৪৪-৪৯. ৱিৱট্টঞাণছক্কনিদ্দেসৱণ্ণনা

৯৫. ৱিৱট্টঞাণছক্কনিদ্দেসে নেক্খম্মাধিপতত্তা পঞ্ঞাতি নেক্খম্মং অধিকং কত্ৱা নেক্খম্মাধিকভাৱেন পৱত্তা পঞ্ঞা. কামচ্ছন্দতো সঞ্ঞায ৱিৱট্টতীতি নেক্খম্মাধিপতিকতপঞ্ঞাসম্পযুত্তসঞ্ঞায হেতুভূতায, কৰণভূতায ৱা কামচ্ছন্দতো ৱিৱট্টতি পৰাৱত্ততি, পৰম্মুখী হোতীতি অত্থো. এস নযো সেসেসু.

৯৬. কামচ্ছন্দো নানত্তন্তি কামচ্ছন্দো সন্তৱুত্তিতায অভাৱতো ন একসভাৱো. নেক্খম্মং একত্তন্তি নেক্খম্মং সন্তৱুত্তিভাৱতো একসভাৱো. নেক্খম্মেকত্তং চেতযতোতি কামচ্ছন্দে আদীনৱদস্সনেন নেক্খম্মং পৱত্তযতো. কামচ্ছন্দতো চিত্তং ৱিৱট্টতীতি দিট্ঠাদীনৱতো কামচ্ছন্দতো নেক্খম্মক্খণে চিত্তং ৱিৱট্টতি. এস নযো সেসেসু.

৯৭. কামচ্ছন্দং পজহন্তোতি নেক্খম্মপৱত্তিক্খণে কামচ্ছন্দং ৱিক্খম্ভনপ্পহানেন পজহন্তো. নেক্খম্মৱসেন চিত্তং অধিট্ঠাতীতি পটিলদ্ধস্স নেক্খম্মস্স ৱসেন তংসম্পযুত্তচিত্তং অধিতিট্ঠতি অধিকং কৰোন্তো তিট্ঠতি, পৱত্তেতীতি অত্থো. এস নযো সেসেসু.

৯৮. চক্খু সুঞ্ঞং অত্তেন ৱাতি বালজনপৰিকপ্পিতস্স কাৰকৱেদকসঙ্খাতস্স অত্তনো অভাৱা চক্খু অত্তেন চ সুঞ্ঞং. যঞ্হি যত্থ ন হোতি, তেন তং সুঞ্ঞং নাম হোতি. অত্তনিযেন ৱাতি অত্তনো অভাৱেনেৱ অত্তনো সন্তকস্সপি অভাৱা অত্তনো সন্তকেন চ সুঞ্ঞং. লোকস্স অত্তাতি চ অত্তনিযন্তি চ উভযথা গাহসম্ভৱতো তদুভযগাহপটিসেধনত্থং অত্তাভাৱো চ অত্তনিযাভাৱো চ ৱুত্তো. নিচ্চেন ৱাতি ভঙ্গং অতিক্কমিত্ৱা তিট্ঠন্তস্স কস্সচি অভাৱতো নিচ্চেন চ সুঞ্ঞং. ধুৱেন ৱাতি পৱত্তিক্খণেপি থিৰস্স কস্সচি অভাৱতো ধুৱেন চ সুঞ্ঞং. সস্সতেন ৱাতি সব্বকালেপি ৱিজ্জমানস্স কস্সচি অভাৱতো সস্সতেন চ সুঞ্ঞং. অৱিপৰিণামধম্মেন ৱাতি জৰাভঙ্গৱসেন দ্ৱিধা অপৰিৱত্তমানপকতিকস্স কস্সচি অভাৱতো অৱিপৰিণামধম্মেন চ সুঞ্ঞং. অথ ৱা নিচ্চভাৱেন চ ধুৱভাৱেন চ সস্সতভাৱেন চ অৱিপৰিণামধম্মভাৱেন চ সুঞ্ঞন্তি অত্থো. সমুচ্চযত্থো ৱা-সদ্দো. যথাভূতং জানতো পস্সতোতি ইচ্চেৱং অনত্তানুপস্সনাঞাণেন যথাসভাৱেন জানন্তস্স চক্খুনা ৱিয চ পস্সন্তস্স. চক্খাভিনিৱেসতো ঞাণং ৱিৱট্টতীতি চক্খু অত্তাতি ৱা অত্তনিযন্তি ৱা পৱত্তমানতো দিট্ঠাভিনিৱেসতো তদঙ্গপ্পহানৱসেন ঞাণং ৱিৱট্টতি. এস নযো সেসেসু.

