৩৩. অৰণৱিহাৰঞাণনিদ্দেসৱণ্ণনা

৮২. অৰণৱিহাৰঞাণনিদ্দেসে অনিচ্চানুপস্সনাদযো ৱুত্তত্থা. সুঞ্ঞতো ৱিহাৰোতি অনত্তানুপস্সনায ৱুট্ঠিতস্স সুঞ্ঞতাকাৰেনেৱ পৱত্তা অৰহত্তফলসমাপত্তি. অনিমিত্তো ৱিহাৰোতি অনিচ্চানুপস্সনায ৱুট্ঠিতস্স অনিমিত্তাকাৰেন পৱত্তা অৰহত্তফলসমাপত্তি. অপ্পণিহিতো ৱিহাৰোতি দুক্খানুপস্সনায ৱুট্ঠিতস্স অপ্পণিহিতাকাৰেন পৱত্তা অৰহত্তফলসমাপত্তি. সুঞ্ঞতে অধিমুত্ততাতি সুঞ্ঞতে ফলসমাপত্তিযা পুব্বভাগপঞ্ঞাৱসেন অধিমুত্ততা. সেসদ্ৱযেপি এসেৱ নযো. পঠমং ঝানন্তিআদীহি অৰহত্তফলসমাপত্তিং সমাপজ্জিতুকামস্স ৱিপস্সনায আৰম্মণভূতা ঝানসমাপত্তিযো ৱুত্তা. অৰহতোযেৱ হি ৱিপস্সনাফলসমাপত্তিপণীতাধিমুত্তিঝানসমাপত্তিযো সব্বকিলেসানং পহীনত্তা ‘‘অৰণৱিহাৰো’’তি ৱত্তুং অৰহন্তি.

পঠমেন ঝানেন নীৱৰণে হৰতীতি অৰণৱিহাৰোতি পঠমজ্ঝানসমঙ্গী পঠমেন ঝানেন নীৱৰণে হৰতীতি তং পঠমং ঝানং অৰণৱিহাৰোতি অত্থো. সেসেসুপি এসেৱ নযো. অৰহতো নীৱৰণাভাৱেপি নীৱৰণৱিপক্খত্তা পঠমস্স ঝানস্স নীৱৰণে হৰতীতি ৱুত্তন্তি ৱেদিতব্বং. ৱিপস্সনাফলসমাপত্তিপণীতাধিমুত্তিৱসেন তিধা অৰণৱিহাৰঞাণং উদ্দিসিত্ৱা কস্মা ঝানসমাপত্তিযোৱ অৰণৱিহাৰোতি নিদ্দিট্ঠাতি চে? উদ্দেসৱসেনেৱ তাসং তিস্সন্নং অৰণৱিহাৰতায সিদ্ধত্তা. ফলসমাপত্তিৱিপস্সনায পন ভূমিভূতানং ঝানসমাপত্তীনং অৰণৱিহাৰতা অৱুত্তে ন সিজ্ঝতি, তস্মা অসিদ্ধমেৱ সাধেতুং ‘‘পঠমং ঝানং অৰণৱিহাৰো’’তিআদি ৱুত্তন্তি ৱেদিতব্বং. তাসঞ্হি অৰণৱিহাৰতা উদ্দেসৱসেন অসিদ্ধাপি নিদ্দেসে ৱুত্তত্তা সিদ্ধাতি. তেসং ৱা যোজিতনযেনেৱ ‘‘অনিচ্চানুপস্সনা নিচ্চসঞ্ঞং হৰতীতি অৰণৱিহাৰো, দুক্খানুপস্সনা সুখসঞ্ঞং হৰতীতি অৰণৱিহাৰো, অনত্তানুপস্সনা অত্তসঞ্ঞং হৰতীতি অৰণৱিহাৰো, সুঞ্ঞতো ৱিহাৰো অসুঞ্ঞতং হৰতীতি অৰণৱিহাৰো, অনিমিত্তো ৱিহাৰো নিমিত্তং হৰতীতি অৰণৱিহাৰো, অপ্পণিহিতো ৱিহাৰো পণিধিং হৰতীতি অৰণৱিহাৰো, সুঞ্ঞতাধিমুত্ততা অসুঞ্ঞতাধিমুত্তিং হৰতীতি অৰণৱিহাৰো, অনিমিত্তাধিমুত্ততা নিমিত্তাধিমুত্তিং হৰতীতি অৰণৱিহাৰো, অপ্পণিহিতাধিমুত্ততা পণিহিতাধিমুত্তিং হৰতীতি অৰণৱিহাৰো’’তি যোজেত্ৱা গহেতব্বং.

অৰণৱিহাৰঞাণনিদ্দেসৱণ্ণনা নিট্ঠিতা.