২০-২৪. ঞাণপঞ্চকনিদ্দেসৱণ্ণনা

৭৫. ঞাণপঞ্চকনিদ্দেসে তেসং পঞ্চন্নং ঞাণানং অনুপুব্বসম্বন্ধসব্ভাৱতো একতোৱ পুচ্ছাৱিস্সজ্জনানি কতানি. অভিঞ্ঞাতা হোন্তীতি ধম্মসভাৱলক্খণজাননৱসেন সুট্ঠু ঞাতা হোন্তি. ঞাতা হোন্তীতি ঞাতপৰিঞ্ঞাৱসেন সভাৱতো ঞাতত্তা ঞাতা নাম হোন্তি. যেন ঞাণেন তে ধম্মা ঞাতা হোন্তি, তং ঞাতট্ঠেন ঞাণং, পজাননট্ঠেন পঞ্ঞাতি সম্বন্ধো. ইমিনাৱ নযেন সেসঞাণানিপি যোজেতব্বানি. পৰিঞ্ঞাতা হোন্তীতি সামঞ্ঞলক্খণৱসেন সমন্ততো ঞাতা হোন্তি. তীৰিতা হোন্তীতি তীৰণপৰিঞ্ঞাৱসেন অনিচ্চাদিতো উপপৰিক্খিতা সমাপিতা নাম হোন্তি. পহীনা হোন্তীতি অনিচ্চানুপস্সনাদিনা ঞাণেন নিচ্চসঞ্ঞাদযো ভঙ্গানুপস্সনতো পট্ঠায পহীনা হোন্তি. পৰিচ্চত্তা হোন্তীতি পহানৱসেনেৱ ছড্ডিতা নাম হোন্তি. ভাৱিতা হোন্তীতি ৱড্ঢিতা পৰিভাৱিতা চ হোন্তি. একৰসা হোন্তীতি সকিচ্চসাধনপটিপক্খপহানেন এককিচ্চা হোন্তি, পচ্চনীকতো ৱা ৱিমুত্তিৱসেন ৱিমুত্তিৰসেন একৰসা হোন্তি. সচ্ছিকতা হোন্তীতি পটিলাভৱসেন ফলধম্মো পটিৱেধৱসেন নিব্বানধম্মোতি পচ্চক্খকতা হোন্তি. ফস্সিতা হোন্তীতি পটিলাভফুসনেন পটিৱেধফুসনেন চ ফস্সিতা অনুভূতা হোন্তি. ইমানি পঞ্চ ঞাণানি হেট্ঠা সুতমযঞাণৱসেন ৱুত্তানি, ইধ সকিচ্চসাধনৱসেন.

ঞাণপঞ্চকনিদ্দেসৱণ্ণনা নিট্ঠিতা.