৩৫. পৰিনিব্বানঞাণনিদ্দেসৱণ্ণনা

৮৬. পৰিনিব্বানঞাণনিদ্দেসে ইধাতি ইমস্মিং সাসনে. সম্পজানোতি সাত্থকসম্পজঞ্ঞং, সপ্পাযসম্পজঞ্ঞং, গোচৰসম্পজঞ্ঞং, অসম্মোহসম্পজঞ্ঞন্তি ইমেহি চতূহি সম্পজঞ্ঞেহি সম্পজানো. পৱত্তন্তি সব্বত্থ যথানুৰূপং পৰিযুট্ঠানপৱত্তঞ্চ অনুসযপ্পৱত্তঞ্চ. পৰিযাদিযতীতি উপচাৰপ্পনাৱসেন ৱুত্তেসু ৱিক্খম্ভনৱসেন, ৱিপস্সনাৱসেন ৱুত্তেসু তদঙ্গৱসেন, মগ্গৱসেন ৱুত্তেসু সমুচ্ছেদৱসেন খেপেতি অপ্পৱত্তং কৰোতি. পেয্যালমুখেন হি দুতিযাদিঝানসমাপত্তিমহাৱিপস্সনামগ্গা সংখিত্তা. যস্মা এতং পচ্চৱেক্খন্তস্স পৱত্তং ঞাণং পৰিনিব্বানে ঞাণং নাম হোতি, তস্মা ৱিক্খম্ভনপৰিনিব্বানং তদঙ্গপৰিনিব্বানং সমুচ্ছেদপৰিনিব্বানন্তিপি ৱুত্তমেৱ হোতি. এতেহি কিলেসপৰিনিব্বানপচ্চৱেক্খণঞাণং ৱুত্তং. অথ ৱা পনাতিআদীহি খন্ধপৰিনিব্বানপচ্চৱেক্খণঞাণং নিদ্দিসতি. অনুপাদিসেসায নিব্বানধাতুযাতি দুৱিধা হি নিব্বানধাতু সউপাদিসেসা চ অনুপাদিসেসা চ. তত্থ উপাদীযতে ‘‘অহং মমা’’তি ভুসং গণ্হীযতীতি উপাদি, খন্ধপঞ্চকস্সেতং অধিৱচনং. উপাদিযেৱ সেসো অৱসিট্ঠোতি উপাদিসেসো, সহ উপাদিসেসেন ৱত্ততীতি সউপাদিসেসা. নত্থেত্থ উপাদিসেসোতি অনুপাদিসেসা. সউপাদিসেসা পঠমং ৱুত্তা. অযং পন অনুপাদিসেসা. তায অনুপাদিসেসায নিব্বানধাতুযা. চক্খুপৱত্তন্তি চক্খুপৱত্তি চক্খুসমুদাচাৰো. পৰিযাদিযতীতি খেপীযতি মদ্দীযতীতি. এস নযো সেসেসু.

পৰিনিব্বানঞাণনিদ্দেসৱণ্ণনা নিট্ঠিতা.