১০. গোত্ৰভুঞাণনিদ্দেসৱণ্ণনা

৫৯. গোত্ৰভুঞাণনিদ্দেসে অভিভুয্যতীতি অভিভৱতি অতিক্কমতি. বহিদ্ধা সঙ্খাৰনিমিত্তন্তি সকসন্তানপ্পৱত্তঅকুসলক্খন্ধতো বহিদ্ধাভূতং সঙ্খাৰনিমিত্তং. লোকিকসঙ্খাৰা হি কিলেসানং নিমিত্তত্তা, নিমিত্তাকাৰেন উপট্ঠানতো ৱা নিমিত্তন্তি ৱুচ্চন্তি. অভিভুয্যতীতি গোত্ৰভূতি চ পুথুজ্জনগোত্তাভিভৱনতো গোত্ৰভুভাৱো ৱুত্তো. পক্খন্দতীতি গোত্ৰভূতি অৰিযগোত্তভাৱনতো গোত্ৰভুভাৱো ৱুত্তো. অভিভুয্যিত্ৱা পক্খন্দতীতি গোত্ৰভূতি উভো অত্থে সমাসেত্ৱা ৱুত্তং. ৱুট্ঠাতীতি গোত্ৰভূতি চ ৱিৱট্টতীতি গোত্ৰভূতি চ মাতিকায ৱুট্ঠানৱিৱট্টনপদানুৰূপেন পুথুজ্জনগোত্তাভিভৱনত্থোযেৱ ৱুত্তো. সমথৱসেন ৱুত্তগোত্ৰভূনং পন নীৱৰণাদিগোত্তাভিভৱনতো গোত্ৰভূতি, ‘‘সোতাপত্তিফলসমাপত্তত্থাযা’’তিআদীসু ছসু সমাপত্তিৱাৰেসু উপ্পাদাদিগোত্তাভিভৱনতো গোত্ৰভূতি, ‘‘সকদাগামিমগ্গং পটিলাভত্থাযা’’তিআদীসু তীসু মগ্গৱাৰেসু সোতাপন্নাদিগোত্তাভিভৱনতো গোত্ৰভূতি অত্থো ৱেদিতব্বো. গোত্তত্থো চেত্থ বীজত্থো. ৱত্তনিপকৰণে কিৰ ৱুত্তং – গোত্তং ৱুচ্চতি নিব্বানং সব্বপৰিপন্থেহি গুত্তত্তা, তং পটিপজ্জতীতি গোত্ৰভূতি, অট্ঠ সমাপত্তিযোপি গোত্তং গোত্ৰভুপৰিপন্থেহি গুত্তত্তা, তং গোত্তং পটিপজ্জতীতি গোত্ৰভূতি ৱুত্তং. ‘‘চতুন্নং মগ্গানংযেৱ গোত্ৰভু নিব্বানাৰম্মণং, চতস্সন্নং ফলসমাপত্তীনং গোত্ৰভু সঙ্খাৰাৰম্মণং ফলসমাপত্তিনিন্নত্তা’’তি ৱদন্তি. ৱুত্তঞ্হেতং ৱিসুদ্ধিমগ্গে – ‘‘তস্স পৱত্তানুপুব্বৱিপস্সনস্স সঙ্খাৰাৰম্মণগোত্ৰভুঞাণানন্তৰং ফলসমাপত্তিৱসেন নিৰোধে চিত্তং অপ্পেতী’’তি (ৱিসুদ্ধি. ২.৮৬৩). তেনেৱেত্থ মগ্গৱাৰেসু সোড়সমং কত্ৱা গহিতস্স বহিদ্ধাসঙ্খাৰনিমিত্তপদস্স সমাপত্তিৱাৰেসু ছট্ঠং কত্ৱা গহণং ন কতন্তি ৱেদিতব্বং. ইতৰথা হি মূলপদগহণেন গহেতব্বং ভৱেয্য.