৯৯. নেক্খম্মেন কামচ্ছন্দং ৱোসজ্জতীতি নেক্খম্মলাভী পুগ্গলো নেক্খম্মেন তপ্পটিপক্খং কামচ্ছন্দং পৰিচ্চজতি. ৱোসগ্গে পঞ্ঞাতি কামচ্ছন্দস্স ৱোসগ্গভূতে নেক্খম্মে তংসম্পযুত্তা পঞ্ঞা. এস নযো সেসেসু. পীড়নট্ঠাদযো হেট্ঠা ৱুত্তত্থা এৱ. পৰিজানন্তো ৱিৱট্টতীতি পুগ্গলাধিট্ঠানা দেসনা, মগ্গসমঙ্গীপুগ্গলো দুক্খস্স চতুব্বিধং অত্থং কিচ্চৱসেন পৰিজানন্তো দুভতো ৱুট্ঠানৱসেন ৱিৱট্টতি, ঞাণৱিৱট্টনেপি ঞাণসমঙ্গী ৱিৱট্টতীতি ৱুত্তো.

১০০. তথট্ঠে পঞ্ঞাতি এতস্স পুগ্গলস্সেৱ তথট্ঠে ৱিৱট্টনা পঞ্ঞা. এস নযো সেসেসু. ইদানি মগ্গক্খণে এৱ কিচ্চৱসেন আকাৰনানত্ততো ছ ৱিৱট্টঞাণানি দস্সেতুং সঞ্ঞাৱিৱট্টোতিআদিমাতিকং ঠপেত্ৱা তং অত্থতো ৱিভজন্তো সঞ্জানন্তো ৱিৱট্টতীতিআদিমাহ. তত্থ সঞ্জানন্তো ৱিৱট্টতীতি সঞ্ঞাৱিৱট্টোতি যস্মা পুব্বভাগে নেক্খম্মাদিং অধিপতিতো সঞ্জানন্তো যোগী পচ্ছা নেক্খম্মসম্পযুত্তঞাণেন কামচ্ছন্দাদিতো ৱিৱট্টতি, তস্মা তং ঞাণং সঞ্ঞাৱিৱট্টো নামাতি অত্থো. চেতযন্তো ৱিৱট্টতীতি চেতোৱিৱট্টোতি যস্মা যোগী নেক্খম্মেকত্তাদীনি চেতযন্তো সম্পযুত্তঞাণেন কামচ্ছন্দাদিতো ৱিৱট্টতি, তস্মা তং ঞাণং চেতোৱিৱট্টো নামাতি অত্থো. ৱিজানন্তো ৱিৱট্টতীতি চিত্তৱিৱট্টোতি যস্মা যোগী নেক্খম্মাদিৱসেন চিত্তাধিট্ঠানেন ৱিজানন্তো তংসম্পযুত্তঞাণেন কামচ্ছন্দাদিতো ৱিৱট্টতি, তস্মা তং ঞাণং চিত্তৱিৱট্টো নামাতি অত্থো. ঞাণং কৰোন্তো ৱিৱট্টতীতি ঞাণৱিৱট্টোতি যস্মা যোগী ছব্বিধং অজ্ঝত্তিকাযতনং অনত্তানুপস্সনাঞাণেন সুঞ্ঞতো ৱিদিতং কৰোন্তো তেনেৱ ঞাণেন দিট্ঠাভিনিৱেসতো ৱিৱট্টতি, তস্মা তং ঞাণং ঞাণৱিৱট্টো নামাতি অত্থো. ৱোসজ্জন্তো ৱিৱট্টতীতি ৱিমোক্খৱিৱট্টোতি যস্মা যোগী নেক্খম্মাদীহি কামচ্ছন্দাদীনি ৱোসজ্জন্তো তংসম্পযুত্তঞাণেন কামচ্ছন্দাদিতো ৱিৱট্টতি, তস্মা তং ঞাণং ৱিমোক্খৱিৱট্টো নামাতি অত্থো. তথট্ঠে ৱিৱট্টতীতি সচ্চৱিৱট্টোতি যস্মা যোগী চতুব্বিধে তথট্ঠে দুভতো ৱুট্ঠানৱসেন ৱিৱট্টতি, তস্মা মগ্গঞাণং সচ্চৱিৱট্টো নামাতি অত্থো. মগ্গঞাণমেৱ ৱা তথট্ঠে দুভতো ৱুট্ঠানভাৱেন ৱিৱট্টতীতি সচ্চৱিৱট্টোতি অত্থো.

