১৩. ৱিমুত্তিঞাণনিদ্দেসৱণ্ণনা

৬৪. ৱিমুত্তিঞাণনিদ্দেসে সক্কাযদিট্ঠীতি ৱিজ্জমানট্ঠেন সতি খন্ধপঞ্চকসঙ্খাতে কাযে, সযং ৱা সতী তস্মিং কাযে দিট্ঠীতি সক্কাযদিট্ঠি. ৱিচিকিচ্ছাতি ৱিগতা চিকিচ্ছা, সভাৱং ৱা ৱিচিনন্তো এতায কিচ্ছতি কিলমতীতি ৱিচিকিচ্ছা. সীলব্বতপৰামাসোতি সীলেন সুদ্ধি ৱতেন সুদ্ধি সীলব্বতেন সুদ্ধীতি গহিতঅভিনিৱেসো. সো হি সভাৱং অতিক্কমিত্ৱা পৰতো আমসতীতি সীলব্বতপৰামাসো. উভিন্নং সমানেপি দিট্ঠিভাৱে তক্কঞ্চ পৰূপদেসঞ্চ ৱিনা পকতিযা এৱ সক্কাযদিট্ঠিগহণতো পকতিভূতায ৱীসতিৱত্থুকায সক্কাযদিট্ঠিযা পহানেনেৱ সব্বদিট্ঠিপ্পহানদস্সনত্থং সক্কাযদিট্ঠি ৱুত্তা. সীলব্বতপৰামাসো পন ‘‘সুদ্ধিপটিপদং পটিপজ্জামা’’তি পটিপন্নানং পটিপদায মিচ্ছাভাৱদস্সনত্থং ৱিসুং ৱুত্তোতি ৱেদিতব্বো. তিণ্ণম্পি অনুসযপ্পহানেনেৱ পহানং দস্সেতুং দিট্ঠানুসযো ৱিচিকিচ্ছানুসযোতি ৱুত্তং, ন ৱিসুং কিলেসত্তা. উপক্কিলেসাতি কিলেসেন্তি উপতাপেন্তি ৱিবাধেন্তীতি কিলেসা, থামগতট্ঠেন ভুসা কিলেসাতি উপক্কিলেসা. সম্মা সমুচ্ছিন্না হোন্তীতি সমুচ্ছেদপ্পহানেন অনুপ্পাদনিৰোধেন সম্মা সমুচ্ছিন্না হোন্তি. সপৰিযুট্ঠানেহীতি চিত্তং পৰিযোনন্ধন্তানি উট্ঠেন্তি উপ্পজ্জন্তীতি পৰিযুট্ঠানানি, সমুদাচাৰপ্পত্তানং কিলেসানমেতং অধিৱচনং. সহ পৰিযুট্ঠানেহীতি সপৰিযুট্ঠানানি. তেহি সপৰিযুট্ঠানেহি অনুসযিতউপক্কিলেসেহি. চিত্তং ৱিমুত্তং হোতীতি তেসং অভব্বুপ্পত্তিকভূতত্তা সন্ততিৱসেন পৱত্তমানং চিত্তং ততো ৱিমুত্তং নাম হোতি. তদেৱ সুট্ঠু ৱিমুত্তত্তা সুৱিমুত্তং. তংৱিমুত্তিঞাতট্ঠেনাতি তস্সা ৱিমুত্তিযা জাননট্ঠেন.

ৱিমুত্তিঞাণনিদ্দেসৱণ্ণনা নিট্ঠিতা.