অঞ্ঞে পন ‘‘যো নিব্বানে পঠমাভোগো পঠমসমন্নাহাৰো, অযং ৱুচ্চতি গোত্ৰভূ’’তি ৱদন্তি. তং ফলং সন্ধায ন যুজ্জতি. পন্নৰস গোত্ৰভুধম্মা কুসলাতি এত্থ অৰহতো অভিভৱিতব্বনীৱৰণাভাৱতো ৱিতক্কৱিচাৰাদীনং সুখেনেৱ পহাতব্বভাৱতো চ অভিভৱনট্ঠেন গোত্ৰভুনামং নাৰহন্তীতি কত্ৱা গোত্ৰভূনং অব্যাকততা ন ৱুত্তাতি ৱেদিতব্বা. অৰহতা পন ফলসমাপত্তিং সমাপজ্জন্তেন সঙ্খাৰে অনভিভুয্য সমাপজ্জিতুং ন সক্কাতি ‘‘তযো গোত্ৰভুধম্মা অব্যাকতা’’তি ৱুত্তা. কেচি পন ‘‘অট্ঠ সমাপত্তিযো নিব্বেধভাগিযা এৱ ইধ নিদ্দিট্ঠা, তস্মা অট্ঠ সমাপত্তিগোত্ৰভূ কুসলা হোন্তী’’তি ৱদন্তি. তথা সঙ্খাৰুপেক্খাযপি ৱেদিতব্বং.

৬০. সামিসঞ্চাতিআদীসু ৱট্টামিসলোকামিসকিলেসামিসানং কিলেসামিসেন সামিসং সনিকন্তিকত্তা. কিং তং? অট্ঠৱিধং সমথগোত্ৰভুঞাণং. ৱট্টামিসন্তি চেত্থ তেভূমকৱট্টমেৱ. লোকামিসন্তি পঞ্চ কামগুণা. কিলেসামিসন্তি কিলেসা এৱ. নিৰামিসন্তি দসৱিধং ৱিপস্সনাগোত্ৰভুঞাণং অনিকন্তিকত্তা. ন হি অৰিযা গোত্ৰভুস্মিং নিকন্তিং কৰোন্তি. পোত্থকে ‘‘সামিসঞ্চে’’তি লিখন্তি, তং ন সুন্দৰতৰং. এৱমেৱ পণিহিতঞ্চ অপ্পণিহিতং সঞ্ঞুত্তঞ্চ ৱিসঞ্ঞুত্তং ৱুট্ঠিতঞ্চ অৱুট্ঠিতং ৱেদিতব্বং. নিকন্তিপণিধিযা হি পণিহিতং পত্থিতন্তি অত্থো. তদভাৱেন অপ্পণিহিতং. নিকন্তিসঞ্ঞোগেনেৱ সঞ্ঞুত্তং. তদভাৱেন ৱিসঞ্ঞুত্তং. ৱুট্ঠিতন্তি ৱিপস্সনাগোত্ৰভুঞাণমেৱ. তঞ্হি নিকন্তিচ্ছেদকত্তা ৱুট্ঠিতং নাম. ইতৰং অৱুট্ঠিতং. বহিদ্ধা ৱুট্ঠানত্তা ৱা ৱুট্ঠিতং. ফলগোত্ৰভুপি হি নিব্বানজ্ঝাসযৱসেন নিব্বানাভিমুখীভূতত্তা বহিদ্ধাসঙ্খাৰনিমিত্তা ৱুট্ঠিতং নামাতি ৱেদিতব্বং. হেট্ঠাভিভৱনৱুট্ঠানৱিৱট্টনৱাৰেসুপি ফলগোত্ৰভু অজ্ঝাসযৱসেন নিব্বানাভিমুখীভূতত্তা অভিভুয্যতি ৱুট্ঠাতি ৱিৱট্টতীতি ৱেদিতব্বং. তিণ্ণং ৱিমোক্খান পচ্চযাতি তিণ্ণং লোকুত্তৰৱিমোক্খানং সমথগোত্ৰভু পকতূপনিস্সযপচ্চযা হোন্তি, ৱিপস্সনাগোত্ৰভু অনন্তৰসমনন্তৰূপনিস্সযপচ্চযা হোন্তি. পঞ্ঞা যস্স পৰিচ্চিতাতি পুব্বভাগপঞ্ঞা যস্স পৰিচিতা পৰিচিণ্ণা. কুসলো ৱিৱট্টে ৱুট্ঠানেতি অসম্মোহৱসেনেৱ ৱিৱট্টসঙ্খাতে গোত্ৰভুঞাণে কুসলো ছেকো, পুব্বভাগঞাণেন ৱা কুসলো. নানাদিট্ঠীসু ন কম্পতীতি সমুচ্ছেদেন পহীনাসু নানপ্পকাৰাসু দিট্ঠীসু ন ৱেধতীতি.

গোত্ৰভুঞাণনিদ্দেসৱণ্ণনা নিট্ঠিতা.