যত্থ সঞ্ঞাৱিৱট্টোতিআদি সচ্চৱিৱট্টঞাণনিদ্দেসে ৱুত্তত্তা সচ্চৱিৱট্টঞাণক্খণমেৱ সন্ধায ৱুত্তন্তি ৱেদিতব্বং. মগ্গক্খণেযেৱ হি সব্বানি যুজ্জন্তি. কথং? ঞাণৱিৱট্টে ঞাণঞ্হি ৱজ্জেত্ৱা সেসেসু অৰিযমগ্গো সৰূপেনেৱ আগতো. ৱিপস্সনাকিচ্চস্স পন মগ্গেনেৱ সিজ্ঝনতো ৱিপস্সনাকিচ্চসিদ্ধিৱসেন ঞাণৱিৱট্টঞাণম্পি মগ্গক্খণে যুজ্জতি. মগ্গঞাণেনেৱ ৱা ‘‘চক্খু সুঞ্ঞ’’ন্তিআদি কিচ্চৱসেন পটিৱিদ্ধমেৱ হোতীতি মগ্গক্খণে তং ঞাণং ৱত্তুং যুজ্জতিযেৱ. অত্থযোজনা পনেত্থ ‘‘যত্থ মগ্গক্খণে সঞ্ঞাৱিৱট্টো, তত্থ চেতোৱিৱট্টো. যত্থ মগ্গক্খণে চেতোৱিৱট্টো, তত্থ সঞ্ঞাৱিৱট্টো’’তি এৱমাদিনা নযেন সব্বসংসন্দনেসু যোজনা কাতব্বা. অথ ৱা সঞ্ঞাৱিৱট্টচেতোৱিৱট্টচিত্তৱিৱট্টৱিমোক্খৱিৱট্টেসু চতুন্নং অৰিযমগ্গানং আগতত্তা সচ্চৱিৱট্টো আগতোযেৱ হোতি. ঞাণৱিৱট্টো চ সচ্চৱিৱট্টেনেৱ কিচ্চৱসেন সিদ্ধো হোতি. সঞ্ঞাচেতোচিত্তৱিমোক্খৱিৱট্টেস্ৱেৱ চ পেয্যালে ৱিত্থাৰিযমানে ‘‘অনত্তানুপস্সনাধিপতত্তা পঞ্ঞা অভিনিৱেসতো সঞ্ঞায ৱিৱট্টতীতি অধিপতত্তা পঞ্ঞা সঞ্ঞাৱিৱট্টে ঞাণ’’ন্তি চ, ‘‘অভিনিৱেসো নানত্তং, অনত্তানুপস্সনা একত্তং. অনত্তানুপস্সনেকত্তং চেতযতো অভিনিৱেসতো চিত্তং ৱিৱট্টতীতি নানত্তে পঞ্ঞা চেতোৱিৱট্টে ঞাণ’’ন্তি চ, ‘‘অভিনিৱেসং পজহন্তো অনত্তানুপস্সনাৱসেন চিত্তং অধিট্ঠাতীতি অধিট্ঠানে পঞ্ঞা চিত্তৱিৱট্টে ঞাণ’’ন্তি চ, ‘‘অনত্তানুপস্সনায অভিনিৱেসং ৱোসজ্জতীতি ৱোসগ্গে পঞ্ঞা ৱিমোক্খৱিৱট্টে ঞাণ’’ন্তি চ পাঠসম্ভৱতো ঞাণৱিৱট্টে ঞাণম্পি তেসু আগতমেৱ হোতি. ঞাণৱিৱট্টে চ অনত্তানুপস্সনায ৱুট্ঠায অৰিযমগ্গং পটিলদ্ধস্স কিচ্চৱসেন ‘‘চক্খু সুঞ্ঞং অত্তেন ৱা অত্তনিযেন ৱা’’তিআদিযুজ্জনতো সচ্চৱিৱট্টো লব্ভতি, তস্মা একেকস্মিং ৱিৱট্টে সেসা পঞ্চ পঞ্চ ৱিৱট্টা লব্ভন্তি. তস্মা এৱং ‘‘যত্থ সঞ্ঞাৱিৱট্টো, তত্থ চেতোৱিৱট্টো’’তিআদিকানি সংসন্দনানি ৱুত্তানীতি ৱেদিতব্বং.

ৱিৱট্টঞাণছক্কনিদ্দেসৱণ্ণনা নিট্ঠিতা.