৩৬. সমসীসট্ঠঞাণনিদ্দেসৱণ্ণনা

৮৭. সমসীসট্ঠঞাণনিদ্দেসে পঞ্চক্খন্ধাতিআদীহি দসহি ৰাসীহি সব্বধম্মসঙ্গহো ৱেদিতব্বো. ন হি একেকস্স ৱসেন আযতনধাতুৰাসিৱজ্জেহি সেসেহি অট্ঠহি ৰাসীহি ৱিসুং ৱিসুং সব্বধম্মো সঙ্গয্হতীতি. যস্মা পন লোকুত্তৰধম্মা হেতুসমুচ্ছেদেন সমুচ্ছিন্দিতব্বা ন হোন্তি, তস্মা সব্বধম্মসদ্দেন সঙ্গহিতাপি লোকুত্তৰধম্মা সমুচ্ছেদৱসেন সম্ভৱতো ইধ ন গহেতব্বা, হেতুসমুচ্ছেদেন সমুচ্ছিন্দিতব্বা এৱ তেভূমকধম্মা গহেতব্বা. সম্মা সমুচ্ছিন্দতীতি যথাযোগং ৱিক্খম্ভনতদঙ্গসমুচ্ছেদপহানৱসেন পৰিযুট্ঠানং অনুসযঞ্চ নিৰোধেন্তো সম্মা সমুচ্ছিন্দতি. এৱং পুগ্গলাধিট্ঠানায দেসনায সম্মা সমুচ্ছেদো নিদ্দিট্ঠো. নিৰোধেতীতি অনুপ্পাদনিৰোধেন নিৰোধেতি. ইমিনা সমুচ্ছেদত্থো ৱুত্তো. ন উপট্ঠাতীতি এৱং নিৰোধে কতে সো সো ধম্মো পুন ন উপতিট্ঠতি, ন উপ্পজ্জতীতি অত্থো. ইমিনা নিৰোধত্থো ৱুত্তো. এৱং অনুপট্ঠহনধম্মৱসেন অনুপট্ঠানভাৱো নিদ্দিট্ঠো. সমন্তি কামচ্ছন্দাদীনং সমিতত্তা সমং. তানি পন নেক্খম্মাদীনি সত্ত, ৰূপাৰূপজ্ঝানানি অট্ঠ, মহাৱিপস্সনা অট্ঠাৰস, অৰিযমগ্গা চত্তাৰোতি সত্ততিংস হোন্তি.

তেৰস সীসানি সীসভূতানং সব্বেসং সঙ্গহৱসেন ৱুত্তানি. ইধ পন সদ্ধাদীনি অট্ঠেৱ সীসানি যুজ্জন্তি. ন হি অৰহতো তণ্হাদীনি পঞ্চ সীসানি সন্তি. পলিবোধসীসন্তি পলিবুন্ধনং পলিবোধো, নিব্বানমগ্গাৱৰণন্তি অত্থো. সীসন্তি পধানং, অধিকন্তি অত্থো. পলিবোধোযেৱ সীসং, তংসম্পযুত্তাদিসব্বপলিবোধেসু ৱা সীসন্তি পলিবোধসীসং. এস নযো সেসেসু. ৱিসেসতো পন ৱিনিবন্ধনন্তি উন্নতিৱসেন সংসাৰে বন্ধনং. পৰামাসোতি অভিনিৱেসো. ৱিক্খেপোতি ৱিপ্পকিণ্ণতা. কিলেসোতি কিলিস্সনং. অধিমোক্খোতি অধিমুচ্চনং. পগ্গহোতি উস্সাহনং. উপট্ঠানন্তি অপিলাপনং. অৱিক্খেপোতি অৱিপ্পকিণ্ণতা. দস্সনন্তি যথাসভাৱপটিৱেধো. পৱত্তন্তি উপাদিন্নক্খন্ধপৱত্তং. গোচৰোতি আৰম্মণং. ইমেসু দ্ৱাদসসুপি ৱাৰেসু পধানট্ঠো সীসট্ঠো. ৱিমোক্খোতি ৱিক্খম্ভনতদঙ্গসমুচ্ছেদপটিপ্পস্সদ্ধিনিস্সৰণৱিমুত্তীসু পঞ্চসু নিস্সৰণৱিমুত্তি নিব্বানং. সঙ্খাৰসীসন্তি সব্বসঙ্খতসঙ্খাৰানং সীসং, কোটি অৱসানন্তি অত্থো. এতেন অনুপাদিসেসপৰিনিব্বানং ৱুত্তং. সঙ্খাৰাভাৱমত্তৱসেন ৱা খন্ধপৰিনিব্বানমেৱ ৱুত্তং হোতি. নেক্খম্মাদিকং সমঞ্চ সদ্ধাদিকং সীসঞ্চ, সমসীসং ৱা অস্স অত্থীতি সমসীসীতি. অথ ৱা তেৰসন্নং সীসানং তণ্হাদীনি পঞ্চ সীসানি সমুদযসচ্চং, সদ্ধাদীনি পঞ্চ মগ্গসচ্চং, পৱত্তসীসং জীৱিতিন্দ্ৰিযং দুক্খসচ্চং, গোচৰসীসঞ্চ সঙ্খাৰসীসঞ্চ নিৰোধসচ্চন্তি ইমেসং চতুন্নং অৰিযসচ্চানং একস্মিং ৰোগে ৱা একস্মিং ইৰিযাপথে ৱা একস্মিং সভাগজীৱিতিন্দ্ৰিযে ৱা অভিসমযো চ অনুপাদিসেসপৰিনিব্বানঞ্চ যস্স হোতি, সো পুব্বে ৱুত্তসমানঞ্চ ইমেসঞ্চ সীসানং অত্থিতায সমসীসীতি ৱুচ্চতি.

সমসীসট্ঠঞাণনিদ্দেসৱণ্ণনা নিট্ঠিতা.