত্তসন্ততাধিপতেয্যং. ৱত্তমানজীৱিতিন্দ্ৰিযস্স উপৰিপৱত্তিযা চ পচ্চযত্তা পুব্বাপৰৱসেন পৱত্তসন্ততিযা অধিপতিভাৱেন অনঞ্ঞাতঞ্ঞস্সামীতিন্দ্ৰিযস্স পৰিৱাৰং হোতি.

সোতাপত্তিমগ্গক্খণে জাতা ধম্মাতিআদি সব্বেসং মগ্গসম্পযুত্তকানং ৱণ্ণভণনত্থং ৱুত্তং. তত্থ মগ্গক্খণে জাতাতি মগ্গসমুট্ঠিতা এৱ, ন অঞ্ঞে. যস্মা পন মগ্গসমুট্ঠিতম্পি ৰূপং কুসলাদিনামং ন লভতি, তস্মা তং অপনেন্তো ঠপেত্ৱা চিত্তসমুট্ঠানং ৰূপন্তি আহ. সব্বেৱ হি তে ধম্মা কুচ্ছিতানং সলনাদীহি অত্থেহি কুসলা. তে আৰম্মণং কত্ৱা পৱত্তমানা নত্থি এতেসং আসৱাতি অনাসৱা. ৱট্টমূলং ছিন্দন্তা নিব্বানং আৰম্মণং কত্ৱা ৱট্টতো নিয্যন্তীতি নিয্যানিকা. কুসলাকুসলসঙ্খাতা চযা অপেতত্তা অপচযসঙ্খাতং নিব্বানং আৰম্মণং কত্ৱা পৱত্তনতো অপচযং গচ্ছন্তীতি অপচযগামিনো, পৱত্তং অপচিনন্তা ৱিদ্ধংসেন্তা গচ্ছন্তীতিপি অপচযগামিনো. লোকে অপৰিযাপন্নভাৱেন লোকতো উত্তৰা উত্তিণ্ণাতি লোকুত্তৰা. নিব্বানং আৰম্মণং এতেসন্তি নিব্বানাৰম্মণা.

ইমানি অট্ঠিন্দ্ৰিযানীতিআদি পুব্বে ৱুত্তপৰিৱাৰভাৱস্স চ তেন সহগতাদিভাৱস্স চ আদিৱুত্তআকাৰানঞ্চ দীপনত্থং ৱুত্তং. তত্থ অট্ঠিন্দ্ৰিযানীতি পুব্বে ৱুত্তনযেন পঞ্ঞিন্দ্ৰিযেন সহ অট্ঠ. সহজাতপৰিৱাৰাতি অট্ঠসু একেকেন সহ ইতৰে ইতৰে সত্ত সহজাতা হুত্ৱা তস্স সহজাতপৰিৱাৰা হোন্তি. তথেৱ অঞ্ঞং অঞ্ঞস্স অঞ্ঞং অঞ্ঞস্সাতি এৱং অঞ্ঞমঞ্ঞপৰিৱাৰা হোন্তি. তথেৱ অঞ্ঞমঞ্ঞং নিস্সযপৰিৱাৰা সম্পযুত্তপৰিৱাৰা চ হোন্তি. সহগতাতি তেন অনঞ্ঞাতঞ্ঞস্সামীতিন্দ্ৰিযেন সহ একুপ্পাদাদিভাৱং গতা. সহজাতাতি তেনেৱ সহ জাতা. সংসট্ঠাতি তেনেৱ সহ মিস্সিতা. সম্পযুত্তাতি তেনেৱ সমং একুপ্পাদাদিপকাৰেহি যুত্তা. তেৱাতি তে এৱ অট্ঠ ইন্দ্ৰিযধম্মা. তস্সাতি অনঞ্ঞাতঞ্ঞস্সামীতিন্দ্ৰিযস্স. আকাৰাতি পৰিৱাৰকোট্ঠাসা.

ফলক্খণে জাতা ধম্মা সব্বেৱ অব্যাকতা হোন্তীতি ৰূপস্সপি অব্যাকতত্তা চিত্তসমুট্ঠানৰূপেন সহ ৱুত্তা. মগ্গস্সেৱ কুসলত্তা নিয্যানিকত্তা অপচযগামিত্তা চ ফলক্খণে ‘‘কুসলা’’তি চ ‘‘নিয্যানিকা’’তি চ ‘‘অপচযগামিনো’’তি চ ন ৱুত্তং. ইতীতিআদি ৱুত্তপ্পকাৰনিগমনং. তত্থ অট্ঠট্ঠকানীতি অট্ঠসু মগ্গফলেসু একেকস্স অট্ঠকস্স ৱসেন অট্ঠ ইন্দ্ৰিযঅট্ঠকানি. চতুসট্ঠি হোন্তীতি চতুসট্ঠি আকাৰা হোন্তি. আসৱাতিআদি হেট্ঠা ৱুত্তত্থমেৱ. ইধ অৰহত্তমগ্গৱজ্ঝেযেৱ আসৱে অৱত্ৱা সেসমগ্গত্তযৱজ্ঝানম্পি ৱচনং আসৱক্খযৱচনসামঞ্ঞমত্তেন ৱুত্তন্তি ৱেদিতব্বং. অৰহত্তমগ্গঞাণমেৱ হি কেচি আসৱে অসেসেত্ৱা আসৱানং খেপনতো ‘‘খযে ঞাণ’’ন্তি ৱুচ্চতি. তস্মাযেৱ চ অৰহাযেৱ খীণাসৱোতি ৱুচ্চতীতি.

আসৱক্খযঞাণনিদ্দেসৱণ্ণনা নিট্ঠিতা.